( اليوم اللي بعده في المستشفى )
ندى راحت شغلها عادي جداً .. وقررت إنها تكلم واحدة صحبتها في مكتب السجلات وتطلب منها ملف دكتور مالك زميلهم ..
( والحوار اللي دار بينهم كالآتي )
ندى: معلش يا حبيبتي لو هتعبك معايا .
مروة: لا ولا تعب ولا حاجة .. بس قولتيلي إسمه إيه؟
ندى: دكتور مالك .
مروة بضحك: مالك إيه يا ندى، صحصحي معايا كدا يا حبيبتي .. إنتِ عارفة فيه كام دكتور في المستشفى .. وكام شيفت أصلاً؟!
ندى إداتها بياناته اللي تعرفاها كلها .. وإنه كان جاي تبع الجروب الأخراني .. وقالتها على إسم كام زميله ليه بردو كانوا جايين معاه .. اللي هما حبيبه وفرح .. وكمان صاحبهم هيثم .
وفضلت مروة تدور فترة في السجلات .. بس للأسف ردها كان صادم!!
مروة: للأسف مش لاقية حد بالإسم والمواصفات دي يا ندى.
ندى بصدمة: نعم!
مروة: زي ما بقولك كدا .. إنتِ متأكدة من الإسم دا طيب؟
ندى بنفس الصدمة: أيوه يا مروة .. دا كان صاحبنا .. وبنشوفه ونتكلم معاه زي ما بكلمك كدا!
مروة: مش عارفة أقولك إيه والله! .. الموضوع غريب جداً بصراحة!
ندى: طب باقي الجروب موجودين؟ .. أسامي صحابه اللي قولتلك عليهم دول؟
مروة وهي بتقلب في الملفات بتاعت آخر جروب جه يتدرب في المستشفى ..
مروة: أيوه .. كلهم موجودين .. ماعدا الإسم اللي قولتي عليه دا .. مالك .. مالك سليم الهواري! .. مش موجود نهائي، ملوش أي أثر!
ندى بصدمة: إزاي بس! .. عموماً متشكرة جداً يا مروة تعبتك معايا .
مروة: العفو، على إيه بس يا حبيبتي .. أنا كان نفسي أساعدك والله، بس مش عارفة بجد إيه ده .. أول مرة تحصل حاجة زي كدا!
ندى: هي فعلاً حاجة غريبة .. طيب، يلا يا حبيبتي .. أشوفك بعدين .
وسابتها ندى وخرجت .. وقررت تروح تشوف أي واحدة من صحبات مالك .. أو المفروض إنها صحبته يعني ..
وطول ما هي ماشية في طرقة المستشفى دماغها كانت شغالة، مبتفصلش .. عمالة تفكر في اللي حصل .. وتفتكر في كل مواقفها مع مالك ده .. و وجوده في المستشفى وتلقائيته .. وكل المواقف العادية اللي كانت بتحصل قدامها، ومتخزنة عندها في الذاكرة وهو موجود فيها! .. وبكدا كمان هي صدقت كل كلمة ياسمين قالتهالها .. وإتإكدت إن اللي بيحصل مع ياسمين ده شيء خارق للطبيعة فعلاً، دا مش مجرد مرض نفسي ..
أنت تقرأ
رواية " هازارد " 🔞😈
Romantiekالجزء الثاني من رواية " ما وراء الظلام " 😈🔥 عشقها جنيّ .. ( الرواية بالعامية المصرية 📌 ) بإختصار في هذه الرواية يمكنك أن تعرف ماهية الحُب .. وكيف لقلبٍ بريء أن يجعل من الشيطان ملاكاً .. يمكنك أن تعرف معنى الحُب الأبديّ .. الحُب المطلق، الـ ما لا...
