ياسمين فضلت قاعدة مكانها على السرير .. بتتابع بعينيها ندى وهي خارجة من الأوضة، وأول ما باب الأوضة إتقفل .. ياسمين غمضت عينيها وبدأت تفتكر في الأحداث اللي مرت .. وتفتكر صدمتها لما قالولها إنها حامل فعلاً .. وبقت تفتكر في الشخص اللي بيجيلها في الأحلام كتير .. واللي مؤخراً بقت تحس إنه هو هو نفسه " مالك " زميلها في الشغل .. أو إن الشخص اللي بيجيلها في الأحلام دا بيتشكل على هيئة مالك .. بتحاول تربط أي أحداث ببعضها .. لكن مش عارفة .. كل اللي عارفاه ومتأكدة منه إنها حامل .. وغالباً حامل في ولد .. أي حاجة تانية دلوقت مش مهم .. الأهم عندها دلوقت إنها تاخد بالها من نفسها وتحافظ على البيبي الجديد اللي ربنا رزقها بيه ..
عدى شوية وقت وياسمين نامت من كتر التفكير ..
---------- بـقلمـــي مـنـه محـمـد ----------
عدت الشهور الأولى من الحمل على خير ومفيش أي حاجة تانية – مش طبيعية – حصلت لياسمين .. وندى ومامتها ومامت ياسمين بقوا يباتوا معاها هما التلاتة ويقضوا معاها أطول وقت ممكن عشان يساعدوها وكمان يعوضوها عن غياب عمر واللي بقى يستغل وجودهم حواليها ويتأخر في الشغل ويبات فيه بالأسابيع .. وإهتمامه بياسمين قل جداً تحت مسمى إنه بيجتهد في الشغل الفترة دي عشان في مولود جديد هيشرف كمان كام شهر وهيحتاجوا مصاريف كتير الفترة الجاية .. لكن الوضع دا مكانش عاجب ياسمين خالص .. ولا عاجب حد ..
---------- بـقلمـــي مـنـه محـمـد ----------
( الساعة 12 بالليل )
ياسمين: عمر ..
عمر وهو نايم على السرير ومديها ضهره: اممم
ياسمين: عمر ماتستهبلش .. إنت لسة منعستش!
عمر لف ليها وقالها: نعم يا ياسمين .. عاوزة إيه؟
ياسمين: عاوزة أتكلم معاك شوية ..
عمر: دا وقت كلام يا ياسمين؟ .. إنتِ شايفة الساعة كام؟!
ياسمين: وإيه يعني؟ .. ما إنت ياما بتسهر في الشغل .. وأنا ماصدقت إنك نايم معايا النهاردة!
عمر: بس إنتِ عارفة إني تعبان من الشغل ومحتاج أرتاح ..
ياسمين: عادي هنتكلم شوية صغننين وبعدين نام براحتك!
عمر: أنام براحتي فين بس .. ما أنا عندي شغل مهم بكرا بردو!
ياسمين: هو إيه اللي شغل مهم؟ .. ما إنت بالنسبالك شغلك كله مهم!
عمر: طب أعمل إيه بس يا حبيبتي؟
ياسمين: حبيبتك؟ .. هو في حد يعامل حبيبته زي ما إنت بتعمل معايا كدا؟
عمر: طب قوليلي طيب أعمل إيه؟ .. مش كل اللي أنا بعمله ده عشانا وعشان المولود الجديد إن شاء الله؟
أنت تقرأ
رواية " هازارد " 🔞😈
Romanceالجزء الثاني من رواية " ما وراء الظلام " 😈🔥 عشقها جنيّ .. ( الرواية بالعامية المصرية 📌 ) بإختصار في هذه الرواية يمكنك أن تعرف ماهية الحُب .. وكيف لقلبٍ بريء أن يجعل من الشيطان ملاكاً .. يمكنك أن تعرف معنى الحُب الأبديّ .. الحُب المطلق، الـ ما لا...
