الوريثة الوحيدة (باللهجة الجزائرية)

13

دخل كريم هاديك الدار وفي ظهرو سلاح كوني خرجلو اسلام ، كانت ساحة الجريمة مزالها والدم لصق لتم، بدات الغبرة تتحط على الدار هاديك وكان كاين واحد البرود والهدوء يخوفو ،راح ديراكت لشومبرة تع الهام وغير حلها كان فارغة كيما خلاها وباردة ، مشاعر الهام كامل كانو لتم ، تمشى بخطوات عديدة للطابلة هاديك يحوس على كش حاجة ممكن حاتعاونو لابغا بكش حاجة صغيرة ، حتى واذا كانت في شومبرة خاطية قاع ... بصح لي لقاه بين هادوك الورق ماكانش متوقعو ،كانت قطعة تع لالام ملطخة بالدم والورق هاداك ملطخ بالدم ، وهاد الشي كان تحت الغطاء تع الطابلة، خلاتو يخمم في بزاف صوالح، واهمها ولي خوفاتو ، انو تكون الهام...

 دخل للكوزينة هاديك وقعد يخرب فالقجور كشما يلقا وكان كاين فالبوطاجي واحد ستة مواس واقفين على باطتهم ، وروماركا بلي خص واحد منهم ... والمشكل ماشي هنا ، المشكل انو النهار اللول لي جاو فيها لهاد الدار كانو في ستة لتم... طلع الكاميرا وصورها. وكمل راح للفريجيدار لي كانت تفوح منو ريحة عيانة قراف  ، وقال انو ربما كان كاين لحم وفاح لتم ، بصح لي لقاه لتم كان اكثر من مجرد لحم ... خلاتو يولي بخطوات مرعوبة للور 

كريم :لا حول ولا قوة إلّا بالله...

...

"كريمة 21 سنة ،حابسة قرايتها وكانت تتلاقا مع حكيم ومرتو فالعادة بالخفاء ...علاحساب اقوال الجيران ووش شافو ، يقولو انها كانت تخرج من الدار بالتخبية وفي يديها حاجة وكي تدخل تدخل تاني بالتخبية، بصح عندها اشحال ماجاتش... وللأسف الشديد لقيناها ميتة وراسها فالفريجيدار..."

خزر فيه ياسر لي يخدم معاهم بعد ماغلق الملف تع كريمة الضحية الثالثة فديك الدار وقال بينما لابوليس كانت داخل هاديك الدار تلز فالأدلة للجريمة الثالثة 

كريم: انا دخلت بش نحوس على حاجة تقول بلي سليم لي قتلهم ...بصح هاد الجريمة ...امبوسيبل يكون هو ، السيد البارح طلقوه وراس المرا الدود ناض فيه ، مما يعني انها ماتت عندها كش خمسة ايام؟

حرك ياسر راسو بتفهم وقال 

ياسر :كش ما لقيت كي جيت 

كريم:واحد من المواس راه ناقص ، مما يعني انواستخدمها كأداة الجريمة ،ويخصنا دوك الجسد تاعها والاداة تع الجريمة ...(تنهد) وفوق هاد الشيئ... علابالك بلي الطفلة لي كانت هنا ... سيرين ... تبين انو كانت تسيي تنتاحر كي كانت محبوسة هنا ... مالازمش يعرف آدم 

وقبل ماينطق ياسر جاه واحد البوليسي يلهث من الصدمة وقال 

البوليسي :لازم تشوفو هاد الشي

طلع كريم من الارض بعد ماكان يشوف تحت سرير شومبرة حكيم ومرتو وكانت صدمتو اكثر من اي شيئ... وش هادا ؟ شكون لي قتل ؟ شكون لي دار هاد الشي وعلااه؟