كل دارٍ تضمك ليتها صدري وكل عينٍ تشوفك ليتها عيني

بارت 15

~ قسم عبدالمجيد والهنوف ~
عبدالمجيد : ابي افهم شي واحد بس ليه نطيتي ليه
الهنوف : شسوي طيب تبيني اجلس لحالي وكلهم برا
عبدالمجيد : اجلسي اي تجلسين ليه تبين تضرين نفسك وتضرين اللي ببطنك وش تبين يصير فيني لو صار لك شي
تبيني انجن واموت علميني وش تبين ؟
الهنوف : والله مو قصدي بس حاولت انزل بدون ما انط لكن فشلت محاولاتي ونطيت مابيدي غير هالحل
عبدالمجيد : حل ؟ هذا تسمينه حل ؟ هذا ابداً مو حل ولا راح يكون حل انتي بـ استهتارك وعدم الامبالاة كنتي كفيلة بأنك تنضرين وتضرين روح باقي ماجت عالدنيا
مافكرتي وش ممكن يصير فيني لو صار فيك شي لا سمح الله انا سعيت عشان نكون تحت سقف واحد ومايمسنا ضرر نعيش بسعادة وهنا لكن مدري شسوي فيك اتضايق ؟ بيقولون زوجته هي سبب ضيقته ازعل ؟ بيقولون متهاوشين هو وزوجته اتركك ؟ وش بيصير فيني وكيف بصبر من دونك اطنشك ؟ قلبي ماهو مطاوعني على تطنيشك اهجرك ؟ بروح وروحي بتبقى عندك وبين ضلوعك اضربك ؟ بطلع مو رجال قولي لي وش اسوي
الهنوف تنزلت دموعها من ردة فعل عبدالمجيد : عبدالمجيد تكفى سامحني والله ماعاد اسويها خلاص ما ابيك تشيل بخاطرك علي بيأكلني قلبي من تأنيب الضمير تكفى
عبدالمجيد : انا ماعمري شلت بخاطري عليك تبين الحين اشيل لا والله لو اموت ما اسويها بس تكفين وبـ أمانه الله لا تضرين نفسك والروح اللي بتجي قطعة منك
_______________________________
~ بيت ابو عبدالعزيز ~
نجوى : تفكرين في مين لك ساعة على هالحال
قوت : هلا قاعدة افكر باللي دافع عننا ليش سواها وهو مايعرفنا ولا لنا فيه صلة قرابة
نجوى : هذاك اللي لما كنا بالمول ؟
قوت : اي هو التفكير اكل قلبي صراحة
نجوى : طيب وش الفايدة من معرفتك ليش هو سواها
قوت : ياختي ابي ارتاح من بعد السالفة وانا بس افكر
نجوى : طيب عادي شافهم يتحرشون فينا ودافع عننا ممكن لو احد شافنا غيره بيسوي مثل ماسوا تماماً
قوت : مدري مدري احس فيه شي غريب بالموضوع ولا كيف سواها ولا يعرف حنا مين
نجوى : يابنتي هو واضح انه مو من الرياض اصلاً وعيب شخص يشوف ناس تتحرش ببنات ويمشون الموضوع وكأنهم مايشوفون
قوت : اي انا قلت اكيد مو من الرياض شكله شوي غريب ما اعرف كيف اشرح لك بس يارب فهمتي علي
نجوى : فهمت عليك فهمت بس خلي هالخرابيط عنك ونامي واتركي التفكير بالناس اللي ماله فايدة
قوت : طيب طيب خلاص اذا طلعتي قفلي الباب معاك
_______________________________
الصباح قدام بيت الشيخ صالح ~
ابو حاتم : لي عند ابوكم 200 الف ريال ادفعوها ولا بشتكيكم للشرطة سامعين انت وياه
ابو عابد : وانا لي عند ابوكم 3000 الاف ريال لو ماترجع لي هالايام والله ما اخليكم في حالكم تسمعون !!!
حسين : صلوا عالنبي يارجال المبالغ كبيرة علينا شلون بندفعها
ابو حاتم : ماهي مشكلتنا والله حقنا نبيه ادفعوه ولا بنشكيكم معكم مهلة شهر لو ما اندفع حقي كامل ياويلكم
ابو عابد : وانا مهلة 3 أسابيع ياويلكم لو ماتجيني
الشيخ نايف شافهم متجمعين : عسى ماشر وش فيه
ابو عابد : ابوهم اكل فلوسنا وما رجعها لنا نبيها
الشيخ نايف : استحى على وجهك انت وياه الشيب مالي روسكم ولحاكم وجايين تطالبون حقكم من رجالٍ تحت التراب
ابو حاتم : ما احد قال له مايدفعها والصراحة انا ابي حقي برمم بيتي تعبت وانا انتظر حقي يندفع
الشيخ نايف : تفوووو على هالوجيه اي والله عنبوكم ماتخافون الله انتم ؟ قلوبكم وشهي منه ؟ حجر ؟ انا بدفع لكم اللي تطلبونه منه الله يبيحه لكن من بعد هالسواة مالكم قعدة في هالديرة تضفون عفشكم وتذلفون براها
ابو عابد : بس ياشيخ مالك حق تطردنا من ديرتنا
الشيخ نايف : الا لي حق لي حق دام هذي سوايكم مع خلق الله الحيين والميتين انا شيخ هالديرة وانا اللي بطردكم منها ما احدٍ له كلمة بعد كلمتي يلا امشوا معي امشوا لا بارك الله فيكم ، ابوي حسين لا تشيلون هم دامني موجودٍ على هالدنيا اي شيٍ تطلبونه تبشرون به ان ضاقت عليكم الوسيعة تعالوا لي وابشروا باللي يرضيكم
حسين بـ ابتسامة حزن : ماتقصر ياعمي جزاك الله خير
_______________________________
~ بيت العم هزام ~
شريان : انتم وش تحسبون مالكم اهل مالكم اخوان تشاورونهم وش هالسواة ذي ؟
خزامي : شريان اللي صار صار خلاص لا تقعدون تحقوون وتهاوشون على شي قد صار
خالد : لا ياشيخة على الاقل انثبرتوا لين يجي احد وتستأذنون منه ولا قلتوا لـ امي ولا جدة منيرة
الجازي : ياخي خلاص اذا بتهاوشون هاوشوني انا خزامي مالها دخل انا اللي قلت لهم وانا اللي شرت عليهم نطلع
فيصل : خلاص خلاص روحوا داخل وانتم ياويل اللي يقرب لهم ولا يضايقهم الانسان ماهو معصوم عن الغلط كلنا نغلط ونعرف غلطنا ونصححه وش بتستفيدون الحين من هواشكم غير انكم صدمتوهم باللي سويتوه معهم تبونهم يكرهونكم ولا وش
شريان : فيصل بالله ذي سواة يسوونها لو شافهم احد وراح قال لـ جدي ساعتها لا انا ولا انت ولا حتى خالد بنقدر نوقفه عن اللي بيصير
فيصل : طيب واذا شافوهم وش دخلهم دامهم ماسووا شي غلط وجالسين حالهم حال انفسهم ما احد يحق له يتكلم بحرف واحد اعتذروا لهم قدامي يلا
شريان : انا اسف ماكان قصدي لكن والله من خوفي عليكم
خالد : وانا بعد اسف
الجازي : ماله داعي تتأسفون عارفين بغلطنا وانها ساعة غضب وما احد بيقدر يمسك نفسه
خزامي : فعلاً لكن حابة اخليكم تفهمون نقطة بس حنا مهما سوينا ومهما طلعنا عن شوركم نبقى خواتكم ستركم وغطاكم نكتم اسراركم نشيل همومكم نسايركم نداريكم نحطكم فوق روسنا لكن لا يجي يوم تسوون فينا كذا وتعصبون علينا عشان شي مو غلط وبس اتمنى تفهموني يلا يـ الجازي امشي
فيصل : سمعتوا كلام خواتكم اللي كنتوا طايرين فيهم هواش شفتوا انهم عارفين الصح من الغلط
_______________________________
~ بيت الشيخ سعد ~
رهف : وش رايكم نطلع نتمشى بالسوق والله طفشت من قعدة البيت
سديم : فكرة حلوة لكن منين نجيب الفلوس مافيه تمشية بدون شراء
ام راكان : وهو لازم شراء مو لازم اهم شي توسعة الصدر والخاطر
سديم : اي لازم من زمان مانزلنا للسوق لازم نشتري شي
راكان : قوموا البسوا بننزل واشتروا كل اللي نفسكم فيه مايجي بخاطركم شي ونسكت ونخليه
ام راكان : من وين جبت الفلوس
راكان : جبتها
ام راكان : لا تكون بس سارقها والله يـ راكان
راكان : اذكري الله يمه هذي الفلوس من حلالنا اغلب حلال ابوي خذيته وعقبال الباقي
رهف : احلف قول والله !
راكان : والله
رهف : الله وناسسسسه اخذنا حلالنا ياربي ياربي بطير من الفرحة
ام راكان بضحكة : شوي شوي يابنتي لا تطيحين
سديم : والله والله ما اخلي شي بخاطري بشتري السوق كله
راكان : حلالك يلا يمه قومي البسي عباتك يلا
ام راكان : يلا احترنا هنا لين نلبس ونجيك
راكان : يلا بس لا تبطون ترا بسحب عليكم
سديم : لا وش تسحب علينا طيران نلبس ونجي
راكان : هههههههههههههههههه طيب اعجلوا مع السوالف بيروح الوقت يلا روحوا