كل دارٍ تضمك ليتها صدري وكل عينٍ تشوفك ليتها عيني

بارت 28

~ بيت الشيخ نايف ~
الشيخ نايف : شريان وانا جدك رح لـ جدتك قل لها تزهب العشاء وتحسب حسابها بكره عشاء سلامة بنت ابو عبدالعزيز
شريان : ابشر على خشمي
ابو حازم : استعجلت يـ ابوي كان خليتها عقب بكره
الشيخ نايف : خير البر عاجلة وشو له انتظر لـ عقب بكره
ابو حازم : على ماتحب مانقدر نقول لك شي ،
شريان دخل المطبخ بدون مايشوف من فيه وصرخت عمته بدور : ارجع ارجع معي البنات ارجع
شريان رفع راسه وشافها هي والبنات انفجع وصد بحرج : أخووو فيصل ، طلع وسكر الباب طلعت له بدور
بدور : وش فيك انت ماتدري انهم معي احرجتهم
شريان : وانا عالم الغيب شدراني انكم فيه خابر جدتي منيرة هي اللي فيه وجيت اعلمها بشيء
بدور : تعلمها في وش قل لي انا اعلمها ولا تدخل علينا كذا
شريان : شدراني انا المهم قولي لـ جدتي بكره عشاء سلامة بنت ابو عبدالعزيز وزهبوا العشاء
بدور : طيب خلاص رح اذا زهب قلنا لك
شريان : زين زين
______________________________
~ بيت الشيخ صالح ~
فهد : السلام عليكم
فزت الجدة سارة على صوت ولدها : ياهلا ياهلا تعال عندي بشوفك بتطمن عليك وين اخوانك ؟
فهد ابتسم وجلس عندها : ياهلا بك جيت انا لحالي العيال ماجوا معي فالرياض قاعدين
الجدة سارة : ليه وراك ماجبتهم معك
فهد : اصلاً انا ماكان لي نية اني اجي لكن تذكرت البلاغ اللي رافعينه على ابن الكلب وعودت عشان اشوف وش صار عليه ووش الجديد
الجدة سارة : اخاف ينقلب عليكم ياعيالي والله اني اخاف
فهد : ياجعلني فداك ياجنتي وناري ينقلب علينا ليه !؟ ليه الدنيا سبهللة وش حنا مسوين عشان ينقلب علينا
خلود : والله هذا حالها يافهد من يوم دقيت وعلمتني وقلت لها وهي بس تفكر فيكم وشايلة همكم
فهد : ياجعلني والله فداها يمه لا تفكرين في شي يقلقك ولا تشيلين هم حنا نبي نأخذ ثأر ابونا ماهو رد الثأر بالثأر ؟
الجدة سارة : الا
فهد : خلاص حنا نبي نأخذ الثأر وتبرد قلوبنا وقلبك ماتبين يبرد قلبك على غريم رجلك على قاتله !؟
الجدة سارة : الا والله ودي قلبي يبرد وارتاح بس خايفةٍ عليكم يسوي بكم شي ولا يضركم
فهد : لو هو رجال يطلع بس ولا يقرب لنا ومايتهرب من فعلته اللي هو سواه هو عارف انه لو طلع ولا لقينا له درب والله مايسلم وينذبح بس انه انحاش ولا له أثر
خلود : للحين مالقوه ولا سمعوا عنه شي
فهد : لا والله ماله أثر نهائياً كان الارض انشقت وبلعته لكن وين بيروح مصيره يطلع
خلود : تكفون لا يروح منكم دوروه لين تلقونه واخذوا ثأرنا منه واقتلوه مثل ماقتل ابوي
فهد : ادعوا بس كثروا الدعاء وان شاء الله اننا بنلقاه ولا يطلع والله مايصبر على هالحال
______________________________
~ بيت ابو نصار ~
ناصر : ولد وش فيك متضايق ومعصب وش صاير
نصار : رحت لـ بيت عمي ابو نوف وليتني مارحت
ناصر : افا ليه وش فيه
نصار : يوم جيت بطلع نادتني نوف وقالت لي كلام ضايقني وعصبني بالحيل
ناصر : وش قايله لك قل لي
نصار : احسب عندها شي اخرتها تجي تكلمني عن عرسها الاولي وراضي وانا وش طيب مانيب رجلها الحين والمفروض ماتجيب الطاري قدامي
ناصر : اذكر الله يمكن انها تبي تقول لك شي او انه اللي صار معها قبل مايصير معها بعرسك عليها
نصار : حتى ولو المفروض ماتجي تقولها لي بالطريقة ذي ولا تقولها لي من الاساس شي انطوت صفحته يرجع ينفتح على بداية صفحة جديدة ليه !
ناصر : معها عذرها يانصار ماتبي الشيء اللي صار ينعاد
نصار : وشو عذره وش شايفتني هي ؟ مثل هاللي تخلى عنها وتركها عشان وحده ثانية
ناصر : وانت شدراك انه عشان وحده ثانية يمكن ماصار بينهم نصيب ولا قدروا يكملون مع بعض
نصار : لا تقعد تبرر لي موقفها وكلنا ندري انه من اول يحب له بنت وهذا هو من يوم طلقها رايح يخطب البنت اللي هو يبيها وميتٍ عليها
ناصر : انا والله اني ما أبرر لك الموقف اللي صار بس اقول لك معها عذرها يمكن هو مسوي لها شي ماتبيك انت تسويه معها بعدين ماتدري يانصار
نصار : زين زين انا بسكت وبشوف وش تاليها
______________________________
~ أدهم وسرور ~
أدهم : ابوي هاوشني ولعن خيري
سرور : وانا بعد وياخوفي بس يشوفون بعض ابوي وابوك ساعتها وش بيصير
أدهم : كله منك المفروض انك سكت عن هالسالفة لين نروح لنا مكان مافيه احد وتقولها
سرور : وش اسوي بعدين السالفة سمعتها من عرب وقلتها وش دراني انها بتوصل هالمواصيل
أدهم : السالفة سالفة عرض فيها فضيحة وهاه انفضحنا وعرفوا اهلها وتهاوشوا مع ابوي وابوك وكليناها الله يستر بس مايجينا اخوها والله مايخلينا
سرور : يجي واعلى مافي خيلة يركبه ماهوب مسوي شي وان سوا تحسبني بسكت بروح اقرب مركز ارفع شكوى
وانتهينا
أدهم : لا تصير غبي بيقول حاكي في عرضي وعلى اختي والشكوى بتنقلب عليك ونروح انا وانت في ستين داهية ما احد بيفكنا لا من الشرطة ولا منه
سرور : بكون وقتها مطقوق اكيد الشكوى بتجي عليه ماجينا شي
أدهم : بيقول مامديت يدي الا عشانهم تكلموا في عرضي بالباطل وانا اللي برفع الشكوى وتنقلب عليك معه ادلة وشهود
سرور : وشهي الادلة ذي والشهود علمني بس
أدهم : الشهود راضي والادلة ابوها اللي عارف تربيته وش وعارف بسوايانا وعارف انه ماطلعت منها العيبة لا تصير غبي وتورطنا
______________________________
~ خروج نجوى من المستشفى ~
نجوى : مابغيت اطلع هالمستشفى كئيب مررررا
عبدالعزيز : والله ياحبيبتي كل المستشفيات كئيبة
نجوى : صادق لكن ما أعرف ما ارتحت فيه نهائيًا
عبدالمحسن : خلاص انتي بعد شوي بتطلعين
نجوى : فكة والله ما احب المستشفيات وحوستها احس بكتمة
عبدالعزيز : الكتمة والله بتجيك بعد شوي
نجوى : كيف مافهمت
عبدالعزيز : هاللي واقف عند راسك ينتظر طلعتك عشان يكتمك خايف عليك واخرتها تسوين معه كذا
عبدالمحسن : تنكسر يدي لو سويتها لكن لا مانع من اني اغير رايي بعدين
عبدالعزيز : هااا شفتي لا تتطمأنين ياحلوتي بيلعب فيك بيوم من الايام وقولي ماقلت
نجوى : شدعوة ترا كله مقلب مايسويها قلبه مايطاوعه
عبدالمحسن : نشوف مع الوقت قلبي بيطاوعني او لا
نجوى : لا ان شاء الله مابيطاوعك ولا راح تضرني كيف بتضر شخص انت شايف فيه الحياة والنجأة
عبدالمحسن : أهخ جابتها عالجرح وربي مايجيها شي
عبدالعزيز : سحرتك شكلها
عبدالمحسن : حلالها تسوي اللي تبي
نجوى : شفت المهم يلا عاد ماصارت ترا ابغى اطلع شوفوا وش صار عالخروج
عبدالعزيز : طيب طيب لا تنفخين شوي شوي
نجوى : يلا بس روح شوف ، ناظرت بعبدالمحسن ، وانت بعد لا تجلس عندي روح معاه
عبدالمحسن : شدخلني انا الحين
______________________________
~ بالليل عند الدكة ~
شريان : وبس هذا كل اللي صار
حازم : وانت شلون رفعت نظرك عليهم
شريان : رفعته صح لكن يشهد الله اني ما شفت شي
حازم : طيب مره ثانية انتبه وتنحنح قبل تدخل
شريان : تنحنحت بس يمكن انهم ماسمعوني واحسب مافيه الا جدة منيرة تعرف انها ماهي تسمع زين واحسبها هي ودخلت ياولد انحرجت واحرجتهم معي
حازم : ماصار الا الخير دامك ماشفتهم ماعليه جل من لا يخطى
شريان : ودي ان جدي ماقال لي رح
حازم : خلاص اللي صار صار اهم شي انك طلعت على طول ولا شفتهم
شريان : ودي اعرف ليش امور البيت ماتجي الا عندي انا ليه ماتجي عندك انت ولا واحد من العيال
حازم : عشانك الوحيد اللي تعرف لـ هالامور وتعرف شلون تعلم اهل البيت بالمطلوب جدي جربنا واحد واحد ولا شاف احد برد كبده غيرك
شريان :  تعلموا وريحوني شوي
حازم : لا تحاول هالامور مايعرف لها غيرك وحتى لو تعلمنا جدي ماراح يطلب الا منك معتمد عليك
شريان : ايه الله يطول بعمره ويخليه لنا ذخر ان شاء الله
حازم : امين