طفات السما وطلع القمر والنجوم بانو ، كانت الحالة فالريف بزااف كالم وبزاف نقي...بعيد على المشاكل تع المدينة ، بعيد على الماضي تع الهام ، قدرت تركز... لحق العشا وريحو كامل فالطابلة ومل واحد مركز في ماكلتو حتى نطق آدم لي كان مقابل عبدالسلام
آدم:جدي ، غدوة لازم نولي ...عندي خدمة ويما راهي تعيط باش نولي ...
عبدالسلام :ايه ، طريق السلامة وليدي ... بصح تولي ؟
آدم:ايه ...نكمل واحد الشغل ونولي
وخزر فإالهام لي عينيها ماطلعتهمش من طبسيها ،بصح نطق اياد
اياد :خالي ! وين راك رايح !؟
تبسم آدم ومسح على شعرو وقال
آدم:ني رايح للخدمة إيادو ...مانطولش ونولي ...
مليكة:هييه ... روح ياوليدي مانحكموكش ... بلاك على روحك برك
حرك راسو بطمأنينة ونص عينو مزالت على الهام
آدم:ماتخافيش ... غير نكمل شغلي ونولي، وليت نكره المدينة
تنهد عبدالسلام وقال
عبدالسلام: إلهام بنتي ... آدم وليدي ...وش رايكم تخرجو من الدزاير ؟
طلعت إلهام راسها بالزربة بتفاجأ وحتى آدم تشكل في وجهو عقجة وكمل عبدالسلام
عبدالسلام :علابالي ...حتى انا هادا وين جاتني الفكرة ... آدم وليدي ... نتا يماك راهي ملسقاتك مع بنت خالتك لي عندك عام برك زواج معاها بصح تطلقتو هنا برك،وراهي حاباتك تولي ليها ،وكثر من هاك راهي تسيي تبعدك علينا ... مانقطرش نتخيل حجم الضغط لي فيك ... وبنتي إلهام ...تبانلي كون تبدلي محيط بعيد على العايلة راح يكون احسن لك ، واكثر من هذا ...راح تكوني الوريثة تع باباك ... راهم كامل... كامل يعسو فيك وماتعرفيش وش راه يقارع فيك ...
آدم:تسما ... راك حابني نخرج مع إلهام ياك؟
حرك راسو بنعم وكمل
عبدالسلام :اونموا تكون معاها لهيه وماتبقاش وحدها ... خممو فهدرتي ...حنا تاني مابقالناش بزاف ونولو للدار ،ومانقدروش نخلوالهام هنا تسما لازم تولي معانا ، وكي تولي معانا معنتها راح يحوسو عليها
...
كانت مريحة تشرب في قهوتها ، رجل على رجل تقارعفي مرا تدخل من الباب الكافيتيريا ... حتى دخلت مرا تبان فالستينات من عمرها ،كان المظهر تاعها يبين بلي حالتها عادية بصح من الناس لي يحبو رواحهم حتى اذا لازم ينحوها من لحم ناس وحدوخرين ...ناضت سلمت عليها وريحت هي لوخر
فوزية :وش درتي فيها ؟
تنهدت كريمة وقالت
كريمة :وش ندير فيها ! من النهار لي ولات ماقدرت نرقد ... علابالك بلي الورث هاداك كامل عندو ماليه دوك ...لازم نحوسو على حل ...على حل يخلي داك الميراث بين يدينا
سقدت فوزية روحها وقربت من مليكة وقالت بصوت هادئ
فوزية :بلاك ماسمعتيش ...بصح ، راجلها ... سليم ... لقاوه مقتول
توسعو عينيها وبدات تسمي وتترحم عليه وقالت بصوت عالي خلات الناس كامل يشوفو فيها
كريمة:كيفاه !! كيفاه صرات !!
فوزية :ماعلابالييش...بصح سمعت بلي ماشي غير هو لي مات ... معاه واحد المرا اسمها كريمة ...
كريمة :كيفاه هادي ! حاب تقولي بلي كان يخون هاديك الطفلة !؟؟
فوزية :بلااك ... بلاك هاديك الطفلة لقاتهم مع بعض وقتلتهم ...هاني لقيتك كيفاه تبعديها من العايلة ...
تنهدت كريمة بتفكير في هدرت فوزية وقالت بتردد
كريمة :اواه ... يفيقو بلي انا مولات الخدمة تخلاص عليا مال ...
فوزية : واذا ماحركتيش روحك وتجري على حق ولادك ماغادي يصحلك فرنك !
صح ... راهي تدير هادالشي كامل علاجال ولادها ، بصح كون يعرفو بلي هي لي راهي تشهر على الهام غادي تروح هي وولادها فالهلاك .. ديجا الكبار تع الدار راهم مع إلهام ... تنهدت كريمة بتعب وقالت
كريمة:مايهمش ، ماشي علاجال هادي لي عيطتلك ... ياخي قلتيلي بلي كاين أرض للبيع ! بعتوها ولامزال؟
تنهدت فوزية وبان علامة الغضب والانزعاج في وجهها بصح قررت تتغاضى عن الامر وقالت بنوع من اللمعان
فوزية :عرفتها ! جبتلك العقد ديراكت ...
كريمة:اوكي مالا نشريها عليك ...
...
فوزية .:خلاص خلاص ...دوك نشوف كيفاه نبيعهالها ....مايهمش ...واحد ماراح يفيق ، غاذي تكون غير هي وولادها فالحكاية و نلحقو للعايلة ... مابياش الدراهم ...بيا هاداك الراجل ... غادي نخسرلهم حياتهم كامل وننسيهم فكلشي... عيطتلي قبيلة بلاك علاجال الأرض ... غادي نبيعهالها اليوم وننقل الملكية ليها خلاص....
وبعدها ديراكت كوبات على التلفون وهبطت من الطونوبيل للكافيتيريا... بلاك واحد ماعلابالو ، بصح هي علابالها بأخطاء العائلة ...الكبار فيهم والصغير
يُتبع....
أنت تقرأ
الوريثة الوحيدة (باللهجة الجزائرية)
Romance❗كرونيك جزائرية ❗ النوع:غموض -اكشن-دراما-رومانسي-جريمة وش راح يصرا نهار نولي للدار لي حاولو يقتلوني فيها علاخاطر انا هي الوريثة الوحيدة لأكبر ابن فالعايلة ؟ واهم من هاد الشي...كامل حابينني نموت...
