الوريثة الوحيدة (باللهجة الجزائرية)

الجزء الاول :للضعفِ قوة

الهام تتحدث:

بديت نحل عينيا غيربلاعقل نسيي نتأقلم مع ضوء تع الشمس لي طاحت على عينيا ... الوجع لي كنت حاساتو فالكور تاعي مانقدرش نوصفو بأي من الحروف لي نقدر نخرجهممن فمي لي راه ناشف...هذا نهاري الزاوج بلا ماكلة ولا الما... حكيت عينيا غير بلاعقل وانا نسيي ننوض ونرفد روحي ... وجهي لي كان يوجع بواحد الطريقة ...كنت متأكدة اني نلقاه زرق كيما التيليتابيز الموف هاداك...خزرت فالمراية تاع لاشومبر وشفت الميزيرية في انعكاسي... عيني منفخين من البكا والكور تاعي كامل زرق ورقيق على الخيط تع الخياطة ... تنهدت بارتجاف وجبدت روحي غير بلاعقل للدوش ...نتمنى انو واحد مايسمعني ... دوشت بالسيف بش ننحي التعب لي فيا وتوضيت ...اول مابديت في صلاتي سمعت خطوات قاووين جايين لشومبرتي ...قلبي كان ينبض بعنف قريب يطلع ... النفس تاعي سخون والمتسارع ...في صلاتي ...كنت ندعي ربي انو مايصراش الفيلم تع البارح ...انو مايدخلش عليا وانا نصلي ويكمل شغلو ... حل الباب عليا وقابلتني فيقورتو ... عقدة تع حواجبو وهو يخزر فيا تحولو لتقزز وغضب ... بضحكة مستهزأة قال 

إسلام:زعما تخدعي فينا بصلاتك ؟ كي تكملي شغلك هبطي للتحت تديريلي الفطور 

كملت صلاتي وقرجومتي ترجف...كان كل سجدة ندعي ربي انو يخرجني انا ووليدي من هاد الحالة ... ماقدرتش نزيد نتحمل كثر ... طلع هو عاود رجع منين جا وكملت صلاتي بالدعاء... نحيت طقم الصلاة تاعي ورحت خبيت هادوك البقع السوداء في وكهب ...يكره يشوف فيهم ...وعما ماشي هو لي دارهم ؟ ...كرهت من هاد المعيشة خلاص ...لازم ندير اي حاجة ...ماعندي ني والدين يحامو عليا ونتكل عليهم ...اصلا هادي الغلطة تاعهم ! زوجوني بواحد كبير عليا بقرون ...بواحد مايعرفوش اللقب تاعو ...لي كان يهمهم هو يليكيديو بنتهم الصغيرة ...بعد ماكملت هبطت ليه ... خطوتي كانو مايتسمعوش ...دخلت للكوزينة وتقابلني ديك الريحة القاوية تع الشراب والدخان ...استغفرت وغلقت نيفي وكملت طريقي بش نديرلو الفطور يرهج ... حطيتلو الفطور ورحت ليه للصالون كان متكسل لتم وقلت 

إلهام:الفطور راه واجد ..

ماريبونداش عليا ...المهم ...رحت طلعت شوية ماكلة لوليدي اياد لي كان فشومبرتو ... يادرا اذا سمع للمداربة تع البارح ؟ نتمنى انو ماسمعهاش... دخلت عليه ولقيتو قريب للباب وكأنو موجد روحو بش يبعد على الباب ... تبسمتلو  وقلت بصوت حنون كان يخبي بزااف 

الهام :هيا وليدي ني جبتلك فطورك ! 

عمرو خمس سنين  وانا خمسة وعشرين ... قرب ليا بخطوات يبانو خايفين وقال بهدوء تام 

اياد: ماما ...راكي مليحة ؟ 

مسحتلو على شعرو غير بلاعقل وقلت نطمن فيه مالغري حاجة ماكانت مليحة 

الهام: راني مليحة الحمدالله ونتا وليدي ؟ رقدت مليح ؟ 

اياد : شفت كوشمار...بابا ...كان يضرب فيك 

تجمدت في بلاصتي وقربت ليه بالزربة معنقاتو بلافورص ونمسحلو على راسو ونطمن فيه ونخلقلو كذبات 

الهام :مكان حتى حاجة هداك كان غير كوشمار ماشي مليح ... هيا اشرب حليبك قبل لا يبرد 

...

بعدما خليت اياد فشومبرتو نمنعو من انو يحتك بباباه بزاف نخاف لايلحق ليه ... كنت فالكوزينة كي عادتي نطيب ...جاني صوت قاوي خطفلي قلبي ... وصوتو لي كان اكثر حاجة سكنت فيا الرعب... خليت كلشي من يديا ورحت نجري لشومبرة تع اياد ... النفس راحلي كي شفت الجسم تاعو الكبير رافد وليدي الصغير لي داير قد حبة فولة بيد وحدة وجابدو من الكول .... توسعو عينيا كثر كي شفت موجد يدو بش يضربو لوجهو ...وبلا سبة ! 

جريت بخطوات ماعرفتش كيفاه حتى لحقت لتم وجبدت يدو بالقاوي خلاتو يطلق اياد ويطيح فالارض ... بصح في عوض مايضرب اياد عاود ولا ليا ...مرة وحدوخرى ...وقدام وليدي لي نخاف انو يشوف قطرة دم ...وهنا قررت نتحرك ...بطريقة او اخرى حانرجع الضربة عشرة خطرات !

المقدمة*

هاي عليييكم💖😁 كرونيك جديدة ونوع جديد من اقصص راه جاكم ✨ بن ني حابة نوضح حاجة انو الكرونيك خيالية ...وتاني ماتحكموش على من المقدمة🌚 هادي غير مقدمة صغير خفيفة ظريفة ...المهم 🙃✨

حاجة وحدوخرى الشخصيات حانخليهم هكا شوية غامضين امبعد مانعرف اذا نحط الصفات ولانخليهاليكم تتخيلو الشخصيات تاوعكم وصفاتهم الخارجية والداخلية 

هاد الكرونيك حاتكون بزاف مختلفة على لوخرين وزيد واقيل لأول مرة حانكتب حاجة فيها الدرامابهاد الكمية من المقدمة🙂 بصح راح يكون النوع تاعها : غموض - تحقيق- اكشن-رومانسي (باينة من وقتاه اناستازيا تكتبلك حاجة بلا حب ؟)

الخاوة ماتتكرنجوش على اسلام يرحم باباكم ✨راه غير شخصية ضائعة هي تاني وحانحاولو نعاونو 😊

مهم: الفكرة تع Ilham's pov(ليراهي الفوق ) ماهيش الفكر. تاعي لقيتها عن كاتبة انجليزية عجبتني قلت بلاك حانستعملها ... ونتمنى برك انو ماراحش نتحط فمشاكل بسبة سطر 🙂علاخاطر ماخصنيييييييش وادعولي ماراحش يكون حاجةقراف ... المهم انا قلت بلي ماش تاعي فهمت فهمت مافهمتش الله يسهل ✨(ديجا شكون حايقرا الكرو تاعي )

تابعو القصة ني متحمستلها قبل ماتبدا😍🥰