~ بيت الشيخ صالح ~
الشيخ نايف بصوته العالي : السلام عليكم
الكل بصدمة : وعليكم السلام
الشيخ نايف تقدم لـ عيال الشيخ صالح : عظم الله اجركم
باسل : اجرنا واجرك وجزاك الله خير
العيال : الله يرحمه ويغفر له
باسل : جزاكم الله خير
قاموا العيال اول ما شافوا راكان داخل : وش جابك انت
راكان : جاي اعزي وش اللي وش جابني ناسين انه عمي ؟
حسين : لا مانسينا انت ماجيته وهو حي وجاي تبي تعزي بوفاته عشان تحرق قلوبنا
راكان : احرق قلوبكم ؟ انا ؟ ليش احرق قلوبكم في عمي انا لـ اني مثلكم ولا مثل عمي الله يرحمه ماني قاسي القلب
فهد : مانبي لك تعزية ولا حتى سلام ما استبعد انك انت اللي قاتله وجاي تمشي بجنازته
راكان : لا عاد اتهمتوني في اشياء كثير مالي فيها وهالمره تهمة اني قاتل عمي ياخي وش انتم ؟؟؟؟ عموماً عظم الله اجركم والله يغفر له ، طلع وهو متضايق حيييل
الشيخ نايف : اذكروا الله وادحروا الشيطان تراكم في عزاء ابوكم مايصير تسوون كذا مع المعزين هو جاي يعزي ولو انه قاتله ماكان شفتوه جاء وعزاكم
باسل اللي كان ساكت راح لـ اخوانه : خلاص ياعيال خلاص ترانا في عزاء والكل جاي لا تسببون لنا فضيحة
_______________________________
~ بيت ابو عبدالعزيز ~
ابو عبدالعزيز : وشوو وش تقولين انتي من هالكلب اللي تعرض لكم ولمس بنتي مييين
ام عبدالعزيز : مدري مانعرفه بس فيه ولد جزاه الله خير دافع عننا
عبدالعزيز : ولييه ما اتصلتوا علي لييه
ابو عبدالعزيز : مين اللي دافع عنكم ذا وكيف شافكم
ام عبدالعزيز : واحد جزاه الله خير وواضح انه مو من الرياض
عبدالعزيز : طيب اللي تحرش فيكم ماعرفتوا اسمه او شكله
قوت : الا اعرف شكله بس ما اعرف اسمه
عبدالعزيز : حلو نقدر نبلغ عليه من مواصفاته
ام عبدالعزيز : ماله داعي البلاغ ابداً خلاص شريان اخذ حقنا وزيادة بعد
عبدالعزيز : شريان من ذا ؟
ام عبدالعزيز : اللي دافع عننا واخذ حق اختك من هالقذر
ابو عبدالعزيز : تعرفونه ؟
ام عبدالعزيز : لا والله مانعرفه واول مره نشوفه بس سمعت خويه يقول له شريان
عبدالعزيز : وش تبي فيه يبه
ابو عبدالعزيز : نشكره على اللي سواه من اجل امك وخواتك
عبدالعزيز : اي والله يستحق الشكر بس خسارة مانعرفه
ابو عبدالعزيز : يلا الله يجزاه خير ما قصر
_______________________________
~ بيت ابو عبدالمحسن ~
جنى : وينك انت من الصباح مو موجود
عبدالمحسن : بالمول اشتري اغراض ليش وش صاير
جنى : مو صاير شي بس اشتقت اجلس معاك ونسولف
عبدالمحسن : ياحبيبتي انتي خلاص ابشري تعالي نجلس
جنى : وش شاري ليش ماجبت لي
عبدالمحسن : تبين ثوب وشماغ ؟
جنى ضحكت : ههههههههههههه سخيف ابي هدية لو حلاو مصاص راضيه اهم شي حسسني اني اختك وشي غالي عليك
عبدالمحسن : انتي اغلى من روحي وانتي هدية من ربي لي وش هالكلام ما ابي اسمعه مره ثانية
جنى : امزح معاك شدعوة تكفى قول لي قصايد
عبدالمحسن : تبينها فيك ولا عامة
جنى : عادي مو شرط بس ابي اسمع قصايد
عبدالمحسن : من عيوني
جنى : تسلم عيونك
عبدالمحسن :
ودك تحطه فالعيون من العيون
وتبسط على رمضى الثرا يمناك له
وتظله من الشمس في ظل الجفون
ولا يمر أذنه سوا لباك له
جنى : الله الله ياحظي فيك ياحظي
عبدالمحسن : والله انا اللي ياحظي يوم انك اختي
جنى : ياحبيبي ، اسمع شرايك نطلع نتمشى والله ضايق خلقي من البيت
عبدالمحسن : وين تبين نروح المكان اللي خاطرك فيه قولي ابيه وانا اقول تم وابشري وحاضرين
جنى : ياحظي فيك والله الله لا يحرمني وجودك بحياتي والله اني بدونك ولا شي
عبدالمحسن أبتسم : ولا يحرمني وجودك وصوتك وظلك وعيونك وكلك ياللي بسببها انا على قيد الحياة
جنى بخجل : استحيت ترا بكنسل اروح معاك
عبدالمحسن ضحك : ههههههههه لا تكفين خلاص توبة
جنى برفعة اصبع : انتظرني هنا اتجهز وانزل لك
عبدالمحسن : حاضرين
_______________________________
~ بيت العم علي ~
"قسم الهنوف وعبدالمجيد "
الهنوف ببكى : عبدالمجيد وينكك
عبدالمجيد برعب : شفيك ياقلبي ليش تبكين
الهنوف : مبروك ياعبدالمجيد مبروك
عبدالمجيد المتصنم : مبروك ! مبروك على وشو
الهنوف بفرحة : انا حامل راح يجيبنا بيبي بعد 9 شهور
عبدالمجيد : احلفي بالله
الهنوف : والله العظيم انا حامل راح تصير اب
عبدالمجيد بصراخ وفرح : الحمدالله يارب الحمدالله ياحبيبة قلبي وعيوني والله بطلع ابشر امي
طلع وراح يركض لـ امه يبشرها انها بتصير جدة
عبدالمجيد : يمه يايمه
ام حازم : هلا ياوليدي وش فيك
عبدالمجيد : مبروك مبروك بتصيرين جدة بعد 9 شهور
ام حازم : ماشاءالله مبروك مبروك الله يتمم لها على خير يارب العالمين ويفرحكم فيه
عبدالمجيد : امين يارب العالمين
عامر : وش السالفة ليش فرحانين وش فيه
عبدالمجيد : ياعزتي لـ ولدي بينقرد دام ذا عمه
عامر بـ عدم استيعاب : ولدك هو انت عندك ولد وانا مدري
عبدالمجيد ضحك : ههههههههههه قريب بتصير عم ياغبي
عامر : أسالك بالله
عبدالمجيد : اي والله
عامر : والله لـ اطلع عيونه
الهنوف : والله انا اللي بذبحك لو تقرب له
عامر : يليل جتنا امه وش بيفكنا الحين
ام حازم : احسن تستاهل خذي حقك منه حيلك فيه
عامر بصدمة : يمممه وش فيك قلبتي علي ماش ماتحبوني
ضحكوا على عامر وجلسوا ينتظرون ابو حازم وحازم عشان يبشرونهم
_______________________________
الشباب بالحد الجنوبي ~
سلطان : البشارة ياعياللل
غزاي : وش فيك
سلطان : جهزوا اغراضكم بنرجع لـ أهلينا
غزاي : قل والله !
سلطان : والله العظيم
فيصل : الحمدالله الحمدالله
عبدالله : متى يشمل الكل ولا لا
سلطان : اسامينا مع اللي بيرجعون وبنرجع اليوم
كلهم سجدوا سجود شكر غزاي وفيصل وسلطان وعبدالله : الحمدالله والشكر لك يارب الحمدالله
غزاي : اجل يلا خلونا نقوم نجهز اغراضنا ونمشي والله اني مشتاق لـ اهلي ولـ جدي ولـ الديرة كثيررر
فيصل : الله على هذيك الايام اخيراً بنرجع نعيشها من جديد
عبدالله : لازم نجيكم بالديرة نبي نعيش الاجواء معاكم
فيصل : والله اللي مرحبا عينٍ فراش وعينٍ لحاف
عبدالله : البقى يابعدي انت
سلطان : ياخي شكلكم ماتبون ترجعون
غزاي : لا وش مانبي الا ميتين اصبر مافيك صبر
سلطان : ودي بـ اهلي ياخي
غزاي : بتشوفهم ان شاء الله
فيصل : يلا ياعيال قوموا نجهز اغراضنا عشان نمشي
_______________________________
~ بيت الشيخ سعد ~
ام راكان : وراك جيت عسى ماشر
راكان : أهخ يايمه أهخ اتهموني بمقتل عمي يايمه
ام راكان : من اللي يتهمك من ذا
راكان : فهد يايمه فهد
ام راكان : حسبي الله عليه الله يوريني فيه عجائب قدرته
رهف : خير ان شاء الله بأي حق يتهمونك بوفاة عمي
ام راكان : ياويلي عنك ياوليدي يتهمونك اتهامات باطلة لكن الله بيأخذ حقك ان شاء الله
سديم : ماسلمنا من عمي وهو حي والحين طحنا بعياله الله ينصرنا عليهم
راكان : انتم اصبروا لـ بعد العزاء وبتشوفون وجهي الثاني والله ما اخليهم يتهنون في حلالنا والله
رهف : اخذ حقنا اللي من بعد وفاة ابوي ماشفناه ولا تهنينا فيه
راكان : ابشري والله ان يرجع كل قرش اخذوه مننا
سديم : برد قلوبنا ياراكان واخذ حقوقنا ترا مالنا الا انت مالنا عنك غناه
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
