الوريثة الوحيدة (باللهجة الجزائرية)

17

طلعت عينيها ليه وكان يشوف فيها بكل هدوء ومانحاش عينيه حتى بعد ماخزرت فيه ، كانو مريحين فالصالون الهام لاتية بإياد تلعب معاه اما هو كان مكتفي انو يخزر فيها ، وقالت بتساؤل وتوتر 

الهام:همم؟؟

تبسم شبه ابتسامة وميل راسو كثر وقال 

آدم:ماكانش علابالي بلي في عايلتنا كاينة وحدة شابة كيفك 

حبسلها النفس وعينيها تبلوكاو باه يرمشو ، حست بقلبها يخباااط وهي تسمع هاد الكلمات ربما لأول مرة ... قدرت تسمعهم من ناس خلاف بصح بنيات مختلفة ...هاداك الاحساس من قبل لي كان عبارة عن تقزز وخوف بصح دوك؟ كي قالها هو؟ العكس تمامًا ؟ تلمعو عينيها لي كانو طافيين ، وقبل ماتقدر ترد دخلت القوات العسكرية ، حمحم ودخل عبدالسلام للصالون وين كانو مريحين ، ناض آدم من بلاصتو لاش يخليلو بلاصة ليه 

آدم:جدي ! ارواح ريح لهنا 

همهم مرة خلاف وراح لديك الجيهة بينما آدم ربح قدام الهام متأكد من انو يخلي مسافة بيناتهم باش ماتديرونجاش وبقاو ساكتين حتى نطق عبدالسلام ...ماشي نطق نطق ، بصح طرطق بومبة 

عبدالسلام:نتوما ماتحشموش وتتزوجو ؟

الهام كانت تلون مع اياد زلقلها القلم من يدها وآدم تبلوكا في بلاصتوكي كان راح يريح وخزرو فيه بإندهاش وكمل عبدالسلام يشوف سوغتو فردة فعل تع آدم

عبدالسلام:هيه! وش فيها؟ راكم احفادي العزاز وباينة راح نزوجكم للعزاز عليا... مالغري آدم كان مزوج مع هاديك العقرب لي ماعلاباليش ميمبا كيفاه دخلت للعايلة وسيرين بنتي راح تبانلك واعرة ، بصح اذا كان مع وليدي آدم؟ راح تعيشي حياة خير من ...قبلها

خزرت فإياد لي كان يقرعج هو تاني ،وقالت 

الهام:ايادو وليدي ، روح عند جداتك راهي تعيطلك ..دوك نجي ونلعبو برا صحا ؟

إ‍ياد باينة بلي مالاحش يتحرك ، دار لعند الهام وقاللها بصوت حماسي خلاها تحمار كثر 

إياد:تسما خالو يولي بابا ! ني حا يكون بابا ! 

تبسمت بتوتر وقالتلو بالزربة وهي تخزر فعبدالسلام لي قريب يتطرطق بالضحك وآدم حشمان مدور وجهو كامل...

الهام:روح روح ...دوك نجي 

خرج اياد وبقاو هوما الثلاثة ...حتى نطقت الهام بهدوء فجأة رافضة الفكرة بكل إحترام

الهام:مانقدرش ياجدي...عندي ظروف ...مايسمحوليش نعيش مع انسان خلاف ونخسرلو حياتو ...

فهاديك اللحظة تمامًا كان آدم حاب ينطق ، حاب ينطق ويقول بلي مايهموش ظروفها وحالتها ...اذا كان معاها ...راح يتأكد من انها تريح...راح يتأكد من انها تعيش حياة الاحلام...بصح قرر يتراجع عن هدرتو وشافو عبدالسلام كيفاه لمعو عينيه فديك اللحظة وانطفاو مرة خلاف ؛تنهد عبدالسلام وقال 

عبدالسلام:بصح يابنتي...راني متأكد بلي اذا كان آدم راح ترتاحي بلبزاف ...

الهام:علاهادي ياجدي ...مانقدرش نتزوج بآدم ...راه انسان عزيز عليا وراح نخسرلو حياتو برك ... خلي هاد الموضوع لامبعد ياجدي

سكت عبدالسلام وقعديتفرج فيهم وسوغتو في آدم لي بان على وجهو الحزن والخيبة ... بصح كملت الهام 

الهام:بصح ... اذا جا النهار وين حبيت نبني حياتي مرة خلاف ...راح نخبرك ياجدي...راح نقبل هاد الزواج ...

تبسم ليها وناض مرة خلاف رايح ليها ،اول مالحق ليها مسحلها على راسها وقال 

عبدالسلام:كيما تحبي يابنتي ... راني هنا باش تستعمليني 

وقبل ماتقدر ترد قال بنب ة حماس 

عبدالسلام: حقااا ! نسيت ماوريتلكش الاعواد لي عندنا 

ناضت من بلاصتها بابتسامة وحماس تعيط لإياد يجي معاها يخرجو لبرا ...وين كان المنزل تاعها الجديد ...راهي في سيمانة وقادرة تريح راسها وانتعشت حياتها مرة خلاف ...مكانش حس وكل نهار تخرج مع اياط وآدم لبرا يحوسو بأراضي جدهم ... بدات تتعرف على اهل القرية غير بشوية ولي خلاها ترتاح بزااف وتخرج من قوقعتها...بصح هاد الشي ماراحش يدوم...

يُتبع...