اوتار

البارت الحادي عشر

اوتار ..
البارت الحادي عشر ...
للكاتبة : اية علوان ...

....

وتر
- وصلنه لالمانيا بعد ساعات
اول مانزلنه من الطياره جمعونه كلنه بمكان واحد حتى يشوفون اذا العدد كامل الاجواء غريبه وحلوه عليه
بعدها دخلنه للمطار ووطلعنه
واخيرا صرنه ببرلين
لكينه سيارات جاهزات صعدنه بيهن ووصلونه للسكن الي راح نعيش بي
طبعا جان مقسم سكن الرجال عن سكن البنات
بعد ماطبينه دلونه ع الغرف الي راح نعيش بيهن وكل ٣ بنات بغرفه وحده وبالصدفه فطم صارت وياي بنفس الغرفه
طلبو من عدنه نرتاح ونرتب غراضنه ونجتمع بليل ساعه ب٩
بعدها اخذت وحده من الخزانات وبديت ارتب بملابسي واعلكهن
تعبت كلش  كمت من مكاني ونمت بفراشي
ماحسيت شكد مر من الوقت
كعدت ع صوت بنات يسولفن يمي
لكيت فطم وعلا فوك راسي
فطم: كومي يلا كافي نوم
وتر: عوفيني اريد انام تعبانه
علا: لج وتر كومي بعد اقل الساعه ويردونه نجتمع
وتر: سمعت كلامها بسرعه طفرت
يااااا ولج اني شكد نايمه لعد
فطم: من ال٤ العصر لل٨
وتر: كمت من فراشي ع السريع فجاه اول ماوكفت ع رجلي دخت ورجعت كعدت
علا: شبيج
وتر: راسي يوجعني
فطم: هاي لان كمتي ع السريع هيج دختي
كومي ع كيفج وروحي غسلي وغيري ملابسج وخل نطلع كلنه سوا
وتر: تمام
رحت للحمام سبحت وغيرت ملابسي وطلعت وي البنات
انجمعنه كلنه بصاله جبيره وكلها كراسي
تفاجئت بالعدد كلش هواي رغم بس بنات
طلع مو بس جامعتنه الي مشاركين بهل المنحه كل جامعات العراق
رحت اني وفطم وعلا سوا ع منتصف الصاله وكعدنه سوا
بعدها اجه المشرف علينه بالبدايه سلم علينه وانطه مقدمه طويله بعدها انطانه التعليمات الي تخص السكن والمحاضرات الي راح ناخذهن وعلمنه ع كلشي يخص دراسه الماجستير هنا وعلمنه ع التوقيتات الي نطلع بيهن ولازم بعد ال١٠ بليل مايستقبلون اي طالبه خارج السكن
بعد المحاضره طلبو من عدنه مجموعه كتب لازم نشتريهن حتى ندرس عليهن
قررنه احنه والبنات نطلع الصبح ونشتري كلشي نحتاجه
رجعت للسكن فتحت جهازي لكيت اتصالات كارثه من لحن
رجعت اتصلت عليها
اجاني صوتها العالي وسطر اذني بصياحها
لحن: وجعااا حتى وجعههه وين جنتي وليش ماتردين
وتر: جنت بالمحاضره وقفلت جهازي وما ادري بيج متصله
لحن: وصلتي
وتر: يي
لحن: اكلتي
وتر: لا بعدني شوي واكوم اكل
لحن: وتر اكلي وديري بالج ع نفسج لاتنسين تخابريني ع اي شي يصير وياج تمام عمري
وتر: ان شاء الله
بعد ماخلصت المكالمه رحت سويت عشا اني والبنات
واكلنه بعدها كل وحده راحت لفراشها
مانمت لان نايمه من العصر لليل
ضليت اكلب بالبرامج واتصفح بيهن
لحد مانعست ونمت
كعدت الصبح ساعه ب٧ ونص
تريكت وبدلت وطلعنه سوا اني ومجموعه من البنات حتى نروح للمكتبه نشتري الكتب الي طلبوهن من عدنه حتى نبلش ندرس

بعد ماخلصنه شرايه رحنه افترينه بشوارع برلين
كلنه مصدومين من جمالها
صارت ساعه ب٢ الضهر
رجعنه للسكن تغدينه وكعدنه نكلب بالكتب ونطلع عليهن
جانت علا طالعه برا
خلال دقايق رجعت وبيدها ورقه
علا: وترررر
وتر: هاا
علا: اجتج رساله
وتر: الي !!!
علا : يي هاي اسمج مكتوب عليها
وتر: من منو
علا: ما ادري واني دا ادخل للسكن لكيت البريد واكف بالاستعلامات مال السكن ومن صاح اسمج كتله اني صديقاتها اخذت الضرف واجيتج حتى مافتحته
وتر: بله انطينياه
فتحت لكيت رساله مكتوبه بالانكليزي
قريتها اكثر الكلمات مافهمتهن
اخذت جهازي وترجمت الرساله