اوتار

البارت الخامس

اوتار ..
البارت الخامس ...
للكاتبة : اية علوان ..
.......

رزان
بعد ماخلصنه الفصل الاول وبدت عطله نصف السنه ارتاحيت كلش لان واخيرا راح احجي براحتي وي محمد
طبعا محمد عرفته من جنت بالمرحله الاولى وجان سايق الخط مالتنه وجنت معجبه بي من اول ماشفته
وبمرور الوقت اعترفلي وصار كلام بيناتنه وتطورت علاقتنه اكثر واكثر
اكثر صديقاتي من احجيلهن عنه وخصوصا صديقاتي الي وياي بمنطقتنه دائما ينصحني ابتعد عنه وانو هو واحد ملعب ويضحك ع البنات واكثر من وحده اجتني تكلي هذا الولد موزين وضحك ع فلانه وفلانه بس حبي جان اكبر من هيج ماصدكت بكلام اي احد جنت اصدك بكلامه وبس وجنت انفذ كل الي يكوله واخاف علي من يزعل او يصير بي شي او يتاخر من يراسلني
ليل ونهار تفكيري كله بي ، جنت بين فتره وفتره اطلع بليل حتى اشوفه وهو جيرانه مجرد خطوتين ويوصل لبيتنه
بيوم من ايام العطله الربيعيه صارت مشكله بيني وبينه وقررت ما احاجي ابد لان حيل جنت ضايجه منه
للعصر جهازي فجاه ما ادري شصار بي فجاه عطل وطفى حاولت اشغله اكثر من مره ما اشتغل
ضليت حايره شسوي وشلون اصلحه وما اكدر انطي لاخوي حتى يودي للتصليح لان بس يفتحه يشوف كل مراسلاتي وكلامي وي محمد واذا عرف يذبحني
مالكيت حل غير اراسل صاحب المحل الي كدامنه واحاجي بلكي يكدر يصلحه وهو صديق اخوي
اخذت جهاز امي ودورت حسابه وراسلته بسرعه رد
بالبدايه صار كلام بيناتنه بعدها دخلت بالموضوع كبل وطلبت منه يصلح جهازي
وافق وكال بليل اطلعلي ورا البيت وانطينياه ومن اصلحه ارده الج
مافكرت ولا انتبهت شدا اسوي
صار الليل وراسلني من جهاز امي اخذت جهازي وطلعت لكيته واكف بالباب مال الجهه الخلفيه لبيتنه
انطيته جهازي وتشكرت منه ورجعت للبيت بس بلحضتها متت خوف مامتعوده اطلع لاحد غير محمد
كعدت الصبح لكيت نبيل مراسلني وكال تصلح الجهاز تفاجئت شبسرعه صلحه
بعدين طلب اطلع بليل واخذه منه
وافقت وصار الليل وطلعت خارج البيت انتضرته
اجه وانطاني الجهاز وتشكرت منه وانطيته فلوس التصليح ماقبل ياخذهن رغم شكد لحيت علي بس ابد ما اخذ مني
فجاه احنه ودانحجي حس ع شي بعيد عنه
شاف ضوا موجهه بأتجاهنهه من صاح وقرب من الضوه اكتشف شخص كاعد ويصور بينه
اني بهاي اللحضه متت خوف وقطره دم ماضلت داخلي
ضليت ارجف حسيت بهل اللحضه اني شدا اسوي وشهل المصيبه الي طيحت نفسي بيها
شفت نبيل من بعيد سحب الولد وتعاركو بيناتهم ومن تقربو ع الضوه انصدمت هذا محمد
ماعرفت شسوي اخذت الجهاز وطفرت داخل البيت
سمعت اخر كلام حجو بيناتهم
( ولج حقيراا كح... الا افضحج واشهرج بالمنطقه ولج انتي تلعبين عليه ولج اني اعلمج خاينه كوا... ام الزلم ....)
ضلت كلماته ترن بأذني ومن الخوف ماعرفت شسوي
رجعت كبل لغرفتي وقفلتها ضليت ارجف وابجي الليل كله خفت لا يسويها صدك ويروح يفضحني بالمنطقه شلون بيه ياربي شجاني طيحت نفسي بهل المصيبه
دكت ساعه ب٤ الصبح واني لسه منايمه
فزيت ع رنه الجهاز فتحته وشفت رساله من نبيل
نبيل: لاتخافين ولايضل بالج
رزان: شلون ما اخاف اني شفته صورنه سوا وفوك كل هذا هو عنده صوري اكيد راح يشهرني بالمنطقه ويفضحني
نبيل: اخذت الجهاز منه وكسرته اما صورج ما ادري بيج دازه اله صور
رزان: شمدريني بي هيج حقير ونذل أمنت بي وصدكت كل كلامه ومن طلب صور الي دزيتله
نبيل : شجاج ، هسه انتي ارتاحي ولاتخافين مايكدر يكول شي
رزان: وشنو الي يخليك هيج مطمئن منه
نبيل: هاي مو اول ولا اخر مره يسويها مسويها وي غيرج هواي وكل هالوقت جنت الم علي دلائل حتى اطيح حضه واشهره بالمنطقه
تدرين بالبدايه حسيت اكو شي بيناتكم بس ماتوقعتها منج عبالي بنيه فقيره وحبابه ماتوقعت واحد مثل محمد يضحك عليج
رزان: جنت غبيه وفاهيهه وماركزت بتصرفاتي الا من طحت وهسه حيل متندمه
نبيل: شيفيد الندم بعد كل الي سويتي
رزان: اكلك هسه اني بيا حال وانته تحاسبني تدري لسه جسمي يرجف من الخوف
نبيل: كتلج اهدي ولاتخافين مايسويلج شي بعد وهسه روحي نامي ولاتفكرين بي ابد
رزان: بعد كلام نبيل ارتاحيت حيل وسديت الجهاز ونمت
صار الصبح لكيت الكل كاعد
لكيت مرت اخوي مسويه ريوك كعدت ع السفره اريد احط اللكمه بحلكي ما اكدر كل شهيه ماعندي
شربت چاي وكمت كلها انتبهت عليه وابوي ضل يسئل شبيه وليش لوني مخطوف تحججت وكتله مريضه شوي وتعبانه
رجعت لغرفتي وسديت الباب
ركضت لجهازي لكيت محمد مراسلني ويهدد  وحتى دزلي اكثر صوري
متت خوف ماعرفت شسوي ركضت لنبيل وحجيتله كلشي وع كلام محمد وتهديده الي
طمني كالعاده وكال لاتخافين ،وهو راح يهدد محمد بالصور والفديوهات  الي عنده
انتضرت تقريبا ساعه ونص
اجت رساله من محمد يكول بيها
(لاعبالج خلصتي مني وراج وراج لحد ماتموتين )
يمة كال هيج واني قطره دم ماضلت بيه
ضليت ابجي لحد ماراسي صار بي صداع
اخذت دوا ورجعت نمت ، الكل استغرب مني وامي ضلت تسئل شبيه ضليت اتحجج بحجج فارغه حتى انفرد بحالي .
خلصت العطله وبلش الدوام واي خبر عن محمد بعد ماسمعت
طول العطله نبيل يراسلني ويسئل عني ويطمني تقريبا بديت اتخطى الموضوع وبديت انسى او بالاحرى اتناسى الموضوع
من رجعت للدوام حجيت كلشي لوتر وميار واتفاجئن وضلت وتر ترزل بيه وتحجي عليه
هالمره من صدك لازم اتوب واسمع كلام وتر احس كلامها بالمكان وحتى نصائحها ولو سامعه كلامها من البدايه مجان صار بيه الصار.
مرت الايام والاشهر بسرعه وماحسينه ع الوقت شبسرعه يمشي
طول هالفتره نبيل ابد ماعافني وضل مستمر بالتواصل وياي ودائما يسئل عني ويدقق بأقل التفاصيل
حسيت نفسي بديت انعجب بي ، حسيت فرق المشاعر كلش جبير بينه وبين محمد
محمد مجان هيج واصلا يادوب يراسل وكوا يسئل عني واني مثل الغبيه مجنت منتبهه علي بسبب حبي التافهه الي جان عاميني
يوم عن يوم يزيد اعجابي بنبيل لدرجه مايمر يومي اذا
ما اصبح برساله منه وانام باخر رساله منه جنه صبح وليل نتراسل
محمد صار بعيد عني رغم مرات من اطلع للجامعه اشوفه واكف باب بيتهم ودائما يخزرني صرت ما اهتم ومن اشوفه كبل ادير وجهيي عنه
بلشت امتحاناتي اخر شهر وقررت اركز بيهن حيل واجيب درجات عاليه حتى اخر السنه ارتاح
خصوصا بماده الروايه جانت درجاتي ضعيفه حيل بهل الماده
بيوم من الايام الاستاذ قرر يساعدنه ويشيل من درجاتنه
فطلب من عدنه نسوي تقرير عن اي شخصيه من شخصيات الموجوده بالروايه وانطانه مجموعه كتب حتى نبحث عن الشخصيات بشكل ادق
قررنه اني ووتر وميار نروح للمكتبه الي كدام الجامعه
ومن وصلنه هناك بالصدفه لكينه ريم وڤلانتاين وازل هناك كعدنه كلنه سوا وبدينه نبحث عن كل الكتب الي ذكرهن الاستاذ ونجمع بالمعلومات حتى يكمل التقرير
......
وتر
قربت نهاية السنه تخلص ، ايامي وروتيني صارن عادي
لان كل يوم نفس الشي ماكو شي جديد
رغم ايامي العاديه بس مابطلت احجي كلشي لبابا
بين فتره وفتره ااكتب كلشي يصير بحياتي
وبأحد الايام طلب استاذ ماده الروايه نسوي تقرير عن الشخصيات وانطانه وقت يومين كحد اقصى حتى يكمل التقرير
جانت مده قصيره كلش بنفس الوقت الاستاذ قرر مايركز ع الاخطاء الي تتواجد بالتقرير وكال عادي اي شي المهم تكتبون وتتعلمون من اخطائكم حتى بالسنه الجايه تعرفون شلون تسوون تقارير
ثاني يوم قررت اخذ وياي دفتري تقريبا قرب تخلص اوراقه
اخذته وياي للجامعه ومناك رحنه سوا اني والبنات للمكتبه حتى نكتب عن الشخصيات
وبنفس الوقت قررت اكتب شوي احداث عن الي يصير وياي
من وصلت للمكتبه تفاجئت بريم والبنات هناك وطبعا المكتبه جانت مختلطه وتستقبل الطلاب والناس الي تحب تقرا وتطلع ..
بدينه نجمع بالكتب والمعلومات الي ذكرهن الاستاذ النه وناخذ معلومه عن كل شخصيه ونجمعهن بتقرير واحد
طولنه هواي تقريبا اخذ وقت من عدنه بالساعتين ونص
بعد ماخلصنه كامن البنات كلهن واني ضليت اجمع بالاوراق الي طشرناهن والكتب جانن هواي حتى اختلطن نص كتبي عند البنات وكتب البنات عندي
تاخرت الا طلعت ورزان ضلت تصيح يلا يلا بالاخر جمعتهن ع السريع وطلعت ركض
رجعنه للجامعه اخذنه اخر محاضره وطلعنه للبيت
اول ماوصلت طلعت الكتب الي اخذتهن من البنات وفصلتهن عن كتبي ورتبت الاوراق والمعلومات كلهن
تذكرت بلحضه دفتري الي اخذته وياي رجعت دورت بالكتب الي موجوده عندي ماكو
لا يالله بس لا صار عند البنات وراح يقرن كلشي كاتبته
ركضت اخذت الموبايل وراسلتهن ماردن اكيد هسه نايمات وين يردن لازم انتضر لليل الا يردن
ضل بالي يم الدفتر شلون بيه وشلون اذا قرن كلشي اكيد راح ياخذن نضره عني غلط
ضليت حايره وحتى نوم مانمت
صار المغرب ورن جهازي ركضت علي لكيت رساله من ڤلانتاين وريم يكولن ماعدنه دورن بالكتب الي عدهن ومالكن ولا دفتر نفس الوصف الذكرته
بقت رزان وميار وازل اذا ماعدهن انتهي اني
دكت ساعه ب٧:١٥ دقيقه ردت رزان وكالت هم ماعندي
لا يالله لعد عند منو
بقت ميار وازل يلااا ردن عفيهه
بالاخر ردن وكالن هم ماعدهن ضليت حايره وين راح يعني معقوله طاح من عندي بالجامعه لو بالمكتبه
بس الحمد لله كلشي ولا يطيح بيد البنات
هاهيه اكعد الباجر وادوره بالجامعه واذا مالكيته ادوره بالمكتبه وين يروح مثلا اكيد موجود بشي مكان