Rebirth As Khattar (ခတ္တာအဖြစ်ပြန်လည်မွေးဖွားခြင်း)Completed

အပိုင်း ၃၅

ရင်တွေနာလွန်းလှပါသည်။ပြန်လည်ကူးပြောင်းမွေးဖွားလာခဲ့သည့်ဘဝဟာ တကယ့်ကိုအဖြစ်ဆိုးနှင့်ယောကျာ်းတစ်ယောက်ကြောင့်အဆုံးစီရင်လိုက်သည့်ခန္ဓာကိုယ်ဖြစ်နေသည်။ဒါကြောင့်ပဲ အမေ မိန်းမပေးစားရုံနှင့်ဘာကြောင့် သတ်သေခဲ့တာလဲဟုစဉ်းစားနေခဲ့ရတာ တကယ်တော့...။

'ဖြစ်တည်မှု'ဆိုတဲ့စကားကို ဒီခန္ဓာကိုယ်ထဲရောက်လာကတည်းက အကြိမ်ပေါင်းတစ်ရာမကကြားနေခဲ့ရတာ။တကယ်ပဲ ခတ္တာဟာ ယောကျာ်းတွေကိုစိတ်ဝင်စားတဲ့သူတစ်ယောက်ဆိုတာ လုံးဝမရိပ်မိခဲ့။

ရွာမှာတုန်းက အ​​မေက အိမ်ထဲကအိမ်ပြင်ပေးမလွှတ်တဲ့အကြောင်းရင်း ဘာအလုပ်မှမလုပ်စေပဲအိမ်ထဲမှာပဲထားသည့်အကြောင်းအရင်း ရွာထဲကိုမလည်ပါနဲ့လို့ပြောသည့်အကြောင်းအရင်းအခုမှခတ္တာခေါင်းထဲတစ်စီတစ်တန်း။

ဘထွေးဟာလည်း 'သူဌေးကြီးနဲ့ ဘယ်လောက်ထိရင်းနှီးနေကြပြီလဲ'တို့ 'သူဌေးကြီးနားသိပ်မကပ်နဲ့ သူဌေးကြီးကစိတ်ရှုပ်တတ်တယ်'လို့သတိပေးပြောခဲ့တာတွေက တကယ်တော့ သာမာန်မဟုတ်ပါပဲ ခတ္တာဟာ Gayတစ်ယောက်ဆိုတာသိနေကြလို့ပင်။ရှက်လဲရှက်မိသလို ဘထွေးကိုတောင်မျက်နှာမပြဝံ့တော့ပါ။

ငိုထားရသည့်အရှိန်နှင့်တရိပ်ရိပ်တက်လာနေသည့်မှတ်ဉာဏ်တို့အလယ်ခတ္တာတအားပင်ပန်းနေပြီဖြစ်သည်။ နေညိုသွေးဆိုတဲ့ကောင်ဟာ Gay တစ်ယောက်မဟုတ် ကိုယ့်ကိုယ်ကိုယ်ပျော့ညံ့တဲ့သူလို့ဘယ်တော့မှမတွေးခဲ့ ယောကျာ်းတစ်ယောက်ကိုကြိုက်ဖို့နေနေသာသာ မိန်းမတစ်ယောက်ကိုတောင်စံချိန်နှင့်လက်ခံခဲ့သည်ကောင်ကခတ္တာဆိုတဲ့ကောင်ရဲ့ ခန္ဓာကိုယ်ထဲရောက်မှအလဲအလဲအပြိုပြို။

ဒီအတိုင်းဆိုပါလျှင် နာကျင်နေရသည့်အရာမှန်သမျှ မိန်းမတစ်ယောက်လိုပျော့ညံ့ပြီးကလေးတစ်ယောက်လိုဖြစ်နေတဲ့အရာမှန်သမျှ ခတ္တာဆိုတဲ့ကောင်ကြောင့်ပင်။နေညိုသွေးဆိုတာ ဘယ်တော့မှသူများစီးတဲ့ဖိနပ်ကိုတယုတယမတိုက်ချွတ်ပေးတဲ့အပြင် ယောကျာ်းသားတစ်ယောက်ရဲ့အင်္ကျီတွေကို အမြတ်တနိုးမနမ်းရှုံ့ခဲ့ဖူး။ထို့အတူအရမ်းအသန့်ကြိုက်တဲ့ထိုသူတွက် သူအိပ်ယာမနိုးခင်တအိမ်လုံးကို ခြေချသည့်ကြမ်းပြင်ကစလို့ချောင်ကျိုချောင်ကြားထဲ ဖုန်တစ်စက်တောင်မကျန်အောင်တိုက်ချွတ်ပေးမယ့်ကောင်လည်းမဟုတ်။