اوتار

البارت الثاني عشر

اوتار ...
البارت الثاني عشر ...
للكاتبة : اية علوان ...

....

رزان

انتهت اربع سنين بلمح البصر  وتر سافرت ونستنه حتى تواصل بعد ماتتواصل ويانه
بقيت اني وميار ع تواصل
بعد مابلشت العطله طول العطله حاولت وي امي حتى تقنع اخوي يرجع جهازي مرت سنه كامله ولحد هاليوم ما اقتنع انو اني بطلت ادخل بأي علاقه غلطت غلط وتبت
حجيت وياه اكثر من مره وحاولت افهمه انو اني هاهيه شيريد اسوي بس خل يرجع جهازي اريد ارجع لحياتي قبل بدون اخطاء
مرت ٥ شهور واني ع نفس حالي  ابوي وامي زينين وياي وحاولو ينسون الخطا الي سويته وي محمد الا اخوي ضل حاقد عليه

يوم الثامن والعشرون من شهر سبتمبر

خلصت كل شغلي ونضفت البيت ورتبته كعدت حتى ارتاح اخذت جهاز امي وضليت اكلب بالبرامج
حتى انسى التعب البيه
طب وائل مستعجل
وائل: امي وين
رزان: بالمطبخ
ركض للمطبخ وطلع امي وداها لغرفتها  وسد الباب وراه
خلال اقل من نص ساعه طلع باوع عليه ودار وجهه وراح
بعدها امي صاحتلي رحت ركض الها
تغريد: رزاااان
رزان: هاا يمة
تغريد: طبي وسدي الباب
رزان: سديت الباب وكعدت يمها
هاا
تغريد: يمة انتي كبرتي والحمد لله خلصتي دراستج وصرتي مره جبيره وشحلاتج 
رزان: يي
تغريد: يمة ماناويه تزوجين !!
رزان: بس يمة بعدني صغيره ذاك اليوم تخرجت شبسرعه تردون تزوجوني حتى تعيين لسه مادورت
تغريد: يمة هو وينه التعيين لو اكو جان تعينوو هاي الشباب شو ليل ونهار يركضون ركض بس علمود التعيين وتالي كاعدين وساكتين هسه شوفي اخوج ٣ سنين وهو يركض ع التعيين والحمد لله بالتعب وشگه والصبر  يلا تعين
رزان: زين هسه المطلوب مني شنو
تغريد: يمة جايتج خوش قسمه واخوج يعرفه والولد عازل بيت وحد عن اهله ويكولون عنه خوش رجال ومحترم شنو رائيج
رزان: يمه عفيه ما اريد اتزوج والله بعدني صغيره ليش هيج تسوون بيه
تغريد: يمه سالفتج القديمه لسه بلسان المنطقه هسه من تزوجين راح تخلصين من القال والقيل والولد خوش ولد ليش ترفسين النعمه بيدج
رزان: لا يمة عفيه ما اريد عفيه كولي لوائل ماتريد وبعدها
يمة عفيه لاتكسرون بيه
تغريد: الشور مو بيدي تعرفين اخوج اذا حط شي براسه يسوي هسه خل يجي واحجي وياه عسى ولعل يقتنع
رزان: يمه عفيه قنعي والله بعدني ممستعده لاي شي
تغريد: هسه روحي ومن يجي ابوج واخوج اكللهم وان شاء الله البي خير يصير
رزان: طلعت من غرفه امي والخوف تملكني ما اريد اتزوج ما اريد هو نبيل تزوج وصار عنده طفل واني لحد هاليوم ماكدرت انساه شلون نوب يجي رجال غيره واصير اله
لا عقلي ولا گلبي ولا روحي مستعده لهلزواج هذا
يارب دخيلك ما اريد وائل يفرض سيطرته عليه ويدمرني ربي بعد عني هالقسمه هاي
صار العصر واجه ابوي واخوي
بالبدايه امي ماحجت شي وضلت ساكته لحد مانطق وائل وكال لابوي اكو قسمه زينه جايه الي
ابوي ضل صافن وما حجه كلمه
جانت الكلمه الرئيسيه لوائل 
بعد ماكمل كلامه امي كلتلهم انو اني ما اريد وبعدني ممستعده حجت هيج وياريتها ماحجت
تخبل وضل يصيح
وائل: تريددد تفشلنييييي بنتجججج فوك ماتكود وي ذاك وهذا جايه تفرض كلمتها علينه
حجايه وانطيتها للرجال وغصبا عليها الاسبوع الجاي يجي  يعقد عليها وبعدين نتفق ع العرس وحجايه زايده ما اريد منها
تغريد: يمه ع كيفك شبيك گبيت بوجهنه خلينه نتناقش بهل الموضوع مو تصيح وكلشي مانفتهم منك ياوليدي
وائل :يمة ياحجي يابطيخ تدرين سمعة بنتج طاشه بالمنطقه ولسه محد نسى سالفتها ولج يمه تدرين ذاك اليوم واحد من الولد يضحك ويبسمرني ويعيرني بأختي كدامي وترديني اسكت لاتخبليني يمه بروح اهلج اسكتي وخليني اتصرف هاي مايفيد وياها ولا احد ينسى سالفتها الا اذا تزوجت ع الاقل اذا تزوجت نخلص منها ونطم سالفتها ومحد يذكرها وكل هالحجي وعيونه بگصته
رزان: من سمعت كلام وائل انهاريت كلش وضليت ابجي واغم بروحي ع هالحظ
شكد مايمر من وكت وشكد ما احاول واخليهم ينسون لا هو ينسى ولا العالم تنسى
بنفس الوقت ما اريد اتزوج واذا انطق بحرف وارفض يمكن يذبحني ويخلص مني فوك كل هذا هو گوا متحملني ويريد يخلص مني هسه قبل باجر حسيت نفسي عاله ع اهلي