أغا الريف

الأجزاء 23

أغـــــا الـــريـــف ...🍂🍁
بـقـلم : استـبـرق دانـيال و راشـيـل زيدان
الفـصل الأول :رذيــلـــة أنــثــى أذلــهــا الـحــب

𝐏𝐀𝐑𝐓  221

صوت ترجيها وندائها وصل  لمسامعهم وجاو كيجريو يفرقو جقلة وفيديهم زرواطة ، هبطو برهوش لسويكلاص يأكلها فعظيماتو ووصل تحذيرو لحكيم لرجع جالس فبلاصتو وهيا جنبو

ليل ظلم ، ونجومو شدو مكانهم فسماء سوداء مضوياهم القمرة لكانت فتمام بدرها ، ضو ديالها داخل من شباك سجن ولكان ضارب فوجهها ، كانت متكية على كتفو وهيا غارقة فنعاسها ..

فحين هو كان باقي حال عينو كيخمم وراسو كيضرب فالف مطرقة ، وبنفس للحظة كان فاروق جالس خارج كوميسارية كيصوني للمعارف و المحاميين فنصاصات ليل ، وجسمو كيجرف من شدة سميقلي لكاين ..

اما عندها هيا ، فكانت شادة طريق وراسها فوق زاجة ساهية فتفكيرها فيه ، فينو ؟ علاش مكانش جنبها ؟ من اول ثانية فتحات عيونها تمنات فقط تشوفو غير هو ، تخشى فحضنو دافي والحنين ، وتخبى بين يديه من الوحوش الآدمية..

وعلى ذكرهم طاح فبالها مصطفى وطاحو معاها دموعها ، للحظة تفكرات جميع ما داز عليها من حكرة واحتقار وفقر وبخل ، مع كل ثانية ودقيقة كتفكر لحظة من مضيها كيطيحو من عيونها قطرات كيعبرو على اساها ..

وطول مدة لكانت كتبكي فيها كان متبعها بانظارو لمتزحزوش عليها وقلبو كينغزو لشوفتها هاك ، فامنياتو انه يحضنها وتبكي فحضنو ولكن القدر مكتبهاش ليه وكتبها لابن عمو وخوه وصديق روحو ، نزلات دمعة صغيرة من عيونو ولكانت دمعة رجولية مكتنزل غير إلى القلب تقيح وخلى فيه عاهة متبراش ..

اما عندهم فكانت ناعسة بين حضنو شبه عارية وتفكيرها معاها ودموعها عليها ، وهو مكانش اقل منها هاز ليها الهم لتمرض محبوبة قلبو ويخليها طريحة فالفراش ، ضمها اكتر ليه كيطبطب عليها وهيا كتشهق بين يديه خايفة عليها أكثر من أي شخص داز فهاد دنيا ..

ليلة دازت طويلة على كل القلوب ، منهم لتوجع ومنهم للفرح كيفها هيا لقبلها قايد القبيلة عندو فانتسغرامها وجاوبها على ميساجاتها المتكررة ، ليلة حتم عليها القدر انها تكون موجوعة فكل قلب ولهان ..

دنيتهم تجمعات فقبيلة اركمان وكانت مكان يترسخ فدماغ قبل القلب ، وفيها يتفتحو القلوب ويعيشو أحزان وأفراح،  واش هاد الحب غايدوم ؟ باش غاينتاهي هاد الحب إلى كان كيشعل الغيرة فلقلوب ويخليها تبكي بلترات د"ماء ؟

#قريـــبــا_نهــاية_الفصل

أغـــــا الـــريـــف ...🍂🍁
بـقـلم : استـبـرق دانـيال و راشـيـل زيدان
الفـصل الأول :رذيــلـــة أنــثــى أذلــهــا الـحــب

𝐏𝐀𝐑𝐓  222

اصبح صبح وشرقات شميستو الباردة فسماء المغيمة شويا ، فتحات عينيها على زقزقة العصافير لكانو قدام سرجمها ، دورات راسها ببطئ كتحرك بين يديه بسلاسة حتى وقفات فوق زربية ، هزات بزربة حوايجها لبساتهم وخرجات بالخف لبيتها ..