وكيف يبعد مني من جعلت له صميم قلبي على علاته وطنا

١٥

طلعت تغريد تدور جود بالممرات شافتها جالسه وسرحانه
جلست جنبها وهزت كتفها
تغريد:شفيك انتي ؟؟
جود:ليش شفيني مافيني شي
عدلت جلستها تغريد: العبي على غيري بس انا ماتقدرين تلعبين علي اعرفك زين فيك شي قولي بالطيب احسن
جود بتعب:مادري حاسه نفسي تعبانه من شي
تغريد بقلق:من وش!! قولي لي يمكن اقدر اساعدك ناظرتها جود بدموع وخافت تغريد عليها اكثر وحضنتها
تغريد:بسم الله عليك شفيك ليش تبيك يعورك شي اوديك للمستشفى ؟؟
تعدلت جود ومسحت دموعها:ماله داعي المستشفى راسي مصدع وحاسه بتعب بجسمي خمول يعني
مسحت ظهرها بحنيه:ليش داومتي اجل كان غبتي مو احسن من تتعبين نفسك
جود بسخريه:اللي يسمعك يقول اني مريحه نفسي دايما
تغريد:اف منك لاتقولين كذا قاطعهم جرس الحصه
جود:علينا تهاني!! مالي خلقها تكفين مابي احضر حصتها ملل
تغريد:حتى انا مابي احضر ولا حليت واجبها بعد بتوقفني زي كل مره تبين ننحاش؟
تعدلت جود بابتسامة:اممم ليش لا
تغريد بحماس:يلا امشي ورا المدرسه
جود:بسرعه لايشوفوننا الحين مين يفكنا منهم وراحو يركضون ورا المدرسه

.

.

.

دخل القاعه بهيبته المعتَاده سلم ونزل اغراضه على الطاوله رفع راسه وطاحت عينه على لارا وميلا يحطون"مناكير" وجاء بباله فعلتهم لحياه وزفَر
سعود: على حسب علمي م حنا بحصه عنايه يميلا واللي جنبها!!
ميلا بغرور:دكتور العنايه اللي تقول عنها شي روتيني بالنسبه لي
سعود بصَبر:روتينك سوويه ببيتك مو عندي هنا!!!والحين دخلي حوستك وافضل انك تنتبهين معي انتي واللي جنبك
لارا بمقاطعه:اللي جنبها في عندها اسم لو سحمت دكتور؟؟
سعود:احلفي؟ مادريت والله ! وبنبره حاّده: تعدلي بلا بربره زايده
تعدلوا ميلا ولارا من نبرته اللي ارعبتهم
دارت انظاره على الطلاب بس ماشافها بينهم استغرب بس تجاهل وبدا يشرح
خلص شرحه وناظر بميلا ولارا واشر لهم بيده
سعود بهدوء:انتوا الثنتين ابي منكم تسوون برزنتيشن عن هالدرس وتشرحونه شرح مفصل وزين فاهمين؟
لارا بلقافه:وليش حنا؟ القاعه مليانه شوف لك احد يسويه ضربتها ميلا وسكتت
سعود بتمالك لاعصابه:نعم؟وش تفضلتي حضرتك؟
فوق درجاتك اللي زي الزفت قله ادب؟ ولا بعد  تتشرطين عندي!!
لارا بنرفزه:ترا مالك الا اسبوع جاي امداك تشوف درجاتي وتقيمها على كييفك!!! برزنتيشن ماني مسوويه
سعود بعصَبيه:لاراااا عدلي اسلوبك معي ترا تتكلمين مع دكتورك مب صاحبك يشاطره وعلى قله ادبك هذا حسابك معي وعلى البرزنتيشن بتسوينه ويلا اطلعي قدامي بسرعه
وقفت لارا وطلعت وميلا تطالعها بصدمه والطلاب مو اقل منها
سعود ناظر بميلا:البرزنتيشن منفصل كل وحده لحالهاا واخذ غراضه وطلع

.

.

.

تمشي بممرات الجامعه شافت سعود وواضح عليه معصب لفت بتهرب عشان مايشوفها بس خاب ظنها لما نادى عليها
حياه بتوتر:هلا
سعود:ليش ماحظرتي المحاضره عندك عذر ؟
حياه بتورط:هو يعني انا كنت اء شسمه وين كنت!
سعود:انا اسالك وين كنتي ووش عذرك ماحظرتي ؟؟ قاعده تتمشين هنا كانك بحديقه ابوك لاشغل ولا مشغله!!
ماكان عندك محاضرات لازم تحضرينها اول باول؟؟
سكتت حياه وهي ماكان بودها تحضر عنده لانها متنرفزه منه
سعود:جاوبي اسالك؟
حياه بكذب:كنت تحت بعياده الجامعه تعبانه
سعود:والتعبان يقعد يتمشى هنا وهناك!!
حياه بنرفزه:ماتمشيت كنت طالعه من العياده وجايه للقاعه
سعود: صباح الخير ياطالبه اول شي  المحاضره مخلصه من وقت يالمجتهده وثاني وين العذر اشوفه
حياه بغباء:اي عذر بالضبط؟؟
سعود بصَبر:عذر العياده مو قلتي انك جايه منها اشوف العذر وريني
حياه بورطه:ما خذيت عذر
سعود :ماخذيتي عذر؟ بالله عليك وليش ان شاء الله ؟ ممكن اعرف لو تفضلتي
حياه ببلشه:لان شسمه هو يعني تعب خفيف وخلاص
سعود:ماشاءالله؟؟وش هالتعب اللي زيارته كذا حلوه
حياه بخجل:اووه عاد لاتقعد تحقق تعب بنات
غمض عيونه سعود وبتحذير:اخر مره امشيها لك فاهمه
هزت راسها ومشى تاركها
حياه تنفست براحه:وهذا ناشب لي وع عليه

انتهى...