السلام عليكم ورحمه الله وبركاته
يقولون من طوّل الغيبات جاب الغنايم 😂
بس غنايمنا قليله للاسف الشديد
انا ماني راضيه عن البارت هذا جدا 😔 لكن الوقت ما اسعفني اكتب زين .. حسيت اني طوّلت بس ابشرو بالبارتات الجايه احداث تعجبكم ان شاءالله .. العوض ولا القطيعه يلا
قراءه ممتعه لاتنسون النجمه والكومنت يهمووووني
وضيفوني انستا 💞
في قسم التحقيق دخلوا رواسل ونايف
رواسل بتوتر : نايف
لف لها نايف بدون مايتكلم
رواسل بتوتر : ذحين اخوانك صاير لهم شي خطير
حرك نايف اكتافه بمعنى ما ادري : مدري ان شاءالله الامور طيبه
رواسل : طيب السلاح الي معاك حقك؟
نايف بإستغراب : ليش؟
رواسل بفشله : لا بس استغربت يعني وجهك مب حق سلاح ومدري وش واضح انك مسالم
نايف : ايه مالي ومال المشاكل انا والسلاح مب حقي حق اخوي بس عطاني حقه احتياط
رواسل بفهم : اهااا
نايف : إيه .. عاد انا بروح اشوف اخواني توصين شي؟ اذا احتجتي شي قولي من ذحين
رواسل هزت راسها بنفي : لا .. -وبالغصب قالت -ش شكرا
نايف ابتسم : الكلمه غصب طلعت من فمك .. لا تاكلين خرابيطك ذحين شريت لتس فطيره معاهم كليها اول شي عشان بطنتس مايعورك
رواسل بإستغراب : طيب
وتوجه للخارج
رواسل بسرعه : اسمع !
لف لها نايف بإستغراب
رواسل : بتتنازلون عن اخوي صح؟
نايف بيأس : احنا وش قلنا؟ .. اسألتس انا جاوبي
رواسل نزلت انظارها للأرض : بتتنازلون
نايف : اجل ليش تكررين الكلام
رواسل : اذكرك بس
نايف : مايحتاج
في المستشفى ، دخل نايف وتوجه للأستقبال
نايف : لو سمحت ابغى اسأل عن غرفة شخصين .. واحد اسمه عز بن فهد وواحد اسمه نواف بن فهد اليوم جو
الموظف بدأ يبحث : تلقاهم بغرفة ١١٢ الدور الثاني
نايف بإستغراب : مب المفروض مريضين يكونون بغرف منفصله؟
الموظف : إلا بس نواف اصر انه يكون مع عز بنفس الغرفه
توجه نايف لهم وصل للغرفه المطلوبه و دخل شاف المنظر المُحزن .. عز مُستلقي على السرير فاقد الوعي الشاش مغطي نصف وجهه و المغذي بيده و الاكسجين بفمه .. اما جمبه نواف الي كان صاحي بس حاط مغذيه بيده وجمبه ابوه
نواف بعصبية : وييينك انت ! طولت
نايف : رحت اوصل بنت الناس ابوي ما قال لك؟
نواف : إلا بس طولت واجد
نايف توجه لعز : وش قالو عنه تكفوون !
نواف بقهر على حال اخوه : فاقد الوعي ذحين يقولون شوي بيصحى بيشوفون وضعه احتمال يتنوم يومين ثلاث هنا وترا رجله انكسرت وخيطو له ٦ غرز بجبهته .. وبيعيدون الاشاعه مرا ثانيه له يتأكدون
نايف انصدم : الله ! كل ذا
نواف وجه انظاره لأبوه : وفوووق ذا ايش ابوي يقول بنتنازل عنه !
بو نواف بندم نزل راسه : إييه بنتنازل
نواف بعصبيه اشر لعز : واخوووي عز الطايح هنااا ! وشللوون يايبه تتنازل عن حق ولدك بهالسهوووله ولدك انغدر غدر فييه ولد الكلللبب يايبه عيالك كلهم طايحين بالمسشفى والسبب هو .. مير ربي سلم نايف منه
بو نواف بعصبيه : بس مابقى الا وتضربني قلت بنتنازل يعني بنتنازل وعز عانيه ما مات الحمدلله
نواف : يعني نتحراه يموت عشان نتنازل عنه يايبه هالمرّه سلمنا المره الثانيه وش بيسوي فينا
نايف يهدي الوضع : نواف اكيد ابوي ما تنازل الا وعنده اسبابه انت ماتدري وش صار
نواف بخيبه : افاا يبو نواف حنا عيال فهد ويصير بنا تسذا ونتنازل عن حقوقنا ! اثارينا نهون عندك لذي الدرجه
بو نواف لف اعطاهم ظهره بنبره متألمه : لا والله انكم قطعه من قلبي ..
وانهار عالأرض يبكي بشدّه بصوت متألم : طالبكم ياعيالي لا تزيدون همّي
فز نواف من سريره وبسرعه سحب سلك المغذي من يده : تكفى يايبه تكفى
نايف توجه لأبوه : بسم الله عليك اذكر الله يبه
بو نواف وهو يبكي بحرقه : تكفون يا عيالي لا تقارنون غلاكم عندي بأي احد ثاني تكفون خلوني اعدل المصيبه الي سويتهاا .. انا داري ان عز مظلووم بس مابيدي شي والله اني مقهوورر نيران شابه بصدري .. تكفى يا نواف ياوليدي
نواف فز يحضن ابوه : لاتقول تكفى
بو نواف مسك راس نواف : سامحني والله اني ادري انك اكثر شخص مقهور على حق اخوانك .. ساامحني انا سويت ذنب بحياتي مايغتفر
نواف بقهر : انا ماقلت تسذا الا من قهري عليهم .. وش سويت يايبه كود نلقى حل !
بو نواف بندم : انا اخذت الشركه بكبرها
نايف بإستغراب : كيف؟
بو نواف بندم نزل راسه : وفيه قسم منها لطلال الله يرحمه بعد موته المفروض ولده يورث هالقسم منه .. بس انا رفضت وزوّرت اوراقهم استغليييت انهم كانو صغار وخليت الشركه كلها بإسمي
نواف وسّع عيونه : اخو نايف ! يعني انت اكلت مال اليتيم يايبه !!
نايف بصدمه : ليش يايبه ليييش؟ .. وش بيضرك لو خليت قسم من الشركه لهم .. هاللحين امير حاقد علينا عشان هالسبب والله ماينلام ! .. وشلون بيعيّش اخته الكبيره على ذا الحال؟ .. حتى رواسل اكبر منه مايمديها تسوي شي !
بو نواف : انا داري داااري والله
نواف : وش بتسوي هاللحين
بو نواف بحزن : بكتب قسم خاص لهم بالشركه وهم يتفاهمون بينهم .. ياااارب انك تغفر لي
نواف : تتوقع ان الامور بتمشي بهالسهوله؟ ماهقيت والله
قاطع كلامهم صوت عز وهو يئن من الالم ..
عز بألم : ناييف ن نوافف .. والله م مايخلونك اخواني
فزو كلهم له بخوف عليه
نواف مسك يده : بسم الله عليك .. لاتخاف عز احنا معااك اخوانك عندك عضيدك عندك
نايف قام يشوف الاجهزه الي حول عز بسبب خبرته بمجال الطب ..
صد بو نواف بألم على منظر ولده .. اول اشخاص نادى بهم ولده اخوانه .. تعزوى بأخوانه ! .. يحس بأطمئنان لما يشوف حنيّة نواف عليهم .. واهتمام نايف بهم .. يعتقد انهم طاحوا بالأب الغلط للاسف
دخل الممرض
نايف لف للممرض : صحى بس مب بكامل وعيه ذحين
الممرض : دام انه كذا شوي بيصحى
عز بصراخ : تكففى
نايف بأسى : الظاهر يتحلم
نواف برزت عروق رقبته من القهر ، شد على يد عز : انا معااااك والله انا معك معاك محد بيلمس شعره منك دام راسي يشم الهوا
بو نواف بخوف توجه للممرض : ذحين اذا صحى بيحس بالآلم الي فيه؟
الممرض : طبًعا
بو نواف : كيف بنخفف عليه الالم؟ تكفى مابيه يحس بشي
الممرض بإستغراب : مستحيل مايحس بشيء دام ان كل هذي الضربات و الاصابات فيه .. فتره وتعدي ان شاءالله ولدك يكون قدها
مسح بو نواف دموعه بطرف شماغه : لاحول ولا قوة الا بالله
نواف بتعب : تكفى ياعز تكفى ياعيون اخوك
فتح عز عيونه ببطئ الكل مجتمع حوله يطالعونه ، والممرض يفك المغذيه من يده ،
نواف صرخ : عز!
لف نايف لهم بخوف : بسم الله عليك
بو نواف ما تجرأ يتكلم بس سواد الوجه الي سواه
واكتفى يناظر حنيّة عياله على بعضهم
عز بألم : رااسي .. شيلو ذااا الي على راسي
الممرض : مايمدي نشيله هذا ضروري عشان الغرّز الي بجبهتك
عز ناظر فيهم بألم و تذكر وش صار له قبل مايفقد الوعي شد على يد نواف بقوه : تكفى لاتخليني يانواف
نواف : ابشر بعزّك
عز بألم : رجلي توجعني .. كلشي فيني يوجعني احس عظامي بتتكسر
نايف : رجلك انكسرت
عز بنبرة خيبه : يبه .. هو صدق الي قاله امير لي قبل مايصير فيني كذا؟
بو نواف منزل رأسه بكل خيبه : إيه
عز بألم : ليييش يايبه ليش؟ يرضيك حالي كذا عشان ذا السبب؟
نايف : خلاص ياخي ! شي صار وانتهى لاتقعدون تضغطون على ابوي كذا
عز غطى عيونه بيده وببكى : ا امير غ غدر فيني .. ماهقيتها منه
نواف : والله انه مايستاهلك وانا اخوك .. وبعدين وش تبغى فيه وحنا عندك
بدأ صوت عز يختفي من الألم والتعب ..
الممرض : لو سمحتوا كثرة الكلام معه تتعبه زياده
عز غمض عيونه من الألم : راااسي ..
قاطعه نواف بخوف : خلاص لا تتكلم زياده بتتعب
نايف لف للممرض : ماتقدرون تحطون له منوم؟
الممرض : إلا بس اذا استدعت الحاله
نايف : طيب شوفه يتلوى ألم قدامك ! لازم منوم ياخي مايقدر يتحمل
الممرض : طيب
بو نواف : مين يجي معاي نرجع للمخفر نشوف وضع امير؟
نواف : مستحيل اطلع من هالغرفه و عز هنا نايف رح معاه
نايف : دام نواف هنا ماعليه خوف بروح .. بس مب عشان امير عشان الضعيّفه رواسل
الممرض : بينكتب له تنويم يومين
نايف : طيب
في الديره بيت الجد بو خالد مجلس الرجال ، دخل فراس
الجد : وين رحت انت؟
فراس جلس : عند اخوياي غزلان راحت بيتها؟
الجد : إيه
تنهد فراس : الله يكون فعونها
دخل البتال
الجد وسّع عيونه بصدمه : انت مارحت؟
البتال بعدم اهتمام : لا مالي خلق لمشاكلهم وهواشاتهم بقعد هنا احسن
ضحك فراس وحاوط رقبته: هلا بخويي بترقد جمبي اليوم والله ان تبشر بالرفس لين تروح عند امك
البتال رفع حاجبه : اجل احسن لي اروح عند امي من ذحين
الجد : لالا معليك منه ذا مايستحي بخليك ترقد عندي بغرفتي ياوليدي وبنسحب عليه
فراس : تسحبون علي .. داري اصلا محد يحبني غير امي
دخلت الجده فجأه وبتمثيل : لالا انا ما احب احد
فراس : افاا
الجده بتمثيل الجديه : قلت ما احب احد ماعندي ولد غير خالد
فراس بتفكير : اجل محد يحبني غير خواتي
الجد بحدّه : ماعندنا ولد اسمه خالد ماقلت لك لعاد تجيبين طاريه انسيه خلاااص
الجده : ولدي خااالد وشلون تبغاني انسااه دام انه يسموني ام خالد وانت بو خالد؟ ابي افهم انت ليش طردته؟ تراه ولدك لو يسوي الي يسويه يبقى ولدك
فراس حس ان الموضوع بدا فيه جديّه كانو يمزحون مع بعض فجأه انقلب الوضع
فراس : خلاص تعوذو من ابليس كنا نمزح وش صار خالد بيرجع ان شاءالله بس انت قسيت عليه آخر مره وطردته قدام اهله وخواته .. قلبك يطاوعك يايبه تشيل بخاطرك عليه لهذا الحد لين متى بنقول للناس ان خالد مسافر وانت طارده؟ .. اصلا احنا لازم نفاتحك بهالموضوع من زمان بس نستنى نار كبدك تطفى
الجد بصرامه : لا خالد ما ابيه يرجع لو ايش ماعندي ولد اسمه خالد دام ان هذي فعوله وهذي رداته يسمع شور حرمته ويقلب علينا !
فراس : خالد ما سوا شي مب ذنبه كله من حرمته السعلّوه هذي نكبته
البتال بداخله : قبّت بينهم .. انا مدري متى برتاح من هالمشاكل
الجد : الظاهر ماربيته زين ليش يسمع شورها اصلا
الجده : ولدي ماله دخل باللي يصير لازم يرجع
البتال بإنفعال : خلاااص تعبت ياناس ارحموني انا مارحت مع اهلي عشان ارتاح والقى المشاكل لاحقتنا وش ذول الأهل
لف له فراس بصدمه وسحبه مع يده يقومه : بتال .. امش معاي وانت صادق وش ذول الأهل
الجد بعصبيه : زي ماسمعت خالد لا اشوف رقعت وجهه هنا
الجده رفعت اصباعها بتهديد : شف ولدي بيرجع يعني بيرجع
فراس وهو خارج بصوت عالي وماسك بتال بيده : تفاهموا بينكم مب قدام الصغيّر
البتال بصدمه : هيه انا ماني صغيّر
فراس ابتسم بحنيه : إلا صغيّر .. اجل ليش تتأثر من اي شي يصير هنا
البتال : انا ماني صغيير .. ما اتأثر بس ياخي ما احب يصير مشاكل خصوصا قدامي
جلس فراس على كبوت سيارته و جمبه البتال : بتعاني بحياتك كثيير على ذا الحال .. ترا المشاكل شي طبيعي تصير
البتال بعدم اقتناع : طيب
فراس بنرفزه : وش الي طيب ترا واضح انك مو مقتنع لا تسلك لي
البتال ضرب يدينه ببعض : وش تبغاني اقول طيب
فراس : ابي اسولف مع ولد اختي حرام؟
البتال : لا مب قصدي تسذا بس توك جاي من برا اكيد بتكون تعبان وكذا مو وقته نسولف بالله
فراس ابتسم : انا وش عندي غيركم؟ سولف سولف لايكثر
البتال ابتسم ولف للمجلس : انت هالحين مطلعني ومخليها تبرق وترعد بين جدي وجدتي
فراس ضحك من ضحكته : ما قلت لك طبيعي يتهاوشون هاللحين تلقاهم يشربون شاهي مع بعض
البتال : وخالي خالد؟
تنهد فراس : ما ادري عنه بس بيرجع ان شاءالله
.. الصدق له فتره مادق علي مادري وين دياره حتى
البتال : تدري احس ما اذكره كثير ماله ذكريات كثير معنا
فراس : عشانه مايجي كثير كل ماجا جات معه السعلّوه وجابت لنا بلوى ثانيه
البتال ضحك : وانت ليش تسميها سعلّوه زيهم
فراس : سمعت البنات ماينادونها الا تسذا صرت زيهم هههههههههههههههههههه
البتال طلع مفتاح سيارته من جيبه : شرايك بس امي عطتني مفتاح السياره تقول صرت واثقه فيك هههههههههههههه
فراس : حركااات لا اوصيك عاد لاتخيّب ظن امك فيك
البتال : امي انخذلت لين خلاص مُستحيل اسوي شي يضايقها الي فيها مكفيها .. لو درا عبدالله شنقني يشوفني ورع
فراس ابتسم : عبدالله عشانه الاخ الكبير شايل همكم كلكم مهما سوا صدقني يحبك
البتال : هو صح انه مقروشني كلشوي يسألني وقالبها تحقيق ومدري وش بس احبه
فراس : تدري اني اوقات اتمنى يكون عندي اخ كبير غير خالد يساندني
البتال : وش السبب طيب
فراس : بس كذا ابغى عضيد ارتكي عليه كل ماضاقت فيني الدنيا .. تدري وين رحت انا؟
البتال بفضول : وين
فراس تذكرهم وابتسم : عند سيف وبراك لا خلا منهم ولا عدم الحمدلله انهم عندي هم الي معوضيني ولا قد اني طايح من زمان بدون وقوف
البتال بإستغراب : وش سوو يعني
فراس: ابد
هم عوض ربي لي كل ماضاقت فيني الدنيا رحت لهم
عندك اول شي براك عاقل ويفكر زين قبل مايتصرف صديق الطفوله وهو الي الاغلب نعتمد على قرارته صح اوقات يصير غبي بس ماعليه .. و سيف تعرفت عليه بالشركه اكثر واحد مفهي بيننا وعجول حييل ويتصرف بدون مايفكر الي بقلبه على لسانه وهذا الشي ينكبنا وكل ما قال يعيياال نخاف كلنا اكيد بيجيب لنا بلوى جديده أكثر واحد يضحكنا ويوسع صدورنا .. هم مب اخوياي الا سندي بهالدنيا
البتال انصدم من التقرير الي اعطاه اياه فجأه عنهم : ماشاء الله واضح متعلق فيهم حيل .. انتبه لاترفع سقف هقواتك فيهم ويخيب ظنك
فراس بإستغراب : افا عليك وش ذي السلبيه الي عندك ذول محازمي مستحيل يخيب ظني فيهم إلا اقولك وانت سولف لي عن اخوياك؟
البتال : ماعندي .. انا شخص انطوائي لأبعد درجه ما احب يكون عندي صداقات .. تضايقني فكرة انه يكون عندي احس اني ملزوم اسولف لهم واهتم فيهم ماحب تسذا انجبر على شي .. في ذا الزمن صار نادر تلقى شخص يبقى مثل ماعرفته ماني مستعد يصير شي ما اقدر اتحمله
فراس بتفكير : مب كلهم كذا يعني اذا احتجت شي مثلا او ضاقت فيك الدنيا وش تسوي تروح عند من؟
البتال ببرود : الله لايحوجني لأحد .. ابد افرش سجادتي وادعي ربي مايبغالها احد ليش تحب تكبر المواضيع
فراس : والنعم بالله
- وبثقه - بس تذكر اني دايم معاك
انا عونك وانا كتفك وانا مركاك وانا لك في مجالس الضيق سبحة يمينك
البتال بعدم اهتمام : اركد اركد انا ماني بحاجة احد
ميل فراس فمه بملل من شخصية البتال هو الشخص الوحيد الي يحس انه حاط حواجز بينه وبين جميع الاشخاص صعب جدا الوصول لشخصيته او انه تتقرب منك بأي طريقه بس مازال مُصر انه يخلي علاقته معاه مافيها حدود او حواجز
فراس بقهر : انت شفيك تسذا ماتعطي الواحد مجال يتعرف على شخصيتك الغريبه هذي تراك تقهر
البتال ابتسم بخفه : شسوي شخصيتي كذا تدري اني مرتاااح كذا لأبعد درجه مالي ومال الناس .. زي ما قلت لك لاترفع هقواتك بأخوياك
ضربه فراس بنرفزه : وجع الا اخوياي علامك عالناس انت
البتال : محشومين بس محد يستاهل الثقه الي انت معطيها إياهم لهالدرجه يعني
فراس : قم قم بس خلن ندخل البيت نشوف وش نهايتها مع امي وابوي
البتال : مابي ادخل بالله ابي افرفر بسيارتي بالحاره شوي ابي احس اني حُر بلا قيود هههههههههههههههههه
فراس رفع حاجبه : الي يشوفك يقول حابسينك .. عالعموم رح وانتبه لنفسك زين لاتبطي تراي وااااثق فيك
البتال توجه له وحبّ يده وراسه : ابشر
بعد يده فراس عنه بسرعه : وجع
البتال بإستغراب : علامك
فراس : لاتحبّ يدي وراسي لا تحسسني اني عجوز
البتال بإستغراب : وبعدين تعال صايح عندنا قل انتم ماتحترموني ولا كأني خالكم ومدري وش
فراس : مهما صايحت عندكم لا تعاملني تقل عجوز
البتال ناظره بطرف عين : يعنني الخال الفلاوي
- وتوجه لسيارته - انت فاضي اذا تدور سوالف و علوم مب عندي ترا
فراس توجه للبيت : رح رح بس وانتبه لنفسك
في البيت ، توجه الجد بو خالد لغرفة ساره بعد هواش مع الجده عشان أمر ولده خالد الي يتضايق حييل كل ما ينذكر طاريه بس تعب منه تعب من مشاكله و زوجته الي كل ماجات جابت مصايب وبلاوي وتعبّي راسه على اهله واخر حل توصل له انه يطرده ولعاد يشوف وجهه ، دق باب غرفة ساره كانت مُستلقيه على سريرها وبيدها جوالها تفكر وش ترد على رسالة زوجها والهم ياكلها وكيف بتصارح اهلها برسالته وبصوت عالي : مين
الجد : ابوتس يابنيتي
فزت بسرعه تفتح له الباب وعلامات البُكاء تحتل وجهها
ساره : هلا يبه
دخل الجد و جلس بطرف سريرها وقباله بالضبط جلست ساره على الكرسي
الجد لاحظ ملامح وجهها الي تدُل انها كانت تبكي قريب بس مُستحيل تعترف :
" وراك يابنتي من الصبح تبكين
ترا دموع العين ماهي خفيّه
تبكين وابكيتي صغارً بريين
وانا بعد دنيتها هاشميّه
مير البكى والحزن ماهو بهاللحين
فرقى ولد الناس ماهي قضيه
إليا تعدت عشرة أيام تنسين
انت وهن كلٍ يسليه حيّه
لكن اليا حطو على راسي الطين
هاك النهار اليا بكيتي عليّه
مدام انا وأنت عالأرض حييّن
ياسعد عينك لو بكيتي شويه
والله لأنسيك الزعل لين ترضين
وامهد لك الدنيا فجوجٍ فضيه
واحماك مثل حماية الجفن للعين
وكلش فداك اليا بغيتي شريّه "
كانت هذي الكلمات كافيه انها تهيّض مشاعر ساره الحساسه أكثر مما هي عليه
ساره بصوت خافت : ي يبه
الجد : لبيه
حاولت تجمّع قوتها تتكلم باللي تبغاه جا الوقت الي تشرح لهم اللي صار : ابغااه يبه تكفى .. ابغى احمد ماله دخل يبه والله ماله دخل انا السبب انه انسجن
الجد وسّع عيونه بصدمه : وشللووون تكلمي يابنيتي وش صار معتس؟
ساره حاولت تتكلم بسرعه قبل تنهار اكثر : يبه احمد انسجن بدالي ظُلم ضحى بنفسه عشاني! مديهم يقولون بنت عبدالرحمن مسجونه بيشهّرون فيك ..
يبه انا السبب كنت - وببكيه- طالعه مع وحده الله لايوفقها غدرت فيني حطت مخدرات بشنطتي وبلّغت علي يوم جو الشرطه شافوني معاه بالسياره وهو أخذ التُهمه بدالي ! يبه لو اي شخص غيره اكيد بيخليني انرمي بالسجن ولا درا عني احمد غييير غيير عنهم ليش كلكم تكرهونه
حط الجد يده على راسه من هول الصدمه : لا اله الا الله .. ليش ماعلمتينا من بدري الله يهديك
ساره تحاول تخلص كلامها دفعه وحده : هو انتو خليتوا لي مجال اتكلم؟ كل ماجبت طاريه سكّتني فراس مايداني طاريه حتى ليش يبه؟
انا قلت لك قبل فراس لان عارفه ردت فعله .. ت ترا احمد طلع من السجن اليوم ارسلي يبغاني احدد يوم يجيني .. انا ابغاه بروح معاه مهما يصير .. و فراس تصرّف معاه انت لا يتدخل بيني وبين زوجي
الجد بصدمه : ليش تروحين مع الي ما تخاف الله وتحط لك هالبلاوي
ساره : ايش دراني انا مادرييت !
الجد : يابنيتي وانتي متوقعه ان احمد بيرجع لتس بهذي السهوله ياخوفي يبي ينتقم منتس يسوي شي لاتضمنينه
ساره : يبه احمد اعرفه مستحيل يسوي شي يضرّني دام انه دخل السجن بدالي وش بيسوي أكثر من تسذا ! .. هاه شرايك اقوله يجيني بكرا؟
الجد قام : يصير خير
في بيت تجمّعت فيه كل المصايب والبلاوي بيت"غزلان " دخلت حوريه البيت وتوجهت بسرعه للقسم الي قال لها طلق انه لها بدون ما تقابل غزلان : اسمعوا
عبدالله نزل الاكياس الي كانت بيده : سمي
غزلان : لاتخلون اي شي يأثر فيكم البيت بيتكم تعاملوا طبيعي
رتيل بملل : طيب
غزلان : انا برقد لا اسمع ازعاج لحد يصحيني وانتبهوا لفادي معاكم
ترف : وابوي
غزلان بعدم اهتمام : علامه؟ ورجعت له زي ما يبغى عموما انا برقد
ترف بصدمه : ط طيب
توجه عبدالله لأخواته : شرايكم نتجمع كلنا بغرفه وحده احس البيت بيولّع منهم
رتيل بضحكه : عبدالله شفيك تحسب الحرمه هذيك بتطلع فجأه وترميك برصاص ولا وش ترا عادي البيت بيتنا
عبدالله ابتسم : يمكن توقعوا اي شي منها
ترف جلست وجمبها فادي : ما اقول الا ياحظ البتال اختار راحة باله
عبدالله بإستغراب : ليش ان شاءالله لا يكون متضايقه من شي؟
ترف : لا ابد بس كذا تخيل اول ما قابلتها قالت انتي ترف بنبرة مستفزه كأني طايحه من عينها تقول ماتوقعتك تسذا كنت احسب بنت مزيونه ومدري وش قهرتني
عبدالله انصدم : معليك منها وش حلاتس وش زينتس دام هذي بدايتها كدينا خير
رتيل : انتي غبيه ماتعرفين تردين عليها
ترف : وش اسوي اخاف اقول شي يزعّل ابوي
عبدالله : معليكن منها بس اذا صار اي شي ثاني قولوا لي بسرعه لاتخبون عني اي شي
ترف ابتسمت : يا حليلك ياعبود .. معليك
دخل طلق فجأه
عبدالله : هلا يبه
طلق ابتسم : هلا بك .. وين امكم؟
رتيل : راقده تقول لحد يصحيها
اختفت الابتسامه من وجه طلق : افا مامداني اقابلها زين حتى
عبدالله : معليه يبه بكرا ان شاءالله
رفع فادي يده بمعنى انه يبغاه يشيله
رفعه طلق فوق : هلا ياعيون ابوك انا .. بترقد عندي هالليله؟
فادي ابتسم بفرحه : إييه
طلق لف لهم : لاتسهرون عاد نامو بدري
ترف ضحكت : يوه يبه من زمان عن هالكلمه لاتسهرون
طلق : انا بشيل فادي معاي شوي ابيه يشوف عمّته
يتبع
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
