ندى: طب إنت هتعمل إيه دلوقتي؟
عمر: يعني إيه هعمل إيه دلوقتي؟
ندى: يعني هتتصرف إزاي مع ياسمين دلوقت!
عمر: هتصرف إزاي يعني إيه؟ .. هتصرف عادي يا ندى!
ندى بإستغراب: عادي إزاي؟! .. بعد كل اللي إستنتجناه ده وهتتعامل عادي!
عمر: يعني المفروض أعمل إيه يا ندى؟!
ندى: معرفش! .. بس أنا لو منك مش هروح البيت النهاردة! .. خليك بايت معانا!
عمر ضحك وقالها: إنتِ خايفة عليا يا ندى؟
ندى: إنت بتضحك يا عمر؟ .. أيوا طبعاً خايفة عليك! .. مخافش عليك ليه؟ .. ياسمين كدا شكلها ملبوسة وعليها حاجة .. والحاجة دي ممكن تإذيك! .. خاصة بعد ما اتإكدنا خلاص إنها موجودة فعلاً! ..
وكملت وقالت: وبعدين إنت مش بتقول إن البيت بقى مكان مقبض بالنسبالك؟ .. خلاص هتروح ليه؟
عمر: إنتِ عاوزاني أسيب ياسمين لوحدها يا ندى؟ .. وأسيب ابني كمان!؟ .. دا فرضاً إن ياسمين فيها حاجة زي ما بتقولي، هسيب إبني معاها؟ .. مش ممكن تإذيه؟
ياسمين بعد ما افتكرت حاجة قالت بتردد: صحيح، هي مش ياسمين كانت قالت قبل كدا إن يزن دا ..
وقبل ما تكمل جملتها عمر قاطعها وقالها: لأ، مفيش الكلام ده .. أنا سألت كذا حد وسألت الشيخ اللي كنت جبته أول ما رجعنا من المستشفى وقالي إن مفيش الكلام ده .. يزن ابني يا ندى!
ندى بإرتياح: طب الحمدلله ..
ورجعت إتخضت وقالت: طب إفرض ياسمين أذته؟ .. أو الحاجة اللي عليها دي عملت فيه حاجة!؟
عمر: شفتي؟ .. عشان كدا بقى مينفعش أسيبهم لوحدهم!
ندى بخوف: بس أنا قلقانة عليك يا عمر .. خد بالك من نفسك كويس!
عمر: متقلقيش عليا يا حبيبتي ..
وقرب منها وطبع بوسه خفيفة على جبينها .. وراح سلم على باباه ومامته وطلع على شقته .
---------- بـقلمـــي مـنـه محـمـد ----------
عمر وهو طالع على السلم لاقى تليفونه بيرن .. ولما رد على المكالمة قالوله إنهم عاوزينه في الشغل ضروري ..
فـ قرر إنه هيطلع شقته يغير هدومه وهينزل تاني يروح الشغل ..
بعد ما دخل البيت وهو رايح ناحية الأوضة .. كان سامع صوت ضحك عالي .. إستغرب .. ولما ركز مع الصوت لاقاه جاي من الأوضة .. قرب من الأوضة بالراحة .. ولما وصل عند الباب .. سمع صوت ياسمين بتتكلم مع حد جوا ..
ملامح وشه إتبدلت وفتح الباب فجأة ..
لاقى ياسمين شايلة يزن وبتتكلم معاه .. ريأكشن وشه بقى عبارة عن إستغراب وتعجب لإنه كان متأكد إنها بتتكلم مع حد .. وكان سامع حد بيرد عليها .. لكنه ملحقش يميز الصوت .. ومبقاش متأكد حتى إن كان في صوت حد مع ياسمين من الأساس!
أنت تقرأ
رواية " هازارد " 🔞😈
Romanceالجزء الثاني من رواية " ما وراء الظلام " 😈🔥 عشقها جنيّ .. ( الرواية بالعامية المصرية 📌 ) بإختصار في هذه الرواية يمكنك أن تعرف ماهية الحُب .. وكيف لقلبٍ بريء أن يجعل من الشيطان ملاكاً .. يمكنك أن تعرف معنى الحُب الأبديّ .. الحُب المطلق، الـ ما لا...
