اوتار

البارت العشرون

اوتار ...
البارت العشرون ...
للكاتبة: اية علوان ...

..........

وتر
دخلنه بالسنه الجديده
بهل الثلاث الايام كدرت الكه غرفه ايجار حتى اعيش بيها بعد ما اخذت غراضي وكلشي من الفندق اتجهت كبل للمبنى الجديد
رتبت غراضي وقررت استقر بهاي الغرفه
اتجهت ثاني يوم ادور بكل مكان ع شغل عسى ولعل  احد يقبلني واشتغل عنده
بعد بحث يوم كامل للاسف مالكيت والكل  ما استقبلني لان بكل بساطه عربيه
ثالث يوم جانت عطله رسميه لان دخلنه بالسنه الجديده
ماكدرت اطلع لان ماعندي مكان اروح اله
ضليت بغرفتي اقرا دروسي للجامعه واطور من لغتي اكثر
خلال هالثلاث ايام ماسمعت اي خبر عن اسحاق
قررت انساه نهائيا وابلش حياتي وحيده
ثاني يوم من السنه الجديده طلعت ادور ع شغل مره ثانيه
بكل مكان اروح اله احط اسمي ورقمي يمهم بلكي يغيرون رائيهم ويخلوني اشتغل عدهم
رجعت للمبنى بعد يوم كامل من التعب ، رجعت وكلي امال خائبه لان لحد هاللحضه محد استقبلني كعامله عندهم
دكت الساعه ب5 العصر
رن جهازي برقم غريب رديت
طلع شخص اجنبي يريد عامل بدوام جزئي
فرحت كلش وكتله راح اباشر بالعمل باجر
الحمد لله خلصت من شغله المصرف
الصبح اداوم بالجامعه والعصر اطلع للشغل وبليل ادرس وارتاح
صار الصبح وهذا ثالث يوم من السنه الجديده وبهل اليوم عيد ميلادي ، صرت 23 سنه
لحد هاللحضه احس ماحققت اي شي بحياتي
بس متاكده اذا اضل احارب راح احصل ع كلشي بتعبي
كالعاده نفس الستايل دائما
بنطرون عريض وقميص عريض وطويل
اخذت جنطتي وخليت بيها جهازي وسماعات ودفتر رسم واقلام جاف ورصاص ودفتر ثاني للدراسه وكم كتاب شلتهن بيدي
بعدها لبست حذائي وقفلت الباب وطلعت للدوام
بعد ماوصلت للجامعه وهاي ثاني يوم اداوم بيها
رغم متاخره بالتسجيل كلش بسبب شهاده اللغه الي حصلت عليه لان لوما هي مايقبلوني بهل الجامعه
دورت ع قاعتي ولكيتها اول ماطبيت لكيت الكراسي مرتبه بشكل علوي مثل السينما وكدام الكراسي شاشه عاليه وجبيره للتدريس
بكل مكان طلاب من مختلف الاصناف والاجناس
بيهم عرب وبيهم اجانب
اخذت احد الكراسي وكعدت بيهن
خلال هالدقائق ماعندي شي اسوي طلعت دفتر رسمي وكعدت ارسم وحدي بعيد عن الكل
وصلت لنصف الرسمه وطب الاستاذ
انطه مقدمه ورحب باكثر الطلاب الجدد الي مثلي
بعدها بلش يشرح حاولت افهم شيحجي كوا افتهمت
بعد ماخلص شفت دفتري كاتبه معلومات قليله
ضليت محتاره شلون بيه لازم اخذ المعلومات الباقيه بس منين ، اكثر الاشخاص هنا اجانب ومااكدر احجي وي احد
وباقي الاشخاص عرب هم ما اكدر احجي وياهم بسبب خوفي من البشر وبنفس الوقت شي بداخلي يمنعني اتقرب لاحد
طبكت دفتري ولميت اقلامي ورجعت كلشي بجنطتي
كمت من مكاني وطلعت افتر بالحدائق الي بالجامعه
من بعيد لمحت مقاعد مصممه بشكل دائري
عجبني تصميمهن فأتجهت الهن وكعدت
طلعت موبايلي وبلشت ابحث عن رسمه التهي بيها
اما الرسمه الثانيه بقت كما هي ع النص
ماكدرت ارجع الها بسبب انقطاع الرغبه بالاكمال
كلبت الورقه ع صفحه بيضه وبلشت اخطط تفاصيل العين والخشم والحلك بعدها اخر شي الشعر
بعد ماكملت العين الي اخذت مني تقريبا ساعه ونصف
شفت الساعه
المحاضره الثانيه بدت من زمان
لميت الاقلام والمساحه وحطيتهن بالجنطه واخذت دفتر الرسم بيدي
بديت اركض ع السريع ما اهتميت لاي شي
ادري راح انطرد هالمره لان تاخرت كلش
وصلت للقاعه بعد ربع ساعه مشي سريع
من وصلت لكيت الاستاذ اتجاهه ع الشاشه ودايشرح بيها
حاولت انتهز هالفرصه وادخل بدون ماينتبه
مشيت بخطوات بسيطه وهادئه
وكفت ع اثر احد يصيح بأسمي
وتر: yes
الاستاذ: do you ask my permission when you enter
هل اخذتي الاذن مني من دخلتي