حَظ المكَان اللَي يضوي فِيه قَمَرين قَمْر السَّماء وَقَمر وَجْهك المُعتاد .

البارت الرابع

ضحك الكل وانتهى لبسهم ونزلوا السياره اللي كان يسوق مازن بعرض ابتسامته
وروحوا الحفل بكل فرح ومش عارفين ايش منتظر لهم هناك
*في السياره *
مازن: وين حرم عمر؟ (يقصد امينه )
ام مازن: نجلاء مريضه وخليت اوسان عندها
مازن : الله يشفيها، وخالتي ندى نمُر لها؟
ترف : ايوة وقالت :يا شمس الكيمره معش؟
شمس: ايوة كم وصتني امينه اصور لها
ترف : مشحونه أو زي المره الاولى يا مهفوفه؟
شمس بضحك : لا وامل قد تأكدت لا تخافي
ترف: إلا صح نمُر لامش يا امل ؟
امل: لا بتجي مع أبي وريمان بسيارة وامي اتدخل واتخلي ريمان عند ابي وبعدها بنخرج خرجه عائليه
ام مازن: وبكره قد عز الدين كلم ابوش معزومين عندنا غداء علشان العرس بنروح حفله العقد حق غيث في بيت ام براءه
طيف بفرح : يعني بنرقد عندكم اليوم ؟؟
ام مازن: ايوة يا حبيبة عمتها
مازن بهدوء : وابن عمها
محد سمعه إلا ماما لطيفه اللي جنبه ضحكت وقالت بهمس : الله يجعلها من نصيبك
ام كرم : مازن اللفه الثانيه البيت ركز وين عقلك
مازن بضحك وهو يرجع بسياره: عند بنت الحلال
دُجى : عز الله دوختي اخي
طيف : الان اضحك أو ايش
ترف بغمزه : لا تجهزي بعد عرس غيث دورش
وانهى مضاربتهم تفحيط مازن :
ام كنعان : نزلت قبل نص ساعه وين انت يا محترم
مازن : يا كذابه كلها عشر دقايق
ام كنعان بضحك : لا ترادد خالتك !
مازن بضحك : كلها خمس سنين يا خالتك
رند : وفرق الطول كانش بنته
مازن : هيا اطلعي يا ندوشه بس
ام كنعان :غفلتي عن تربيتهم يا غزال
ام مازن :وهو صدق ما بين اعتبرش اختي بين ابسرش زي عيالي
ترف بضحك:اتقولي بناتي مجامله
دُجى :محد قال لندوشه تقص شعرها
غلقت ام كنعان الباب بقوة وقالت بمزح :حاضر حاضر انا اعرف اربيكم
رند :انتي اصلا ما تشتي نقول لش يا خاله وتفرحي لما نقولش ندوشه
اشرت لها ام كنعان اص ضحكوا كلهم وقالت ماما لطيفه :وهي مالها عادي شباب اكثر من مازن
طيف بصوت واطي :ونشهد
ضحكت ترف وضحكوا كلهم واخيرا وصلوا للحفل
*تعريف بسيط *
كانت ندى لابسه عفريته جنز وشعرها اللي قاصه له بوي وصابغه واشقر على رمادي واكسسوارات هادئه .

وصلوا النادي وبداو يعدلوا أشكالهم ويعدلوا الميكب وراحوا يجلسوا في المدرجات وامل وترف في الساحه
الكابت سوما : الكل تتوجه لخيلها بعد طلقه الرصاص تبدا السباق !
وفعلا بداو يتسابقوا وكانوا امل وترف في النص
ترف بنرجسيه وهي فوق خيلها : خليهم يعيشوا دور المتسابقين لما اصفر لش نسرع
امل : تم
وبعد ٣ دقائق وفي خيالتين قربوا يوصلوا صفرت ترف وانطلقوا بكل سرعتهم وكذا أعلنوا فوزهم لآخر مرحله
تحت تصفيق قوي وتشجيعات وصدمه السرعه من البنات قالت الكابت سوما : مبروك للفازتين امل وترف قاطع حديثها ضجه تصفيق
دُجى : شمس مصورة كل شي ؟
شمس بفرح لفوزهم : أولا بأول
وأعلنت الصافره المرحله الثانيه اللي فيها خيل واحد ركبت ترف الخيل وبعد ما اسرع وقفت عليه ووصلت ل نص الساحه وتشقلبت ل وراء ونزلت واسرعت امل تمسك اللجام ودارت وهي تمسكه والخيل يجري بقوة ركبته وتشقلبت فوقه ووصلت ل خط النهايه وسوت زي حركه ترف بالضبط ونزلت منه وكان هذا عرض أمل وترف لليوم اللي صدم الحاضرين والمتسابقات حتى لجنه التحكيم صح دربوهم لكن امل وترف تدربوا اكثر وخاصه امل .
الكابت سوما بحماس : من احلا العروض اللي سويناها من افتتاح النادي وبهذي المناسبه نتشرف بتكريم الخيالتين امل وترف بالكأس الذهبي
طلعت امل وترف تحت تصفيق وتشجيع كان محمسهم أكثر من أي وقت تصوروا وكل من اهلهم جابوا الهدايا
ام امل : مبروك يا قرة عين امش
*ام امل كانت سعوديه قحطانيه تعرف عليها عبد الرحمن في تجاره من تجارته وطلبها من ابوها وقصتهم جايه مع البارتات ان شاء الله *
امل : الله يبارك فيش يا اطلق ام
ام امل وهي تبوس امل وترف: مبروك يا حبيبه خاله
ترف : يبارك بعمرش يا رب
وكل البنات والامهات حطوا الهدايا وتجهزوا علشان يروحوا وامل راحت مع اهلها بموعد تجي لهم مع اهلها الظهر وقت الغداء .
*في السياره *
مازن : اللي يسمع من خارج يقول عرس مش عرض
ام مازن : اول مره اشوف ترف بهذي القوه والهيبه
ترف : ايش قصدش يالحبببه؟
ام مازن بضحك : شمس صورتي واضح؟
شمس: الله المستعان طالبه جرافكس وتنسال هذا السوال ؟
ابتسمت ام شمس وقالت : كل واحده فنانه بتخصصها
ام كرم : وانا اشهد وعقبال ما اشوف طيف دكتوره
ترف : الوضع كان مدح لي ليش رجع عائلي ؟
مازن : حب الذات قتلها
ندى : بس و الله ااابدعتتتتتت بقوةةة ما توقعت هكذا
ترف بثقه : وعاد وعاد
نزلت ندى بيتها وهي بتجي بكره الغداء وواصلوا للبيت
*في بيت عز الدين *
شمس بضحك: يا عم فديوهات الحفل بمبلغ وقدره
ترف : يا وسخههه
ابو مازن بمزح: ابشري بس ظبطي لي وحده في الصور
شهقت ترف وقالت : يا حسرتي عليش يا غزاله قلبي
ضحك ابو مازن وكملت شمس : اص بس سويت فيدوهين في العرض الأول تكبير لش علشانهم والعرض الثاني بعد م نزلتي وقفت وامل نفس الحركه ، وكل واحده لها نُسخ
ابو مازن: كيف صورتي وهو ممنوع ؟
شمس : قالوا اني مصورة ولما خلصت شافوا ان الصور مش واضح إلا امل وترف ووافقوا
ابو مازن بضحك: راح عليش مبلغ وقدره
ترف : لو امي تجي ذلحين  بس
ضحك ابو مازن وخرجت شمس وجاء مازن و غيث يشوفوا وهم متحمسين بس ما حبوا يبينوا ل ترف
غيث : الان بس كذا تجروا بالحصان وتسموه عرض مهاره؟
ترف : انت لو تسكت وتهدا تشوف لما افوز وابدأ العرض
مازن : وليش تصفري انتي ولد؟
ترف بثقه : شوف بس
وشافوا سرعتها وبدأ العرض الثاني
ترف : مستعدين
ابو مازن بضحك : لا
بدأ العرض الثاني والكل انصدم وما توقعوا تكون بهذي المهاره
ترف وهي تشرب شاهي : بس كيف ؟
غيث : ما توقعت يا خيخه يطلع منش هذا الابداع
مازن : انقلع بس ،لبسها فل وعطاها بوكي ورد
ترف : ليت والناس تتعلم من الأخوه الكبار
حضنها غيث بيده وعطاها ظرف فيه مبلغ لانه ما يحب أشياء البنات ولا يعرف يختار حضنته بفرح
وقال ابو مازن : يالمترفه
ترف وهي تعشق هذا الاسم : عيونهاااا
ابو مازن: لما تروحي تاخذي الشهاده سجلي اسمش خياله واختاري الخيل اللي تحبيه واشتريه لش وفي حال تحبي تروحي تدّربي أو تِدربي يكون لش
صاحت بكل قوتها وحضنت ابوها وكل راح يجهز لصلاه المغرب
غيث: انا بلحقكم بتوضأ واجي
ابو مازن: طيب
خرجوا ولحقهم غيث وما ركز بالبيت اللي قدامه وكان في حد يحاول يصوب عليه
كيان : غغغيثثث ابعد !
بعد غيث بخوف واطلقت الرصاصه للجدار
مسك كيان رصاص واخذ المسدس من يده وقال : مسكتك يا حيوانننن
اتفتحت عيون غيث بصدمه وقال رصاص : ما اكون رصاص اذا ما قتلته، غيث يسحب علينا وابوه يبلغ علينا؟
رخى كيان ولطم رصاص وقال : والان انا باخذك السجن يا كلب
غيث : بعدت عنكم لأنكم شويه صيع والان تشتوا تقتلوني ؟
كيان بمزح وهو مثبت رصاص: الحمد لله اني تأخرت اغلق الدكان أو الان انت صورة معلقه
غيث : حتى في حالات الجد تافهه ؟
ابتسم كيان راحوا سلموا رصاص الشرطه وفي الطريق
غيث : تسلم يا اخي والله لكن لو مت وانا خاطي المسجد كنت شهيد يا المنقذ المغوار
كيان بمزح : يخي الله المستعان احنا جيران مره انا مره انت وبعدين ذنوبك لو قتلوك وانت تحج والله اعلم ما اتنغفر
غيث بضحك : بعيد الشر ، المهم الاسبوع الجاي يوم الجمعه انت اول الحاضرين !
كيان : اجي لك من الساعه ٥ الصبح وبعدين اصغرنا واول واحد يتزوج سبحان الله يالدنيا
غيث: ياخي افرح لي مش تحسدني وانت انوي تزوج وانا اول الداعمين يرجااال
ابتسم كيان وتذكر حبيبة الطفوله دُجى وقال : ان شاء الله ،ادخل نلحق نصلي مع الجماعه الثانيه
*كيان* : صاحب بقاله ورثها من ابوه اللي كل الناس تحبه ،درس دبلوم مختبرات وهو اللي يصرف على أهله بعد موت ابوه والكل يشهد بأخلاقه وعمره٢٢ سنه وصاحب المقرب لبيت عز الدين ، ويدور وظيفه في مستشفى بس عاده ما لقى ،يشتغل في المخابرات بدون محد يعرف، وعنده ٣ خوات متقاربات في العمر .
ابو مازن بعصبية : وين انتت ما شفتك تصلي؟
باس كيان رأس عمه وحكى له القصه
ابو مازن بخوف : ما قصرت يولدي والله
كيان : ما سويت شي دافعت عن اخي بس
ابو كرم : وصليتوا ؟
غيث : لحقنا الجماعه الثانيه
ابو كرم : وبهذي المناسبه الحمد لله في المستشفى يشتوا فني مُختبرات وسجلت اسمك وقبلت والصباح تداوم من ٨ ل ٢ الظهر وبعدين روح البقاله
كيان بفرح: الله يفرج عليك يا عم شكرا ما قصرت والله
ابو كرم : انت الغالي ابن الغالي
باس كيان رأسه وقرر الصباح يخلي صاحبه يمسك البقاله ويرجع لبقالته بعد الدوام وكذا يكون معه مصدرين دخل
اتفقوا مادام كل الرجال مع عيالهم مع كيان اللي يعتبروه واحد من عيالهم يروحوا بوفيه يضيعوا وقت ويخططوا للعرس لموعد صلاه العشاء
*عند البنات *
ام نجلاء: اوففف يالخيااالههه! يجنننن
ترف بضحك : قولي ماشاءالله بعدين يموت الحصان
ام نجلاء: ماشاء الله وهذا احلا طقم اكسسورات (كان الطقم فضي وناعم ونفس التشكيلات اللي تحبها ترف )
ترف: يحببي يجنننننن
ام نجلاء : تستاهلي أكثر
رند: صوت طلق رصاصه ؟
ترف: عادي هذا يمكن عرس او شي قرح
دٌجى بمقاطعه : امل اتصلت لي قالت رجعت من المطعم الان وصورت الهدايا كامل يخي المكان يجنن وقالت الصباح بتجي مع امها واختها
شمس بثقه : حياها الله وانا صورت الهدايا شوفي الصور احلا
ضحكت ترف وقالت : انا وامل واحد ما يفرق بكره اروح اسرق اللي يعجبني وهي بتسرق قبل ل تسلم اصلا
شمس :خلاص السهره اكككيد في الجبا
ترف : لا بنطبخ العشاء ونتعشاء وارقد لاني مكسرره وبكره ل جت امل ونزلت ملاك الصبح نخطط ونختار لبس ونشوف مواضيع امس واليوم ما نسيتهم واساسا بترقدوا عندنا اسبوع
ضحكوا البنات وكل واحده راحت تطبخ بحماس لعرس الاسبوع
جاءوا الرجال ومحد تكلم على الحادث مادام موضوع عدا على خير تعشوا وكل عائله راحت دور في العماره لان بيت ابو عزالدين (محمد) بيت العائله وبعد موته مسك الوضع ابو مازن وهو الاب بعد موت ابوهم
ونظفوا البنات ورقدوا مع بعض في مجلس النساء على عهد حفله بكره والتجمع ...

_____
بارت قصييير وبعده احلا ثلاثه بارتات لا تنسوا النجمه واشوفكم في بارت جديد لا يَحلوين 🤎🤎.