رواية " هازارد " 🔞😈

الفصل الثالث

وخرج عمر ومشي .. ياسمين قررت تقوم تاخد شاور يمكن تفوق من اللي هي فيه .. وفضلت سرحانه طول الوقت لحد ما طلعت من الحمام .. وكانت لسة بتجفف شعرها لاقت الفون بيرن .. بتبص لاقتها ندى .. فردت عليها ..

ندى: صباح الخير يا يسو ..

ياسمين: صباح النور ..

ندى: مال صوتك؟

ياسمين: مفيش ..

ندى: عمر قال إنك تعبانه .. فقولت أتصل اطمئن عليكي، وأشوفك هتروحي الشغل ولا لأ؟

ياسمين: اهاا كنت تعبانة شوية بس النهاردة بقيت كويسة الحمدلله .. بقولك هي ماما زينب صاحية؟

ندى: إشمعنى؟ .. بعدين لأ هي نايمة، إيه اللي هيخلي ماما تصحى بدري أوي كده! هي بتصحى تصلي الفجر وتنام تاني ..

ياسمين: طب هي عاملة إيه دلوقت؟

ندى: لسة تعبانه يا ياسمين، إدعيلها ..

ياسمين: من عنيا يا حبيبي، حاضر .. ربنا يديها الصحة والعافية يارب .. بصي أنا هنزل الشغل النهاردة و وإحنا راجعين هبقى أقعدي عليها .. تمام؟

ندى: ماشي يا حبيبتي، مفيش مشكلة ..

---------- بـقلمـــي مـنـه محـمـد ----------

( في المستشفى )

قررت ياسمين تجهد نفسها في الشغل ومتفكرش في اللي حصل خالص، جايز هي غلطانة وعمر هو اللي معاه حق فعلاً ..

شوية وهما قاعدين في غرفة الدكاترة الخاصة بيهم في المستشفى ..

نسرين: شوفتوا الدكتور الجديد يا بنات؟

سلمى: أنهي؟

نسرين: أبو عيون دباحة ده ..

سلمى: ما تتكلمي من غير الغاز كده ووضحي تقصدي أنهي بالظبط؟

نسرين: يعني هو في أحلى من اللي عيونه زرقاء وشكله فلاتي ده، هو دا منظر دكتور أصلاً .. دول جايبينه يعالج المرضى بشكله القمر ده ويجبلنا إحنا خلل في المخ ..

ندى كانت ماسكة ملف بتبص فيه .. فرفعت عينيها من الملف، وبصيتلهم وقالت ..

ندى: قصدكوا دكتور مالك؟

نسرين: أيوااا .. إنتِ كدا ابتديتي تفهميني يا ندوش، إسمه كان طاير من دماغي والله ..

سلمى: أيوا أيوا تصدقي افتكرته ..

نسرين وهي ساندة رأسها بإيديها: يلهوي على القمر يا ولااااه ..

وقعدوا كلهم يضحكوا ويهزروا وياسمين قاعدة في حالها .. بتسمعهم وساكتة وبس ..

بعد شوية .. ياسمين وندى خرجوا من الأوضة مع بعض .. كل واحدة رايحة عشان تكمل شغلها .. بس كانوا ماشيين مع بعض في الطرقة، بيتكلموا شوية ..