Rebirth As Khattar (ခတ္တာအဖြစ်ပြန်လည်မွေးဖွားခြင်း)Completed

အပိုင်း ၆၄

ခြံဝန်းအတွင်း အပြင်အဆင်များခမ်းနားထည်ဝါစွာရှိနေပြီးယနေ့ဟာ မောင်ခတ္တာနှင့်ဆက်ထင်၏မင်္ဂလာပွဲရက်ဖြစ်သည်။အထင်ထပ်ပို၍ပင်စည်ကားသွားပြီး အနယ်နယ်အရပ်ရပ်ကလာတဲ့ဧည့်သည်များနှင့်ဘိလပ်ကမိတ်ဆွေများ အရာရှိပုဂ္ဂိုလ်များအားလုံးစုဝေးလျက်ရှိကာ ကျယ်ဝန်းသောခြံဝန်းအတွင်းလူများပြည့်နှပ်နေကြသည်။အနားမှလူတွေအားလုံးဖေးမကူညီမှုနှင့်ယခုလိုမင်္ဂလာပွဲအမြန်ဆုံးအထမြောက်သွားသည့်အတွက် ဆက်ထင်ဝမ်းသာမိသည်။

ဘိလပ်ကဧည့်သည်များနှင့်စကားစမြည်ပြောကာရယ်မောနေသည့်ခပ်လှမ်းလှမ်းမှမောင်ခတ္တာအားငေးမောကြည့်ရင်းပြုံးမိသည်။ကောင်လေးမှာ ငွေရောင်တိုက်ပုံအင်္ကျီလေးနှင့်အတူငွေရောင်ပိုးပုဆိုးကိုဝတ်ထားပြီးတောက်ပသည့်ကြယ်လေးအသွင်ရှိနေ၏။ ဒီဘက်မှအရာရှိတွေပုဂ္ဂိုလ်တွေနှင့်စကားပြောခိုင်းသည့်အခါ နေရခက်သလိုနှင့် မျက်နှာလေးသေးသေးလေးသာရှိသော်လည်း ဘိလပ်မှဆက်ထင်ရဲ့သူငယ်ချင်းများနှင့်စကားပြောနေတဲ့ပုံလေးကတော့မတူ။

အင်္ဂလိပ်ဘာသာစကားအားကောင်းမွန်ပြေပြစ်စွာပြောနေပြီးထိုဘိလပ်သားများကြား ပြောဆိုရင်းပျော်ရွှင်နေဟန်ရှိသည်။

''အဟမ်း...သူဌေးမင်းရယ် ဒီအနားခေါ်ရင်လည်းခေါ်လိုက်ချေပါ ခေါင်းစောင်းရတာညောင်းရောပေါ့''

ရွှတ်နောက်နောက်ပြောလာသည့်စကားသံကြောင့် ထိုင်နေသည့်ဝိုင်းအတွင်းရယ်မောသံများဟာဆူညံသွားသည့်အတွက်ဆက်ထင် နားထင်အားလက်ညိုးနှင့်အသာကုတ်ခြစ်လျက် ပြုံးမိသည်။

''ငေးမောကြည့်လဲကြည့်ချင်စရာပါတော် မျက်နှာလေးကိုကကြည့်စမ်းပါဦး အေးအေးချမ်းချမ်းလေးနဲ့ ချစ်စဖွယ်လေးဆိုတာ''

''ဟုတ်ပါ့တော် ကျွန်မလဲကြည့်နေတာ တို့သူဌေးမင်းသည်းသည်းလှုပ်ဖြစ်နေရတဲ့အကြောင်းအရင်းအခုမှပဲသိရော့တယ်''

''ဘိလပ်လိုပြောနေတာလဲမွတ်ထွတ်နေရော''

ကတော်တွေအချင်းချင်းပြောနေကြသည့်စကားသံများကြောင့်မောင်ခတ္တာကိုလှမ်းကြည့်ရင်းသက်ပြင်းချမိ၏။ ကလေးငယ်ဟာ မင်္ဂလာပွဲမလုပ်ခင်ကတည်းကစိုးရိမ်တကြီးနှင့်ပူပန်နေရသည်။ဒီလိုလူအများက သူ့အားချီးမွှမ်း၍အကောင်းမြင်ပေးကြသည်ကိုသိလျှင်ဘယ်လောက်များဝမ်းသာနေပါ့မလဲ။