اوتار

البارت السادس والعشرون

اوتار ...
البارت السادس والعشرون ...
للكاتبة : اية علوان ...

.........

وتر
جن جنوني وتخبلت اخذت جنطتي وطلعت من المقهى ودمي فاير
يالله منك يا اسحااااق

طلعت من المقهى واجرت تكسي طلبت منه يوصلني لشركه (IA)
نار بداخلي مشتعله بسببه
من البدايه لحد هاللحضه دائما اكول اله خليني اعيش براحتي خليني اشتغل واصرف ع نفسي خليني اتعب واعيش هالدنيا ع اصولها

فكره انو يساعدني بكل مجالات حياتي هالشي مداخل بعقلي ابد ، هو صح الوصي عليه بس جان حد الدراسه وبس

وصلت للشركه نزلت من السياره وركضت لاول مصعد
ضغطت ع زر اعلا طابق بعدها انتضرت اوصل
انفتح الباب وصرت كدام غرفه اسحاق مباشراً
مشيت بالممر بهدوء بعدها فتحت الباب وصحت بصوت عالي
اسحااق
اسحاق: وتر !!؟
وتر: اريد احجي وياك كلمتين
اسحاق: تمام تفضلي
وتر: استغرب من جيتي لشركته ، مشيت خطوات وكعدت ع احد الكراسي مقابيله
-ليش اشتريت مكان شغلي
اسحاق: ع هاي اجيتي
وتر: اكيد
اسحاق: عجبني واشتريته اكو اشكال !!؟
وتر: لا والله عجبك واشتريته لو لان اني اشتغل هناك ركضت اشتريته
اسحاق: مو مهم السبب المهم المكان صار بأسمي واسوي الي اريده بي بعدين بدال ماتفرحين شبيج كالبه خلقتج
وتر: شلووون ما اكلب خلقتي اسحاق الف مره كتلك ما اريدك تدخل بشغلي وبحياتي اكثر من هيج
اسحاق: ماصار شي صاحب المحل راح يبقى رئيس عليكم وراح يبقى المحل نفس ماهو مجرد راح يزيد ع راتبج وينطيج وقت اكثر حتى تدرسين الاطفال
وتر: بس اني ما اريد هيج
جنت مرتاحه بشغلي وبراتبي وبكلشي بحياتي
فكره انو يصير الك اسم بمكان شغلي هالشي مدايدخل بعقلي
اسحاق: مم مشكلتج هاي مو مشكلتي
ان رضيتي او لا بالاول والاخر راح يصير الي اسم بكلشي بحياتج
وتر: انت ليش تعاند وياي ليش ماتعوفني براحتي
اسحاق: ما اكدر انتي امانه عندي ولازم احافظ عليج من كلشي
وتر: يالله منك اسحاق ،، امانه امانه امانه كافيي شوكت تخلص هالامانه وتفك عني
اسحاق: ماضل شي تقريبا اقل السنه وترجعين لبلدج
وتر: ان شاء الله واخلص منك
اسحاق: هههه
وتر: شدعي عليك هسه طول الطريق دمي فاير وحلفت الا اخليك تتنازل بس صار العكس وخليتني اهدأ واتماشى وي الموضوع عادي
اسحاق: ههه اعرفج واعرف شلون اتصرف وياج لذلك لاتحاولين تطبقين افكارج عليه
وتر: عوذه منك
اسحاق: هههه بما انو خلصت شغلي كومي خل اوصلج لبيتج
وتر: لحضه !
اسحاق: هاا
وتر: عندي سوال الك
اسحاق: تفضلي سئلي
وتر: شوف هو لازم من زمان اسئلك بس دائما لو انسى لو يصير شي يلهيني لذلك ماصارت فرصه
اسحاق: عن شنو تقصدين
وتر: تعرف يوم ميلادي صح !؟
اسحاق: ايي
وتر: هاي السنه بيوم ميلادي اجتني هديه غريبه بوقت متاخر واستغربت منو الي داز هيج هديه تالي الليل
وماخطر بالي غيرك بما انو انت الوحيد الي تعرفني بهاي المدينه
اسحاق: ايي
وتر: بس بنفس الوقت جنت انت داخل بالغيبوبه
شلون وصلتلي الهديه ومنو غيرك ممكن يدز
اسحاق: جانت ورد باكارا مو
وتر: ييي عفيهه ، لحضه !!!
شلون عرفت !!!
اسحاق: ههه لان اني الي دزيتها الج
وتر: شلوون مو جنت بالمستشفى
اسحاق: ييي ، قبل يوم الحادث جنت مخطط اسويلج ميلاد حلو بس ماصارت فرصه
بنفس الوقت جنت افكر شنو اهدي الج
وبما انو انتي بنيه فأكيد يعجبج اما المجوهرات اما الورود
بس انتي غير عن كل البنات
عندج حساسيه من رائحه الورد وتحبين نوع واحد بس والي هو ورد باكارا الاسود عديم الرائحه
لذلك طلبت هالنوع بس جان صعب احد يلكاه وهو متوفر بمكان واحد بس
لذلك فكرت اجيبه قبل ميلادج بأيام
بس اتفقت وي صاحب المحل وطلبت منه يوصلج هالباقه قبل لا ينتهي يوم ميلادج بدقايق حتى تبقين تذكرين هاللحضه دائما
وبس
وتر: زين لحضه ، شمدريك عندي حساسيه تجاه الورد وشمعرفك اني احب الورد الاسود بس هالشي محد يدري بي غير بابا ،وامي اصلا مجانت تهتم لهلتفاصيل ، شلون عرفت انت !!
اسحاق: خمنت بس
وتر: اسحااق لاتضحك عليه كلي شلون عرفت
اسحاق: ممم هالشي ضيفي وي الاحداث الغريبه الي تصير وياج وبالوقت المناسب هم تعرفين شلون
وتر: يالله منك اسحاق الى متى تضل هيج احجيلي كلشي تعرفه وهاهيه ليش تخليني اموت من الفضول والتفكير بسببك
اسحاق: راح اطلع اذا تردين تعالي وراي
وتر: كام من كرسيه ومشى كدامي ولايهمه شي
يالله دخيلك شنو هالبشر هذا لهلدرجه متقن فن الالمبالاه لك اني الي محد يكدر يخليني اضوج ولا انقهر تالي عمري واحد مثله يلعب باعصابي هيج
نوب عافني وحدي لا يالله والله خبل ومو صاحي ابد
اخذت جنطتي وركضت وراه لكيته صاعد بالمصعد وبقى ثوان وينسد الباب
ركضت ركض حتى الحك علي
ومن وصلت انسد بوجهي بقى مسافه اقل اصبعين مفتوحه من الباب
طلع اسحاق مخلي حافه حذائه ع حافه الباب حتى ماينسد
رجع انفتح الباب وطبيت لداخل المصعد
ضغط ع زر رقم ١ بعدها تحرك المصعد ونزلنه سوا
طول الوقت هو ساكت واني ساكته
لحد ما انفتح الباب وعبر هو وراه اني
طلب من الحراس يجيبون سيارته
بعدها اقل الدقيقه صارت سيارته كدام الشركه
دار وجهه عليه وكال
اسحاق: صعدي
وتر: فتحت الباب وصعدت
بعدها صعد هو من جانب السايق
شغل السياره وانطلق بيها
اسحاق: اكو فكره بالي بس ماتصير اذا ماتوافقين عليها
وتر: شنو
اسحاق: بقى شهر ونص وتنتهي دراستج لهل السنه مو
وتر: يي
اسحاق: بشهر السابع راح تنفتح مسابقه لافضل رسام
وبما انو عندج الموهبه اريدج تشاركين بهل المسابقه
وتر: رسمي مو بذاك التطور حتى اشارك بعدين شراح استفاد اذا شاركت
اسحاق: حسب المرتبه الي راح تحصليها ان فزتي بالمرتبه الاولى راح تكون جائزتج عاليه كلش
راح تنشهرين ع مستوى البلد برسمج وحتى راح تكونين استاذه لاكثر من ١٠٠ طالب وحتى كبار مو صغار
ومو بس هيج راح يساعدوج حتى تفتحين معرض كامل بأسمج ويقدمون كلشي تحتاجي وفوك كل هذا راح تحصلين ع مبلغ مالي عالي
وتر: واذا حصلت المرتبه الاخيره
اسحاق: تخسرين اكيد وعادي ان فزتي او خسرتي المهم شاركتي وحاولتي
وانتي مو تردين تكونين من نفسج وتطورين ذاتج بدون ما اتدخل
وتر: يي
اسحاق: لعد شاركي وان جنتي كدها وفزتي فراح تثبتين انو اني جنت ع غلط بتفكيري اتجاهج وانو تكدرين تعيشين بدوني
وتر: تمام لعد راح اشارك
اسحاق: متاكده !!؟
وتر: يي
اسحاق: اوك وهاا تسجلين بشهر السابع وتنفتح المسابقه بشهر التاسع يعني عندج شهرين بس حتى تكملين لوحه كامله وشرط تكون  دقيقه كلش
وتر: تمام
وصلت للمبنى الي اعيش بي
قبل لا انزل درت وجهي عليه وكتله
وتر: شكرا ع كلشي داتقدمه الي
ابتسم وكال
اسحاق: you're welcome