رواية " هازارد " 🔞😈

الفصل الـ 15

( في إحدى الكافيهات )

ندى كانت عمالة تتكلم وترغي كتير .. أما ياسمين كانت أغلب الوقت سرحانة في اللي حصل ومش عارفة تعمل إيه ..

ندى: ياسو .. هااي!! .. إي يما بقالي ساعة بكلمك وإنتِ ولا هنا!

ياسمين: قولتلك تعبانة يا ندى وعاوزة أروَح!

ندى: يالهوي عليكي .. دا إنتِ نكد يا شيخة! .. أو الحمل بقى هو اللي مأثر عليكي؛ عشان كدا بقى أنا هعذرك .. عشان خاطر البيبي الثغنون اللي هيشرف كمان خمس شهور ده

ياسمين: لأ كتر خيرك والله .. متشكرين!

ندى: ألا قوليلي صحيح .. نفسك بقى تسمي إيه؟ .. أكيد كان جاي على بالك أسامي ولاد حلوة وأسامي بنات حلوة عشان اللحظة دي ..

ياسمين: عادي .. بصي مش فاكرة دلوقت .. مش جاي على بالي حاجة دلوقت والله .. مش رايقة، لما أروق هبقى أقولك عليهم ..

ندى: طيب يا بومة .. أقولك .. أنا ممكن أقترح عليكي الأسماء اللي أنا بحبها؟

ياسمين: إقترحي ياختي ..

ندى: بصي ياستي .. أنا بحب مثلاً إسم آدم و زياد و .. مالك ..

ياسمين أول ما سمعت الإسم إنتبهت .. وجه على بالها حاجة كدا .. فسألت ندى ..

ياسمين: بقولك يا ندى صحيح .. إيه أخبار الشغل في المستشفى؟

ندى: كويس .. بس إيه اللي جابه على بالك دلوقت؟!

ياسمين: يعني .. عادي .. أصل كنت بفكر أرجع الشغل، حاسة يعني إن ممكن قعدت البيت أو الحمل زي ما بتقولي هما اللي مأثرين عليا ومسببنلي التوتر والضغط اللي أنا فيه ومودي مش حلو كدا .. ف كنت بفكر إن يمكن لما أرجع الشغل مودي يتظبط ..

ندى: لااا معتقدش خالص .. أنا بقول إنتِ ترتاحي تماماً الفترة دي لحد ما تولدي بالسلامة ..

ياسمين: نعم ياختي! .. إنتِ عارفة معنى الكلام اللي بتقوليه ده!؟ .. يعني كدا مش هرجع الشغل تاني خالص وعليكي خير!

ندى: وفيها إيه يعني؟ .. ما تخليكي في البيت تربي ابنك وتشوفي نفسك وحياتك .. مش لازم شغل يعني!

ياسمين: لااا إنتِ دماغك ضربت على الآخر يا ندى! .. إنتِ عايزة تفهميني إنك متعرفيش الشغل دا بالنسبالي إيه؟ .. أنا الشغل بالنسبالي حياة .. من غيره أموت!

ندى: بعد الشر عنك يا يسو .. وبعدين مش للدرجادي يعني! .. بكرا إن شاء الله لما ملوكة يشرف و ..

ياسمين قاطعتها بإنفعال: إيه ملوكة ده!؟

ندى بخضة: إيه يا ياسمين مالك! .. قصدي البيبي الجديد يعني .. بس حبيت أدلعه، ألاه!؟