اوتار

البارت السابع

اوتار ...
البارت السابع ..
للكاتبة : اية علوان ..

...
رزان
- لليل اجه ابوي وكعدو يتفاهمون وبدا الصياح والعياط بينهم
بالاخر قرر يبطلوني من الدراسه ويسحبون جهازي

لو ارجع ع الي سويته اكول اني الغلطانه واعترف بغلطي وشيسوون بيه حقهم بالاخر اني نزلت راسهم كدام العالم
قررت اخضع لطلباتهم واسكت وما احجي شي
سحبو جهازي وتغيرت معامله الكل وياي وصارو يتحقروني
كمت حتى اكل قليل اكل ، ضعفت فوك الضعف البيه
وتغيرت كلش
تمنيت لو اكدر احاجي ميار ووتر
مشتاقه للدوام ومشتاقه لكلشي ، تندمت حيل ع الي سويته وتمنيت يرجع بيه الزمن وما اعيد هالغلط

بعد شهر ع هالمعاناة

اندك الباب رحت فتحته لكيت ام نبيل واخته
حيل فرحت لان احد من اهل نبيل اجه علينه احسه وياي دائما واكو امل يتصلح جرح بداخلي
بعد مادخلتهم للبيت وامي استقبلتهم
رحت للمطبخ قدمت الضيافه واني دا اقدمها سمعت شي حسيت تحطمت ع اخر شي بقه بيه ام نبيل تكول لامي انو كلنه معزومين ع خطبه نبيل
بهل اللحضه حسيت نفسي من صدك انكسرت
فوك الاذيه وتعامل اهلي وقسوتهم وياي كل هذا يهون بس بلحضه الي سمعت بيها نبيل خطب وحده غيري
اضلمت الدنيا بعيني
تمنيت كلامهم كله جذب تمنيتهم جايين يخطبوني
هاي تاليتها حتى نبيل عافني
ركضت لغرفتي وقفلت الباب
كعدت ابجي لحد مانشفت دموعي وورم گلبي بكل لحضه خليت بگلبي احد ، تاذيت حيل وانقهرت
اعترف غلطت ودا اتاحسب ع غلطي بس مو لهلدرجه
حتى الشخص الي احاول اضمد جروحي بي راح لغيري
انتضرت يصير الليل حتى افهم كلشي ما اصدك ولا راح اصدك نبيل يتزوج وحده غيري
دكت ساعه ب١١ونص بليل
ركضت ع جهاز امي جان ع الشحن سحبته
وطلعت حساب نبيل
راسلته وانتضرت الرد
خلال ثواني رد حتى ما اتاخر
كتبت جريده
عاتبته وحجيت كلشي بگلبي اله
بالاخر صدمني بالرد
نبيل: والله جدا اسف شسوي اهلي مايقبلون اخذ وحده دارسه وحجيتلهم عليج وماقبلو ومابيدي حل غير اوافق ع طلبهم
ضليت صافنه هذا من كل عقله دايحجي
رجعت راسلته وحجيت علي اريد بس ارتاح اريد النار الي بداخلي تهدا ماكو
ماتحملت كلامه والحجج الي طلعهن
شنو رجال ويجبرو اهله ع الزواج وين عايشين بيا عصر
حضرته ومسحت كل الرسائل وقفلت الجهاز ورجعت لغرفتي
نمت ع فراشي وع لحضه تجمعت كل الافكار والمواقف والاحداث السوده الي صارت الي
بجيت بحرگه كلب وبدون صوت ضليت ابجي لحد ماغفيت

مرت الايام وقررو زواج نبيل يكون بعد اسبوع
كلها فرحانه وكلها داتجهز نفسها حتى تحضر العرس
واني بعالم ثاني ، بعالم كله اذيه وقهر ودموع
بهيج وقت لازم اني الي اكون عروسه مو هاي البنيه
بهيج وقت كلها داتحضر لزواجي وتحتفل وياي
كل احلامي وتخيلاتي راحن برمشة عين كلشي انتهى وراح

بيوم العرس
طلعت من غرفتي وعيوني مورمه من البجي
شافتني امي ضلت صافنه عليه
تغريد: ليش لسه ملابسه يلاا بسرعه خل نروح
رزان: وين
تغريد: يااا ولج عرس نبيل اليوم شبيج
رزان: روحو انتو ما اروح اني راسي يوجعني ومالي خلك
تغريد : بيج شي
رزان: لا مابيه بس تعبانه شويه
تغريد: يعني هسه مراح ترحين
رزان: مم
تغريد: بكيفج ، ديري بالج ع البيت وشيصير خابريني
رزان: تمام
رجعت لغرفتي وسديت الباب اتجهت ع الشباچ فتحته وشفت السيارات كلها داتروح ع جهه بيت نبيل