اوتار

البارت التاسع والعشرون

اوتار ..
البارت التاسع والعشرون ...
للكاتبة : اية علوان ...

............

بعد شهرين ...
الثاني من شهر سبتمبر
وتر : مر شهرين ع تسجيلي بالمسابقه
خلال هالشهرين جانت عطلتي لذلك استغليتهن احسن استغلال واشتركت بهل المسابقه
بصراحه دخلت مو علمود افوز او اخذ اي مرتبه
شاركت حتى اثبت لنفسي انو خلال مده قصيره اكدر اسوي بيها شي عضيم من خلاله افتخر بنفسي
قررت شنو ارسم رغم جان قرار صعب لان اللوحه تطلب مني وقت كلش طويل وتركيز قوي
كضيت الشهرين المضن ع الرسمه تقريبا من 7 الى 8 ساعات خلال اليوم ع نفس الكعده
من اكعد الصبح اكل لكمه واخذ فرشي وابلش ارسم
ولحد ماتدك ساعه ب3 العصر اخذ فتره استراحه اكل بيها واطلع للمقهى وب8 بليل ارجع
طلبت من مديري اطلع من وكت واتفرغ اكثر علمود اتعب اكثر ع الرسمه
وهالمره ماحجه شي لان اسحاق مدير المكان كله لذلك مسيطر علي ومايكدر يحجي شي

مرات يجي اسحاق لبيتي ويحاول يعرف شنو رسمت بس كالعاده دائما اخلي خارج البيت وما اخلي يشوفها

بس هسه صار الوقت حتى اخلي يشوفها واخلي العالم كله يشوف ابداعي

دزيتله رساله وكتله نهيت الرسمه وصار الوكت حتى تشوفها
فرح كلش وطلب مني يجي بليل بعد مايخلص شغله

بهل الاثناء غطيت الرسمه بالغطا وطلعت لشغلي
صار الليل واجاني لمكان شغلي
اسحاق: هلا بالمبدعه
وتر: هههه اهلا بيك
اسحاق: خلصتي شغلج
وتر: بس لحضه خل انضف اخر طاوله واجي
اسحاق: تمام
وتر: اخذت سفنجه وصله ناشفه ونضفت اخر طاوله بقت
بعدها رحت نزعت الصدريه وعلكتها
شفت اسحاق كاعد وي مديري ويسولف وياه
رحت بأتجاهه
وتر: اسحاق
اسحاق: هاا خلصتي
وتر: ايي
اسحاق: يلا امشي
وتر: ودعنه مديري وجينا وكارلوس وطلعت
اسحاق: متحمس اشوف ابداع شهرين
وتر: خايفه كلش
اسحاق: ليش
وتر: اخاف ماتعجبك او اخاف يطلع مستوى رسمي مو مثل الباقيين ويفوقوني بالابداع
اسحاق: بالعكس لاتخافين
خليج قويه وشجاعه وثقي بنفسج اكثر وخلي بالج ان فزتي او لا هالشي مو مهم المهم حاولتي وجربتي وشفتي نفسج شكد قويه احسن بهواي مما تبقين كاعده وساكته وتكرهين نفسج لان ماعندج شي يخليج فخوره بذاتج
وهسه كليلي تشوفين ذاتج هي نفسها قبل سنتين
وتر: اكيدد لاا كلش اكو فرق اختلف كلشي بيه
قبل جنت اكرهه كلشي بحياتي واكره نفسي
بس حاليا لا حبيت نفسي بالاول وشفت عالمي مو بذاك السوء الي جنت متوقعته
رغم الصعوبات البي بس هالشي مايخليني اتراجع عن اي شي اخلي بالي
بفضل الله وبفضلك كدرت احقق هواي احلام وافكار براسي
اسحاق: ههه الحمد لله المهم تكونين قنوعه تجاه نفسج هذا اهم شي عندي
وتر: وصلنه للبيت بعد محادثه طويله بينه
-انطيني وعد ان ماعجبتك تكلي وماتضم داخلك ولاتجامل وتكول حلوه
اسحاق: افااا عليج اني اجامل ليش شوكت جاملتج حتى هسه اجاملج بعدين اني صريح ومايهمني احد لذلك لاتخافين راح احجي كلشي احس بي من اشوفها
وتر: ييي عفيهه هههه
وصلت للبيت وفتحت القفل بعدها طب وطبيت وراه
صارت كدامه الرسمه
اسحاق: ومغطيتها هم
وتر: غير اخليها مفاجئه
اسحاق: بله وخري الغطا خل نشوف ابداعج
وتر: غمض عيونك
اسحاق: يالله منج ياوتر دوخري خل اشوف
وتر: ههههههه اخذتها مني هالكلمه
اسحاق: تعودت ع كلامج لدرجه صرت احجي مثلج
وتر: ههههه هسه غمض عيونك الا اوخر الغطا
اسحاق: تمام تمام
وتر: سحبت الغطا ع كيفي بعدها طلبت منه يفتح عيونه ويشوفها
اول مافتح عيونه انصدم وكام يفرك بشاربه ولحيته بعدها ابتسم
وتر: هاااا بشرر شلونها
اسحاق: منو هاي
وتر: كاديان
اسحاق: رسمتي صديقتج !!!
وتر: يي
من الصدمه كام مايعرف شيحجي
تقرب من اللوحه وصار يتلمسها
-وخر ايدك ما اسمح تلمس صديقتي
اسحاق: هههه اريد اتاكد هاي واقعيه لو رسمه
وتر: والله رسمه وبيدي رسمتها
اسحاق: لا من صدك تستحقين الجائزه وحتى اكثر من هيج لج وين جنتي اول مره اشوف عندج هيج ابداع
وتر: لاا اسحاق عفيه لاتضحك عليه صدك حلوه لو هيج تشاقه
اسحاق: لج شبيج والله تجنن حتى من كثر مامصدوم بجمالها ماعرفت شحجي
زين هاي الاثار والشعر القريب من حاجبها شلون رسمتي
وتر: رسمتها اول شي بالرصاص وبكل طبقه كررتها اكثر من ١٠ طبقات سويت لحد ماوصلت للون المطلوب بعدها ضفت فحم  ودمجته وي اللون القديم وصار عندي الطبقه المطلوبه
بعدها رسمت خصلات الشعر بقلم خفيف ورجعت عليهن اكثر من مره حتى تبين خصلات حقيقيه
وضفت اللمعه من خلال مسح اطراف الخصلات بمساحه مونوزيرو والمساحه الالكترونيه
وهيج انطه لمعه حقيقه
اسحاق: واووو من صدك ابداع بما تعنيه الكلمه
زين شكد طولتي بس بالكصه
وتر: طولت هواي والله لان جانت كصتها شويه طويله وعدها اثار الشعر نازل قريب ع حاجبها لذلك طول عندي بس بالجهه اليمنى ٤ ايام والجهه الثانيه تقريبا ٣ ايام ومن كملت بس الكصه تقريبا اخذت مني اسبوع ونص
اسحاق: بس الكصه !!!!
وتر: يي
اسحاق: زيين
وتر: اتذكر جانت تضوج كلش من شعر كصتها رغم الي يشوفها يكولولها شعرج طالع وهي خطيه تضل تصيح وتكول مو شعري هذا
اسحاق: ليش جان شعر وجهها كثيف
وتر: لا بالعكس جان قليل كلش واصلا الي يشوفها يكولوها حافه وجهج من كثر ماخفيف بس المسافه بين كصتها وحواجبها جانت كثيفه بالشعر
هههه اتذكر جانت تجي تشكي الي عنهن وتريد تشيليهن وبكل مره اكللها لا والله حلوات عليج وخليهن
بصراحه جنت احبهن ما اعرف ليش
اسحاق: هيج شكلها بريء
وتر: كلش بريء وطفولي لو تشوف عيونها جانت طفوليه كلش واذا دمعت تضل عيونها تغورگ بالدموع
اسحاق: شعجب رسمتيها ليش مارسمتي شي مختلف وليش هي بالضبط
وتر: لان ارسم وجوهه اشخاص بس
واني كتلك من قبل الاشخاص الي اعزهم يضل اشكالهم بالي دائما مثلك انت وكاديان
اما ليش رسمتها
لان مشتاقتلها ولان تمنيتها وياي بكلشي
لذلك رسمتها حتى كلما اشوفها كدامي كلبي يطمئن
وما احس بالغربه باي مكان مو الا هنا
اسحاق: بس اني وياج بكلشي ليش تحسين بالغربه
وتر: بس انت راح تعوفني بس ارجع للعراق راح تبقى هنا وهيج راح ارجع وحيده وحتى كاديان ما اعتقد راح التقي بيها مره ثانيه وما اعرف وين صفى بيها الدهر لذلك ع الاقل واحد منكم يبقى وياي مو ثنينكم تعوفوني
اسحاق: الله كريم المهم متاكده ومقتنعه من اختيارج لهل الرسمه
وتر: يي ، ليش احسك ضجت من رسمتها
اسحاق: بالعكس كلش فرحان لان ابدعتي بهل اللوحه بس خايف من شي ثاني
وتر: شنو
اسحاق: تعرفين بالعراق مامسموح لاغلب البنات ينشهرن او ينعرض وجوهن بكل مكان
زين اذا فزتي تدرين هاي رسمتج راح تطش وكلها تشوفها وحتى صديقتج تشوفها
زين واهلها شلون اذا شافو شكل بنتهم منتشر بكل مكان
شنو راح تكون رده فعلهم وشنو راح تكون رده فعلها هي بالضبط
اخاف بالاخر يلوموها وياذوها
وتر: ما اعتقد يصير هيج شي
لان نسبه ٦٠% يمكن ما افوز
اسحاق: زين ونسبه ال٤٠ الباقيه يمكن تفوزين
وتر: اذا فزت فعادي راح تكون هي سبب نجاحي وفوزي
اما بخصوص نشرها هي عادي عدها اما اهلها يمكن ينصدمون اذا عرفو بس همه مراح يعرفون
اسحاق: وشلون ماراح يعرفون
وتر: لان رغم هي نفسها بس الجهه الي راسمه بيها شكلها مراح يخليهم ينتبهون راح يتوقعون وحده شبيهه بنتهم
لان اذا فكرت بيها شلون رسامه وبألمانيا ممكن ترسم وحده بالعراق وبعيده عنها كل البعد لذلك لاتخاف اني متاكده محد راح يشك ويعرف انو هي نفسها كاديان