كل دارٍ تضمك ليتها صدري وكل عينٍ تشوفك ليتها عيني

بارت 16

~ بيت ابو عبدالعزيز ~
ابو عبدالمحسن : اسمع يـ عبدالإله جانا شغل فالديرة ولازم نروح هناك اليوم او بكره
ابو عبدالعزيز : وشو شغله اللي طلع لنا فجأة
ابو عبدالمحسن : يخص محلاتنا التجارية وهالامور لازم نطلع للديرة خلال هاليومين وخذ اهلك معك
ابو عبدالعريز : طيب طيب بسكر الحين واشوف وش يصير معي واقول لك
ام عبدالعزيز : وش فيه
ابو عبدالعزيز : اخوي يقول طلع لنا شغل فالديرة ولازم نروح خلال هاليومين
ام عبدالعزيز : طيب تعرفون احد هناك لكم معارف ولا اخوياء
ابو عبدالعزيز : لا والله مالنا ولا نعرف لكن بنسأل عن سكن والله ييسر الامور واي لازم اخذكم معي
عبدالعزيز : وشو له تأخذهم خلهم وانا وانت اللي نروح
ابو عبدالعزيز : ما اقدر لازم كلهم معنا يمكن هالشغل يطول ويأخذ فترة نبيهم منها يريحونا ومنها انا اتطمن عليهم
قوت : شسالفة على وين رايحين
ام عبدالعزيز : الديرة يابنتي
قوت توسعت عيونها بصدمة : اييش اييش ؟ لا تكفون ما ابي
عبدالعزيز : مو على كيفك ياماما ابوي قال كلنا يعني كلنا
قوت تأففت : اسكت بس اف ياربي ما ابي تكفى يبه لا نروح هناك الحياة هناك ابد مو حلوة
ابو عبدالعزيز : ما اقدر يابابا وبعدين انتي ماقد رحتي هناك ليش تحكمين عليها وانتي مابعد شفتيها
قوت : والله يبه صديقاتي كلهم راحوا هناك ويقولون ابد الحياة هناك مو حلوة كئيبة وكلها عادات وتقاليد سيئة
عبدالعزيز : والله ما احد خربك غير بنات بليس ذول
قوت : عدال ياللي كل اخوياك مطاوعة اسكت بس
_______________________________
~ بيت العم طلال ~
ابو نايف : ماودك تعرس وانا ابوك
غزاي : ليه تبي فرقاي مسرع انفقعت كبدك مني
ابو نايف ضحك : لا ياولدي ماهو بقصدي اني طفشت منك لكن اللي بعمرك عندهم عيال وعيالهم طولهم
غزاي : يبه من ذي اللي بترضى فيني وانا متصاوب وامشي على عكاز مدري هو انا بطيّب ولا بستمر على هالحال
نايف : اذكر الله ياغزاي وش هالكلام مايصلح تقول كذا وانت ان شاء الله انك بتطيّب لا تفأول على عمرك ان شاء الله بتعرس ويجي لك عيال وحياتك بتصير بأحسن حال
ابو نايف : نايف صادق وانت مايعيبك شي وانا ابوك ايأك تفكر ان هالاصابة هي عقوكك وان ما احد بيقبل فيك انت كفاية انك ضحيت بعمرك لجل الوطن وعياله
بدران : انت فخر بنسبة للكل لا تفكر انك بيوم من الايام مانتب معرس ولا انك بتتشافى وعمر المرض ماكان للمضحكة والاستهزاء انت بطل وسويت أشياء عمر الانسان مايسويها تفأل بالخير واترك عنك هالسلبيات
غزاي : والله مدري شقول لكن على هواك واللي تشوفه
ابو نايف : ايه هذا الكلام الزين واللي يستأهل نسمعه نايف وانا ابوك نط ناد امك نط
نايف : ابشر وعلى هالخشم الحين اروح لها ركض
ابو نايف : يلا يلا اعجل وانا ابوك
نايف طلع يركض : يييمممه وينك عندي لك بشارة
_______________________________
~ بيت الشيخ صالح ~
حسين : عدو ابوي يسوي معنا كذا ويطرد الديانة من الديرة عشاننا ؟ حنا اللي كان ابوي يحلفنا مانقرب له ولا حتى نرد له السلام !
الجدة سارة : جزاه الله خير وجعلها في ميزان حسناته تراه طيب وحنون والكل يحبه محبوب ووجهه بشوش لا يغركم كلام ابوكم الله يرحمه عنه
فهد : وشلون يعني ؟
الجدة سارة : يافهد ياحبيبي نايف تراه عكس كلام ابوكم والدليل اللي سواه اليوم وفكنا من الديانة وسددهم وهو عدوه
حسين : عمري ماتوقعت انه كذا وانه فعلاً يحب الخير ومايرضى على الناس اللي يعرفهم حتى ولو كانوا له اعداء
فهد : ولا انا توقعت صدمني صدمة عمري هذا اللي ابوي يقول عنه حسود وحقود ولا يحب الا نفسه يالله يالله
الجدة سارة : ياعيالي ابوكم في حياته الله يرحمه ويغفر له ان شاء الله ويسامحه كان يظلم الناس يظلمهم كثير ومن هالناس هو نايف اللي فزع له بعد مماته وفكه من دعاوي الديانة الناس لها حوبة ولا بد اللي صار من دعاهم
سلوى : وانا كنت دايماً اسأل نفسي ليش ابوي كان يحذرني انا والبنات مانشوف بناتهم ولا نروح مناسبات هم معزومين عليها اخر شي يطلع من ابوي كل ذا !!!
خلود : ما اقدر اصدق ما اقدر ابوي يطلع ظالم كيف ووشلون
الجدة سارة : ابوك ظالم اخوه وعياله وظلم الناس واكل حقوقهم
بشاير : عمي وعياله شدخلهم
الجدة سارة : ابوك اول من ظلم ظلم اخوه وعياله واكل ورثهم وحقهم ومن بعدها كل هالناس
حسين بصدمة : كان يقولها راكان وانه اغلب هالحلال لـ عمي ولهم لكن ماكنا نصدقه ونقول لـ ابوي ويقول كذاب لاتصدقونه
الجدة سارة : هاه شفتوا ابدا الناس ماكانت تكذب بشيء يخصها وانا شاهدة على كل شي يقولونه
سكتوا منصدمين من ابوهم وليش يسوي مع الناس كذا مو مستوعبين ان ابوهم يطلع كذا
_______________________________
~ مجلس الشيخ نايف ~
الشيخ نايف : هاه يـ اخوي عساكم بتطولون عندنا
ابو جمعان : والله يمكن نجلس هالاسبوعين وبعدها ماشين للخبر
الشيخ نايف : افا وليه وراك يـ اخوي
ابو جمعان : والله هالاشغال ووظيفة هالبنت والدراسة
الشيخ نايف : ايه الله يعين والله اننا فرحنا بجيتكم وماودنا انكم ترجعون بتضيق صدورنا ومالنا ونيس
ابو جمعان : اجل انا اللي ودي والله ماودي افارق هالديرة واهلها واللي فيها لكن الاشغال هي العوق وانا اخوك
الشيخ نايف : الله يعين وييسر
ابو جمعان : امين ، الا انت وش سويت مع ابو حاتم وابو عابد وراك عليهم
الشيخ نايف : الله لا يبارك بهم ولا يردهم اي والله قليلين الحياء والمروة
ابو جمعان : عسى ماشر وش هم مسوين
الشيخ نايف : رايحين لـ بيت صالح يطالبون عياله بفلوسهم اللي ماخذها منهم صالح انت تخبر بعد موت المتدين يطالب الديان بفلوسه مايسامحه بها ويجعلها صدقةٍ له ولـ اهل بيته ؟
ابو جمعان : لا بارك الله بالعدو سود الله وجيههم فشلونا مع الجماعة ماخبرت هالعلم والسواة نسويها ابد
الشيخ نايف : وانا عشاننا مانسويها ولا نرضاها قلعتهم من الديرة ماعاد نبي لهم شوف قليلين الحياء
ابو جمعان : زين ماسويت وانا اخوك فشلونا بين الناس وفالجماعة الله يفشلهم ولا يبارك بهم
_______________________________
~ بيت ابو عبدالمحسن ~
ابو عبدالمحسن : يانادية ياعيال وينكم
ام عبدالمحسن : وش فيك يابندر صاير شي
ابو عبدالمحسن : جهزوا الاغراض بنمشي للديرة بعد شوي عندنا شغل مهم يلا
عبدالمحسن : شغل ؟ وفالديرة ؟ وش ذا الشغل اللي طلع فجأة
ابو عبدالمحسن : والله اني محتار كيف طلع لنا شغل فالديرة لكن ماعلينا اهم شي جهزوا الاغراض وكل شي بنمشي للديرة ان شاء الله احنا واخوي عبدالإله واهله
ام عبدالمحسن : طيب كيف بنروح هناك وحنا مانعرف احد ولا لكم قرايب هناك
ابو عبدالمحسن : يابنت الحلال بيحلها ربك ان شاء الله يلا روحي انتي وجنى جهزوا الاغراض وانا وعبدالمحسن بنروح نشيك عالسيارة ونجيب اغراض للطريق
جنى : ان شاء الله بس عادي تجيبون لي اغراض احبها من البقالة دامكم طالعين
ابو عبدالمحسن : امري ياقلبي وش اللي ودك فيه
عبدالمحسن : وش تبين نجيب لك
جنى : برسلها عالواتس وجيبوها
ابو عبدالمحسن : لا يكون كثيره ومضرة بالصحة !
جنى بضحكة : ههههههههه لا لا بس ابغاها مو مضرة
ابو عبدالمحسن : اي اشوا الحمدالله خلاص ارسليها نجيبها
جنى : يلا الحين برسلها لـ عبدالمحسن
عبدالمحسن : لا تكفين الا انا
جنى ضحكت : هههههههه ارسلتها ياحلو
عبدالمحسن : يارب صبرك وعفوك والرضى خلاص امري لله بجيبها مالي الا انتي مابخليها بخاطرك
_______________________________
~ بالليل وأجواء الديرة ~
ابو عبدالعزيز : الحين من وين ندور لنا سكن نجلس فيه
ابو عبدالمحسن : والله مدري شكل مافيه الا بيوت إيجار مافيه فنادق سكنية
ابو عبدالعزيز : الديرة مافيها فنادق كلها بيوت ومحلات تجارية وأسواق قديمة تقريبًا فيها كل شي الا الفنادق
ابو عبدالمحسن : قد زرتها انت عندك علم فيها
ابو عبدالعزيز : لا والله لكن اسمع فيها وانا ماقد زرتها
عبدالمحسن : طيب يبه شوف هالبيت مكتوب عليه مركز ال سلمان يمكن هم ذولي اهل الديرة خلونا نسألهم
ابو عبدالمحسن : اي والله خلونا ننزل نشوف
ابو عبدالعزيز : يلا توكلنا على الله انتم خلوكم بالسيارة مع الاهل لين نرجع
عبدالعزيز : خلاص ابشر ان شاء الله
راحوا ابو عبدالمحسن وابو عبدالعزيز يدقون الباب
الشيخ نايف : شريان رح شف من عند الباب
شريان : ابشر
ابو عبدالمحسن : السلام عليكم
شريان : وعليكم السلام يامرحبا والله
~ بالسيارة وصدمة قوت ~
قوت : هذا هو هذا
ام عبدالعزيز : شفيك يابنتي وش فيه
قوت : يمه هذا هذا اللي دافع عننا لما كنا قدام المول هذا
ام عبدالعزيز رفعت طرحتها تشوف : اي والله هذا هو
عبدالعزيز : انتي متأكدة انه هو ؟؟؟
قوت : اي وربي متأكدة هذا هو بشحمه ولحمه
نزل عبدالعزيز يركض ونزل وراه عبدالمحسن : يبه
ابو عبدالعزيز : وش فيك صاير شي للاهل ؟
عبدالعزيز : لا مو صاير شي بس اختي تقول ان هذا اللي دافع عنهم بشحمه ولحمه
شريان بصدمة : نعم !
ابو عبدالعزيز : تقوله صادق
عبدالعزيز : اي والله
عبدالمحسن : صلو عالنبي ياجماعة لخمتوا الرجال خلوني اشرح له اخوي انت رحت الرياض قبل فترة ؟
شريان بأستغراب : الله الله
عبدالمحسن : الله عليك طيب وانت شفت حريم يتعرضون لهم شباب ودافعت عنهم !
شريان : اي نعم ليه وش فيه من انتم
عبدالمحسن : اي خلاص ياعمي هذا هو
ابو عبدالعزيز : اللي انت دافعت عنهم ذولي اهلي وجزاك الله الف خير ماقصرت وش هالصدفة اللي احسن من الف ميعاد
شريان أستوعب بعد ماجاه مغص ببطنه : اييه ياهلا ومرحبا والله حياكم الله تفضلوا ، ضيوف ياجدي ضيوف
وقف الشيخ نايف واخوه ابو جمعان وعيالهم : يالله حيهم قلطهم بصدر المجلس قلطهم
ابو عبدالمحسن : السلام عليكم
الشيخ نايف : وعليكم السلام اقلطوا
ابو عبدالمحسن : ابقاك الله
ابو جمعان : شكلكم ما انتم من الديرة
ابو عبدالعزيز : لا والله ما احنا من الديرة حنا من الرياض ولنا شغل هنا وقاعدين ندور سكن ومحلاها صدفة اللي جمعتني بولدكم اللي دافع عن اهلي وحمى عرضي ياجعلكم ماتشوفون فيه الا اللي يسر خاطركم
الشيخ نايف : ياهلا والله ومرحبا فيكم تدورون سكن وبيتي مفتوح الليلة قعدتكم عندنا
ابو عبدالمحسن : جعله بيتٍ عامر بـ اهله والله مانقدر الاهل معنا ولا هالفرصة اللي جمعتنا بكم ماتتفوت
الشيخ نايف : على هواكم لكن قدام بيتي بيتٍ لي أجار وخالي مابه احد وان قاله الله انتم ساكنين فيه لين يخلص شغلكم ووالله مايجيني منكم ريال
ابو عبدالعزيز : ماقصرت واذكر الله يارجال البيت مثل ماتقول أجار واعتبرنا مأجرين وخذ الاجار
الشيخ نايف : انا حلفت والله والله مايجيني ريال قولوا تم
ابو عبدالعزيز : تم جزاك الله خير ماقصرت فيك الخير والله
الشيخ نايف : شريان انت وبدران خذوا المفتاح وروحوا افتحوا البيت خلو اهل الجماعة يرتاحون وانت يانايف رح داخل قل لهم يجهزون العشاء
ابو عبدالمحسن : لا والله ماتقصرون تعبانين وودنا نرتاح
الشيخ نايف : على هواكم
بدران : ابشر حياكم ياجماعة
ابو عبدالمحسن : تمسوا على خير وجزاكم الله خير