اسير الناردين(جارى تعديل السرد)

نصيحة٢

ذهبت ناردين لتحضير السفرة ولكنها فوجئت بمن يسحبها من ملابس من خلف عنقها ويسحبها الى المطبخ، انتفضت من مكانها بزعر ثم نظرت لذلك الشخص فتنهدت بارتياح عقب تلك الحركة المفاجئة قائلة براحة
_ماما حرام عليكى خضيتينى

نظرت اليها والدتها نظرة حارقة وقالت بضيق شديد
_حرام عليا انا!! دة مافى حرام غير خلفتك انتِ يافضحانى وسط الناس

ثم ضربت ظهر يدها بباطن الاخر وهى ترتكز بهم على معدتها بحركة شعبية قائلة بضيق
$جايبة مديرك ومدير اخوكى وعزماه عندنا لا وعازماه على العشا وقولنا ماشى مفيش حاجة، لكن تعزميه على فول وطعمية وكشرى وبتنجان دة اللى مش ممكن
ثم نظرت لها والدتها نظرة ثاقبة وقالت بعيون محققة
_ناوية على اية يابت بطن؟

تظاهرت ناردين بالانشغال بملئ الاطباق بالطعام  قائلة ببراءة بتوتر فهى تعلم والدتها بنظرة واحدة ستكشف كل ما تخبىه داخل صدرها فهذه هى الحاسة السابعة لدى الامهات بل والاهم ان وقفت امامها دقيقة اخرى ستجعلها تقر بكل مافعلته بحياتها من اخطاء
_وانا هنوى على ايه؟ وهعرف منين ان انا فى الشغل و انه هيوصلنى وكمان هيطلع معايا؟ الموضوع صدفة مش اكتر
ثم اكملت بمرح مصطنع

_وبعدين يعنى الجماعة الاغنيا دول ملهمش نفس ياكلو من اكل عامة الشعب، دة حتى الدراسات العلمية اثبتت ان الفول بيزود الذكاء وسرعة البديهة

رفعت لها سامية حاجبها لها بنظرة معينة جعلتها تعدل كلامها قائلة بتوتر 
_مش بيزوده اوى يعنى بس بيساعد
ثم اكملت بضيق مصطنع
_ وبعدين دة الاكل اللى عندنا وهو جه ياكل بقى منه مش هنعمله مخصوص

امسكتها سامية وجعلتها تلتف لمواجهتها ثم قالت بجدية
_ناردين انتى تضحكى على اى حد بالكلمتين دول لكن انا لا يابنت بطنى، انتِ بنتى ياناردين يعنى حفظاكى صم وعارفة كل حركاتك واكشف كدبك والاعيبك من على بعد اميال، قوليلى اية اللى فى دماغك

نظرت لها ناردين ثم علمت بانه لابد من المواجهة والاعتراف فطأطأت رأسها قائلة بإعتراف
_بصى يا ماما كل اللى اقدر اقولهولك بإن اتطلب منى انى اساعده وده الحل الوحيد، ف ارجوكِ جارينى فى اللى بعمله، ارجوكِ يا امى

نظرت لها سامية بغير رضى عن حديثها هذا ثم قالت بحسم وهى تتحرك
_لا انا هروح اطلب ديليفرى لان عمايل الاكل هتاخد وقت ومش هنتفضح

اوقفتها ناردين بكلماتها قائلة
_والديليفرى هياخد مش اقل من ساعة على ما ييجى وكدة هيفتكر ان احنا بنهينه فلازم ان احنا نقدم الاكل

عادت لها سامية وقد احتدالغضب بها قائلة بسخط 
_ناردين انتِ حطيتينا فى مشكلة كبيرة، اللى برة دة التايجر ومديرك انتِ واخوكى ولو اعتبرها اهانة هنروح ف داهية

نظرت لها ناردين بهدوء وقالت بثقة
_متقلقيش، سيبيها على الله ثم عليا وجارينى فى اللى بعمله