سيف وهو مصر يبوس راس الموظف : والله انك نشمي وكفو
وبسرعه تقدم براك دف سيف عن الموظف وقال : خليه يرجال فقعت تسبده ..اي يلا ورينا التسجيل
تقدم الموظف للكمبيوتر وهو يحاول يفتح الوقت الي قال عنه براك
الموظف وهو يقدم فالتسجيل : اسمعو اذا شفتم اللحظه الي تبغونها احتسو
وبسرعه صرخ فراس : وقف وقف هنا يوم سلمت لسيف الاوراق
ظهرت لحظة سيف وهو يحط الاوراق بالدرج الاخير
سيف بانتصار : هاه عينتو..ماقلت لكم اني حطيتها بالدرج
براك بتركيز وهو يطالع الشاشه : سد حلقك شوي
فراس حط يده على راسه : ياويلي هذا المدير ابو راس دخل
سيف بأستغراب : تسيف دخل وانا متأكد سكرت الباب بمفتاح
الموظف بصدمه على غباء سيف : ياغبي هذا المدير اكيد بيكون معه نسخ للمفتايح
سيف بصدمه : انا مانيب غبي لو سمحت ومسرع صرت تمون
براك ناظر فيهم : سد حلقك انت وياه..شوفو وش يسويي !
وظهرت لقطة المدير وهو يفتش بالمكتب ويفتح كل الادراج لين اخذ الورقه الي أعطاها لفراس
فراس بصدمه : اخذها... اخذها ابن التسلب وهو قايل لي انتبه لها قلت لكم هذا حاقد علينا.. اعوذ بالله تسنّي ذابح واحدٍ من عياله
سيف بصدمه : هاه شوفو...قاعد يحاول يرجع الادراج نفس ماكانت كأنه مب مسوي شي
براك ببلشه : وش الدبره يعيال
فراس : معليكم الحل عند ابوي ...ولف للموظف
فراس بشكر : ماقصرت يخوك يعطيك العافيه اشهد انك عن مية رجال
الموظف وهو يسكر الكمبيوتر: العفو ولو
سيف : وترا انا مب غبي على فكره
الموظف : حقك علي وترا لاتلومني انصدمت
براك وهو يسحب سيف معاه لبرا: يرجال معليك من خوينا تسذا مفهي يلا مع السلامه توصي شي
الموظف : ابد والله سلامتكم و الله يعينكم على ما ابتلاكم الظاهر بتطيحون بمشكله مع هالمدير الاقشر
فراس بتنهيده : اي والله
مزرعة بو فلك ... بعد ماتعشو اهل بو نواف وراحو
فلك وهي تاكل تفاحه : اقول يبه
بو فلك نزل جواله : لبيه
فلك : اذا تخرجت يبه لزومن اسوي لي حفله تسبيررره واعزم فيها كل صحباتي وتسذا
ام فلك حطت يدها : ياويلي هالغبيه خربت المفاجأه
فلك بضحكه: خلاص يمه بسوي نفسي مجنونه ما ادري
إيلاف جلست وبيدها كوب مويا : اخخ... عطشانه هذا ثالث كوب اشربه
ميلاف وهي منسدحه على رجل امها: مالومتس من يوم جت المها وانتي تقرقرين عند راسها مدري تسيف مستحملتك
ميلاف شربت ونزلت الكوب: ياخي هالمها حبوبه عسل حتى سوالفها تجنن وتعطيني على جوي (وبتشميقه) مب مثلتس
فلك وهي تاكل تفاحتها : صادزه والله تمون بسرعه وتقول ان ماعندها خوات وتسذا وتعتبرنا خواتها
ام فلك بأبتسامه : ايه ياعمري هي ماعندها خوات بس اخوان الله يحفظهم
ميلاف ناظرت امها : واحنا يمه مب عمرتس ولا بس هي
ام فلك بضحكه: انتو عمري ودنيتي وكل شي
بو فلك : بس خويي فهد الله يهديه شديد شوي على عياله.. مغير يبغى نواف يتوظف بشركته الي اشغلنا بها
فلك بصدمه : ياقدمي نواف ذاك الي كنا نتصافق انا وياه
بو فلك بضحكه : اييه... كبر تغير حيييل وصار شنبه خاط بوجهه الله يوفقه
ام فلك لفت بأبو فلك : اقول عزام...
فز بو فلك لها : لبيه آمري
ام فلك : الاسبوع الجاي بتبدأ اجازة نهاية السنه ابغاك تودينا عند امي نقعد عندها
بو فلك تعدل بجلسته : هذي مايبغى لها مشاوره اصلا لزومن نزور عمتي ابطينا عنها عشان دراسة البنات
ام فلك بأمتنان : الله يلا يحرمني منك
ابو فلك بأبتسامه : ولا منتس
فلك تنحنحت : هيه ترانا هنا
ام فلك لفت لها : ادري
ابو فلك بقهر : لزومن تخربين اللحظات الحلوه
بيت بو نواف ...
نزل نايف من الدرج
المها زغرطت بطقطقه : مابغيت تطلع.. وبعدين وش هالهالات تقل باندا
نايف وهو يتجه ينسدح بتعب عند رجل امه
ام نواف وهي تلعب بشعره : كيف حالك يوليدي
المها بحزن على حالة اخوها: اقول نايف..
نايف بصوت هادي : لبيه
المها: خاطرك بشيء اسوي لك شي
نواف : ايه تكفين سوي لي اثنين اندومي وزبطيها عاد
المها فزت : ابشر
ام نواف : يانايف كل لك شي مفيد وش تبغى بالاندومي
نايف بنفس الهدوء (معروف ان نايف صوته هادي وحاله حال نفسه ) : لا يمه مابغى
دخل نواف وحط يده على فمه بتمثيل : يمااه من ذا الي منسدح عندتس مانعرفه
نايف ضحك غصب من كلام اخوه : يعنني نسيتي
نواف ضحك بفرح وباس راسه بأحترام : حيوو اخوي التسبير وحضنه بقوه
نواف بصوت مخنوق: يالتسلب خنقتني ..يماه كتمني
ام فلك بخرعه دفعت نواف عن اخوه : يادافع البلا علامتس على اخوتس
نواف بسعاده : اااححببه يمه احبه كيف ماتبيني احضن عضيدي
دخل عز وبيده خلف : خير انت وياه تتحضنون قدامنا ماتقولون عندنا اخوان ثانيين
وبحركه سريعه فتح خلف يده يحضن رجول عز انحنى عز يحضن خلف وقال : اصلا عادي خلف احسن منكم
نواف بجوع : اشم ريحة اندومي جا بوقته
المها من المطبخ : هذا لاخوي نايف انتم حقكم على النار شويات ويجهز
نايف : جيبيه مع حقهم
المها : تمام
ام نواف رفعت يدها وقالت : يالله اجعل هاللمّه الحلوه دايما
كلهم بصوت واحد : اميين يارب
الديره
تحديدًا مجلس الجد..يجتمع فيه الثلاثي المنحوس
فراس..سيف..براك..
الجد بعصبية: انت من صدز تحتسي
براك : اي والله
الجد كملّ : والله اني كنت هاقيها من يوم شفت بو مساعد طوّل وهو يقنع خويه الاقشر ذا بالواسطه عرفت في بلا
فراس : تسلب قاهرني
فراس لف لسيف بقهر : وشقومك ساكت تسذا احتسي
الجد بسرعه: وش تبغاه يحتسي كفايه انت وبراك صجيتو راسي (لف لسيف ) يبوك ياسيف خلك ساكت احسن
سيف هز راسه بصدمه : ابشر ياعم
براك همس لفراس بضحكه :سدد له وحده
الجد بتفكير : اقول فراس تتذكر خوي نسيبك عزام ينقال له خوي اسمه بو نواف
فراس بسرعه : ايه اذكره والله انه رجالٍ اجودي
الجد : ينقال عنده شركه خاصه فيه انت دق على عزام واستفسر منه ان زان الوضع ارفعو خطاب تقاعد انت والدلوخ الي معتس
براك بسؤال : وان مازان الوضع
الجد : مالك دخل انا بتصرف (وبسرعه رفع عصاه يأشر بها عليهم ) هيا يلا انقلعو عن وجهي ابي انسدح
وبسرعه قامو بصوت واحد : ابشرر
عند الجده داخل البيت...
"آآخ يمه...على هونك نتفتي شعري" تقولها ملاك وراسها بين يدين امها تكدّ (تمشط) شعرها
الجده وهي تكد فيه : اقول ولا تسلمه
يتبع ..
هالله هالله بالدعم وتعليقاتكم تهمني
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
