اوتار
البارت الاول ..
للكاتبه :اية علوان
......
• الثاني من أكتوبر
كالعادة...
ما اشوف شي منه غير عيونه البيضاء وجسمه الاسود يحيط بيه من كل الجهات ، مدده جسمي على الفراش وعيوني على السگف ،دموعي تطيح وحده ورا الثانيه حسيت بقطرات ماء وصلت لداخل اذني ، من شدة الخوف لازمة الفراش بيدي ماتحركت ابد ،اخاف انطق اخاف اصرخ وياخذ روحيي ، احس بنبضات گلبي تتسارع وحده ورا الثانيه كأنما بسباق ...
رن المنبه ..
ساعه ٦:٠٠
واخيرا اختفى
ضليت صافنه ع سگف الغرفه واخيرا شفت اللون الابيض للسگف واشعة الشمس دخلت لداخل الغرفه
كمت من الفراش ،مسحت دموعي اخاف تشوفني وتسئل شبيه، رحت بأتجاه المرايه شفت وجهي المخيف
عيوني الكبار يحيطهن الهالات السوده وشفتي صايره بلون الابيض،
الطابق الاعلى من شفتي لونه ابيض عكس لون بشرتي والطابق السفلي من شفتي كله جروح وتشققات من العطش
اما لون بشرتي كل يوم يصير اغمق من امس
طلعت من غرفتي واتجهت للمغسله ، غسلت وجهي بمي بارد رغم جان الصبح وهيج وقت الجو يكون بارد
رغم المي البارد الي امتلئ بوجهي بس ماحسيت ببروده المي ، اتجهت للمطبخ طكيت بيضه وحطيت الجاي ع النار ، اخذت خبزه وقسمتها للنص
القطعه الاولى رجعتها وي باقي الخبز والقطعه الثانيه خليت بيها البيضه ولفيتها بقوه اخذت استكان الجاي وشربته ، بعدها رجعت لغرفتي اخذت فرشاه الاسنان وصابونه ورحت للمغسله ، فرشت اسناني، شفت فرشة الاسنان كلها دم ، رجعت غسلتها وغسلت اسناني من الدم ، اخذت الصابونه وغسلت وجهي
رجعت لغرفتي اخذت قميص طويل وبنطرون عريض وحذاء بسيط لسه عندي من السنه الراحت
لبست شالي واخذت جنطتي وطلعت
فتحت الباب بهدوء حتى ماتكعد من النوم ، فجاه
لحن :راح ترحين للدوام
وتر : ايي اليوم اول يوم
لحن : زين عندج فلوس
وتر : عندي الف دينار
لحن : المن يكفيج الالف ، دقيقه اجيبلج فلوس اصرفيهن هناك
وتر : ما اريد اصلا مراح اشتري شي ، بعدين خليهن مصروف للبيت ، راح اروح ديري بالج على امي
لحن: دقيقه يمعوده بس اخذي كم فلس احسن مما تضلين بدون شي
وتر: دخلت للغرفه حتى تجيب مصروف الي
ما اريد اخذ يادوب يكفنه مصرف للبيت نوب اخذ منها
طلعت وسديت الباب وراي ، دك الهورن مال الخط رحت على السريع وصعدت بالسياره وسديت الباب رحت صفيت بالقرب من الجامه حتى اشوف كلشي من بعيد
انطلق الخط
بيتي بعيد عن الجامعه لذلك اخلي الخط ياخذني
بعد مامشى مر ع الطريق العام
اباوع من كل جهه اكو بشر
نساء ،رجال ، اطفال
بكل مكان ..
ضليت شفتي تكرر اخر كلمة فكرت بيها
بشر ، بشر ، بشر ، بشر ،بشر ......
لاكثر من مئه مره كررت كلمة بشر ، حتى نسيت الطريق ونسيت اني وين
ڤلانتاين : وتر ...وترر
وتر : سمعت اسمي تكرر اكثر من مره وهالشي خلاني اصحى على نفسي وانتبه اني وين
ڤلانتاين : شبيج
وتر : مابيه شي
نزلت من السياره وسديت الباب وراي عبرت حافه الطريق ووصلت لباب الجامعه دخلت للتفتيش
المفتشه : بطاقتج
وتر : هاا
المفتشه : ماما بطاقتج وين ما اكدر ادخلج بدون بطاقه
وتر : لا يالله نسيت بطاقتي بالبيت شلون بيه هسه ياربي
ست حبابه بس اليوم والله نسيتها بالبيت
المفتشه : ماما شلون ادخلج وانتي ماعندج بطاقه شنو الي يثبتلي انتي طالبه هنا
وتر : والله طالبه واذا تردين تاكدي من اسمي بالقسم
المفتشه : تمام سجلي اسمج هنا والقسم
وتر : بعدني باول يوم وهيج تعرقلت اموري ربي دخيلك ساعدني هاي اصعب سنه دراسيه ساعدني يارب وخلصني منها
سجلت اسمي وقسمي والمرحلة
وبعدها دخلت
اخخ يمه رجع الدوام واني حيل مابيه شلون حتخلص هالسنه ما ادري
ڤلانتاين : تعالي منا خل نصعد بالباصات احسن
وتر : مشينه مسافه الطريق وبعدها صعدنه بالباص
كعدت يم الشباك كالعاده احب اكعد كدام الشباك
كعدت يمي ڤلانتاين
ڤلانتاين : شبيج اليوم
وتر : مابيه شي
ڤلانتاين : شلون مابيج وانتي من اول يوم ما ادري شجاج بالخط صافنه وبالتفتيش ناسيه بطاقه الدخول صاير شي بالبيت امج بيها شي
وتر : لا ماصاير شي بس تعبانه شوي
ڤلانتاين : عيونج ليش هيج شجاج
وتر : مابيه شي والله بعدين عادي هي عيوني من زمان هيج
ڤلانتاين : اهتمي بيهن خليلهن اي شي من غسول او ترطيب لاتعوفيهن هيج
وتر : فلانتاين عفيه كافيي مالي خلك لاي شي والله
كالعاده اتهرب من كلشي وما احجي لاحد عن الي دا اشوفه بكل يوم شحجي واصلا اذا حجيت محد راح يصدك وكلها راح تشوفني مخبله
احسن شي اسكت وما احجي لاحد
وصلت للقسم خلال ١٠ دقايق نزلت من الباص
كدامي القسم ، اخذت نفس طويل وزفرته
احس بكتله ثكيله ع صدري ودمعتي بطارف عيني
داخلي يصيح بكل صوته مايريد يرجع للدوام
وخارجي يبين للكل اني متحمسه لبدايه الدوام
دخلت للقسم بكل مكان هوسه بكل مكان بشر
شباب وبنات ،كبار وصغار ، ضاق صدري واختنكت من شفت كمية البشر الموجودين بالقسم
رجعت طلعت واخذت نفس بعدها رجعت وتحملت دخلت كبل للقاعه واخذت اخر مكان سحبت كرسي وكعدت
ريم : هلاوو وتر شلونج
وتر : الحمد لله وانتي
ريم : زينه
وتر : سحبت كرسي وكعدت كدامي
ريم : شلونج بالعطله
وتر : عادية لاطلعه ولا طبه كله بالبيت
ريم : اصدمج بخبر
وتر : صدميني خيه عايزه صدمات حتى اصحى ع نفسي اكثر
ريم : دقيقه خل تفاجئج ازل ما اريد اخرب المفاجئه ولو اني تدرين بيه احب اخرب كلشي بس خطيه ازل كالت اني اكوللها
وتر: شو ماشفتها
ريم : جانت بالحديقه برا وي ڤلانتاين
وتر : ههه زين
دخلت ڤلانتاين وازل وياها للقاعه اجت كبل عليه كمت من مكاني وسلمت عليها
كعدنه كلنه ع شكل دائره عبالك حزب ومجتمعين سوا
ريم : كولي بسرعه بعد ما اصبر
ازل : دقيقه شبيج
وتر: احجن الفضول وصل الف
ازل : اول شي باركيلي
وتر: الف مبروكك ياروحيي ، يلا كولي شصاير
ازل : رفعت ايدي
وتر : من الصدمه خليت ايدي ع حلكي وصحت
وااات معقولهه لااا لااا مامتوقعتها منج شنو هاي معقوله
ازل : هههههههههه هاي بعد
وتر : الف مبروك يروحيي انتي شايفه كل خير شوكت صار كل هذا وليش ماكلتي ليش ماحجيتي
ازل : بالعطله بشهر اغسطس بوكتها مجان عندج نت وماكدرت اراسلج واكلج بس البنات درن قبلج
وتر : درت وجهي ع ڤلانتاين وع ريم
ليش ماكتلي
ازل : اني كتلهن لاتكولن الها اريد افاجئج
وتر: احلا مفاجئه والله
زين كوليلي منو تعرفي من كرايبكم بعيد احجيلي كلشي
ازل : وحده وحده ع كيفج
باعي هو من بعيد ما اعرفه بالبدايه مجنت مقرره اصلا اتزوج وكلت اخلص دراسه الا بس من اجه اهلي قبلو وكالو نشوف رائيج كالو عنه زين وحباب الولد وبالاخر وافقت شلون وشوكت وليش ما ادري كلت ايي وبس
وتر: ههههههههه والله ضحكتيني شلون ماتدرين وكلتي موافقه غير تشوفي غير تكعدين وياه وتعرفي شبي مابي
ازل : مدريني بعد وافقت والحمد لله من خطبنه لسه ماشفت شي سيء عنه الولد حباب وهادىء مثلي تقريبا
وتر : الله يسعدج يارب
ازل : امين
ريم : بله شنو شروطكم
ازل : ماشرطنه شي
ريم : لا بله ودراستج
ازل : ايي كنالهم وكالو ايي تكمل
ريم : واذا خلاج تبطلين بعدين
ازل : لا مايسويها
ريم : والله ما ادري
وتر : اجه الاستاذ وبدت اول محاضره جانت تعريفيه
بدا يشرح عن المواد وشلون صعبات ولازم نشد حيلنه ونقرا زين وهالسنه تختلف عن باقي السنين
ادري والله تختلف هي من اول يوم كلشي تعرقل كدامي تريدها تنتهي بسلام
بعد ما انتهت المحاضره اخذنه استراحه نص ساعه كل هالوقت واني منتضره ميار ورزان يجن ولسه ماكو
وتر : اكلجن
ڤلانتاين : كولي
وتر : ميار ورزان شو ماكو اليوم
ريم : ماراسلتيهن
وتر : ضيقت عيوني وباوعتلها بتك عين
مو تدرين بيه ماعندي نت شوكت اراسلهن
ريم : نسيت شبيج تحجين من ورا خشمج
وتر : ههههههه مو سوالج غبي
ريم : لا والله
وتر : ايي والله
ازل : شعدنه المحاضره الجايه
ريم : سمعت ندى تكول راح ياخذنه استاذ علي
وتر : منو هذا
ڤلانتاين : حسب ماكالو اعتقد ابو النحو
وتر : الله يستر
مشت النص ساعه بسرعه ماحسينه عليها واجانه استاذ علي جان شاب تقريبا يوصل عمره بين ال٣٠ وال٣٥
مبين علي شاطر وذكي لهجته الانكليزيه تجنن طريقه نطقه للاحرف ممتازه صراحه عجبني تعامله واسلوبه وي الطلاب وفوك كل هذا اهم شي يحجي انكليزي طلاقه
بعد ماخلص المحاضره سئلنه كم واحد من شعبه A
نصف القاعه رفعت ايدها بعدها كال
للاسف انتو القاعه الوحيده الي ما راح اخذها هالسنه
الكل صاح وكام يحجي وصار ضجيج
حاول الاستاذ يهدئهم
-استاذ توفيق رئيس القسم راح ياخذكم وبسبب اعدادكم الهائله قررنه نقسم الشعب بين الاساتذه
بعد ماكمل كلامه الكل هدأ وصارو يتناقشون بيناتهم بأصوات خافته
بين ضجيج الدوام وبين داخلي الي كمل الدوام وهو يصرخ ويريد الرجعه للبيت
شفت الساعه الي لابستها بيدي
ساعه ب١:٢٥
قررت ارجع بعد ما انسطر راسي
واخيرا ما اصدك خلص اول يوم دوام
وصلت للبيت اول ماطبيت تلكتني لحن
لحن : مو كتلج انتضري انطيج مصرف ليش شردتي
وتر : ما احتاج عندي ترا
لحن : ولج بس الف شيكفي بربج صدك تحجين
وتر : ايي يكفيي
لحن : اكلتي
وتر : لا
لحن : راسج يوجعج مو
وتر : شمدريج
لحن :شلون ما ادري وهو اول يوم الج اول شي تخربط روتينج وثاني شي الشمس سطرتج وثالث شي من الصبح لسه ع لفه واستكان جاي ووجهج مسفوط سفط شجاج
وتر : ما اريد اكل مالي خلك عفيه ولاتصيحين
اخذتني من ايدي وكعدتني كبالها
لحن : وتر شجاج ماتكليلي شجاج كافيي ولج مرن ٣ سنين كافي انسي الراح راح بعد مايرجع
وتر : دمعت عيني الغصه بداخلي اريد اصرخ اريد ابجي
لسه ممصدكه مرت ٣ سنين هيج بدونه
لحن : والله تعبت ساعديني مثل ما اني دا اساعدج خلينه وحده لازمه بيد الثانيه ونكمل هالحياه سوا خل نوكف سوا ونساعد امي شوفيها حالتها مكافي البيه مو والله تعبت منا وضعي ومنا انتي ومنا امي ومنا شغلي كليلي شسوي
وتر : رفعت عيني وخليتها بعيونها طاحت دمعتي
نطقت اكثر كلمه صعبه عليهه
امي ماراح تضل ويانه مثل ماعافنه هي هم راح تعوفنه
لحن : لاتحجين هيج امي مراح تعوفنه اذا اهتمينه بيها سوا راح تعيش وراح تكمل ايامها ويانه وراح تشوفج تتخرجين وراح تشوفني لابسه فستان العرس راح تفرح ويانه وتضحك ويانه وتسوي كلشي ويانه
وتر : زادت حالتي وكعدت ابجي اكثر سحبت ايدي من ايد اختي ودخلت لغرفتي ركضت ع فراشي الي اكثر شي اكرهه ونمت ضليت افرفح لحد ماغفيت بدون ما ادري
......
يتبع
اني وتر ...
صاحبة الاحدى و عشرون عام، شخصيتي غريبه ، خيالي واسع ، احاول بكل جهدي اتعايش بهل المجتمع المضطهد للمراة ، احب الانعزال والهدوء
شخصيتي متناقضه مع كل شي
أنت تقرأ
اوتار
ChickLit" على اوتار الماضي عشنا وعلى اوتار الحاضر نحيا هكذا علمتنا الحياه فيوم لنا ويوم لها " أوتار ... رواية عُراقيةٌ تحكي قصه ثلاث فتيات احداهن لاتؤمن بالحُب والاخرى تعشق معنى الحُب اما الثالثه فالحُب لايعشقها افتحو ابوابها الاربعه لتكتشفوا عالماً ي...
