اسير الناردين(جارى تعديل السرد)

تغيير

دخل المنزل بعد يوم شاق فهو متعب بشدة مرهق جسديا من العمل، ومرهق ذهنيا من التفكير طوال اليوم، وكذلك مرهق نفسيا، لا يصدق بان اليوم انتهى اخيرا ولكنه سعيد وبشدة ايضا فاليوم حقق مايريد بعد فترة طويلة، اليوم يشعر بالسعادة كان يدخل المنزل يصفر ولكنه توقف حينما وجد كل من فيه يجلسون امام التلفاز القى السلام ولم يجلس معهم بل تحرك باتجاه غرفته حينما سمع ذلك الصوت يهتف باسمه

حسام: آسر!

توقف آسر ينظر له باستفهام
حسام :ما تيجى تقعد معانا

رفع له آسر حاجبه ولكنه قال بهدوء
مش عاوز اقعد انا تعبان وعايز ارتاح

وقف حسام قبالته مستعد للمواجهة التى اجلها طويلا فهو لا يحتمل ان تضيع حبيبته من بين يديه بسبب الماضى فقال بهجوم وبوضوح
:مش قادر ولا مش عايز علشان انا موجود

مسح آسر وجهة بكفيه فحالته اليوم منهكة بشدة كما انه سعيد بعد فترة طويلة ولا يريد ان يضيع تلك السعادة كما انه مرهق بشدة فقال
حسام ممكن نأجل الكلام ف الموضوع ده يوم تانى لانى فعلا تعبان

حسام باصرار
لا نتكلم دلوقتى

سحب آسر انفاسة وحبسها محاولا تهدئة نفسه ثم نظر له وقال
اوكى نتكلم دلوقتى قولى عاوز نتكلم ف ايه؟

حسام: هتفضل زعلان منى لامتى واصلا انت زعلان منى ليه
آسر: بستعبط
قالها آسر بسخرية شديدة يعقبها ابتسامة ساخرة جعلت كل من بالمنزل ينظر لهم بتوجس خائفين مما يمكن ان يحدث

حسام بدفاع
:لا ياسيدى مش بتستعبط بس قولى زعلان ليه وهتفضل كدة لحد امتى؟
الى هنا وكفى بدأ هو يفقد اعصابه قائلا
:لا بجد مش عارف زعلان ليه زعلان على حظى الاسود يعنى انت بتسال؟ المصيبة تحصل وانت اللى المفروض تلم الليلة وتكون واقف ف ضهر خالك لانك المفروض تكون ابنه وهو اللى مربيك تهرب!! ياشيخ حرام عليك ان مكنتش كبرت ف البيت دة واتربيت فيه ان مكانش الراجل والست دى  (ثم اشار على والديه) اعتبروك ابنهم واكتر وربوك ف بيتهم كنت عملت اية وقت ما حصلت المصيبة اللى اتحطينا فيها
ثم اقترب منه وبدأ يضرب بسبابته ف صدره قائلا
عملت ايه يا ابن عمتى وقت ماحصلت المصيبة دى عملت اية؟!  هربت ايوة هربت ومتقولش حاجة غير كدة، هربت وسبتنا ف قلب المصيبة دى، كنت شاب وكبير وسيبت خالك ف قلب المعمعة والمصيبة دى وهربت، سيبت خالك الراجل الكبير يلم المصيبة دى لوحده وانت نفدت بجلدك، مكنتش راجل يعتمد عليه ف وقت الشدة سيبت خالك ومرات خالك وولاد خالك وهربت يا ابن الاصول، من ناحية المفروض هو يلم المصيبة دى من الاعلام والصحافة وحتى الحكومة ومن ناحية تانية المفروض انه كمان يسيطر على مشاعره المكلومة دى ويتغلب على وجعخ وكسرته ويلم الموضوع، وانت هربت المفروض اللى نعتمد عليه ف الوقت دة سابنا وهرب بحجة انه موجوع بسبب اللى حصل وانا
ثم بدء يضرب صدره هو
وانا انا اللى كنت عيل لقيت نفسى مرة واحدة مستوجب انى اتغلب على وجعى وكسرتى وعلى المنظر اللى شوفته دة وانى اكون راجل
ثم ابتسم بسخرية :راجل يعتمد عليه يتغلب على وجعه ومصيبته وكمان المفروض العيل دة يلم الليلة من الكل وينقذ اسم العيلة ومستقبلها وينقذ نفسه بدل مايتسجن او ينهار كل حاجة لا ومش بس كدة اتفاجئ انه والده حط عليه اللوم خايف ليتكرر فيه نفس اللى عمله احمد طيب ازاى ؟؟!!