❗كرونيك جزائرية ❗
النوع:غموض -اكشن-دراما-رومانسي-جريمة
وش راح يصرا نهار نولي للدار لي حاولو يقتلوني فيها علاخاطر انا هي الوريثة الوحيدة لأكبر ابن فالعايلة ؟ واهم من هاد الشي...كامل حابينني نموت...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
هبطت بهاداك الزعاف لي كان فيا وكان اي واحد يقربلي راح نفرغ زعافي عليه ، اول ماهبطت هادوك الدروج ولمحت قامتها القصيرة تلبس في وليدها حسيت براحة كبير فقلبي بصح فنفس الوقت كنت قادر نبكي بذيك اللحظة ، راهي قريبة ليا ، راني قادر نخليها ليا ، بصح فنفس الوقت راهي بعيدة علي كل البعد ، كي النجمة تلمع بين عينيا تبانلي قريبة علي بصح هي بعيدة عليا حتى ولكان ندي عمري كاملة نتمشى ليها مانلحقش... وهادا لي خلاتني نحزن كثر واكثر... مل مانشوف وجهها ... كانت تخليني نفرح بوجودها ونحزن لبعدها... اذا كان كاين نهار لي راح تكون فيه ليا ... راح نصبر لداك النهار ، لابغا نقارع قرون وقرون، واذا كنت حاب نفوت حياتي مع الشخص لي نحبو راني حابها تكون معاها ، كل ثانية من حياتي وكل رمشة نديرها تكون معاها وليها برك ... برك كون تعرف شحال راهي تعنيلي ... واشحال راني مشتاق ليها
اول ماتشاوفنا فيها حسيتها تتجنبني ولا حزينة ماقدرتش نفهمها حتى قالتلي بلي راح تولي مع عمي مالغري قتلها بلي نوصلك قبيلة ، غاضني الحال بصح قلت نخليها على راحتها خير ... اذا كنت حاب نكسبها لازم نسايسها ومانفرضش روحي عليها ... خرجو من الدار وآخر نظرة ليها كانت السبة لي خلاتني نولي للدار تع عمي ...تحملت وماقدرتش نبعد كثر عليها ...بعد هاديك السهرة وبدات العايلة تتفركت بقاو البنات وانا مع جداتي ،كانت صونيا لتم بصح نورمال كنت معاملتها كيما بنت خالتي ومزالني نعاملها هكا وماراح تتبدل اي حاجة ، حتى بعد هاداك الزواج الفاشل، راح تبقى بنت خالتي على كل حال ، سقساتني جداتي على الخدمة تاعي ولافير تع سيرين(الهام) وين راهي لاحقة وحكيتلها بلي راح يطلقوه مي تحت الرقابة ، علاخاطر مكان حتى دليل تقول بلي هو لي قتلهم ، بصح ماراحش نطلقو ، اذا ماخليتوش يتعفن فالسلونة مانتسماش آدم ... اذا مادخلتوش بيديا هادو مانيش آدم ...ووافقتني جداتي الراي على انو لازم يتلقى العقاب الصحيح ...السيد مرمدها بالرشاوي فالمحكمة حتى عفاوه مي كي تجي ليا هاد الصوالح مايخدموش فيا ... كان كريم حضر المحاكمة هاديك وخبرني بالحكاية بعدما كنت نقارع لسيرين تخرج من الحفافة ... ماخلانيش حتى نجي وقالي نلتها بصوالحي خير ... كملت السهرة وخرجت وليت للدار تع عوي مالغري حلفت فيا يما نحط رجلي لتك ، بصح شكون هي من غير يما لي ولدتني ؟ تخطط حياتي كيما يهواها زعما حياتها هي ... اذا كانت حابة صونيا معاها علاه ماتعيشهاش معاها علاه حتى تلسقها فيا ؟ اذا كانت حابتني نقعد فالدار قدام عينيها وانا بهاد العمر غير تنساها ، راني راجل وعندي مشاغل وحياة ... دخلت للدار وكانت هادية كامل راقدين ، طلعت بلاعقل لليطاج لي فيهم الشنابر وكانت شومبرتي اونفاس شومبرتها ديراكت وقدامي شومبرة اياد ومن الجيهة خلاف شومبرة عمي وعمتي وشنابر خلاف تع ضياف والخردة الزايدة كي حال كل دار جزائرية ...توحشتها ... حبيت نشوفها لأخر مرة قبل مانغمض عينيا وانا ندعي تخرجلي في منامي ... دخلت شومبرتها بلاعقل وكانت راقدة بطريقة فوضوية ، كان الضو تع البيرو تاعها شاعل وستيلوياتها موزعين شرق غرب ، رحت لتم وسقدتلها صوالحها بلاماندير حس حتى لقيت هادوك الورق مشمخين وخزرت فيها بلاعقل وفالورق لي طاحو دموعها عليها كون جيت قادر ندي همومها كامل كون راني ديتهم عليها ، طفيت هاديك اللمبة ومابقا غير الظلام في شومبرتها وضوء القمر ضوا الارض ، قربت منها مرة خلاف وجبدت عليها الغطا تأكدت انها مغطية مليح وسقدتهلا راسها لي كانمعوج بالكامل علاهادي نسمعها كل صباح تشكي لعمتي بلي رقبتها توجعها وماعلابالهاش علاه ، الطفلة قريب تطير رقبتها ... وخرجت بلاعقل بعد ماتطمنت عليها وتمنيتلها انو تكون ليلتها بلا كوشمارات ، بلا بكا وبلا هلوسة ... وودخلت لشومبرتي رميت روحي فالسرير عيان ميت ، وانا نخمم فواش راح يصرا ... ماراحش تخلاص بسلام ... يما ، وعمتي الوسطانية وعمومي لي هنا وفالبلاد ، هادو كامل راح يحوسو يتخلصو منها ، الوريثة الوحيدة !
يُتبع...
في ميزكم علاه الهام شمت ريحة جديدة في شومبرتها🙃✨
1- مجرد هلوسة من راسها برك
2-ريحة جديدة شراتها سهيلة وجابتها معاها
3- تسلل واحد القط لشومبرتها علاخاطر توحشها وحب يتطمن عليها
