فـ راح ناحية باب الحمام اللي في الأوضة .. وقبل ما يخبط على الباب عشان يتأكد إنها جوا .. سمع صوتها بتتكلم جوا الحمام ..
مكنش مميز هي بتقول إيه .. بس كان سامع صوتها زي ما تكون بتكلم حد .. أو بتكلم نفسها.. كانت بتتكلم بإنهيار ..
وليد خبط على الباب كام خبطة .. مردتش!
خبط تاني ..
ياسمين: أيوه!
وليد: حضرتك كويسة؟
ياسمين: أيوه!
وليد سكت شوية وهو متردد .. بس بعد ثواني ياسمين فتحت الباب وخرجت ..
وليد قالها: حضرتك كويسة؟
ياسمين بإستهزاء: إنت شايف إيه؟!
وراحت قعدت على السرير ..
وليد راح قرب منها .. و وقف قصادها وقال: طب ممكن تاخدي الحقنة دي عشان تهدي؟
ياسمين ضحكة بسخرية وقالت: لااا .. دا إنتوا شايفني مجنونة مجنونة يعني؟!
وليد: أبداً يا دكتور ياسمين .. وبعدين يعني من إمتى وإحنا كنا بنقول على المرضى بتوعنا مجانين؟
ياسمين: عشان هما بيبقوا مجانين فعلاً .. دا لفظ بس بنستخدمه عشان منجرحش مشاعرهم .. آل يعني كدا الوضع إختلف لما إستخدمنا مصطلح مختلف؟! .. إنتوا نفسكوا بتعاملوني دلوقت ولا كإنكوا تعرفوني .. أختي وجوزي؛ أكتر إتنين بثق فيهم في حياتي خذلوني وجم رموني هنا زي الكل*بة .. وإنت المفروض زميلي في الشغل وعارف كفائتي وشاطرتي .. جاي دلوقتي تديني حقنة مهديء!!
وليد كان واقف محتار مش عارف يقولها إيه .. فضل ساكت شوية .. بس في الآخر هي إتكلمت وقالت:
_ هات يا دكتور الحقنة دي .. هات .. ( وأخدتها منه وكملت ) .. وياريت متتعبش نفسك تاني ولا تدخل عليا .. ولا تخلي حد يجيلي .. مش عايزة أشوف أي بني آدم تاني!
وليد: على فكرة يا دكتور ياسمين .. محدش يعرف بوجودك هنا غيري .. أنا وندى وعمر وبس!
ياسمين: والله!! .. تصدق كدا ريحتني جداً .. يااه دا أنا كنت خايفة من الفضيحة بجد .. شكراً جداً ليكوا .. مش عارفة أشكركوا إزاي والله؟!
وليد بتردد: طيب ممكن تاخدي الحقنة عشان تهدي؟
ياسمين بإنفعال: إنت شايفني بشد في شعري؟! .. ما أنا بتكلم كويس أهو!! .. هو أي شغل دكاترة عليا وخلاص! .. ما أنا خدتها منك عشان أخدها .. مش هاكلها يعني؟!
وغمضت عينيها وخدت نفس عميق: ممكن تسيبني لوحدي لو سمحت؟
وليد: حاضر ..
وسابها وليد وخرج .
---------- بـقلمـــي مـنـه محـمـد ----------
أنت تقرأ
رواية " هازارد " 🔞😈
Romanceالجزء الثاني من رواية " ما وراء الظلام " 😈🔥 عشقها جنيّ .. ( الرواية بالعامية المصرية 📌 ) بإختصار في هذه الرواية يمكنك أن تعرف ماهية الحُب .. وكيف لقلبٍ بريء أن يجعل من الشيطان ملاكاً .. يمكنك أن تعرف معنى الحُب الأبديّ .. الحُب المطلق، الـ ما لا...
