اشهد ان حضوركِ موت

بارت 36

#اشهد_ان_حضوركِ_موت
للكاتبة #فاطمة_العبادي

قراءة ممتعة كيكاتي 🖤.

لتنسون تصويت + تعليقات بين الفقرات .. البارت اكثر من 5800 كلمة 🤭💙

تجرئت وگفت على اطراف اصابعي وبسته بشفته مثل العطشان لزمني من راسي وجر نفس قوي ، نزلت نور من الدرج ركض و هيَ تصرخ ..

أبتعد عني شافها حط ايده على عيونه فركهن باوعتلها مبتسمة بخـبث وهيَ ملخت روحها تملخ بچي وصريخ عبالك ميت الها عزيز ..

زيدان سد حلگها بأيده ولزگها على محجر الدرج وگللها بعصبية ...من الخطوبة گتلچ رباب تنزل ضرة على راسچ وانتِ قبلتي فـ بطلي عيارة ، گايلچ هاي الأصل عجبچ لو ما عجبچ الها زيدان والبيت والچ العتبة والدمع .

چانت مثل الصعقة نزلت على راسي من الخطوبة؟ يعني هاي مرته؟ واني الغبية شگد صارلي هنا حابسة روحي ماطلعت وتفقدت وشفت الوضع وعرفت هاي منو وشنو مثل الغبية گاعدة وساكتة ..

كلهم لتمو على عياطها براق طلعت تركض خايفة عليَ من شافتني واگفة مابية شي ضلت بمكانها ..

ونور تدفع بي وهو يسكت بيها وصلت بي ضل يضربها علمود تسكت بس هيَ النذلة ضلت تغلط على امي وابوي وتربيتي اليسمعها يگول متت على زيدان وكتلت روحي علي ..

سمية ...فهمونة شصاير ليش هذا العياط

نور وهي تبچي ...والله يا خالـة تقبلينها انزل الكة رجلي ويا هاي ال*** حلگ بحلگ يتباوسون .

ضربها راشدي قوي وصرخ بصوت عالي ...لا تجاوزين لسانچ اگصه ابوسها اشبكها مالج دخل مرتي مثل ما انتِ مرتي

سمية ضربت وجها بصدمة وعمو جاسم كلة ...نچر ولك نچر خذيتها وسويت البراسك

سمية ...ولك زيدان تاخذها على بنت اختي شحجي شگول لأختي ابني جاب ضرة على بنيتج وهيَ بعدها عروس!!!
طلگ هاي الما تتسمى

رباب ...لا والله؟! ..
رجلي واحبه ليش حتى يطلگني ويكسر بختي اني هم عروس صارلي تلث اشهر .

نور وهيَ تبچي تحجي وياي ...حرام عليچ تاخذينة مني واني بعدني صارلي ويا نص سنة ولچ حتى الله ما يرضى بعملتچ هاي .

زيدان ...صعدي لچ

رباب ...اني اولى بي منچ اني حب سنين ..
وبعدين هوَ گايلچ راح اخذ رباب اخذها ليش قبلتي بي؟

نور ...ما صدگت!! ما صدگت خالـة احچي راح اموت من القهر خالي ليش سااااكت؟

سمية ...شحچي شگول غير هو مشيخها علينا من دخلت للبيت لهذا اليوم

نور ...لچ ترضين ياخذ وحدة عليچ وانتي بعدچ عروووووس؟

رباب ...طبعا لا لأن اني مو انتِ ..
عن نفسي قبلت بي رغم اعرف بي متزوج بس گلت مو مهم اذا اني الماخذة الگلب والمحبة والفرحة الي ذيج شيبقالها غير الحسرات .