وانتهت الليله بفرح عكس صُبحها ومش عارفين شر العرس الجاي، وراحت ام كنعان بيتها علشان تستقبل زوجها وام نجلاء نزلت شقتها في الدور الاول اللي كانت تطلع لهم تساعد وتنزل او العصر اذا اجتمعوا او خرجوا العيال ،وفي الصباح على نور الشمس وشم الخبز من ماما لطيفه :
ترف : صباااححح جنتي وشيف العائله
ماما لطيفه بابتسامه: صباح النور قومي البنات والحقوا اصتبحوا علشان الاختبار
راحت ترف عند البنات تصحيهم تعصبت امل وقالت : نمت ٣ وصحيت ٥ خلوني ارقد ساعه زياده
ترف: محد قال لش اسهري وقومي نصتبح قده جاهز
دُجى: احلا صباح دام فيها خبز ماما لطيفه احمدوا الله وغلقوا الباب علشان ارقد
امل : نذاله فيها في الدم
ترف : كلها ساعتين وتروحي المعهد
دُجى بضحك : المهم غلقوا الباب علشان ارقددد .
حقدوا عليها ورجمتها ترف بالوساده اخذتها دُجى وحضنتها وضحكت بانتصار وراحوا ترف وامل اصتبحوا وجاء الباص وراحوا المدرسه
*في المدرسه*
ترف: ملاك وطيف لازم تشدوا آخر سنه علشان تروحوا جامعه وراسكم مرفوع
طيف : وانتي شدي علشان تروحي شعبه المتفوقات
ترف : اللهم باعد بيني وبين هذي الشعبه كما باعدت بين المشرق والمغرب
امل بثقه: وهو صدق ايش الفرق عن باقي الشعب ملخصات زايده وهكذا هكذا بنطلع تسعينات بأي شعبه
طيف بضحك : والله انهم شغلونا صح بس بنطلع أوائل جمهوريه
ملاك : أص بس خلوني أراجع
ترف بضحك : م توقعتها منش يا ملاك والله ،امل تعالي نخطى المقصف نأكل
امل : واللي اكلتي في البيت يا ظالمه ؟
ترف بضحك : مجرد مقبلات
ضحكوا البنات وكل وحده راحت تراجع عدا ترف وأخيرا جاء وقت الاختبار .
وعند العيال :
كرم : كريم لحق روح الجامعه وشوف تسجيلات السنه الجديده
كريم : ياخي انقلع خليني ارقد انا لي منعك
ضربه كرم وقال : واضح الهمه اللي تتكلم عليها وااضححح
قام كريم وقال بضيق : ومن ايجي معي؟
كرم :يا أطفال الروضه؟ مازن هناك قد حسبته حسبت معيد ماشاء الله وكمان يدور منحه للماجستير
كريم : شهر واحد واعتبره اثاث في الجامعه
كرم بضحك: قوم بس قوممم
*في بيت ابو مازن *
فتحت دُجى عيونها بكسل على صوت ماما لطيفه وقالت : كم الساعه؟
ماما لطيفه وهي تقراء قرآن : ٩ يالله والصبوح في المطبخ
دُجى : لا خلا ولا عدم يا احلا أم
ابتسمت ماما لطيفه وراحت دُجى المطبخ وفي المطبخ شافت غيث وقالت :شاهد قبل الحذف غيث صاحي سبحان الله
غسل غيث وجهه وقال : بروح اشتغل مع أبي
دُجى : مش ناوي تدرس جامعه ؟
غيث: خليتها ل مازن اخي وبعدين الناس تقول صباح الخير !
دُجى بضحك : وانت صادق قام وخطى قبل الكل الله يحفظه بس ويفتح شركته اللي يحلم بها ، صباح الخير والعافيه
ابتسم غيث وقال :قد اسمه حلم يالله ان شاء الله يتحقق ما اكرهه له، ذلحين وين الصبوح ي قلبي ؟
دُجى: انتظر ناكل سوا فوق الطاوله
غيث :استعجلي
اكلوا مع بعض على مناقشات العرس القادم وكل واحد خطى على موقعه
صحت ام مازن وقالت : الحمد لله كلهم راحوا يتعلموا إلا غيث راح يفرز البضاعه مع العمال
ابو مازن بفرح: عادي وشويه اسحبه للجامعه بس الحمد لله انه تغير
ام مازن: الحمد لله واوسان راقد وبروح اساعد ام نجلاء في الغداء واجيب العلاج ل امي لطيفه
ابو مازن: الساعه ١١ ونص يالله استودعتش الله شخطى اسلم على امي واروح اتفقد الشغل
ام مازن: مع السلامه انتبه لنفسك
*عند البنات بعد الاختبار*
خرجت امل بنفسيه وقالت : هو مع السهر أو الاختبار صعب ؟
ترف : لا الاختبار من ...
امل بضحك :امسكي لسانش
ترف :يعني رياضيات ايش متوقعه؟
أمل بضحك : ما حليت إلا سؤالين في الصفحه الثالثه والرابعه سؤال واحد
ترف بضحك: ماشاء الله انا الصفحه الرابعه ولا حليت شي تعرفي احب نظافه الورقه والثالثه سؤال حليته والباقي صح متاكده
امل بضحك: مشاعرنا تجمدت خلاص عز الله أيام نبكي على الدرجات
ترف : وبعدين معانا ١٠ درجات حق الأنشطة نضيفها في الرياضيات وكذا نضمن درجه حلوه
امل : صححححح نسسيت والله فكره
ترف : تعالي نشوف البنات
أمل: يا خريجات كيف الرياضيات ؟
طيف :في الخيارات في الصفحه الرابعه قالت الأستاذه نسوي اقرب حل واخاف يكون غلط
ترف : هيا شوفي تخاف على درجه وفي الاخير صح
ملاك بصدمه :ليش في صفحه رابعه
امل وهي تمسح دموع الضحك :في اسوء مننا يا ترف
ترف :عاد في الدنيا خير
الكل : هههههههههههههههههههههههههههههههه
ملاك : والله ما يهم الحمد لله حليت اللي ينحل اخيرا اتخرج واتزوج
طيف :هيا شوفوا شوفوا ايش تفكر
ضحكوا وكملت ترف : ازوجش مازن؟
طيف بجديه : ايش رأيش نغلق الموضوع؟
ملاك بضحك: تغار وتسعد احساسي
طيف : انقلعي بس
ملاك بمزح : خلاص بتزوج واحد من اخوانش واعتق مازن لوجه الله
طيف وهي ميته احراج : ااا ظريفه ماشاء الله
ترف : خلاص خلاص اصلا لايقين ببعض يا طيف
امل بضحك : ونزوجهم بمكتبه
ضحكت ترف وهي ضحكتها فضيحه حاولوا يغلقوا فمها وقالت طيف: بروح اكل ي حيوانات
ملاك بمزح: كلنا ي اخت زوجي
وبعد ما غلقوا الموضوع بمزح وراحوا يأكلوا لمحت طيف الباص الأول وقررت تهرب معه وقالت : جاء الباص مع السلامه
ودعوها وقالت امل : ترف بكره اخر تدريب لركوب الخيل
ترف : اول واخر دوره ادخلها معش تكسرت وانتي ماشاءالله تدربي لكل شي وزي الربح
امل : اعوذ بالله بس المهم تجي ويوم الربوع كلنا انكمل نختبر ونأجز ويوم الخميس عرض مهاره نعزم الكل والجمعه تاخذي الشهاده وخلصنا
ترف : تم ان شاء الله وكم ندفع
امل: ٣ الف
ترف : ان شاء الله يالله آخر مذاكره شدي
امل : لحد وين التحديد ؟
ترف بضحك : لحد ما تبكي
امل : شكرا لش
ترف :يالله جاء الباص مع السلامه ، ملاك يالله
امل بضحك : يالله بس انقلعوا
*في البيت *
دخلوا البنات البيت بتعتب وشافهم ابو مازن وقال : كيف حليتي انتي وخواتش (ويقصد بخواتش امل وطيف وملاك )
ترف بتسليك : امتياز ان شاء الله
ابو مازن:عيانه نباته
ضحكت ترف وعرفت ام مازن تساليك ترف وقالت : ان شاء الله بس هكذا ،يالله الغداء جهز
راحت ترف أخذت دش وخطت الصاله جلست جنبهم قربت لابوها الخبزه وقالت ترف : بابا اشتي ٣ الف
ابو مازن : يفداش ثلاثمائة الف
ترف بحب : ويلوموني فيك يا نبع الامان
ام مازن بمزح: لا تاخذي حريتش كلها!
ضحكوا وقال ابو مازن بضحك: بس ليش؟
ترف : آخر تدريب علشان الشهاده والخميس تعالوا الحفل بس البنات علشان انفتح شعرنا وكملت بثقه وبصور لكم يا إخواني وانا في الخيل لا تبكوا لأنكم ما اتشوفوني
مازن: الله يرزقني ثقتش بس
ابو مازن: يعني حفل بنات بس ؟
ترف : ايوة بس استلام الشهاده عادي لو جيتوا بس انا باخذ شهاده واروح يعني مافي شي مهم واكيد احلا فيديو لك يا نبع الامان وانا اسوي العرض
ابو مازن: ان شاء الله وفوقها هديه
رند : وانا ؟ وعاد هدية تخرجي من الاعدادي ما وصلت
دُجى: ما تستحقوا اصلا!
ابو مازن: الكل له هديه على حسب الشي اللي سواه
ورند طلبت لش الفستان اللي تحبيه مع طقم فضه
رند بحب : جعل يومي قبل يومك يا احلا اب في العالم
ابو مازن: الله لا قال يا حبيبة أبوها
-رند آخر العنقود ومصدر حب للكل-
مازن: وانا اشتي منحه دام توزعوا هدايا، شهر وانا اعامل في الجامعه ومحد مهتم بس اروح اساعد الطلاب
ابو مازن: شفت شفت بالكثير شهرين واسفرك تاخذ ماجستير وترجع لنا وتكون مجمع مبلغ ويدي على يدك ونفتح شركه لك ان شاء الله(كان قادر يفتح لابنه شركه لكن يحب يشوفهم يعتمدوا على نفسهم)
مازن : جعلك ذخر لي وان شاء الله ارفع راسك
غيث: مرفوع جاهز ذلحين دوري
دُجى : يا اهلي ايش رأيكم تاكلوا سكته؟
ترف: اخذتي طقم ذهب لما جابوا نتيجتش بس طمع وخلينا نترزق الله، كمل يا غيث
الكل :ههههههههههههههههههههههه
غيث: انا اشتي ترقيه محترمه علشان اضمن مستقبلي المادي، وواصل يكذب : وبعدها ادخل جامعه
ضحكت ترف بصمت واشر لها غيث اص وقالت ابو مازن: اابششر
غيث بحماس : تتبشر بالجنه ان شاء الله
ماما لطيفه : لو اليوم تحقيق التلبيات انا و غزال نطالب بطقم ذهب تعب كرف المطابخ
ابو مازن بمزح:وانا اراء ان نأجل هذا الموضوع ل بعد رمضان يعني اكرفوا مره واحده وجبت لكم طقم الماس
شهقت ترف وقالت : يعني المستفيد هنا الامهات ليش يا رب ما كنت ام
ضحكوا وكمل ابو مازن: كل يبشر بسعده لكن عندي طلب
الكل: طلباتك اوااامممررر
ابو مازن : تاكلوا سكته وتحفظوا كتاب الله زي مازن
اختلفت الردود بين من عيوني وحاضر وابشر وقربت اختم
مازن : اذكر تخرجت من الثانويه وبعدها طوالي ختمت وجاب لي سياره و فرحه السياره للان بقلبي
غيث: دام فيها رضى لرب العالمين ثم سياره بالكثير ٤ اشهر واشوف سيارتي السوداء
ترف بضحك: اتفق معك انا قربت اختم ونستفيد دنيا ودين
وعلى اخر الغداء قاطع صوت ضحكاتهم ولمتهم الحلوة شهقه رند اللي انقطع تتفسها بسبب رئتها وطاروا سووا لها التبخيره والعلاج
وفي الغرفه :
ترف بقلق : كيف تحسي
رند وهي تاشر لها من تحت القناع تمام
ترف : اترقدي ترتاحي للعصر ؟
أشرت لها بتمام،خرجت ترف بعد ما تطمنت على اختها وراحت لدُجى في الصاله اللي كانت تذاكر لاختبار الفاينل للمعهد
ترف : بقوم اغسول عيب امي أو جدتي تغسول والله
دُجى : طيب يروحي بس اسرعي علشان تلحقي لآخر ماده
قاطعهم دخول امينه وهي تقول الله المستعان بس ذاكروا وانا اخلص المطبخ وارجع انزل
ترف : نجلاء مريضه انزلي عندها
امينه : ي قلبي لا تخافي أبوها عندها واعرف انكم تساعدوا بس الان اختبارات وضحكت وقالت وبعدين عادي تنظفي انتي
ضحكت ترف وراحت تبوسها وكملت تذاكر
*وعدا الاسبوع بدون اي أحداث مهمه إلا أنهم كملوا الاختبارات *
في صباح يوم الخميس وكل البنات مع الأمهات مجتمعات في بيت عز الدين علشان حفله امل وترف ولان الكل خلص امتحانات ورجعت لمات بنات العم المستمره :
ترف :شكلي كذا حلو ؟
رند : لا البسي جمبسوت ابيض مع اكسسورات ذهبي مع حزام وبوتي بني وخلي شعرش ذيل حصان
-كانت رند تحلم بعد الثانويه تكون مصممه ازياء وكلهم يعتمدوا على ذوقها الرهههيبب-
ترف : فكرهه يالله وانتي البسي البرقع دام جهزتي وكلميهم يجهزوا نفسهم ومازن يوصلنا علشان ما ينفع متعطرات ومتمكيجات
رند : حححااضر ي خيالتنا
ترف : تفداش الخياله والله
شمس :يله اسرعي وبروح اخذ لثمه من دولاب غرفه ماما لطيفه حقي ضاع
ترف بضحك : تمام ي سراقه عينش على هذاك البرقع من زمان
ضحكت وكانت لابسه جنز ابيض وفلينه مكممه سوداء مع كعب اسود واكسسوارات فضي وشعرها اللي كان لاكتافها إلا اني رفعته وحطت مشبك فضي وعلى طريقها شافت كرم اللي كان عند مازن علشان يساعده في مشروع وقرر يروح عند ماما لطيفه يسلم عليها قبل ل يروح
ما ركزت شمس على كرم وقالت بملل : وين البرقع هذا كان هنا
كرم : ضاع البرقع مع قلبي والله !
حسبت شمس انه قال لها مكان اللثمه وقالت بفهاوه : وين ؟
ركزت على الصوت ورجعت وراء الباب باحراج
ابتسم لفهاوتها وجمالها وراح ،دخلت ماما لطيفه غرفتها سمعت شمس وهي تقول : يمه ايش جاب هذا ونحنا بس انروح البنات ؟
ماما لطيفه : من هذا؟
شمس بتوتر : البرقع بس
فهمت ماما لطيفه وقالت بضحك : هنا فوق الشماعه
*نبذه عن لبس البنات*
دُجى : هودي سماوي مع جنز ابيض مع اكسسورات سماوي ورفعت شعرها اللي كان ل آخر ظهرها كعكه
رند: طقم بني بس البنطلون واسع مع اكسسورات ذهبي مع كعب ابيض وكان شعرها زي ترف طويل لركبهم بس رفعته
ملاك : فستان اسود هاادئ جدددا على الجسم اكسسورات حمراء مع كعب احمر وشعرها ل نص ظهرها
امل : فلينه قصيره لحمي وبنطلون واسع ابيض وشعرها زي مشطة ترف بالضبط بس ل نص ظهرها طوله
طيف : فلينه شبك مع باطنه خفيفه بيضاء مع تنوره بيضاء وشربات كعب واكسسوارات سكري وشعرها ل رقبتها مفتوح
الامهات: جلابيات وكل واحده لون مختلف ولابسات حجاب مطرز
وكلهم ميكب خفيف .
خرجوا ترف وامل تحت التصفير والزغرطه والتصفيق ،لبسوا العبايات إلا طيف اللي راحت تصور عند مرايه الصاله
طلع مازن وهو تعب ينتظر وسمع أصواتهم وقرر يطلع يصيح فوقهم علشان يستعجلوا شاف بنت تصور في الصاله صد لكن لف بسرعه بعد م ركز على لون بشرتها الحنطي المميز عن كل البنات ابتسم مازن وقال : طلعت بهزاء البنات لكن شوفتش مستعد انتظر سنين
طيف بصياح : استغفر الله انقلع بس من الباب بروح البس علشان ما تتاخر يا استاذ أعمال
مازن : ببعد بس علشان محد يجي ويفكر تفكير غلط ، انتي من سمح لش تكوني بهذا الجمال كله ؟؟
بعدته بيدها وراحت لكن هذي المره لقيت شمس اللي محمره زيها
شمس بصدمه : شافني كرم
طيف : وانا اقول ليش انتي حمراء يحظه اخي بس
شمس: لا تتهربي وانتي حمراء اعترفي ؟
طيف : زيدت البلاشر بس
شمس: والكذاب ؟
طيف بنص الحقيقه : بالغلط والله شافني وانا اتصور
ترف بشهقه: شاااافشش! قبل أسبوع نمزح لكن الان خلاص نظره شرعيه
طيف : انقلعي بس بالغلط
دُجى :بالغلط ي كذابه غردي وقولي ايش حصل
طيف : حتى شمس شافها كرم
شمس : يكللبه تفضحيني علشان انفضحتي
ترف : بدون محد يفضح حد اشكالكم واااضححه
أمل ورند بنفس اللحضه : ايش في ؟
حكوا لهم شمس وطيف كل شي حصل
رند : يعني مناسبات هذي السنه ان شاء الله
شمس بضحك : رمضان بعد شهر خافوا الله
جت ماما لطيفه وقالت : يعني حصل هذا كله
شهقت شمس ،وكملت ماما لطيفه بضحك: قلتي لي برقع هاه !
ضحك الكل وانتهى لبسهم ونزلوا السياره اللي كان يسوقها مازن بعرض ابتسامته
وراحوا الحفل بكل فرح ومش عارفين ايش منتظر لهم هناك ...
______
بارت جديد وإحداث جديده لا تنسوا النجمه واشوفكم في بارت جديد يَحلوين 🤎🤎.
أنت تقرأ
حَظ المكَان اللَي يضوي فِيه قَمَرين قَمْر السَّماء وَقَمر وَجْهك المُعتاد .
Poetryمن كثر ماهي في قلبي وفي عيوني اللي بيدقق وسط العين بيلمحها . [🇾🇪🇸🇦]
