عدا الاسبوع وهم مع بعض يجهزوا أشياء السفر وروحت الأسواق وكان موعد سفرهم بعد يوم ومحد كان عارف ايش منتظر لهم من نصيب في السفر وخاصه لامل وترف ،تبقى لسفرهم يوم بليلها وفيها قرر غيث يودع بخرجه لطيفة بعد صلاة العشاء .
غيث : بناااتتتي
دُجى : ترف ايوة بنتك لكن انا وانت فرق تسعة أشهر
غيث: يعني ما تشتوا تخرجوا ؟
ترف : معليك منها تدلل، تحب تكبر نفسها هذي النتفه
ضحك غيث ورجمتها دُجى بالوساده وبسرعه لبسوا واخيرا تحقق حلمهم بخرجه ليل بدون اهل
ترف : مازن بيجي معانا؟
غيث : لا حتى ما قلت لحد بخرج خواتي نتمشى قبل السفر مافيها شي
ترف بحماس : صح صح حرك يا وحش
غيث : وين تشتوا تروحوا
ترف : النادي
دُجى : شخصية امل اللي فيش مش وقتها ،يخي بتروحي هناك كله نوادي ماعليك منها نروح حديقة ونلعب هي تغلق اهدعش الليل والان تسع
ترف : اول مره تقولي شي صح في الحياه
غيث بمزح : يالله كل واحده تحط قسمتها
ترف : برجع البيت اوسان مريض واحلا الخرجات السطح وآخر الذكريات حلوةلو كانت بين الاهل
انفجر غيث يضحك بعد فترة طويلة لدرجة صدى الحوش بصوته ابتسمت ريفال اللي كانت تلاعب اختها هيلا في السطح وتراقبهم للحوش وياااه كم ابتسامه غيث إغاثة لقلبهم كلهم
غيث : على من طلعتي بخيله وانا اشوف ان كلنا كريمين
ترف اللي ضحكت من ضحكته : آخر يوم تقول ادفعوا اكيد طلعت عليك بلا شك
ضربها بخفه وقال : خلاص اليوم على حسابي
دُجى : خلاص امشي وانا بتصل لامي ان احنا خرجنا معاك ما بتصيح بس ندي خبر ان احنا خرجنا
غيث : ناخذ اوسان ؟
ترف : لا محموم
تحركوا على طول ولعبوا كل الالعاب وكان الجو معتدل وهواء عليل مناسب على خرجتهم بالضبط
ترف : بالله يا غيث تعال اطلع معي المقص
غيث : انقلعي مجنونه افرط بعمري اللي عاده ما بدأ؟
دُجى : نحنا مع بعض وتعال وسطنا آخر مغامره واول تجربه لك لا تكون جبان يخي
ترف : لا تقتل المتعه وبعدين بالله يقنعوك بنات عيب عليك والله تعال وبس
غيث : انتم تدهدهوا الواحد بس قدااامم لكن بشرط!
ترف بحماس : تدللل
غيث : اللي تصيح قسم بالله لاهينها
دُجى : يخي نحنا قسم ولاده ولا نستمتع ونتصور
غيث بضحك: اقطعوا تذكره
حضنته ترف اللي قدامه شبر تعتبر بطوله وعرضه وراحت دُجى اخذت ثلاث تذاكر ولعبوا ونزلوا ميتين ضحك على دوخة غيث وانتهوا يومهم ب مطعم خفيف ووصلوا البيت الساعه عشر ونص والفرحه مستعمره قلوبهم
راحت دُجى لعند البنات وقالت وهي تبعد اللثمه : بنات والله صورت لكم خياااللل
ترف : فاتكم احلا يوم في الحياه
ريفال : متى يكبر محمود ويكون هكذا يووه بس
طيف : لا تروحي ل محمود اخواني البغال كل واحد شنبه اطول من شعري ولحد خرجني
شمس بضحك : لا تخيبي آمالي انا ماعندي حد وواثقه بكرم
طيف : لا توثقي بحد نصيحه
الكل : هههههههههههههههههه
قاطع صوتهم صياح ابوهم بكل قوة : غغغيثثث
خرج غيث بعد ما عطى اوسان هديته وباس امه وعطاها هديتها خرج بقوة منتظر تهزيئ لكن رد بهدوء : نعم
ابو مازن بعصبيه:الله لا ينعم عليك هذا رد تجاوب فيه ابوك أو اخوك الصغير؟
غيث : أامر يبه
ابو مازن: مفلت شغلك وتخرج خواتك في الليالي؟
غيث بنفس الهدوء : اليوم مناوبة إسلام وخواتي من الصبح يضيفوا الرايح والجاي اول ما فضوا خرجناهم
ابو مازن : وانا هنا طرطور أو كيف ليش ما استأذنت غيث : محشوم يبا.....
ماما لطيفه : استاذن مني يا عز! وانا وافقت له في غلط لا سمح الله؟ بس ما خليت غيث يكمل كلامه اسمح له يتكلم!!
سكت ابو مازن شويه وما حب اخر يوم مع ابنه يكون قاسي وقال : لا لا دام هكذا رضيت عليه
ابتسم غيث بثقل وقاطعم دخول مازن : غيث واقف ليش؟ روح حب رأس ابوك
ولاول مره ابو مازن فتح ذراعه ل غيث وحضنوا بعض وباس رأسه ودخل غرفته بنفس الهدوء لكن بفرح هذي المره لانه عرف يودع ابوه .
في غرفه غيث :
ماما لطيفه : ندخل أو نفزع وخلاص
فز غيث بحب : لا والله انها فزعه فرحت البيت كله حضنته ودخلت العشاء ونزلوا ترف ودُجى ميتات ضحك تعشوا مع بعض في غرفة غيث وفي نص الكلام مع الإرهاق رقد في نص الكلام
ترف : يعمري عفوووي
دُجى :لو يسمعش تقولي له هكذا خلاش فتوت
ابتسمت ماما لطيفه وهي تغطيه بحنيه : خلاص تعالوا نطلع
وعند البنات :
شمس ببكي : كل ما اتخيل إنكم بتجلسوا سنتين اشتاق
ترف : بالله عليش لا تخربي فرح الليله وتبكينا معش !
تحاضنوا الكل بمنظر حنون واخذت ماما لطيفه تلفون دُجى والتقطت صورة لهم وكان نص ماما لطيفه باين في الصورة
شافت دُجى الصورة وقالت بحب : بنات الصورة بطبعها ما اتححمملل
ماما لطيفه : علقوها في برواز في غرفتي
ملاك : كلنا كلنا
ماما لطيفه: خلاص يله ارقدوا علشان بكره اخر يوم لكم بيجوا الاهل ولازم نجلس مع بعض مصحصحين
ريفال : يالله تصبحوا على خير
(يعرفوا ريفال ترقد بعد صلاة العشاء طوالي وما تعلمت السهر إلا معاهم )
الكل راح يبوس جدتهم اللي توسطت الفراش ورقدوا مع بعض تمنوا ان هذا اليوم يمر ببطئ وان سفر بيت عز الدين حلم
في الصباح :
ريفال : بنات الساعه تسع قوموا يالله صبوحح
شمس : يعني اذا ما قومتنا ترف تجي ريفال
دُجى : ترف ما تقوم إلا وقت الاختبارات ولا اترقد ل عصر عادي
ترف : اصبحنا واصبح الملك لله يخواتي ذكر الله يفيد في الدنيا والآخرة!
الكل : ههههههههههههههههههههههه
ام مازن: بنات قوموا صبوح يالله!
ترف : الان ننظف الغرفه ونجي
ماما لطيفه : الحقوا آخر صبوح من يدي
دُجى : ان شاء الله تذوقي عيالي طبخش الرهيب يا احلا أم
الكل : ان شاء الله
اصتبحوا ووقت الغداء جت ام نجلاء من بيت امها وام كنعان وايثار وامل وامها وتجمعت العائلة لآخر اجتماع لبعد فتره طويله محد يعرف اجلها
وبعد الغداء والكل يلبس :
ترف : بنات بخلي شعري كرلي أودع البيت بطبيعتي
امل : اساسا شككلشش كذا رهيب مع النمش احسش هاربه من دزني
حضنت ترف امل وكانت شمس توثق اي لحظه في هذا اليوم دخلوا المجلس والجو كله ضحك ولمة إيثار : ما جت ايه ؟
دُجى : انتي حامل لا تفكري بحد
ترف : بتجي بعد العشاء قالت بعد زفة الغُمره حق خالتها
ماما لطيفه: صلوا مغرب وتعالوا كلكم عندي شي
امل : بنات عرفت ملاك لمن طلعت
الكل : هههههههههههههههههههههههه
وبعد صلاة المغرب راحت ماما لطيفه معاها صحن وتوسطت المجلس وجلسوا حولها الامهات والبنات وفتحت شمس الكيمره في الوسط بدأت ماما لطيفه تدق في الصحن بالحان شعبيه وحولها الامهات يصفقوا والبنات يغنوا معاها ويتمايلوا ، خرج غيث من غرفته بعد ما بدل علشان ينزل لرجال بعد ما تاكد ان محد في الممر سمع غيث الدقه وهو عارف جدا مصدر الصوت ابتسم وتمنى لو كان جنب جدته ومر ينزل الدرج تنحنح وما ركزت ريفال اللي كانت تنتظر أخوها في الدرج علشان يجيب الكيك وتتمايل مع الأصوات شافها غيث وهي تذكره ب رند سوا بعمرها اللي يفرق سنه بس عن رند أو هيئة شكلها أو مساعدتها أو غمازتها
صد غيث وقال بصوت عالي: يولد الله الله!
ريفال بشهقه : طيب ابعد من الباب علشان ادخل وغمض عيونك الطويله !
ما حب غيث اسلوبها ابدا وكان يكره كل البنات الغريبات من بعد براءه بعد من الباب ودخلت عند البنات :
ريفال : وهذا غيث ما يجلس إلا عند البنات
ترف : هاه ؟
ريفال : كنت انتظر لمحمود في الدرج علشان الكيك فجاءه خرج من البيت
دُجى بضحك: هاه كان يبدل واتصل لي وقلت له كلنا في المجلس وخرج ما انتبهت لش والله
ريفال : الحمد لله لابسه حجاب أو قلعت عيونه
ترف : كانش اخذتي راحتش شويه ؟
ملاك بضحك : من شبهت عمتها فما خلفت
ترف : فما ظلمت ، تعلميها سوا وتكلمي
الكل: ههههههههههههههههههههه
نسوا البنات الموقف واكلوا الكيك عدا ترف اللي تكره شي اسمه سكريات وزاد كرهها بعد مرضها
وواصلت ماما لطيفه تدق وبصوتها الحنون :
خطر غصن القنا خطر غصن القنا
وارد على الماء نزل وادي
ومر من جنبي
الكل بلحن : ومر من جنبي
ماما لطيفه: وبجفانه رنا وبجفانه رنا
نحوي وصوب سهامه واعتنى وصاب قلبي
إلا يبوي انا
الكل : إلا يبوي انا
قاطعهم زغرطة ترف رمتها امها بعلبة المنديل
ترف بضحك مع البنات واصلت: اخذ قلبي وراح
ماما لطيفه: خلاص خلاص باقي ل اذان العشاء ربع ساعه روح...
ايه : حيااا السلام عليكم
ريفال بصوت واطي : لش حيه تلقصش
ضحكت ترف اللي كانت جنبها وهمست لها : خلاص تغيرت لا تفضحينا
ابتسمت وسلموا على بعض
ملاك : ايش الكشخه الحلوة هذي؟
ايه : انزفت خالتي وجيت مع بابا اسلم عليكم قبل ل تسافروا وارجع اروح العرس وتروح إيثار مع بابا
إيثار : فعلتي الصح
رسلت لها ايه بوسه من بعيد جلسوا وقالت ايه: الان من بيسافر بالضبط ؟
ملاك : بيت عمي عز الدين كامل
ايه : حتى ماما لطيفه؟
ماما لطيفه: لا بجلس انا وغيث عند قاسم
طيف : لا لا عندنا لا تغيري رايش لوسمحتي
ضحكت ماما لطيفه: كلنا بيت واحد في عمارة واحده كل يوم عند واحد ولا تزعلوا
ايه : يعني المتشرد غيث ما ايروح معاكم
رفعت ترف يدها كان بيكون اقوى كف لولا امل اللي مسكت يدها لأول مرة دورت الصلح
ترف : وخري عني والله ل اذبحها من متى غيث متشرد ؟
ايه : والله اني مزحت يهووو
ريفال وهي تقلدها : يهووو ثمني كلامش وانطقي يهوووو !
ايه : خلاص معليش اسفه
ماما لطيفه : خلاص بكره السفر لا تخلوا في قلبكم زعل قاطعهم أذان العشاء صلوا وجلست ايه معاهم ربع ساعه وراحت العرس
ام كرم :توقعت ترف تقول والله انتي المتشرده
ترف بضحك : مش انا ايه، وبعدين محد متشرد الحمد لله
ماما لطيفه::خلاص اليوم العشاء عليكن
طيف :من الععيوون
وفعلا راحوا كلهم المطبخ يفعلوا آخر عشاء مع بعض بكل حب
ترف : شمس خلاص يختي كل شويه تصوري
شمس : يختي مساحتي او مساحتش خليني براحتي
دُجى : خلاص خلاص حرام كم يوم ويرجعوا يشوفوا صورنا ويشتاقوا
امل بضحك : ونقول الغربه مره
طيف : انقلعوا بس قربوا العشاء جهز
ماما لطيفه: جاءوا العيال؟
ام مازن : لا عادهم في المزرعه ويسهروا بالمزرعه وايتعشوا هناك والليل بيرجعوا
ماما لطيفه: نوره بتناموا هنا علشان بتسافروا الفجر صح ؟
ام امل: اي عشان الباص بيجي ل هنا وبعدين للمطار مافي وقت لو رحنا البيت
ماما لطيفه بحزن: توصلوا بالسلامه
ام مازن : راجعين ان شاء الله راجعين
تعشوا الكل ونظفوا البنات لكن هذي المره رجعوا المطبخ فعاليه اللي تنازف بالماء واللي تزحلق بالصابون واللي تصور واللي تدق على الباب تحمس الجو وبعد ساعتين من تنظيف المطبخ غيروا بجايم النوم وجهزوا آخر اللمسات للشنط
ترف بحزن : يارب حلم مشتيش اسافر
امل : خلاص سنتين ونرجع كم شهور الاجازة وبعدين نسافر سنتين ثانيه ونرجع نستقر وان شاء الله يمروا سريع
الكل : امين
ام كرم : يالله ارقدين بكره معاكن سفر من ٥ الفجر لازم ترتاحوا كلكم
ام امل : الساعه ٩ ونص والان بروح انام عشر والكل نايم !
غمزت ملاك للبنات وقالت : اصلا فيني نوم ، اسبقوا ارقدو ونحنا بنرقد في غرفه البنات
ابتسمت ماما لطيفه وخرجت مع الأمهات
عند الرجال:
كان الجو مع العيال شبة نار وتغسيل ادوات الذبيحه بعد العشاء وجلسه كلام وفصفص
مازن : غيث تعال
غيث : هاه ؟
اخذ دبة الغاز الصغيرة الفاضيه ورجمها له وضحك وقال: امسكها
انفجع غيث لكن مسكها وطار يجري يلحق مازن يغطس وجه في التراب تحت ضحك العيال الهستيري وطبوا إسلام وكيان وكرم وكريم معاهم
كيان : خلاص روح اغسل شعرك يا مازن ونروح نفرفر بالسياره
مازن وهو يتحلف لهم : تم يا كلاب
الكل : هههههههههههههههههههههههههههههههه
اما عند الرجال كان ابو شمس يسوي الشاهي والكلام كان مابين اشتياق للماضي ومواقف أيام زمان وما بين تخطيط السفره وتجارة ابو مازن وأبو امل القادمه
مازن : يبه بنروح مع العيال نلوي شويه ونرجع
ابو مازن: الساعه ١٢ وانتم في البيت راقدين
كيان بابتسامه : بنرقد عندكم يا عم خليها ل ٢
ابو مازن بمزح : دام هكذا الساعه ١٠ وانتم في البيت
الكل : هههههههههههههههههه
إسلام بمزح : ياعم انا ابوهم ولا عليك إلا ١٠ ونص وهم في البيت
كرم : هذا هارب من عندكم ل عندنا خذوه
ضحك ابو اسلام ودق اسلام كرم وخرجوا بدون اي وجهه محدده وعلى أصوات ضحكات وجو العيال الخاص بهم لقوا محل شعبي اخذوا بُن وهم يتنقلوا من مكان ل مكان لمحوا عرس ما يعرفوه نزلوا اخذوا شوط تحت ضحك اسلام وتصويره اتجهوا للبيت بعد ما سلموا على اصحابهم
وفي الساعه ١١ رجعوا الرجال يرقدوا اما البنات كانوا في السطح هاربات من النوم
ملاك : بنات الساعه ١١ خلونا ننزل بيت شمس ننام هناك
شمس : اول مره احب فكره ل ملاك
طيف : ايش معنى شمس تعالوا عندي
ملاك : يا هبلا اخوانش ايروحوا يرقدوا وبيت عمي عز ايروحوا العيال مع كيان وعمي عبد الرحمان فهنا أامن مكان
امل : صح شمس أبوها نايم وما في حد
شمس: صحح ونشوف آخر فلم مع بعض
دُجى : قدددامممم
ونزلوا على أطراف إصابعهم دخلوا غرفة شمس شافوا فلم وفي نص الفلم راحت دُجى المطبخ بهدوء تجيب ماء وكيس البطاطيسات اللي قالت لها شمس عليه .
اما عند العيال اللي قرروا يناموا في بيت عمهم قاسم (ابو شمس) علشان الديوان كبير ومنعزل على البيت فياخذوا راحتهم فيه وصلوا العيال البيت الساعه ١٢ إلا ربع ودخلوا الديوان بهدوء وكملوا سهرتهم إلا كيان اللي استاذن يروح الحمام وشرح له مازن الطريق وراح اما دُجى اللي كانت في الصاله تشوف المرايه وتغني بكل هدوء:
بنة الحسن بسال لوسمحتي سؤال
وش شعور المرايا كل ما شافتك ؟
يا جمال الكمال ويا كمال الجمال
أشهد أن المرايا ما بعد جابتك
ابتسم كيان وابعد عينه عليها وقال : توصف نفسها بكل دلع ؟ انا اقولش وصفش : كنتي في اكمل جمالش كنتي في أعدل غرورش! تصنمت دُجى وقال وهو مبعد عنها : انتظرش ترجعي واخذش حلالي واخت كبيره لخواتي! دُجى كانت بشعرها لكن كيان اللي شافها اول نظرة بالصدفه وابعد عينه خوفا من الله وحفظ لحرمه البيت وغلاوة لأصحابه، كيان وهو كيان اللي ما يترجم مشاعره لحد كان مكتفي جدا بهذا الحد واخيرا عرف يكلم حبيبة طفولته وعطاها وعده وراح الحمام وخرجت شمس تحسبها ما عرفت مكان البطاطيسات بعد ما سمعت الكلام بينهم من عند الباب وكانت صدمتها مش اقل من صدمه دُجى ...
_____
حُب كيان افعال😢لا تنسوا النجمه واشوفكم في بارت جديد يَحلوين 🤎🤎.
أنت تقرأ
حَظ المكَان اللَي يضوي فِيه قَمَرين قَمْر السَّماء وَقَمر وَجْهك المُعتاد .
Poesieمن كثر ماهي في قلبي وفي عيوني اللي بيدقق وسط العين بيلمحها . [🇾🇪🇸🇦]
