ياسمين بصدمة والدموع بتنزل على خدها: لأ يا عمر .. والله لأ .. إنت مش فاهم حاجة!
عمر: فهميني طيب بدل ما أنا نايم على وداني!
ياسمين: أنا هفهملك كل حاجة بس ممكن تهدى .
وبدأت ياسمين تحكيله على كل حاجة .. عمر طبعاً إستهزأ بكلامها .. وضحك ضحكة سخرية وقال: لأ واضح إنك بقيتي تعرفي تألفي حكايات حلو أوي .. بصي يا ياسمين أنا كلامك ده مش داخل دماغي، ولا قادر أقتنع بيه .. بس لو عاوزاني أسامحك في اللي قولتيه وأنساه وأعتبر نفسي مسمعتش حاجة .. وإن دي خطرفة بسبب التعب النفسي اللي عندك يبقى توافقي الشيخ ييجي ويعالجك .. وكمان تتقبلي فكرة إنك عيانة وتخلي ندى أختي تتكلم معاكي وتفهم حالتك إيه بالظبط عشان نقدر نعالجك نفسياً .. عشان أنا وابنك ملناش ذنب في اللي إنتِ فيه ده!
ياسمين بدموع: يعني أنا اللي ليا ذنب يا عمر! .. وبعدين أنا يشهد ربنا مكدبتش عليك في أي كلمة أنا قولتهالك دلوقتي! .. أنا حكيتلك كل حاجة يا عمر برغم إني عارفة إني ممكن أتإذي .. بس عشان تصدقني وتساعدني!
عمر: محدش هيإذيكي يا ياسمين .. وأنا عاوز أساعدك والله! .. بس ساعديني إنتِ كمان! .. وافقي يا ياسمين إن الشيخ ييجي وكل حاجة هتتحل صدقيني!
ياسمين سكتت وبصت في الأرض .. وبدأت تعيط .. عمر قرب منها وخدها في حضنه وبدأ يطبطب على ضهرها ..
عمر: إهدي يا ياسمين وكل حاجة هتتحل صدقيني .. صدقيني محدش هيقدر يإذيكي وأنا موجود!
ياسمين حضنته جامد وإنهارت من العياط .. وبعد شوية بعدت عنه ومسحت وشها بإيديها وقالت: وأنا موافقة إن الشيخ ييجي يا عمر .. عشان أثبتلك إني أنا كمان عاوزة أساعد نفسي .. وعشان إنت فعلاً معاك حق إنت ملكش ذنب في اللي أنا فيه ده، إنت مش مضطر تستحملني وأنا كدا ..
عمر حاوط وشها بإيديه وقال: يا حبيبتي، أنا مش قصدي كدا والله .. متزعليش مني يا ياسمين .. مكنش قصدي!
ياسمين تجاهلت كلامه وكملت: بس لو جرالي حاجة يا عمر خليك عارف إني بحبك أوي .. وإن يزن إبننا إحنا .. مش ابن حد تاني .. إنت متستاهلش إن يحصل فيك كدا وإنه ميطلعش إبنك .. وأنا والله يا عمر عمري ما فكرت أخونك ولا عمري فكرت في حد غيرك .
عمر ضمها لصدره جامد وقالها: هششش .. خلاص .. خلاص يا ياسمين .. إهدي، إهدي وكل حاجة هتتحل إن شاء الله .
ياسمين حضنته جامد وإنهارت تاني من العياط .. لدرجة إن رجلها مبقتش قادرة تشيلها .. وفجأة عمر حس إنها بتقع من بين إيديه ..
عمر بصوت عالي وخوف: ياسمين!
وشالها بسرعة حطها على السرير .. واتصل بدكتور بسرعة .
---------- بـقلمـــي مـنـه محـمـد ----------
الدكتور جه وكشف على ياسمين وقال إن عندها إنهيار عصبي .. وإداها حقنة مهدئ ..
أنت تقرأ
رواية " هازارد " 🔞😈
Romanceالجزء الثاني من رواية " ما وراء الظلام " 😈🔥 عشقها جنيّ .. ( الرواية بالعامية المصرية 📌 ) بإختصار في هذه الرواية يمكنك أن تعرف ماهية الحُب .. وكيف لقلبٍ بريء أن يجعل من الشيطان ملاكاً .. يمكنك أن تعرف معنى الحُب الأبديّ .. الحُب المطلق، الـ ما لا...
