ولات الهام للدار وكانت الدار معمرة !تقدر تسكع الضحكات تع الفاميلية من الصالون للكوزينة ... رجال ونسا وولاد صغار حتى ... كان تحس روحها غير مرغوبة فيها وانو ماشي بلاصتها ...غريبة بيناتهم ...وهذا هو الواقع ! علابالها بلي صح راهي غريبة بيناتهم ... حاجة ماراهي تتحسن في حياتها ...كلشي حابس في راسها وكأن الدنيا تقارع فيها تموت برك ... حتى حست بيد تحطت على كتفها ودارت لقاتها هناء لي كانت ملامح وجهها عادية جدًا وماكانتش قادرة تعرف تعبيرها ونطقت
هناء : وش راكي تديري هنا وحدك ؟هيا معانا
اومئت براسها ونحات خيمارها وتمشات مور هناء لي كانت رافدة كرطونة كبيرة ... حتى لقات روحها فحديقة كبيييرة وواسعة وشابة وخضرا ... قبل ماتقدر تسقسي سبقتها هناء
هناء:علابالي بلي ماعلابالكش ...راح نقولك...هنا يكون العرس ... اذا تقدري تعاونينا نبلاصيو الطوابل والكراسى ؟
تقدمت منها الهام وقالتلها
الهام: ايه نعاون ماشي مشكل ...
تمشات هناء وتبعتها الهام بينما كانت ماسكة بورطابلها وخيمارها لي نحاتو بعد مادخلت للدار ... حطت هناء هادوك الكراطن لي فيهم الديكو وقالت وكأن الفضول كان ياكلها من الصباح بلا ماتبين
هناء :وليدك ... وين راه ؟
خزرت فيها الهام وقالت
الهام:راه ...مع آدم ...اسمو اياد
حركت راسها بتفهم بينما هي كانت تخرج فالضواوي وكملت قالت
هناء : متزوجة ؟
اومئت الهام بالزربة بش ماتخليش سوء فهم وقالت
الهام:ايه تزوجت ... وراني نحوس نتطلق دوك
حطت هادوك الضواوي وخزرت فيها وقالت بنوع من القذف
هناء:ايه صح ... لقيتي عايلة عندها دراهم كثر من راجلك ... صح صح !
وقبل ماتهدرمدافعة عن نفسها جاها صوت تع راجل وماتعرفوش
محمد:وش دي الهدرة لي راكي تقوليها للطفلة !خلي هادوك الضواوي دوك نديرهم انا
خزرت فيه وقالت تشارشي فيه قبل ماتروح بلا ماتطل على الهام لي كانت فحيرة من نفسها
هناء : تفضل ...كون ماشي ماما لي قالت ماننوضكش يالعجوز كون راك تبلاصي فيهم
راحت دخلت للدار بينما الهام كانت واقفة لتم ومحمد غير كيما بان وقال بابتسامة
محمد:انا محمد وهاديك هناء ختي ... ولاد عمك الصغير نبيل ... ماديريش عليها وعلى هدرتها هكا توجور هي
اومئت بلاعقل وبتوتر حتى تفكرت خيمارها لي مادارتوش ... سوكات من بلاصتها ودارتو بالزربة بينما هو تبسم وقال
محمد:اسمك سيرين ياك ؟
سكتت الهام شوية وقالت
الهام:ايه ... بصح ... مانيش موالفاتو ... ني موالفة الهام
عاود نطق اسمها الزاوج تحت انفاسو وقال
محمد:صحا الهام ... تعاونيني نديرو هاد اللمبات ؟ هادا وين نضت من الرقاد مزالني ناعس شوية
تبسمت وقالت
الهام:ايه... مكان حتى مشكل
كانوا يبلاصيو فهادوك اللمبات ساعات تشد الهام السلوم وساعات اللمبات وساعات تبعد من البلاصة بش تشوف اذا الحالة مليحة ... مالغري انو وليد عمتها لي راح يتزوج ماشي من هاد الدار بصح الجد الكبير فهاد الدار شرط انو العرس يكون هنا ... وراهم هنا يديرو ويركبو ويوجدو ... كان محمد يسيي يجبد شي كلمات من الهام ويقصر معاها والهام فالاول كانت خايفة بصح مع الوقت كانت تحكي وتضحك مام ... وحتى كي حكاتلو على اياد وحياتها الزوجية شوية ماكانش قذوف ويروح للأفكار السلبية ولا حتى لامها ...بعد ماكملو هادوك اللمبات جا وقت الكراسى والطوابل وباقي الديكور لي لازم كامل يتعاونو فيه ... كان الطوابل والكراسى راح يديروهم الرجال والباقي كيما الورد البنات ... دخلت الهام للدار بش تكون على راحتها وتسقسي آدم على وليدها اياد ... كانت تسيي تشعل تلفونها وراسها التحت حتى حست روحها خبطت في حاجة ... حاجة صلبة ...حست بوجع راسها ...وولات بخطوات للور حتى قابلها هاداك الحيط ولي كان قدامو برك الباب تع الدخلة ...ضحكت بإستخفاف على روحها ودخلت من ديك الباب وهي تمسح جبهتها
...
هيلاااوز ✨ هادي غيبة ... راني رجعت ببارت بعد اول اسبوع تع الفروض .... بارت قصير لعلاقة الهام مع العايلة ...وش رايكم فعلاقتها مع هناء ومحمد كيفاه راح تكون ؟🤭✨
حظ موفق فالفروض ✨
أنت تقرأ
الوريثة الوحيدة (باللهجة الجزائرية)
Roman d'amour❗كرونيك جزائرية ❗ النوع:غموض -اكشن-دراما-رومانسي-جريمة وش راح يصرا نهار نولي للدار لي حاولو يقتلوني فيها علاخاطر انا هي الوريثة الوحيدة لأكبر ابن فالعايلة ؟ واهم من هاد الشي...كامل حابينني نموت...
