حَظ المكَان اللَي يضوي فِيه قَمَرين قَمْر السَّماء وَقَمر وَجْهك المُعتاد .

البارت العاشر

ابو مازن: اذا لازم اليوم  نتكلم على الحقيقه يا بدر
ابو اسلام : ايش بيفرق وجودها وعدمها واحد
ابو مازن: لا انا مسافر وما ايطيب خاطري إلا لما الكل يعرف 
ابو شمس :يكفي نخبي شي المفروض ما يتخبى
ابو اسلام بتوتر : شورك وهدايه الله 
ابتسم ابو مازن بفرح وتوجه لعند بناته علشان ينظموا مكان التجمع راح لباب الغرفه وقال : بنااات
ترف : ادخل مافي حد
ابو مازن: بنتجمع كلنا في غرفه السطح بدون نقص حد جهزوا المكان
ترف بخوف : ان شاء الله
ابو مازن: وين ام نجلاء
ترف : عند امها من ليلة العيد
ابو مازن: المهم الساعه تسع كل اللي في البيت يكونوا في الطيرمانه
ترف: ابشر
وفعلا جت الساعه تسع تجمعوا أحفاد محمد من أكبرهم ل أصغرهم متوترين عدا الأخوه الثلاثه و ماما لطيفه
كان الجو معتدل قرروا يخرجوا من الطيرمانه لسطح وقال ابو كرم : كرم شب النار في الوسط علشان البرد
كرم : كان رحنا المزرعه نسهر احسن
ابو كرم بجديه : اليوم مش سهره اليوم في شي لازم تعرفوه
خافت شمس تحسبهم عرفوا بلي حصل لها وشعور خوف والنوم طاغيين في ملامحها تجمعوا دائره حول العشاء والنار وبدأ يتعشوا عدا ملاك وريفال اللي كانوا بالثام ماعرفوا ياكلوا براحتهم ابتسم ابو مازن وقال : يبناتي فكوا اللثام وتعشوا براحه هذول اخوانكم
ملاك : لا يعم كذا مرتا...
ابو اسلام : فكوا اللثام انتم ما تغطوا وجهكم على عيال عمكم واعمامكم
كريم باحراج : يا عم نحنا بننزل نستاذنكم
( وكانوا البنات يكشفوا وجيههم لعيال عمهم لكن ما يلتقوا إلا بالصدفه أو في المناسبات  )
ابو مازن بجديه: اجلسوا واسمعوا ، يمه تكلمي كل شي !
ماما لطيفه: اخيرا قررت يا بدر يا ابني تتكلم الحق
اتوسعت عيونهم بصدمه وقالت ماما لطيفه : لما تشوفوا بدر يبوس راسي ويدي لانه ابني من لحمي ودمي
شهقت ملاك ودقتها ترف وواصلت ماما لطيفه : لما كان عمري عشر سنوات زوجني ابي غصب عني على واحد أكبر مني بكثير وقالي بالحرف الواحد اي شي يسويه قولي له حاضر تزوجت وبعد زواجي ب شهر خرجت اللعب مع صحباتي لكن جاء وضربني وقال لي ادخلي انتي كبيره وروحت ل عند ابي وطلقني منه واكتشفت امي اني كنت حامل وجبت بعد تسعه أشهر من زواجي بدر وانا مطلقه وبعدها بأربع سنوات تزوجت جدكم محمد الله يرحمه وجبت عز الدين واحمد وقاسم وكذا بدر يكون اخو عيالي من الام يعني عمكم واعتبره محمد ابنه وتربى مع إخوانه وانعمرت العماره لكل واحد طابق وتعرفوا توفى جدكم اثر مرض قبل عشر سنين  .
شمس بصدمه : بنات شكل عشاء امس من المطعم مفعوله الان وصل تسمعوا اللي اسمعه؟
غطت ترف فم شمس وقالت : يوووه شكلها فيها نوم بدأت تهلوس مسكينه
غيث : يعني هو انتم اللي طلبتوا من المطعم  !
قام ابو مازن بيضربهم بالعصاء لكن قاطعتهم ماما لطيفه بضحك : هم في وجهي اليوم خلاص تعشوا ورقدوا ما فيها شي
ترف : امي اسطورتي
ماما لطيفه : بتحكوا لي القصه لما ننزل!
ضحكوا وما ركزوا لصدمه عيال بدر وأحفاده
ابو اسلام  : وجاب لي بيت صغير اجرته هو كان سبب دخلي بعد ما اشتغلت مدرس وتقاعدت وكان هذا سبب حقد اخواني من ابي عليا
بكت ملاك بمشاعر حب لأول مره تحس بشعور العائله وحزن على أبوها وحضنوها البنات وانصدمت ريفال وامها اما اسلام اللي كل مشاعره فرح ان معه حموله واهل
طيف : بنات ايش الجديد ملاك اختنا من زمان
ترف : يبه فرحنا وقول ان ابو امل برضو اخوك من اب
ماما لطيفه :من اب هاه !!
الكل : هههههههههههههههههههههههههه
أبو مازن: هذا عشير عمري وصاحبي من اول ما بدأنا المشروع وكان معي بالخسارة قبل الربح
ماما لطيفه: الله يديم محبتكم يا عيالي
الكل:امين
ابو مازن :  وانا عندي خبر
الكل بشغف : هات الله يجعله خير
ابو مازن : بنسافر تركيا انا وعائلتي
ترف بصدمه : ليش تقتلوا الفرحه يا مسلمين
ام مازن بعصبية  : احترمي ابوش يابنت!
ترف بحزن : انا اسفه بس ليش يبه
ابو مازن : بتدرسوا جامعه هناك وكل سنتين بنرجع شهرين لما تخلصوا اربع سنين ونرجع هنا نكمل حياتنا طبيعي
محد فرح لخبر ابو مازن بالعكس تكدرت ليلتهم وقال ابو مازن : وانتي يمه بنعامل لش معانا
ماما لطيفه بحده: انا مش خارجه من بيتي ابدا وبجلس عند اخوانك في نفس العماره اللي بناها ابوكم وبكون ازور رند كل اسبوع واذا رجعتوا رجعت دوركم وبنزل عند قاسم 
غيث بحزن: وانا اساسا اللي قدامكم ما حجز لي معاهم ما يعتبرني ابنه واساسا ما بفلت رند و ماما لطيفه
كانت بتكون مشكله بين ابو مازن وغيث لكن قاطعها ابو اسلام (اخوهم الكبير )هدا الامور وانتهت الليله بخبرين ما يشبهوا بعض ابدا ونزل كل واحد بيته مصدوم عدا الإخوان اللي بقوا في غرفه السطح :
ابو شمس: حرام تقسى عليه بهذا الشكل يا عز
ابو مازن : لا تضعيوا فرحه اليوم علشان مراهق ،هذا اخر حل لتربيته وصدقوني انه بيتمرجل أكثر الان ما عنده ظهر يسانده وايعتمد على نفسه !
ابو اسلام بعصبيه : إلا عنده اب وعنده أعمام وظهر وسند وعزوه لكن انت كيف تفكر انت ؟ سافر ودرس عيالك وانا والعيال بننتبه له
ابتسم ابو مازن وهو يعرف انه غلط مع غيث كثير لكن اعمامه وعيال عمه بجنبه وما ايفلتوه لظروف الزمن ابدا
وعند العيال في ديوان ابو شمس:
مازن : يا غيث اعذر ابي كبر السن والمشاكل في الشغل وانت اخي وعضيدي
حضنه غيث اللي ما كان يشعر بتفرقه بينه وبين مازن وعارف ايش يدور  في رأس ابوه لكن غيث كتوم رغم اللي مر فيه ما بين التعب حتى في وجهه لكن داخليا كانت ترعد وتبرق فيه
رقدوا العيال مع اسلام ابن عمهم في ديوان ابو شمس اللي يعتبروه تجمعهم واغلب وقتهم فيه ويعتبر قاسم اب لهم كلهم والبنات أغلب وقتهم في بيت عز الدين .
عند البنات:
ترف بصوت باكي : مشتيش اسافر يناااسس اكره السفر
شمس: لعل في ذلك خير يبنتي
ملاك: يعني لما جاء الفرح جاء السفر حظوظنا في الحضيض
دُجى : خلاص بنات ارقدوا بكره بنسأل ابي متى السفر ونروح الصباح كلنا النادي مع امل ونحكي لها
ترف : صح والله على الاقل أودع سهم (خيلها)
ناموا عدا طيف اللي ضاقت على فراق بنات عمها والانسان الاول والاخير اللي حبته لبست ثياب الصلاه وراحت المطبخ تشرب ماء لكن الدبه خلصت واضطرت تطلع فوق الدولاب علشان تاخذ الثانيه وتشرب ومن ضيق طيف كانت تدندن بغنيه : يسمر وما يحلا السمر إلا بصوت الدان يا سماار
مازن بمزح : هاه احلويت ؟
طيف بصوت عالي : بسم الله الرحمن الرحيم الناس تتنحنح
مازن : أصصصص ابي أو أي حد ايقوم
طيف : كنت نايم مع العيال ايش قومك ؟
مازن :  نفس السبب اللي قومش الكل راقد وجالي ضيق على فراقكم قلت اطلع اشوف لو ترف صاحيه بس جابتني رجلي هنا
طيف : خلاص دام جيت نزل لي الماء وانقلع
مازن بمزح : مش إلا انتي اطول من ترف وتضحكي عليها 
طيف : سامجين انت وترف بالفطره
ضحك وواصل بجديه :زاعله ان احنا بنسافر ؟
طيف والدموع حول عيونها : توصلوا بسلامه
مازن :كلها ٤ سنوات تدرسي فيها وتكوني صيدلانيه ويد اليمين لابوش وانا ادرس ماجستير واجمع مبلغ ادخل مشروع يستحق شهادتي واعيشك بالحياه اللي تستحقيها يا ملكه قلبي 
طيف بحب وعيونها تدمع : الله يوصلك ل احلامك 
مازن : وبعدين وخالق الكون زعلش عليا ما يهون كيف أسمح لعيونش بالزعل وانا مغرمها ؟
ابتسمت طيف وهي تمسح دموعها بقوة وحاولت تنزل الدبه تحت أنظار مازن اللي يتأملها من الباب
طيف : على الاقل تعال هات الدبه !
مازن بابتسامه تذكر الشعر المناسب لها وقال :
يا مدلله لبى الدلع في دلالش
يحلا حليله بين كل الحليلين
تلحقني طيوفش وراها ظلالش
واميز العطر الندي لو تمرين
يا أطول قصيرة طول الله فالش
يجمل خلايق رب موسى وياسين
اطلبش في حاجه صغيره؟ وصالش
ابغا وصالش الي ابغاه الحين .
راح نزل لها دبه تحت سكوتها مذهوله من الحب اللي يجي لها من مازن اللي ما اعتادت عليه من اخوانها وأبوها لهذا الحد
مازن بضيق : والله لو كانت ما مات حبيبة قلبي رند اني تزوجتش ورحنا ندرس مع بعض لكن لعل في ذلك خير
طيف بابتسامة  : انتبه لنفسك في ذمتك روحين وانا منتظره لك طول عمري وهذا آخر كلامي لك وقبل ل يشوفنا حد نشوف رب العالمين علشان يتم موضوعنا على خير
ابتسم مازن بوسع ثغره صح ان كلامتها قلال لكن كبيره بالنسبه لمازن جدا هي ثقيله ما تعرف تعبر وهذا الشي اللي يميزها عنده
شربت الماء اللي نسيت اصلا انهي جت تشربه وقالت : تصبح على خير
مازن : وانتي من اهل الخير يا وجه الخير
راحت ترقد بعد ماحمدت الله عليه وعلى نوم البنات لان ملامح طيف تفضحها ولو حد شافها بتنفضح ورقدت، اما مازن شرب الماء رغم ماله نيه كان يطلع يشرب لكن اول مره يحب دبه ماء .
وفي الصباح تحديدا في النادي:
توجهوا شمس ودُجى وترف وطيف وملاك وريفال ل النادي بسيارة مازن بعد الف محاوله يروحوا يودعوا النادي  قبل السفر
ترف : وهذا كل اللي حصل
امل بصدمه : نظام بيتكم غريب لو حد يغيب يوم تجي المستحيلات
ريفال بضحك : زي مدرستنا
دُجى : ما تخفى عنش  خافيه والله لو ما كان مازن يحب طيف كان زوجتش به اما غيث منصحكش
طيف : انتي اخت الزوج اللي الكل يحلم بها
الكل: هههههههههههههههههه
شمس: عاد امي ما كانت موافقه اجي قلت لها حرام ايسافروا وآخر اللحظات وكم دمعه ووافقت
ريفال: سبحان الله زي مسلسل دمعه كلب اللي سوته ملاك
ملاك : الحق عليا توسطت لش ولا كان الان تسوي الغداء معاهم
امل : اسكتوا بس عندي لكم خبر
ترف : اللهم اجعله خير
امل: حتى احنا بنسافر معاكم ابي وعمي وسعوا شغلهم ل تركيا وبنسافر معاكم ونرجع معاكم
قفزت ترف تحضن امل بكل فرحه هانت عليها فكره الوحده في الغربه ودُجى اللي انهارت فرح والبنات انقهروا انهم بيسافروا
ترف بحزن : انرجع لكم يا بنات كل فتره ان شاء الله وبعد اربع سنوات برجع لكم واغثيكم
امل بمزح : مع راعي النصيب
ترف : يع لا اللهم اجعل نصيبي يمني
دُجى : يمكن يمني هناك
شمس : وهاتي لي اخوه انا اكبركم
طيف : كل ما زانت الجلسه انا اكبركم انا اكبركم وبعدين وين كرم خلاص بعتيه في ثواني
الكل : هههههههههههههههههههههههه
ترف : ذلحين خلونا نروح قسم الاسطبل
ريفال بحماس: وان شاء الله اتعلم
راحوا وجلسوا مع بعض للعصر وجاء مازن روح امل لبيتها وروح البنات للبيت وانطلق السوق
دُجى : بنات بروح البقاله اشتري بطاطيسات بسرعه علشان نسهر
ملاك : قدااامم
راحت دُجى البقاله وشافها كيان وردت له روحه من بعد عمل طويل كان ناوي يتقدم لها بعد عيد الأضحى ابتسم لها عكس اي بنت لو جت وكانت عارفه بحبه لها من خواته لكن اكتفت أنها ردة له الابتسامه من تحت اللثمه وراحت البيت وكان هذا كافي جدا لكيان وهو فعلا كيان 
دُجى : شمس تقولي كيان منصدق بيصبر وايتقدم ولا كلام خواته مزح؟
شمس: لا تشوفي البنات الام بنفسها تكلمت وانتي ما عليش منه اذا رجعتوا وكان صادق بيتقدم واذا لا طز فيه غيره الف يتمنوش
دُجى بضحك : مالش قلبتي عليه كان سؤال بس
ضحكت شمس وقالت :الحماس أخذني معلش .
عدا الاسبوع وهم مع بعض يجهزوا أشياء السفر وروحت الأسواق وكان موعد سفرهم بعد يوم ومحد كان عارف ايش منتظر لهم من نصيب في السفر وخاصه لامل وترف  .

______
بارت جديد وبتتعرفوا على شخصيات جديدة لا تنسوا النجمه واشوفكم في بارت جديد يَحلوين 🤎🤎.