لا تباطيتي بوصلك ..والبطى ماني خويٍ له

Part 25

لاتنسون النجمه والتعليق يهموووني وضيفوني انستا
واكتبو لي توقعاتكم للأحداث الجايه او اي اسئله 💕

فالرياض تحديدا عند نواف ونايف انا
عابد : هذا هو البيت
نايف بشك : متأكد؟
عابد : ايه وانا بروح توصون شي
نواف : يرجال امش معنا دام انه خويك
عابد : لا والله مب فاضي مره ثانيه .. عاد انا بروح
نايف : الله يستر عليك
تقدم نواف وبدأ يدق الباب بقوه
نواف بصوت عالي : يا اهل البيت .. هذولا علامهم محد يفتح
نايف تقدم : وخر وخر برفسه
قاطع كلامهم صوت انثوي ناعم : ميين ؟
نواف : انا
نايف حط يده على راسه من ذكاء نواف: كيف بتعرفك ياغبي
رواسل بإرتباك من ورا الباب : وش تبغوون؟
نواف بصوت عالي : معليش يا اختي بس هذا بيت امير؟
رواسل بخوف : ايه ليش
نايف بهمس : ياولد علامك تتكلم تسذا خرعت الضعيّفه هد صوتك
نواف : مقدر ياخي طبيعتي تسذا
نايف بصوت هادئ : لو سمحتي نادي اخوتس شوي
رواسل بهدوء : وش تبغون فيه
نواف وهو يحاول يقلد طبقة صوت نايف بس طلع صوته مضحك : لاتخافين مابنسوي شي بس ناديه
- نايف كتم الضحكه -
رواسل : طيب تحراني هنيا بس ترا احتمال اطول شوي لأن اخوي حاط له غرفه بالسطح
نايف : خذي راحتتس
نواف : واه بغيت انكتم كيف تتكلم كذا انت كأني اتكلم من خشمي
نايف : ماعندك هدوء تراك تفجع بصوتك ذا دبّر لك حل ترا معد اقدر اتحمل راسي يصدع
نواف حط يده على راسه : والله ويش اسوي بس تتحملني غصب عنك عشاني اخوك
نايف : الشكوى لله بس عشانك اخوي
وسمع صوت متجه لهم
نايف بجديه: بس عاد قلبناها فضفضه
نواف بهمس : اقول انتبه للسلاح الي حاطه بجيبك ذا لا تطلق على بطنك بالغلط ثمن ابلش بك
نايف بهمس : انت معك شي؟
نواف بإبتسامه : اي معاي سكين صغير داسه بجيبي
نايف بتوتر : اشوا .. اسمع شرايك تبدل عطني السكينه وخذ المسدس يرجال والله احس ما اقدر استعمله .. احس مانيب متطمن والله
نواف بحدّه : حتى انا مانيب متطمن .. خل المسدس لك أأمن اذا صار شي دافع عن نفسك به ياويلك يانايف اذا ما استعملته
نايف بتوتر : الله المستعان عيّن خير يرجال خلاص لاتوترني اكثر
نواف : ماني مخوفك بس هذي الاحتمالات
في بيت امير ..
رواسل من عند الدرج حق السطح : اميير فيه عيال يبغونك
أمير بصوت عالي : جاي صبر انتي خليتس بعيده- وهمس لعزّ الي كان فاقد الوعي مربوط عالكرسي ومضروب من كل جهه والدم متناثر بكل مكان ووجهه مليان كدمات والمكان مُرعب : جو اخوانك هاه هيّن يا عيال فهد الوعد قريّب -وقال بصوت عالي- : جاهزين ياعيال خلوكم هنيا بجيب اخوانه
العيال بصوت واحد: إييه
كان معاه ثلاثه من اخوياه وكلهم استفردو في عز لحاله،،نزل امير عند اخته : هيه
رواسل : ويش
امير : خليتس هنا وقفلي الباب زين ياويلتس تجين لو ايش مهما سمعتي اي صوت ولا صار اي شي
رواسل بعدم اهتمام : من زينكم عاد انت واخوياك آخر همي
امير بإبتسامه خبيثه : جا اليوم الي بناخذ فيه حقنا
رواسل : يرجال افلح افلح عن وجهي ورح شف المساكين الي عند الباب من اول يتحرون وجهك
امير وهو خارج : والله محد مسيكين غيرتس يختي بس خليتس هنا انتبهي لنفستس
فتح امير الباب وبصوت عالي : يالله حييهم ارحبو
نواف الي كان متكي على كبوت السياره فز : الله يبقيك امير؟
امير مد يده يصافحهم بقوه : وصلت وصلت عليك نوور ايه انا امير الا اقولك
نواف بعدم ارتياح : سم
امير بإبتسامه : ماقد سمعتو بإسمي
نايف بتفكير : لا والله اول مره اشوفك
امير بداخله : كنت حاس حتى ماعلمهم عني
نواف : اسمع
امير قاطعه : قبل ماتكمل انا داري وش تبغون .. تدورون اخوكم صح
نايف : إيه عندك؟
امير بإبتسامه خبيثه : اييه عندي فوق حياكم اقلطو
نواف : لا يرجال ماتقصر مره ثانيه بس ناده لنا
امير : مهب من سلومنا ولا عوايدنا يجونا ضيوف ومانقلطهم اقلطو اقلطو حياكم الله
نواف تقدم :يلا الله يبقيك
امير وهو يصعد الدرج حق السطح وخلفه نواف ونايف : انا عندي غرفه فالسطح قلت احسن منعزله عن البيت
نايف بتسليك : اييه حلوه
نواف اول ماشاف الغرفه من الخارج اتسعت عينه : ماشاء الله كبيره حيل
امير بسرعه فتح الباب ودخلو نواف ونايف : اييه عشان اخوياي وتسذا عز موجود هنيا
نواف بإستغراب : شغل اللمبه بالله ما اشوف زين
امير بضحكه شغل الاضواء : شوفو يساركم مين فيه
نايف بشهقه : عزز !
نواف بسرعه لف : اخوو ناايف
وبسرعه تقدم رجُل مسك نايف من رقبته وطرحه عالأرض ،، وآخر مسك نواف بس ماقدر عليه وهو يقاوم
نواف بصراخ وهو يقاوم الشخص الي يسدد له لكمات : ناايف !
نايف وهو طايح عالأرض ومو متحمل منظر عز ولا منظر نواف وهو يقاوم ،، نايف بصراخ: تححملل يخووك تحملل
امير وهو يضحكه : هااه عرفتوني ياعيال فهد
نواف وهو يحاول يقوم :يالخسيس لو انك رجال كان جيت مب ترسل لنا اخويااك تتكللمم من اانتت؟؟
امير : اذا رجعت لأبوك اسأله عن اسمي قول له امير بن طلال وشوفو وش يقول لكم او يمكن ماترجعون .. منير و هادي خلاص وخرو عنهم بسمع ويش يقولون
نواف وهو يمسح الدم من فمه : امير بن طلال؟؟ومين انت اصلا مانعرفك ماتفهم -وتوجه جري لعز-
امير برفض : لالا لاتخاف مامات لسى وراي حسابات ماصفيتها معاكم
نايف بصراخ : وشلوون تحط حرتك بواحد صغيّر؟؟المفروض تتفاهم معنا وشدخله هوو !
امير بإستهزاء : ياويل حالي تحزنون خايفين على اخوكم الصغير اوف والدم المتناثر بكل مكان دمه ولا بعد شوفو وجهه كيف ملامحه انمسحت يا الله
نواف بدأ يتحسس وجه عز الي بدون حركه : عز يخوك بسم الله عليكك عزز فيني ولا فيك - وبسرعه شال الشماغ الي كان لافه على راسه وربط به راس عز بحيث يخفف نزيف بعض الجروح-
امير بإستهزاء : الاخ الحنون هاه تدري انه كان يعتزي فيكم قبل مايغمى عليه ترا كان ينادي بأسمائكم ويهدد بس انا واخوياي رفسنا فيه لين اغمى عليه فاتكم يا شكله هههههههههههههههههههههههههههههه
نواف بغضب توجه له ،، اما نايف الي ماتحمل ينقال عن اخوه كذا
نواف بسرعه طلع السكين بيده وبصراخ : ااالثااارر يبن طلال الثاارر
-وبسرعه تحرك منير يبعد نواف عن امير ،، ونواف يقاوم بأقصى قوه بس للاسف ماقدر بسبب ضعف البنيه الجسديه له ،، اما عن نايف الي كان مستلم هادي تصفيق ولكم بأقصى قوه وكل ما انهارت قواه يرجع يتذكر شكل اخوانه ويكمل -
نواف رفع السكينه يحاول يقاوم بها امير : والله ما افكك
امير بإبتسامه : تعال طارحني يالرخمه
نواف بهجوم : ماغيرك الرخمه .. قسم بالله لاتوطى ببطنك والله لاتعرف منهو نوااااف ولد فهد
امير استعد : لحد يتدخل هذي حسابات لازم اصفيها
منير : ابشر
امير وهو يلكم نواف : والله لاااخذ حق ابوي منكم
نواف وهو يتصدى اللكمات : اي حق يارجال؟من انت اصلا الله لايحوجنا لحقوق احد
امير : اييه اخذتو حقنا وورثنا ! .. تدري اني مستغل عز عشان اعرف كل معلوماتكم هاه ذحين عز يشوفني اعز صديق بس للاسف شوفه مغمى عليه هناك كنت ابغاه يشوف اخوانه بذا المنظر
نواف مسك سكينته وتوجه بها لامير بس للاسف امير تصداها وانجرح جرح خفيف .. اما عن منير ف خرج من البيت بأمر من امير
عند نايف ..
هادي ووجهه ينزف رفس نايف ببطنه : تتحداني يالخواف
نايف بألم مسك بطنه : الله لايوفقكم يالكلاااب مستلمين عز .. تبغون نصيحه اقسم بالله بتشوفون شي ماعمركم شفتوه
نواف بصراخ و امير ماسكه من رقبته اشر لجيبه : الثاار لاتنساااه يا ناايف يرضييك منظرنا كذا .. اذا مب عشاني لعز فكر بعز يا نايف
نايف وهو محتار يطلع سلاحه ويطلق عليهم .. يخاف يقتل احد وينرمي بالسجن ويتسمى قااااتلل بكذا بتنتهي حياته وبيروح مستقبله وحياته وسُمعته وكل شي عنده .. بس فنفس الوقت اخووواانه سنده وعضيده قاعدين ينهانون قدام عيونه وهو الأخ الكبير المفروض يسوي المستحيل عشانهم
داخل بيت امير ..
رواسل بخوف : يويلي اخوي وش يسوي كل ذا مزح مع اخوياه .. مستحيل قاعده اسمع اصوات تخوف ..اف ياربي الله يقلعك يا امير ولا بعد حاشرني هنا وقايل لا اطلع يخسي والله لازم اتطمن
- وفجأه تعالى صوت نوااف بالصراخ : والله ماا اخلييييك -،، رواسل بسرعه لبست عبايتها وتلثمت بطرحتها وتوجهت للسطح : لااازم اتطمن ماني مرتاحه لذا الصياح .. ايي صح حتى قهوه ما قال لي اجهزها عشان ضيوفه ..يارب هو مسوي قهوه عاد
في السطح تحديدا غرفة امير
نايف برعب طلع مسدسه بعد ماشاف الوضع صار خطير .. نواف بُنيته الجسديه ضعيفه مابقى الا شوي وينهار .. اما عز الي مربوط وفي اقصى الغرفه والجروح بكل مكان .. اما هادي ف خرج بأمر من امير
نايف وهو يرجف : انا قد كلاامي حذذررتتكم !
امير بإستهزاء رفع يده : قدها يابن فهد؟ اطلق هيا ااطللقق ماتفهم؟
نواف استغل الوضع وبسرعه قام مسك امير من رقبته ورفسه من رجله لين طاح
نواف بنَفَس متقطع : ااطللقق يا ناايف دخيلك تكفى اطللق حطها برجله كود مايتحرك
قاطع كلامه صوت دق الباب ..
رواسل بشهقه : يويلي وشهو الي اطلق
رواسل بصوت عالي : اميييرر
اميير بصوت متقطع وهو طايح عالأرض : مب وقتس الله ياخذتس
نواف لكم وجه امير : خذهاا ياولد طلال
امير صرخ بأعلى صوته بألم
رواسل بسرعه فكت الباب بخرعه وهي متلثمه وشافت اخوها طايح والدم متناثر بكل مكان وعز الي مربوط والجروح بكل مكان .. وشافت نايف الي كان موجه المسدس على امير ويرجف .. وبسرعه توجهت لنايف ومسكت يده ووجهت السلاح نحوها
رواسل برعب : انا في وجهك يالطيب انك ماتطلق علييه تكففىى
ناايف بصرااخ وهو خاف يطلق عليها بالغلط : انقلعي عن وجههيي .. لاتمسكيني تسذا وخري عنيي
امير بصراخ ونواف مكتفه : روااسل ماقلت لتس لاتطلعيينن وخري عن الرجال بسرعه
نواف بصراخ : وخري يالمهبوله تراه سلاح خطير مهوب لعبه كان ماتبين تموتين
رواسل وهي لاتزال ماسكه يد نايف الي فيها السلاح : والله ما افكك تكفىى الا اخوي دخيلك
نايف بصراخ : وخرييي ماتستحين انتي
رواسل بترجي والدموع بعيونها : تكففىى اذبحني بدل اخوي تكفى الا اخوي
امير بألم : رواااسسل
رواسل انحنت لنايف وبدأت بالبكى : دخيلك تكفى الا اخوي
نواف بعصبيه : وشهوو الي إلا اخوتس؟؟خليه يتحمل نتايج افعاله ووش ذنب اخونا الطايح هناك؟
اميير بغضب ونواف لايزال مكتفه : رواااسل قوومي
نايف الي مايتحمل يشوف احد يبكي قدامه : وخري تكفيين والله ما اقدر اتحمل ! انا بين نارين اهلي وانتي .. طالبك طلبه انك تطلعين من هنيا بسرعه الي بيصير ماراح يرضيتس ولا تقدرين تتحملينه
رواسل بإصرار : انا قلت لك مارح اطلع ولا راح اخليك تذبح اخوي هيا اذبحني وريحني يالله السلاح بيدك أطلق علي وريحني
نواف بصراخ : ناايف هذا بيفك مني ما اقدر اكتفه أكثر ..يامره اطلعيي لاتحدينا عالردى مهوب من عوايدنا ولا سلومنا نأذي حريم
تقدم نايف بسرعه ودفع رواسل على الارض بقوه بحيث يقدر يصوب زيين لأمير ،،
نايف لف لرواسل بتوتر : اسف والله اسف بس انتي حديتيني
رواسل ببكى : دخيلك لا
نواف : آخ بس ليتني خليت السلاح معي .. تكفى يانايف لاتخيب ظني فيك .. المشكله حتى جوالي ما اقدر ادق عالشرطه هاللحين .. تكفى يانايف لاتخذلني
قاطع كلامه اصوات سيارات الشرطه متجمعه حول البيت ..
امير برعب : ميين دقق علييهم؟
نواف ابتسم ببرود ومسك امير من شعره: يمكن اخوياك غدرو فيك
نايف برعب جلس عالأرض : نوااف المسدس وش اسوي فيه
نواف : عطني اياه انا معاي التصريح لو شافوه معك بيسجنونك
نايف برعب رمى السلاح على نواف وتوجه لرواسل
نايف انحنى لها وهي جالسه عالارض تبكي : صار لتس شي؟؟تبغين الاسعاف
رواسل بشهقه :لاا
نايف : طيب اسف والله ماكنت اقصد ارميك .. بس انتي حديتيني
رواسل اشرت ليدها الي كان فيها جرح خفيف من رميته : شف هذا منك
نايف : اسف والله
قاطع كلامهم صوت مجموعة شرطيين فتحوا الباب ،،
الشرطي : لحد يتحرك جانا بلاغ حالة تعنيف هنيا
نواف ابتسم وانهار عالأرض : جا الفرج
الشرطي مسك جواله : ارسلو لنا سيارة اسعاف الآن وبسرعه المصابين كثار
امير بصراخ : انقلعوو عنيي ووش عرفكم انتو
الشرطي توجه له وكلبشه من يده : لا اسمع صوت هاللحين كلكم معاي للمخفر بتتحولون للتحقيق
امير وهو يقاوم : وش دررااكم هااه
الشرطي : جانا بلاغ من مجهول مانقدر نصرح .. وصوتك لاترفعه على افراد الشرطه
دخلو مجموعة مسعفين وتوجهوا لهم
الشرطي اشر لعز : هذاك حالته خطيره شوفوه اول
وفيه واحد مغمى عليه عالأرض بس الواضح ان جروحه خفيفه -واشر لنايف- هذول كلهم بينتقلون للمستشفى وانت امش معنا
نايف : طيب
الشرطي توجه لرواسل : انتي معاهم
رواسل فزت برعب : هاه
الشرطي : اقصد انتي بتروحين معاهم لازم نستجوبك زيهم
رواسل : ما ابغى
الشرطي بإستغراب : وشلون ماتبغين هذي اوامر الحكومه
نايف توجه لها : انا بروح لازم تروحين معي .. انادي لتس الاسعاف ترا جرحتس خفيف بس يبغاله تعقيم عشان مايتلوث
رواسل برفض :طيب بروح .. ولا لو سمحت خلي جرحي بحاله خليه يتلوث وش دخلك
نايف: انا ادرس طب وترا مو بصالحتس اذا ماعالجتي جرحتس من ذحين بس بكيفك خلاص
الشرطي : انتو تقربون لبعض
نايف قام يتلفت يدور جواله الي طاح : لا ما اعرفها حتى
رواسل: انا اخت امير - واشرت على اخوها-
الشرطي : طيب يالله بتمشين معاي بسيارة الشرطه؟
رواسل برعب : لا .. مدري .. اخوي مع مين بيروح
الشرطي : اخوتس بيروح فسيارة الشرطه معاي
نايف لقى جواله: انا بلحقكم بسيارتي .. بدق على اهلي ترا
الشرطي بحده : لا بتجي معانا بسيارتنا
نايف ببرود : طيب جب سيارتين وحده للمره واخوها ووحده لي مارح اركب معاهم
الشرطي : لاتخاف اكثر من ثلاث سيارات مجتمعه حول هاللبيت طب وتخير اي سياره تبغى لانك تسذا ولاتسذا بتروح للمخفر والاثنين الثانيين بيروحون بسيارة إسعاف
نايف بنفس البرود : طيب
امير : اختي بتجي معي فاهمين !
الشرطي٢ مسكه من شعره : انا كم مره اقول لك عدل اسلوبك مع الحكومه
عند نايف ،،
نايف بتوتر : الو يبه
بو نواف بسرعه : كم مره دقيت انا؟؟وليش ماتردون علي لا انت ولا اخوك ووينكم هاللحين لقيتو عز؟
نايف اخذ نفس : يبه صل عالنبي .. وتعال لنا بالمخفر
بو نواف بعصبيه : وشوو مخفر ؟والله اني داري هالعزّ ذا مايختفي الا ووراه بلا جايكم جايكم هاللحين
نايف : يايبه لاتظلم عز ! انت تعال بس وبتشوف كيف حالتنا وحالته
بو نواف : قول يابن الحلال وش صار؟
نايف : يبه مابي افجعك بس تكفى تعال انت بنفسك وشوف
بو نواف اخذ مفتاحه بسرعه :سكر جايك ذحين ياخي وش ذول العيال .. اكيد عز متصافق له مع واحد
ام نواف برعب وهي شايله هم عيالها : وشفيهم
بو نواف : اندري عنهم بس طالبيني اروح المخفر
ام نواف شهقة : مخفر ! ياويل حالي على عيالي
المها : يمه اهدي تكفيين الي فينا مكفينا
في الديره ..تحديدا بيت بو خالد بالصاله
الجد بو خالد : فراس
فراس : سم
الجد : داري يبوك انك ضايق عشان اوخيتك غزلان .. بس لا اوصيك عاد طلق جاي بالطريق نبغاك ترحب فيه وتهلّي مهما صار هو زوج اختك وطبيعي المشاكل بين كل زوجين
فراس بضيق : داري يبه بس وش اسوي عاد هذا قرارها بكيفها
دخلت فلك وسلمت على راس ويد جدها
فلك بإبتسامه : هلاا والله بأفضل واحسن واجمل جد بالحياه
الجد بو خالد اول ماشافها ابتسم لا ارادي : هلا والله بحفيدتي الداشره الي تطلع بدون شور احد هاه
فلك ضحكت : قلنا نسوي اكشن شوي وبعدين لاتخاف جدتي خلتنا ننفض البيت كامل انا و البنات هذا امحق عقاب صدقني
الجد بضحكه : داري والله اصلا كنت مجهز لكن اطلق عقاب بس جددتس حلفت علي ما اسوي شي بكم
فلك ضحكت وبدلع مسكت شعرها : ماتقدر ياجد انا الفلك مستحيل ترفض لي طلب
الجد ابتسم : كويس اجل وعارفه بغلاك عندي.. مير الله يهديكم فشلتونا عند الرياجيل ولا بعد مين علمنا بو مصلح
فراس : لاتشوفين وجه ابوي بس كان مشتط عصبيه ومتوعد فيكم بس الظاهر طيحة بو مصلح اثرت عليه هههههههههههههههههههههههههه
فلك : الظاهر تسذا
الجد : أستغفر الله العظيم والله يا ان طيحته قويه اقولك خرعني اناظر وين راح بو مصلح الا القى كراعينه طايره فوق
فلك انهارت ضحك على وصف جدها : تكفى ليتني شفته قههرر
فراس: لاتتشمتين فيه بكرا نلقى كراعينك فوق زيه
فلك : لا يارب استغفرالله استغفرالله والله مب قصدي اتشمت عليه اخاف اتقربع زيه
في مجلس الرجال ..
مريم بعصبيه : خلاص يامنصور وش تبغى ذحين سالفه صارت وانتهت ونسوها حتى تجي انت للآن مشتط؟اعوذ بالله من طبعك
منصور بغضب : يايمه هالمرّه طلعت بدون شورك حتى المره الجايه وش بتسوي عاد هاه؟انا قلت لتس هالشموخ يبغالها اعادة تربيه فوق ما انه لسانها طويل
تطلع بدون شور احد انتي تدرين ان الي فكها مني عبدالله ولا مديني متوطي ببطنها من زمان
مريم : منصور ! وش هالكلام ذا على اختك مهما يصيير هي اختك وماسوت شي غلط خلاص ياخي ماتفهم
منصور : آخ ياكبدي من هالبنت والله لأوريها
مريم رفعت اصبعها السبابه نحوه : منصور قسم بالله لو تسوي لها شي بيصير شي بيزعلك صدقني
منصور قام بيخرج من الغرفه
مريم : وين رايح
منصور بغضب : لجهنم
مريم حطت يدها على راسها : استغفرالله.. هذا الولد بيجنني كل ما اقول يكبر يعقل يصير العكس
عند البنات ..
ميلاف : يمه
حصه: هلا
ميلاف: ابوي راح
حصه : تو الناس ايه راح من اليوم
ميلاف بحزن : ماودعته
حصه : معليه اصلا مستعجل
رتيل : تدرون احس مدري كيف بقابل ابوي بعد طول ذي المده
إيلاف وهي تفصفص : وين ذي المده ترا كلها كم شهر
رتيل : ايي ادري بس احس اني مستحيه منه .. كيف بعامله ولا بعد امي شايله همها
حصه :  عادي عامليه طبيعي
رتيل بنبرة ألم : اي بس كل ما اتذكر دموع وبكى امي قلبي يعورني عليها
إيلاف : اذا تبغوني امحط زوجة ابوكم ذيك تراي بالخدمه ماعندي مانع بأي وقت
حصه ضربتها : بنت عيب وش هالحتسي
رتيل تنهدت : آخ بس الله ييسرها .. بقوم اشم شوية هوا بالحوش
حصه : تمام ..الا وين فلك؟
رتيل : اعتقد مع جدي وفراس
قاطع كلامها فلك وهي داخله
إيلاف بضحكه : جا الذيب على طاريه
فلك رفعت حاجبها : ايه تحشون فيني هاه والله اني داريه
رتيل: كود تخذين شوي حسنات
فلك جلست جمب امها : آخ كنت ابغى اقعد عند جدي وفراس اكثر بس جو عيال خالاتي عبدالله ومدري من قهر
حصه : يلا معليه
رتيل : انا بروح
فلك : تمام
لبست رتيل عبايتها وحطت الطرحه على راسها احتياط وتوجهت للحوش الخلفي بحكم انه قليل احد يجيه وجلست على عتبة الباب ،،وبدأت تسترجع آخر الاحداث الي صارت بحياتها وش سبب تغير حياتهم كذا؟والتشتت الاسري الي صار فجأه وعلاقة امها وابوها كيف صارت كذا؟ ابتسمة بخفه لما تذكرت حياتهم قبل تغير ابوهم كانت كلها سعاده وراحه و فرح وتذكرت مواقف لها مع ابوها ،، وهاللحين تغيرت حياتها كليا صح الكل يمثّل انه بخير بس لا الكل متألم ونفسيته منهلكه حتى عبدالله الكبير المسؤول عنهم ذحين الي يحاول ماينقصهم شي بداخله اشياء واجد مايقدر يعبر عنها بس مضطر يخبي عنهم ليش؟لأنه الكبير،،اما البتال الهاديء البارد الي ماله حس حتى ومايشارك بأي نقاش اكيد انه مجروح من انقلاب حياتهم بس مستحيل يتكلم ،، وترف الي كل همها تضحكنا وتسلينا ودايما بسمتها على وجهها وانا متأكده ورا هذي الابتسامه هموم الدنيا كلها ،، وفادي ياعمري عليه فاقد حس ابوي بالبيت كليوم يجيب طاريه بابا بابا والله اني دااريه ياعيون اختك حتى انت فاقد حياتنا قبل ،، ماحست الا ودموعها تنزل على وجهها مسحتها بسرعه خوف من احد يجي ويشوفها
دمعه ورا دمعه ! شسالفه ليش مب راضيه دموعي توقف خلاص ما ابغى ابكي مو وقته يارب محد يجيني حطت يدها على فمها لتكتم صوت شهقتها والدموع تنزل على وجهها
رتيل بداخلها : انا مشتاقه والله مشتاقه لاهلي ابغااهم والله احبهم ليش صار تسذا لييش تكفى ياربي يارب ترجع حياتنا زي قبل معد اقدر اتحمل ،،قاطع كلامها الداخلي صوت اقدام متوجهه لها
رتيل رمت الطرحه على وجهها وبنبرة بكى : ياارب لا يارب لا .. اانتت؟
منصور انخرع : رتيل !
رتيل : وش تبي
منصور : بسم الله عليتس وش فيتس؟
رتيل الي اي احد يسألها هالسؤال تنفجر : مافيني شي
منصور : اقولك وش فيتس كل هالبكى ومافيني شي؟
رتيل انهارت تبكي : ماا فيني ش..ي ماتفهم انت خلاص الا وتنشب لي
منصور : اسف والله في احد مضايقتس اتوطى ببطنه !
رتيل بقوه : اييهه
منصور بغضب : احتسي لي منهو والله لأربيه
رتيل : كلشي مضايقني وش تقدر تسوي يعني
منصور بإستغراب : وشلون كلشي؟ماني فاهم علامتس انتي
رتيل الي معد تدري وش هي قاعده تقول : اببغىى ابوي
منصور وهو يحاول يهدأها : طيب خلاص لاتبكين ابوتس شوي ويجي ان شاءالله
رتيل برفض : لااا مهوب كذا ابغاه يرجعع نفس زماانن
منصور: وش الحل وش اسوي يعني
رتيل : مدريي شفت كيف مامنك فايده
منصور تكتف : هذا الشي الي مالي عليه استطاعه بس انتي خلاص لعد تبكين قطعتي قلبي والله
رتيل : وش قصدك يعني انت تشفق علي تخسي
منصور قام يبرر لها ويحرك يدينه : لااا ويين محشومه والله انتس صادزه اخسي بس انا قصدي مع كل دمعه منتس احس روحي تطلع ما اقدر اشوفتس تسذا يضيق صدري واجد
رتيل بإستهزاء : والله؟
منصور ابتسم : والله .. هاللحين ادخلي البيت لايشوفتس احد
رتيل : ابو طبيع مايجوز عن طبعه .. الا انت وش تبي تجي هنيا اصلا
منصور استرجع : كنت ابغى شموخ بس شوفتتس خلتني انسى كل شي ابغاه
رتيل تكتفت : ووش تبغى بها
منصور رفع حاجبه : اسرار اخويه وش حاشرتس ادخلي هاللحين ولا تكثرين اسئله
رتيل : لا صدق صدق وشتبغى منها
منصور : ابي احتسي معها بموضوع مهم
رتيل : ووشهو؟
منصور بدأ يتنرفز : خلاص لاتنرفزيني ادخلي داخل ماتفهمين
رتيل بعناد : مانيب داخله وش بتسوي يعني
منصور وهو يحاول مايعصب : رتيل اعتقد انك عارفه طبعي واني عصبي واجد ادنى شي ممكن يخليني اشتعل ف ادخلي داخل ما ابغى ازعلّك
رتيل بحده : لا انت مب عصبي انت مريض نفسيًا-وشددت على هذي الكلمه- تصرفاتك ماتدل انك شخص بكامل قواه العقليه اسألك بالله فيه احد يعصب على اخته عشانها راحت لبقاله؟ولا بعد ليته لحالها راحت معانا ! وبعدين شموخ كبيره وعاقله وعارفه مصلحة نفسها قبلك
منصور : رتيل لاتتدخلين بشيء بيني وبين اختي انا بتفاهم فيه واختي اعرف مصلحتها
رتيل : منصور ترا ادري انه شي بينك وبين اختك بس إلا شموخ ماتفهم ! صح انك اخوها واقدّر ذا الشي بس شموخ انسانه عزيزه وغاليه على قلبي ما اسمح لأي شخص يسوي بها تسذا
منصور بغضب : وشهو ذا الي كان ناقصني والله
رتيل ببرود : تدري اوقات اتمنى شموخ تكون اختي عشان تفتك منك يالمُعقد الله يكتب اجرها عشانها صابره عليك بس .. انتبه ترا الصبر له حدود لاتحسب انها بتقعد تسذا طول حياتها تحت يدك
منصور تحطم من كلامها: لا ياشيخه ومين قالتس ان شموخ تعاني هاه؟ جاييتس تتشكى ولاوش؟
رتيل : لا شموخ لها شموخ يمنعها ان تجي وتتشكى عند اي شخص بس انت لو تفتح عيونك شوي وتررركزز بتصرفاتها بأسلوبها وتفتح لها مجال تتكلم وتاخذ وتعطي معاك بتلقى انها كاتمه بنفسها اشياء واااجد بس انت ماش منك يالمعقد .. الحمدلله على نعمة اخواني بس -وتوجهت لباب البيت ودخلت وسكرته-
وتركت منصور وراها بصدمه من قوة كلامها الي بالرغم انه شخص عصبي اثر فيه هالكلام كيف تجرأت وتقول عنه مريض نفسيا ومعقد؟ اسأله كثير تدور بباله حول كلامها معه والاهم من ذالك كيف بيثبت لها حُبه وهي تشوفه بهذي النظره وهو يعرف رتيل تعودت على الدلال عند عائلتها مُستحيل تقدر تعيش مع منصور الي بهذي التصرفات وكيف بيغير نظرتها عنه
في بيت الجده ام نوال
ريما الي كانت في حاله نفسيه سيئه اما سند الي يحاول يهدأها والجده الي كانت تصلي وتدعي ان الله يشفي ويحفظ لهم سند
سند : ريما
ريما ناظرته بنظره كلها خوف و حزن بدون ماتتكلم
سند : تعالي كلي لتس شي يا امي انتي مايصير تسذا
ريما هزت رأسها بالنفي وهي مالها نفس تاكل شي
سند توجه لها ومعه صحن فيه اكل لها : كلي ياخي -وبمزح- ترا بتموتين جوع صدقيني
ريما بجديه : احسن يارب اموت اصلا
سند نزل الصحن : ياخي تكفييين ياريما لا اشوفك بهذي النفسيه ما اقدر اتحمل تراك تتعبيني زياده
ريما : يعني بالله وش تبغاني اسوي أضحك و افلها وعمي وسندي بالحياه معاه هالمرض ولا بعد بيتمكن منه؟طبيعي لا
سند : بس موب تسذا
ريما : قاعده افكر بحياتي كيف بتصير؟ عمي أيهم ! اكيد بيزوجني ولده بس التفكير يجيب لي الهم والغم متأكده كل بلاوي الدنيا بتجيني
سند بعصبيه : لا والله يخسي ويعقب يزوجك ولده
ريما بإستهزاء : على اساس شوري مهم عندهم
سند : لاتخافين انا بتصرف معهم
ريما : وش يضمن لي انهم بيهتمون لكلامك اصلا
سند : خلاص عاد لاتصيرين متشائمه
ريما : مانيب متشائمه بس هذي ابسط الاشياء الي ممكن تصير
سند بحزن : لا حول ولا قوة الا بالله يعني الا وتتعبيني .. ترا يمكن ما ابات عندكم الليله جاني اتصال مهم ما اقدر أأجله
ريما فزت : بس انت وعدتني
سند : اسف ما اقدر
ريما ببرود : طيب براحتك
العود لبيت الجد بو خالد ..
دخل فادي فرحان فالصاله ويصارخ بأعلى صوته :بابا جاا بابا جاا
ترف ابتسمت : اخيرا
رتيل : اما ابوي جا الله يستر بس
الجده ام خالد : شموووخ
شموخ: هلا
الجده : جددي البخور بسرعه بتجي المره
شموخ ببرود : وتبغينا نستقبل طبينة خالتي تسذا الله المستعان
الجده : وش رايك نطردها عشان حضرتتس عيب مهب من سلومنا ولا عوايدنا نطرد ضيوفنا قسم بالله لو اشوف وحده داخله وماده بوزها شبرين لأربيها مرةٍ ثانيه فاهمات العلم ولالا العِلم موجه للجميع
شموخ مالت بفمها : ان شاءالله
دخلت فلك وهي مشمره اكمام قميصها وواضح انها انكرفت بالتنظيف والترتيب : لا ياجده وش شرايتس اشيلها فوق راسي واطير بها ذا الي ناقص
الجده ناظرتها بطرف عين : ياليت 
دخلت غزلان وواضح انها مرهقه حيل وتعبانه : وش اسوي؟
الجده : وشو وش بتسوين؟
غزلان جلست عالكنبه بتعب : هاه وشو
الجده : وشو الي وشو؟
مريم : علامتس انتي صايره ماتفهمين .. انثبري هنيا لين ينادونتس بعدها تقلعي مع رجالتس
غزلان ببرود : والثانيه؟
مريم : علامها
غزلان : وش اسوي بها
مريم : ووش تسوين بها يعني احنا بنقلطها ونضيفها ونشوف بعدها وش بيصير
إيلاف توجهت لفلك : اقولتس شفتي ستوري المها
فلك ضربت يدينها ببعض : هو انا لقيت وقت اصلا امسك الجوال .. وش منزله
إيلاف : فاتتس منزله اخوها اعتقد نواف وهو يغني شيله ولا بعد الشيله الي انتي تسمعينها دايما واضح يغني من قلب ومتحمس واجد روحي شوفيها قبل ماتروح هههههههههههههههههههه
فلك بفضول : بالله اجل بروح اجيب جوالي
دخلت ساره بهدوء : يمه اساعدكم بشيء
الجده ابتسمت : ياازين بنيتي الي تبي تساعدنا -اشرت لغزلان الي منسدحه عالكنب - روحي شوفي اختتس المصروعه هناك مدري وش بلاها
ساره توجهت لغزلان : شفيتس انتي؟
غزلان بتعب : مدري احس اني تعبانه راسي بينفجر
ساره حطت يدها على راس غزلان وشهقة : ياويل حالي حرارتس مرتفعه وماتعلمين احد انتي
الجده برعب : ليه ماعلمتينا ياغزلان
ساره بصوت عالي : ميلللااف
جات ميلاف بتوتر : هلا خاله؟
ساره : نطي غرفتي بسرعه افتحي اول درج تلقين فيه بنادول جيبيه
ميلاف بسرعه راحت ركض تجيبه
غزلان : احس ما ابغى اقابله مالي خلق والله
ساره : معلينا منه هاللحين اكلتي شي انتي مايصير تاكلين شي وبطنتس فاضي
غزلان وهي مغمضه عيونها : ماالي نفس ماالي نفس اكل شي ولا لي نفس اقابل احد
الجده : يايمه مايصير تسذا
ترف بحزن : يمه انتي تعبانه تبغين عبدالله يوديتس المستشفى؟
غزلان برفض : لاا ماتفهمون انتن خلاص مافيني شي ياويل احد يدري
دخل فادي ولد غزلان وبيده كيس فيه كل انواع الحلويات والعصيرات : ماما شوفي بابا جابه لنا
غزلان ناظرته وبهمس : هذا كم مره اقول له لاتكثر لهم حلويات مايفهم
فادي توجه لها ..
ساره بعدته عنها : فادي حبيبي ماما تعبانه شوي بتعديك روح العب مع جسار
فادي ببراءه : ماما تعبانه؟ خلاص طيب اذا رحت بتطيب؟
ساره ضحكت : ايه ايه بتطيب بس انت روح
دخلت ميلاف وبيدها شريط بنادول
ساره مدت لغزلان فطيره وعصير تاكلها قبل البنادول ..
في مجلس الحريم ..
دخلت حوريه بتكبر واستقبلتها حصه والجده وشموخ اما عن الباقيين ف كانو متوزعين الي بالمطبخ واللي مع غزلان فالصاله وكل واحد مشغول
شموخ الي كانت تقهوي حوريه وملأت الفنجال لأقصى شي وهذا معناه عندهم ان الضيف غير مُرحب فيه
شموخ بإبتسامه مدت لها الفنجال : سمي
حوريه الي مسكت الفنجال وانكب شوي منه على يدها
حوريه بألم : اح
الجده وجهت نظرات لشموخ بمعنى ليش تملأ الفنجال بهذا الشكل
شموخ اكتفت بالابتسامه وتمثيل: يوه بسم الله عليتس المرا الجايه امسكيه زيين
حوريه نزلت الفنجال على الطاوله الي امامها : انا ماسكته زين بس انتي الله يهداتس الظاهر ماتعرفين تقهوين زين
شموخ جلست : والله انا اعرف بس على حسب يعني
حوريه بإستغراب : على حسب وشو
شموخ حطت رجل على رجل : على حسب الضيف يعني
قاطع كلامها حصه بتغيير الموضوع : ايه وشخبارتس وش علومتس
حوريه بتحفظ : الحمدلله
الجده : اعتبري انك ببيتس خذي راحتتس الا انتي بشهر كم؟
حوريه مسكت بطنها: دخلت السادس من اسبوع
حصه الي انقلب وجهها الوان كيف بتكون ردة فعل غزلان وفوق ذا حامل
عند الرجال ..
فراس الي كان بالغصب متحمل سوالف طلق وتعب من التسليك ف خرج فالحوش يشم شوي هواء وشاف جسار وفادي يلعبون بالتراب توجه لهم
فراس : وش تسوون هنيا
فادي ببراءه : نبني جبل
جسار : ايه عشان يصير اكبر جبل بالعالم
فراس انحنى لهم : ياويلكم ويلاه من امهاتكم شوفو كيف ملابسكم تعدمت
جسار بعدم اهتمام : عادي
فادي : حالو فراس
فراس : هلا
فادي وهو مكمل يبني جبل : ماما تعبانه
فراس فز : كيف؟؟
فادي : دحلت عندهم الا شفت ماما تعبانه وحاله ساره قالت لي اروح العب مع جسار عشان تطيب بسرعه
فراس قام : وانت ليش ماعلمتني من بدري
فادي : نسيت
فراس الي توجه بسرعه لناحية الباب الخلفي للمطبخ بحيث مايقدر يمر من مجلس الحريم .. دخل الصاله وشافهم مجتمعين حول غزلان
فراس بعصبيه : علامها؟
فزت غزلان الي كانت الكمادات فوق جبهتها  : مافي شي والله .. انا ماقلت لحد يدري
ساره : حراره خفيفه وبتخف ان شاءالله
فراس : وشلون ياغزلان محد يدري وانا ايش يعني ماني اخوكم المفروض تعلموني اول بأول ترا اذا مالتس خلق تقابلين رجالتس اليوم عادي ترا مب اجباري تقدرين باتسر
غزلان : مدريي
ساره بحده : فراس الي فيها مكفيها خلاص شوي بتخف ان شاءالله
فراس انحنى لها بحنيه : شوفي كيف التعب واضح بعيونتس
غزلان غطت وجهها بالكامل بالكماده : والله يخوي انا ماصرت اذوق طعم النوم من الهم والتفكير
فراس : الله يلوم الي يلومتس هاللحين اوديتس المستشفى؟
غزلان : لا لا ما ادانيها
فراس : مايصير تسذا
ساره : خلاص فراس لاتخاف اذا ارتفعت حرارتها زياده بقول لتس
فراس رفع حاجبه : اكييد
ساره بتأكيد : اكيدين بعد
فراس : تدرون مين علمني؟
غزلان: مين
فراس : فادي جيته وقال ماما تعبانه لولاه مديني مادريت
ساره ابتسمت : ياعمري يافادي صرفته عشان ماتعدينه
غزلان : ايهه ساره بالله انتبهي لاياكل الحلويات كلها اخاف عليه
فراس تنهد : يابري حالي عليتس ياغزلان بس