كريم :إييييه غبت شي يامات ربيت الحنااك !
ضربو في كتفو بإبتسامة سخرية حتى حس بعظمة تدير طق طق طق ولقا آدم قريب يتطرطق في وجهو ومزير على يد كريم
آدم:علاه عيطتلي !
طلقلو يدو وجبدها كريم بملامح ألم وقال
كريم :نتا لي يحكي معاك يغلط ! عيطتلك علاجال لافار تع بنت عمك ... طلعت الحالة كبيرة على وش توقعنا
خزر فيه آدم امبعد في يد كريم لي قريب طرطقها وقال بهدوء عكس الهياج لي كانفيه قبيلة
آدم: وش كاين ؟
تنهد كريم وقال بنوع من الغموض وعدم التصديق تقول بوارويسيي يخلي صاحبو يكتاشف النقطة تع كش جريمة
كريم :خممت كش نهار علاش إلهام مستهدفة ! علاش هي ، اذا صح القضية قضية تع ورث ولا حاجة خلاف ؟
خزر فيه آدم بنوع من التشكك وفنفس الوقت ماراهش حاب يخمم في حاجة اكبر من الورث علاخاطر هادا قادر يسوا حياتها ...
آدم:خممت...بصح واش يقدر يكون ...
تنهد كريم وقال من فوق قلبو
كريم :عمر ، أخ جدك ... تشفا على قضيتو؟
آدم :إيه ، مات بسبة لادوز الزايدة تع الدوا ! كان مريض لدرجة انو ماقدرش يفرق بين كاشية ولا عشرة ، ولا قادر يكون انتحار، بصح جامي لاكانو هاد الزوج الاسباب مقنعينني ... وش دخل عمر فإلهام ؟
كريم :كون زعما ! قضية موت أخ جدك ماشي انتحار ولا موتة نورمال ، كون زعما كانت جريمة ،وإلهام الشاهدة الوحيدة
خزر فيه آدم لمدة وقال بنوع من السخرية وعدم التصديق
آدم:إحتمال شباب ،بصح كان فلوتال احتمال ضئيل يدخل واحد ويقتلو بلامايفيق أي واحد ...
تبسم كريم وقال
كريم :عاودت البحوث تاوعنا اك الوقت ، وطلع واحد من الوثائق لي كانو عندنا مزيفة ...ساعة الوفاة كانت مزيفة ،بعد مادخلت للأرشيف وحوست على تسجيلات الكاميرة ، قبل مايموت الوحيدة ليسجلتها الكامرا ، هي الخدامة لي دخلت عليه بش توصللو الماكلة ، وبعدها انقطعت الكامرا ف23.05 وعاودت ولات تخدم ف23.15 وطلعت فالشاشة طفلة صغيرة كانت قدام الباب ، في ميزك شكون هاديك الطفلة؟
آدم: إلهام ؟...
ضربو في كتفو بابتسامة
كريم: أعطيك الصحة! غادي تقولي كيفاه اكتشفت هاد التسجيل لي ماكانش عندنا من قبل ؟ قتلك ديجا بلي الوثائق مزيفة ، فوق ما انو السيد ماماتش على الحداش ، مي تاني التسجيل عطاوهولنا مزيف ...كان لازم عليا نجيب انفورماتيسيان يقدر يحوسلي على الصح ...وعاودت جبت الملفات تع السبيطار ، السيد لي مات ، مكانش ميت بسبة لادوز ، مي كان شارب حاجة قادرة تقتلو
سكت شوية قبل مايخرج وردة داخل صاشية ترونسبرونت...
آدم:الزنبق ؟
كريم : بعد تحاليل لي درناهملقينا انو الميت شرب شاي ، وكي حوسنا لقينا ورد الزنبق فلاشومبر تاعو ، وباش تعرف بلي مات مسموم من الزنبق ... تشفا بلي لقينا قط ميت على بعد خطوات برك من شومبرتو؟
آدم:إيه ...هاداك القط الميت يخليه توجور عندو علاخاطر يحبو ... بسبة الزنبق مات ...والقط كان الدليل بلي زنبق ...بصح علاه حتى لدوك باش عرفنا ؟
كريم :علاخاطر كاين لي سبقنا ومحا الادلة ومسرح الجريمة ....تشفا حنا كنا لاتيين بحكاية تع المخدرات ،ورحنا للمسرح الجريمة بعد نهار من لي صرات وقالولنا بلي ماتوشاو والو ، حتى انو ماخلاوناش نهدرو مع المشتبهين بيهم وفاللخر مامديناش للقضية اهمية
سكت آدم شوية وقبل مايهدر كمل كريم
كريم :راحتلك عفسة ...الهام وش دخلها ، والطفلة ديك شكون؟ ... هاداك النهار ، الهام كانت فداك لوتال
توسعوعينيه وقال بدهشة
آدم:كيفاه ؟
كريم :ماعلاباليش... مي كانو لتم لقيت تسجيل تعهم بإسم راجلها السابق، وهاديك الطفلة لي بانت فالكامرا ...
سكت كريم وكمل بتردد
كريم :بنت إسلام ...سارة.
يُتبع....
بارت قصير لأهم الاحداث 🤍
أنت تقرأ
الوريثة الوحيدة (باللهجة الجزائرية)
Romance❗كرونيك جزائرية ❗ النوع:غموض -اكشن-دراما-رومانسي-جريمة وش راح يصرا نهار نولي للدار لي حاولو يقتلوني فيها علاخاطر انا هي الوريثة الوحيدة لأكبر ابن فالعايلة ؟ واهم من هاد الشي...كامل حابينني نموت...
