الوريثة الوحيدة (باللهجة الجزائرية)

15

حط السنيوة قدامها وفيدو لوخرة بومادة ، كانت مغطية روحها مليح باش مايشوفهاش وخاصة ليتراس هادوك الزرقين 

آدم: كولي 

بلامايخزر فيها حتى ، ريح فالكرسي لي كان قدام سريرها وحرك هاديك لاسوب بالمغرف باش تبرد شوية ، بان على وجه الهام التقزز من ديك الماكلة 

الهام:ما...مانيش جيعانة 

عمر هاديك المغرفة وحط يدو التحت باش ماتتفقش وقربهالها ورفد راسو ليها  بتاع كولي ، بان التردد على وجهها بصح كلات هكاك ...والمرة الزاوجة رفد طرف خبز عطاهولها 

آدم:كولي الخبز باش تشبعي 

حكماتو وقدرت تحس بصباعتيه ،خزرت فيه وطلع عينيه ليها ... جبدت يدها والخبز هاداك ديراكت وعاودت هبطت عينيها وهي تشوف فداك الخبز تسيي تفتتو مورصويات صغار باش تاكلهم واما هو كان يمدلها تاكل لاسوب ...وفالخبزة الزاوجة حكمها وفتتها هو اما هي ماكان عليها غير تمضغ وتبلع ، دقايق برك وسمعت الحس تع وحدين يكلعو الدروج بالزربة واصوات مخلطة حتى طلت 

مليكة وجات جارية ليها تعنق فإلهام 

مليكة:بنتي سيرين ! وش صرا ؟ راكي مليحة؟ 

جبد آدم روحو وخلا مليكة تريح وكان عبد الرحمان وعبدالسلام جدها غير كيما وصلو مع سهيلة، قربت سهيلة لعند الهام وراح آدم سلم على جدو وعمو وقال بتفاجأ 

آدم:مارحتوش للعرس ؟ 

دارت مليكة بلاماتخلي واحد يجاوب عليه 

مليكة :وش من عرس يرحم باباك ، عرس الفعات مانقدرلوش حسباتلي راني في غابة ...ماكانش العرس اذا بنتي سيرين مريضة

عبدالسلام:هادوك اللفعات نتي لي جبتيهم للدار !جبتيهم وحصلتي 

خزرت فيه بالتشناف وعاودت ولات وكمل آدم

آدم:جدي ! ماتقولوليش نتا وجداتي خليتو العرس نتوما هوما الصح فيه؟

عبدالسلام:وعلاه هاديك راح تخليك تريح وتفهمها بلي العرس حنا ماليه؟ 

عاودت خزرت فيه كي كانت توكل فإلهام بصح هاد الخطرةمنكثرة الكلمات والزعاف سكتت وكمل عبدالسلام 

عبدالسلام:وزيد كيما قالت ، صحة حفيدتي قبل كل شيئ

مليكة:يرحم داك الفم ،قريب ماقتلك الاسنان لي ركبتهم بلافايدة ،خسارة دراهم 

قاطعهم عبدالرحمان باش ماتنوضش كحلة 

عبدالرحمان :خلاص ماتدابزوش راكم خوفتو الطفلة، سيرين بنتي راكي مليحة؟ 

الهام:راني مليحة يابابا ، كون رحتو للعرس مابيا والو ...غير شوية عيا 

سهيلة :كيفاه هادي نروحو للعرس ونخلوك هنا ؟ العرس ياخي جايين وراح يعاوجو يتزوجو بصح بنتي ماتتعاودش