اسير الناردين(جارى تعديل السرد)

هدية

دخلت الى المنزل ولكنها فوجئت من ذلك الصوت الذى ياتى من خلفها قائلا بمرح
_نفذتى اللى ف دماغك خلاص اخيرا؟

نظرت الى مصدر الصوت بتفاجئ عقب تلك الانتفاضة اةفزعة التى صدرت منها ثم قالت بتوتر
_بابا!! تقصد ايه؟

نظر اليها حسن بابتسامة رزينة ثم قال وهو يضع يده على كتفها
_اقصد مديرك، وقبل ما تقولى حاجة انا سمعت كلامك مع مامتك ف المطبخ وشوفتك وانتى بتكلميه

نظرت له بتوتر فاجاب قائلا
_تقدرى تقوليلى ايه اللى كنتى عاوزة توصليله بقى من اللى عملتيه؟

اجابته ببساطة قائلة بلا مبالاة
_افوقه

نظر لها بتعجب فأكملت موضحة
_كل واحد ف الدنيا بيحتاج انه يفوق، فيه ناس بتفوق من طريقتها الغلط عن طريق اشارة، وفيه ناس عن طريق الكلام، وفيه عن طريق قلم قوى على وشها يفوقها، وفيه ناس عن طريق حيل

ضحك هو على طريقتها ثم قال
_وانتى متوقعة انه هيفوق بأى طريقة

اجابته قائلة
_الاشارة ماتنفعش معاه لانه عدى المرحلة دى من زمان، والكلام صعب انك تحكى مع التايجر، وربنا مايجيب قلم على الوش لان دى بتبقى مصيبة كبيرة

نظر لها ثم قال بمرح
_ببقى مفيش غير الحيل

اومأت براسها ثم قالت
_بالظبط كدة

ابتسم لها حسن ثم قال بحنان وهو يربت على كتفها بهدوء
_بس لازم تخلى بالك لان اللعب مع التايجر خطر

هزت ناردين رأسها توافق حديثه وهى تقول بتأكيد
_عارفة بس ربنا معانا واحنا عاملين على مصلحته

_ربنا معاكى يلا روحى نامى

ابتسمت له قائلة برقة وهى تميل لتقبل وجنته بحب
_ تصبح على خير يا ابو على

ابتسم فى وجهها بحنان وهو يقول بحب
_وانتِ من اهل الخير يا حبيبة ابو على

دخلت للنوم بينما سمع هو صوت من الخلف قائلا بغير رضى
_والله محدش مدلع البت دى وهيبوظها غيرك

ابتسم لها ثم قال بهدوء
_سيبيها، محدش عارف الزمن مخبى ليها ايه فى حياته، ا خليها تعتمد على نفسها وتاخد قرارتها بنفسها

اومأت سامية قائلة بقنوط
_ ماشى لما نشوف اخرتها
_____________________________________

دخلت غرفتها فوجدت هاتفها يصدح بالرنين نظرت الى المتصل ثم اجابت قائلة
_ها عملتى ايه؟

اجابته الاخرى بضيق
_ولا اى حاجة جه مخنوق ومش عاوز يكلم حد

همست هى بتعجب
_مخنوق ازاى؟ يعنى بيزعق وكدة وهايج ف الناس زى التور؟

صرخت بها ايلين قائلة بضيق
_ناردين قولتلك قبل كدة متقوليش عليه كدة

زفرت ناردين انفاسه بخنق ثم قالت بسأم
_ نسيب المهم وندخل ف اقول ايه ومش ايه انطقى المهم عمل ايه