أشوف الودّ في عيونك ولكن يردّ الودّ خوفٍ فيك منّي

اشوف الوّد في عيونك٢١

«مكـان أخر »
فيصـل كل شوّي يدق على سعد مايرد عليّه
تذكر انه قاله بيـروح للأسطبل وتوجه لـه
جاه اتصال من سعـود : حيّ الشيخ سعود
سعـود : الله يبقيك ياحبيبي ، وين سعد امي
تسأل عنه
فيصـل : اعتقد أنه بالأسطبل
سعـود : طيب تأكد ورد لي خبـر
فيصـل : ابشر وقفل منه وهو ينـزل من السياره
ويفتح الباب ويـدخل وكان قدامه العم حسـن :
ياهلا بالفيصـل
فيصل سلم عليّه وقبل لايسأله عن سعد كان
توه يطـلع من البيـت وعاقد حواجبه من الشمس
يليّ جت على عيونه وشعره المبعثر
سعـد قرب منهم : وش تسوي هنا
فيصل : ابد ادورك طال عمـرك
سعـد : صاير شي؟
فيصـل : لا بس فاقدك وطلع مو بس انا الشيخه البنـدري
تسأل عنك وكلمني سعـود وتذكر وارسل له ان سعد بالأسطبل
سعـد : أها زين والله وتوجه للجلسه الخارجيه
وقعـد ، فيصل : قم بنمر المطار اول شي ثم الشركه
سعـد بملل : وش تبي بالمطار ؟
فيصـل : بودع اختي وزوجها
سعـد فز من تذكر ان فيه فرصه انه يشوفها :
يلا توكلنا على الله وهو يعدل شعره
فيصل : تعال بسيارتيّ
سعـد اعطى المفتاح احد العمال عندهم يودها للبيت
وتوجـه يركب مع فيصـل : والله توقعت انك بتروح لـ لندن
سعـد قرر انه يتكتم على الموضوع: للحيّن محتار اروح ولا
فيصـل : هونها وتهّون وخلك بـ أرضك
سعـد : يجيب الله خير
 

«الريتز كارلتون»
حصـه وهي تسحب لولو معاها لأجل تروح لغرفة الجُوهره
دقت البات وفتحته لهم وهي مستعجله :
ساعدونيّ الاغراض ماجهزتها
حصـه : الله يهديكم وش كنتو تسوون أمس ؟
كلهم رفعو اكتافهم بـعدم معرفة وحصـه بدأت تلم
مع الجوهره اغراضها ولولو تشيك اذا ناسيه شي
الجُوهـره : يلا ودّي اودع بابا وبعدها نقعد بالمطار لين تجي
رحلتنـا
حصـه طالعت ساعتها وهي تنادي يأخذون شنطهم وينزلونها تحت  : مافيه وقت يلا
الجوهره رفعت شعرها وربطته ولبست عبايتها بعشوائيه
ومشت ورأهـم وركبـت السياره وهي تطالع ساعتها :
يمدي الحق صح؟
حصـه : ان شاءالله حبيبتي

«مكـان أخر »
البنـدري والعنـود اللي توهم خرجو من بيـت ابو الجازي
لأجل يتطمون على الجـازي ويروحون للمطـار يودعون
مضـاوي اللي بتغيب عنهم شهـر
العنـود : ماما يمدي اخذ قهوه ؟
البنـدري : لا حبيبتي وقت نرجع ما اعتقد يمدينا
العنـود : تمام ماما

«المكتب التنفيّذي ، مطار الرياض »
مضـاوي ماسكه يد تركـيّ : تتوقع يمدينا نودعهم ؟
تركـي : حتى لو تأخرنـا ، نتأخر لأجـلكِ لين تشوفينهم
مضـاوي بإبتسامه : لا عادي ماعندي مشكله
تركـي : لو رحنا لهم مو أفضل ؟
مضاوي : صحينا متأخر بس باقي معنا نص ساعه
ام فيصـل وابو فيصـل واخوها منصور وصلو :
السلام عليكم
تركـي ومضاوي : وعليكم السلام
مضـاوي حضنت ابوها : القلب الكبير خفت
أسافر بدون اشوفكم
ابو فيصل : اجيك لو انكِ ف أخر الدنيا يادنيتي
ضمتها وتوجهت لأمهـا : وحيدتي الله يرجعكم
بالسلامه ويحفظكم ياكريم
منصـور : والله مدري كيف البيت بيكون بدونكِ !
مضـاوي تكافح دموعها وضمته : حبيب قلبي
تركـي بإبتسامه : وحيدتكم وقرة عينكم بتكون بعيونيّ
لا تشيلون هم
أبو فيصـل : ونعم فيك يابو الجوهره
مضـاوي: وين فيصل ؟
منصـور : جاي مع الطريق
واخذتهم السوالف ثم ودعوهم ومشـو
فيصـل وسعـد وكان قدامهم البنـدري والعنـود
سعـد باس راس امه : هلا بالشيخه
فيصـل باس رأسها : هذه ولدكِ ضربت مشوار لأجل
اجيبه لكِ
البنـدري بإبتسامه : حبيب قلبي انت ماتقصر
العنـود طالعت فيه ورفع عيونه لها ونزلتها بإبتسامه
سعـد : يلا نـدخل
وكان مقابلهم تركـي ومضاوي ودعهم وسلمو عليهم
واستأذنو ماعدا فيصـل وسعـد
الجُوهـره كانت تركض هي ولولو لأجل يلحقونهم
وهم كانـو بالنداء الثاني ، شافت أبوها : بابا
وأنظار اللي كانـو بالصاله توجهت عليها
تركـي فتح ذراعه لها وهي تضمه : توقعت ما ألحق
تركـي ضحك : مستحيل تضبط علاقتكم مع المطار
وفتح ذراعه لـ لولو وحضنهم كلهم وسلـم على حصـه
وتوجهم مع بعـض عند مضـاوي والعيّال
سعـد كان معطيهم ظهره وظل جالـس لين ينتهي السلام
الجوهره توجهت لـ مضاوي وودعتهـا ولولو كذلك وحصـه
مضـاوي : الله يرفع قدركم وممتنه لتواجدكم هِنا
حصـه : تستاهلين كل خيّر مضاوي الله يبني بيتكم ويسعدكم
مضاوي بإبتسامه : امين وعقبال بناتنا
حصـه : أمين
الجوهره سلمت على فيصـل : كيفك فيصل ؟
فيصل : حيّ الله الجوهره بنت تركي
الجوهره : شكرًا
فيصل وجه انظاره لـ تركي : لازم اعطيها كورسات بالردود
تركـي ضحك : ابد خذ راحتك
الجوهره : بابا
سعـد رفع حاجبه وشدّ على قضبة يده يحاول يسيطر
عن انفعاله قبل لا يغير ملامح فيصـل، تعوذ من ابليس
وجت شنطهم وتساؤل تركـي : رجعتكم لـ لندن اليوم ؟
الجوهره : اي بابا الساعه سبعه
سعـد فز وقـام والتفت لهـم بهدوء وصدمة الجوهره
لاتقل عن لولو ، الجوهره بلعت ريقهّا وهي تفرك يدينها
بتوتـر ، تركـي : توصلون بالسلامه
فيصـل : درب السلامه
مضـاوي : لنا شوفة قريب ان شاءالله
ووصـل النداء الأخير وسعـد توجه لـ تركي اللي جنب
الجُوهـره : نستودعكم الله وصافحه
تركـي : الله يحفظكم ووقف بالجهة الثانيـه
وسلم على مضـاوي ، ثم وقف ينتظرهم يمشون
وكانت أنظاره على الجوهره اللي متجاهله وجوده تمامًا
ولاحظ نظرات لولو الغريبـه اللي الواضح أنها عرفت
وش صار بينهم ، مـرت من جنبّه وريحة عطرها
داهمته غمض بهـدوء ثم توجه للخارج
الجُوهره مدت نظرها لخطواته لين أختفى من أنظارها
فيصـل : رحله موفقه واستأذن منهم ولحـق سعـد
الليّ كان ينتظره عند سيارته فيصل فتح السياره
ركب سعـد بهدوء وهو يرجع رأسه وغمض عيونه
بشدّه وحاله كان غريب نوعًا ما واللي تحت محط
أنظار فيصـل المستغربه ويليّ عارف ان سعـد
يموت و جذوعه من القيظ يبّاس
‏ ولا يبّين للسحاب .. إحتياجـه
فيصـل : حالك مايسر ، اوديك البيت ؟
سعـد فتح الباب ونـزل : انتظرني شوي وراجع لك
فيصـل عقد حواجبه : والله ماينعرف لك !
سعـد رجع للصاله اللي متواجدين فيّهـا
رفع أنظاره لـ الجُوهره اللي قاعده تقرأ كتـاب
مشى بهـدوء تجاهها واللي من حسن حظه كانت
قاعده لوحدها ، لولو وحصـه اللي خرجو من
دورة المياه - يكرم القارئ - انتبهت لـه
وعرفت انه متوجه لـ الجُوهره وعلطول
لفت أمها لجهة الحمامات : ماما تعالي معاي الحمام
حصـه : تونا طالعين منه ؟
لولو : ماما احتجته ماودّي أكون لوحدي
حصـه : تعبانه ؟ اخذ لك مسكن من هنا ؟
لولو وهي تسحب أمها : لا ماما بس تعالي معاي
حصـه تنهدت وتوجهت معهـا
سعـد تنحنح والجُوهره رفعت أنظارها له : بنـت تركي !
الجوهره بسخريه : صدفه غريبه صح؟ يعني بتقنعني
ماكنت تعرفني من الأول وبرغم من معرفتك فيني تماديت
معاي بهالشكل !
سعـد : ماكان عندي عُلم ولو كنت عارف كنت توجهت لأبوكِ ،وماجيتكِ من فراغ يابنـت تركي ! كنت واضح معاكِ من البـداية قلت أبيك انتي !
الجوهره وقفت ورفعت انظارها له بتحـدي :
ولو قلت لك أني ما أبيـك وسبق وقلتها لك !
سعـد : وقلت لكِ ماتعرفيني لو تعرفيني ماكان هاجمتيني
الجـوهره : مين انت ؟ شخص بتمر مثلك مثل البقيّة
سعـد تنهد وقرر ينهي الحوار اللي ماراح يخرجون منه بالهداوه : جيتكِ لأجل أقولك شي وبكمل بطريقي !
الجوهره سكتت تنتظره يتكلم : أنا اسف كان يرضيكِ الأسف
وعطاها قفـاه بدون ماينتظر ردّهـا أو يشوف ردة فعلها
فتح باب السياره  : توجه لـ الشركه
فيصـل توجه لها بـدون مايتكلم معاه بحرف يدري
به انه يصارع شي بداخلـه وله السبب بيغرق نفسه
بالأشغـال .
الجوهره تسارعت أنفاسها وقعدت تحاول تعيد اتزانها
الليّ بُكل مره يشتته لها ولا تدري وش السبب