~ بيت ابو ناجي ~
ابو أدهم : السلام عليكم
ابو ناجي : وعليكم السلام
ابو سرور : ياهلا بـ ابو ناجي
ابو ناجي : لا هلا ولا مرحبا ياقليلين الحياء انت وياه
ابو أدهم : افا ليه وش حنا مسوين لك يوم انك تقول هالكلام
ابو ناجي : تجون تخطبون بنتي لـ عيالكم وهم يتكلمون عن عرضي في السوق ماتستحون انتم ؟؟؟؟
ابو سرور : وش العلم وراك تذب نغزات نلقط منك الكلام يعني قل اللي عندك عيالنا وشهم مسوين
ابو ناجي : ماعرفتوا تربونهم يقولون عن بنتي ان فيها علة وانها تعيي عن الخطاطيب اللي يجونها عشان علتها وانا ادري واتستر عليها بالله عليك انت وياه ذي تربية تربونها عيالكم
ابو سرور : ولدي مايسويها ولا له في هالكلام ابد
ابو أدهم : وش قصدك يعني ولدي هو اللي قال هالكلام
ابو سرور : مايندرى لكن ولدي واعرف وش انا مربي
ناجي : والله ما اردى من أدهم الا ولدك كلهم فالردى ماشين لا تقعدون تدافعون عنهم عند الغلط واذا ما ربيتوهم انا والشرطة نربيهم
ابو ناجي : ياقليلين الحياء والخاتمة هذا كبركم ولا عرفتوا تربون بزران وتعلمونهم الصح من الغلط وان اعراض الناس ماهي للطقطقة ويلا اذلف انت وياه ولا عاد توروني وجيهكم ومالكم عندنا نصيب اذلفوا لا بارك الله بكم وفي عيالكم خسيسين
ابو أدهم : قدها يوم تقول لنا هالكلام !!
ابو ناجي : ايه قدها وقدود وش تحسبني انت اقول كلام واتراجع عنه مثلك ولا اطلب السماح مثل هاللي جنبك ذا
ابو سرور : حدك عاد قلنا يغلط على عيالنا ونربيهم لكن تغلط علينا ليه من انت
ابو ناجي : تاج على روسكم يلا اذلفوا برا بيتي يلا طلعهم ياناجي لا عاد اشوفهم يوطوطون عندي
ناجي : يلا يلا جاكم ماكفاكم اذلفوا برا
______________________________
~ الرياض ~
الضابط : شسم الهارب ؟
باسل : بلال محمود
الضابط : وش سبب البلاغ
باسل : قاتل
الضابط : كيف ؟
باسل : مثل ماسمعت ياحضرة الضابط قاتل وجايين نبلغ عنه
الضابط : قاتل مين وش تقربون للمقتول ؟
باسل : عياله
الضابط : عظم الله اجركم والله يرحمه
باسل : جزاك الله خير
الضابط : لازم نسوي بعض الإجراءات بحق القاتل والمقتول وبعدها نرفع البلاغ
باسل : ماعندك مشكلة بس ياليت الموضوع مايطول
الضابط : لا ان شاء الله اذا تعاونتوا معي وعطيتوني المعلومات الكافية ماراح يطول الموضوع
حسين : متى بيرفع البلاغ وتبدا رحلة البحث عنه
الضابط : البلاغ اليوم بعد ما أتخذ الإجراءات الكافية وتبدا رحلة البحث عن القاتل
حسين : يارب تلقونه للحين في قلبي نار ماطفت
الضابط : استهدوا بالله وماراح يصير شي الا ويرضيكم ياليت تطلعون وتخلون باسل لحاله لـ أتخاذ الإجراءات
عبيد : ان شاء الله يلا ياعيال مشينا برا
الضابط : اول شي ياباسل وين كنت هذيك الليلة
باسل : في بيتي وكنت رايح اتطمن عليهم وصلت البيت وسمعت صراخ الاهل ودخلت اشوف وطلع ابوي مقتول
الضابط : طيب هل كان بين ابوك المرحوم والعامل شي
باسل : مثل وش ياحضرة الضابط مافهمت عليك
الضابط : كان يحصل بينهم مشاكل كثيرة كان ابوك يرفع يده عليه
باسل : لا ابد ابوي مايمد يده لكن انه عصبي وشديد شوي
الضابط : اها طيب يعرف ابوك من قبل ؟
باسل : والله ياحضرة الضابط ماعندي علم في هالشيء لكن اغلب الظن لا لأني يوم جبته سألني كثير وهالعادة ماهي عنده الا اذا جاء عامل يشتغل عندنا
الضابط وهو يقلب بالاوراق : طيب اطلع وناد لي أحد اخوانك
باسل : سم ابشر
______________________________
~ بيت الديرة ~
قوت : الله يفشلكم ليش خليتونا نطلع عاجبكم اللي صار
جنى : استحيت حتى ماقدرت ارد عليهم هم ماشاءالله ما أحس انهم ينحرجون مثلنا عشان كذا قلت خلونا نرجع
قوت : واذا عرفوا اهلينا اننا رجعنا ولا جدهم عرف وش بيصير فينا عاد انتي سمعتي عمي شقال وابوي شقال
جنى : ياختي ابي ارتاح شوي بعدين هالشيء راجع لي مو مرتاحة عندهم احس بأحراج يسولفون واحنا ساكتين ونسمع لهم قلت خلنا نرجع احسن من هالاحراج
نجوى بتعب : زين سويتي لاني احس بتعب ولا لي خلق
قوت : ايش فيك ملاحظة من لما كنا هناك
نجوى : تعب خفيف وان شاء الله بطيب
جنى : لو عبدالمحسن هنا شالك وركض فيك للمستشفى
نجوى : شدعوة تعب خفيف مايحتاج مستشفى
قوت : جيتي عند روميو حقها صدق لو هو موجود كان صرعنا وغصب بيوديها للمستشفى
جنى : حدك عاد كل شي الا حسوني ما ارضى عليه
نجوى : ويع مو لايق عليه دلع حسوني ويع صدق
جنى : قدها ؟ وربي ان يعرف في هالكلام هين اصبري بس
نجوى : قولي له وشو يعني على بالك بخاف يعني ولا ايش
جنى : لا ابد بس بنشوف هو ايش يقول عن هالكلام
قوت : حساس ترا على طول بيصيح او بيزعل انتبهي ها
نجوى : اي على خير انا اعرف شسوي وكيف اراضيه مع اني ما اعتقد بيزعل مني
______________________________
~ بيت ابو راضي ~
راضي : تكفى يبه انا طالبك انك ماترفض هالمره تكفى
ووعد مني اني اسوي اي شي تبيه مقابل موافقتك على زواجي من بنت ابو ناجي
ابو راضي : اي شي اي شي ماتقول لا لو مهما كان ؟
راضي : ايه وعد مني ما اقول لا مهما كان
ابو راضي : رجع نوف وخذها
راضي : يبه نوف جاها النصيب والله يستر عليها شف لك غير هالطلب تكفى
ابو راضي : ايه ماشاءالله الله يستر عليها ويحفظها اجل اسمع انا بوافق لكن بشرط وتنفذه
راضي : انا موافق وشهو شرطك قله
ابو راضي : انك ماتجيبها عندي للبيت بأجر لك بيت وتسكن فيه غير البيت اللي كنت فيه وانباع
راضي : يبه شلون اخليكم انت وامي اسمع انا عندي راي احسن من هالراي واذا وافقت كان بها واذا رفضت ابشر استجر بيت واسكن فيه
ابو راضي : وشهو رايك
راضي : اجيبها للبيت هنا واسكنها فالدور الثاني وانت وامي فالدور الارضي لا هي تجيكم ولا انت تشوفها وش قلت عشاني ما اقدر اخليكم اكثر من هالمدة
ابو راضي : تم انا موافق دامني ماني شايفها
راضي طار من الفرحة : الله لا يحرمني اياك يارب
______________________________
~ بيت الشيخ سعد ~
ام راكان : انا بروح لـ خالتكم سارة
رهف : خذينا معك يمه
سديم : ايه يمه
ام راكان : يلا قوموا البسوا
راكان بصوت عالي : يمه يايمه وينك
ام راكان : انا في ذا تعال
راكان بتعب : يمه الحقي الحقي
ام راكان : بسم الله وش فيه
راكان : خالة سارة يايمه
ام راكان : وش فيها
راكان : تعبانة يقولون انهم عرفوا من هو قاتل عمي والعيال راحوا يدورونه ويبلغون عنه والظاهر انها تعبت عليهم جتني قبل شوي بنتها تبيك
ام راكان : ياحسرتي يلا يلا امش قدامي امش
رهف : احنا بنلبس ونجي بنروح عند البنات
راكان : طيبب يلا بسرعة اعجلوا بسرعة
رهف : طيب انتظر شوي
راكان : اخلصوا بسرعة لا تطولون
ام راكان : عرفت منهو قاتل عمك ياراكان
راكان : لا والله ماقالت لي جت خلود قبل شوي تصيح تبيك تجين وراحت ماقالت لي منهو
ام راكان : ياحسرتي عليها ياحسرتي يارب انك تستر وتلطف فينا يارب
راكان بصراخ : يلا يابناتتت بسرعة انزلووا
سديم : جينا جينا بسم الله
ام راكان : يلا امشوا يلا يارب يارب
______________________________
~ نجوى وعبدالمحسن ~
عبدالمحسن : سمعت انك تقولين عني ويع
نجوى : اي ويع
عبدالمحسن بصدمة : انا ويع
نجوى : من دلعك والله وش هالدلع الخايس طوا وعرض واخر شي تقول لك جنى حسوني
عبدالمحسن ضحك : ههههههههههههه اي يحق لها مالا يحق لـ غيرها وبعدين انا عاجبني الدلع
نجوى بضحكة : ويع صدق ويع وش هالدلع الله يقرفكم انت وياها ويخلف عليكم
عبدالمحسن : انتي وش حارق قلبك انا واختي كيفنا مني لها شعليك
نجوى بطرف عين : اجل خلها تنفعك فارقني
راحت وسحبها عبدالمحسن بضحكة وحضنها : اموت على اللي يغارون والله
نجوى : ماغرت ولا شي وبعدين مافيكم شي يستحق الغيرة
عبدالمحسن : متأكدة ؟
نجوى : اي متأكدة
عبدالمحسن : اوكيه براحتك انا بروح لها اسولف معاها تبغين شي ؟
نجوى ضربته على صدره : وجع خير
عبدالمحسن ضحك : هههههههههههه لا عاد تسوين فيها انا اللي ما اغار ولا يهمني شي
نجوى : زين زين
عبدالمحسن : طيب قربي شفيك بعدتي عني
نجوى بتعب : أهخ ، ولا شي كذا بس ما ابغى
عبدالمحسن : شفيك ياقلبي
نجوى : هاه ولا شي
عبدالمحسن : ايش اللي ولا شي شفيك
نجوى : مافيني شي تعب بسيط بس
عبدالمحسن : ولا قلتي لي !
نجوى : مايستاهل اقول لك تعب بسيط وبيخف ، أهخ ياربي ياربي
عبدالمحسن : نجوى وش اللي تعب بسيط شوي وبتموتين ، صرخ عبدالمحسن بعد ماشاف نجوى زاد تعبها : يمه ياخالة تعالوووووا بسرررعة
نجوى : تكفى ياعبدالمحسن اسكت تكفى
عبدالمحسن : اسكت ليش وش فيك انتي ؟؟؟
نجوى : ما أقدر اقول لكم ايش فيني تكفى اسكت ما ابغاهم يدرون عن مرضي
عبدالمحسن بصدمة : مرض ؟ مرض ايش يانجوى تكلمي لا تخوفيني عليك تكلمي
نجوى بتعب قوي : أهخ أهخ ياربي
عبدالمحسن بصراخ : يممممه الحقيييي
ام عبدالمحسن جت تركض ووراها ام عبدالعزيز : وش صاير شفيكم
عبدالمحسن : نجوى يمه تعبانة
ام عبدالعزيز : ايش ، يمه نجوى شفيك تكلمي ياقلبي
نجوى : الحقي علي يمه تكفين بموت تكفين
ام عبدالعزيز : نجوى حبيبتي صحصحي معاي قولي لي شفيك ياحبيبتي
مسكها عبدالمحسن يهزها : نجوى قلبي تسمعيني
ام عبدالعزيز : روح ياعبدالمحسن شوف ابوها بسررررعة
عبدالمحسن : بعدي ياخالة بشيلها بوديها المستشفى بعدي البنت تعبانة ولا هي قادرة تردددد علللليييي
وانا بموت من الخوف والقلق عليها
ام عبدالعزيز : طيب طيب بس بشويش عليها
عبدالمحسن : ماعليك ياخالة بعيوني بعدي بس
______________________________
~ بيت العم علي ~
"قسم عبدالمجيد والهنوف"
الهنوف : وش رايك تقوم تجيب لي برتقال
عبدالمجيد : وش تبين به
الهنوف : بأكله متوحمة عليه
عبدالمجيد : وهالكراتين ذي اللي كليتها قبل شوي ماكفتك ؟
الهنوف : بتقعد تذلني الحين وبعدين انا ماطلبت شي هاللي ببطني هو اللي يطلب يلا قم جب لي برتقال
عبدالمجيد : بعدين بعدين الحين تعبان برقد
الهنوف ضربته بالمخدة : قم اخلص علي
عبدالمجيد : وجع احد قايل لك اني مفرط في راسي ؟
الهنوف : قم ولا بيجيك اللي اردى من هالمخدة قم
عبدالمجيد : يليل الليل انا وش خلاني اخطي هالخطوة زين زين بقوم بس شيلي هالكراتين ذي
الهنوف : حامل ما أقدر شيلها انت بدربك انت رايح برا شلها معك مره وحده وافتح الدريشة بعد
عبدالمجيد : لا حول لله يارب صبرك وعفوك طيب اي أوامر ثانية طال عمرك
الهنوف بضحكة : سلامتك بس جيب البرتقال وكولا بارد
عبدالمجيد منصدم من وحامها الغريب : وش ذا الوحام الغريب مره ببسي مع ثلج وملح والحين برتقال وكولا
الهنوف : شسوي بعد حامل تحملني فترة هـ الاربع شهور بس وخلاص بتنعتق رقبتك بعدها
عبدالمجيد تأفف : ياررربيييه بس
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
