آدم:الطفلة راهي هنا ؟
اومئ كريم براسو ووجه نظرو لدار الايتام وقال
كريم :ايه ، بنت اسلام المخفية راهي هنا ...والعام الجاي تخرج من دار الايتام
آدم:عشرة سنين ... على الحكاية وحتى لدوك نفيقو بلي الحكاية مزيفة والهام كانت لتم ...
تنهد كريم وقال
كريم :ماعندنا مانجيرو ، فهاداك الوقت كونا غير كيما دخلنا مانعرفوش ... بصح دوك ...هاديك الحكاية كاملة مرتبطة ببنت عمكواسم عايلتك ...لازم نلقاو حل علاخاطر الحكاية غادي تروح بعيد
آدم:وش لي خبرك بلي غادي تروح بعيد ...
هنا آدم عرف بلي كريم علابالو بعفسة قادرة تمحي اسم الهام ، قادرة تحطم حياتو ... بصح كريم اكتفى بالصمت وقال
كريم :كي يجي الوقت ونقولك ، كون نهدر دوك غادي تموتلي هنا وانا مانقدرش نرفدك راك قد البقرة
جاحيرفد يدو ليه حتى خرجت مرا من باب الدار اليتامى وقالت بابتسامة
خيرة :اوه ! جيتو ... مرحبا بيكم
اومئوا ودخل موراها وقعدت تحكي على كيفاه راهي الحالة ، كانت الدار واسعة وقديمة شوية ، باردة والخدامات مايشوفوش فمولات الدار كامل ، الولاد كانو يجرو منا ملهيه وآدم اكتفى بالنظر والملاحظة حتى لحقو لواحد الطفلة كانت مريحة ترسم
خيرة :سارة بنتي !
دارت ليها هاديك الطفلة ، ولي كانت تشبه بزاف لإسلام ...خزرت سارة فآدم و كريم بحيرة ، مع الاول كان عمبالها بلي باش يتبناوها بصح حتى لقات روحها مريحة فالفوتاي تجاوب على اسئلتهم لي تقول عليهم استجواب ، وصح !
آدم:كان عندك 6 سنين ...كنتي فلوتال مع باباك ومراهقة اسمها الهام ...تشفاي ؟
خزرت سارة بحيرة مرة خلاف وخزرت فكريم لي فقد الامل فآدم وقال
كريم:آدم خويا ، نخليلك السلاحوالضرب...خليني نهدر نعرف نهدر خير منك ... راك قريب تقتل الطفلة بالخلعة
وهمس آدم محمر عينيه على كريم لي كان قدامو
آدم: نخرجو منا وتشوف شكون لي يعرف يهدر خير...
...
آدم:ألو ... راني جاي !
خزر كريم فيه كي شاف ملامح آدم تبدلو لجدية كاملة وقال
كريم :غير الخير !
وديراكت جبد لاسانتور تع الطونوبيل كي شاف آدم قريب يطير بيها ونطق آدم
آدم:غادي نستقل من منصب محقق... غادي نولي للشرطة الاستخبارية
كريم : اه ... كيفااه ؟؟؟
بلامايشوف فيه آدم كمل
آدم :هممم ...قررت فجأة انو نبدل ...المحقق ماعندوش بزاف صلاحيات... تحقيقات تاوعنا محدودة ومانقدروش نستخدمو السلاح فالوقت لي نسحقوه ، وحتى البيرو تاعنا عيان ...عيطلي الرئيس داوين وقالي بلي قبلولي المنصب
خزر فيه كريم مي ماقدرش يقول اي حاجة علاجال لافيتاس لي كان فيها
كريم :وش من منصب؟
آدم:قائد الفريق ...
وخزر فكريم بابتسامة فخر
آدم:مليحة ياك ؟
كريم :مليحة بصح كون تنقص شوية لافيتاس...تخاف ماتلحقش حتى للمركز
...
رفد يدو تحيةً لرئيس المركز ... ورجعلو بنفس التحية وهبط يدو وقال بابتسامة لطيفة
حميد : آدم وليدي ... وأخيرًا قررت تدخل للشرطة الاستخبارية
هبط آدم يدو ونحا تعابير الجدية وخلا القليل من المودة دون ان يقلل من احترام الرئيس تاعو
آدم:بعد هادوك السنين عرفت بلي التحقيق مايكفيش... راني نوعدك بلي خدمتي غادي نديرها فأتم وجه
اومئ حميد وريح بإشارة لأدم يريح تاني وقال بنوع من التردد
حميد :بصح... كاينة عفسة غادي تشقيك شوية ...
...
ماشي كش مهمة وماشي المركز عيان ، بصح اعضاء الفريق ماراهمش قابلين آدم كقائد ليهم ... رغم تحيتهم وحزمهم واستقامتهم ، هادوك العينين قادرين يكشفو بلي ماحابينش من آدم كقائد
آدم:من اليوم ، انا هو المسؤول على هاد الفريق...نتمنى انو نقدرو نتعاونو باش نسجلو أحسن النتائج في خدمتنا .
...
يُتبع ...
البوسط لي بدل ليه آدم هو الشرطة الاستخباراتية لي غادي تمنحو نطاق اوسع فالتحقيق فالقضايا لي عندو ،عكس المحققين لي يحققو فجريمة صرات ، الشرطة تمنعمن الجريمة تصرا
أنت تقرأ
الوريثة الوحيدة (باللهجة الجزائرية)
Romance❗كرونيك جزائرية ❗ النوع:غموض -اكشن-دراما-رومانسي-جريمة وش راح يصرا نهار نولي للدار لي حاولو يقتلوني فيها علاخاطر انا هي الوريثة الوحيدة لأكبر ابن فالعايلة ؟ واهم من هاد الشي...كامل حابينني نموت...
