لا تباطيتي بوصلك ..والبطى ماني خويٍ له

Part 30

« في جمس براك »
مِسك بصوت عالي وهي فحضن امها : ماما!
مريم بهمس : شتبين
مسك : متى نوصل
مريم : تونا ماقلنا بسم الله
ام براك وهي فالمقعد الأمامي : هاتيها يا ام منصور عندي
مريم: اخاف تضايقتس ياخاله هي حركيه الله يهديها ماتحب تقعد ف مكان واحد
ام براك : اقول هاتيها ياازين الصغار زيناه
مدت لها مريم مسك : هاك
حضنت ام براك مسك بسعاده : الله يجعلني فدوه
ابتسمت مسك وهي بحضنها
مريم بهمس لحصه : جاز لها الوضع لو اي وحده كان فكت فمها صياح
حصه : ماعليه اهم شي تروح
لف نظره براك لأمه وهي تلاعب مسك عقد حاجبينه بضيق من سمعها همست : عقبال ما اشوف احفادي
بدأ يشتت نظره لقدام ينظر لسيارة فراس المتقدمه و قريب منه سيارة بتال ، بحركه سريعه مسكت مسك يده وبصوت طفولي : بابا
مريم بفشله : عشانه يشبه ابوها
بدأت تردد مسك وهي ماسكه يد براك ويدّه الاخرى يسوق بها : باباا بابا .. رد علي
ام براك : براك!
براك بتوتر : هلا؟
ام براك : ليش ماترد عالصغيّره من اول تحاكيك اعطيها وجه طيب
براك : مانتبهت والله
مريم رفعت صوتها عشان يسمعون : ياعمه اعطيني اياها اخاف تزعجه وهو يسوق
براك بسرعه بدون مايلتفت : لالا خليها عندي المعذره ام منصور مانتبهت لها
مريم بهدوء : عادي
بدأ براك يمسح على راس مسك بحنيّه تحت تهديد من امه بنظراتها
ام براك بطرف عين : بدري .. لا بغيت تعطيها وجه
براك بضيق : شسوي بس ما اعرف اتعامل مع الورعان
ام براك : وبكرا لا جوك ورعان وش بتسوي
ضحكت ام خالد : خليه يام براك بكرا لا جاه ورعان ان شاءالله والله بيطيرهم للسما من فرحته بس خليه  هههههههههههههه
تنهدت ام براك : نشوف وش بيسوي
براك بصوت عالي : تبغون شي من البقاله ؟
ام خالد : انا مب ناقصني شي جبنا كل شي معنا
ام نوال : اي قهوتنا والشاهي كل شي جاهز
ام براك :  كويس
عند البنات ورا شهقوا بقوّه كانو متوقعين انهم ينزلون البقاله
ريما بحزن : لاا افضل فقره البقاله .. يلا شنسوي
رتيل : نقول لفراس؟ بس احس يفشل اشغلناه
فلك فتحت جوالها بسرعه تتصل على فراس
إيلاف ضحكت : قواة التدخل حقنا
رتيل بتعزيز : إييه دقو عليه بالله
شموخ : رخوا اصواتكم لايسمعنا الرجال
فراس : هلا؟
فلك بجديه : اسمعني زين تكفى ترا بنروح فيها ترا الموضوع جدي فيه حياه او موت
فراس بتوتر : شفيه عسى خير
فلك : خويّك ذا مابيودينا البقاله عجايزنا جحفلونا نحتاج بقاله ضروري البنات مستحين يقولون لك قلت انا اقول وترا ريما تبغى البقاله معنا
فراس : وانتي ماتستحين؟ .. تبشر ريما
ضربتها ريما بخفه : فراس تراها كذابه ماقلت
فلك : لا ما استحي
ملاك : اخلص تكفى
ضحك فراس : زين بدق عليه يوديكم بس خلوكم عاقلين تراه مايحب القروشه ماعنده مانع ينزلكم فالشارع
ملاك بهمس : اي واضح عليه انه نفسيه
فراس : الا خويي ما ارضى ..  يلا بدق عليه ذحين
تعالى صوت جوال براك فجأه ، دخل يده في جيبه يطلّعه رد وحط الجوال على اذنه
فراس : براك اسمع ترا البنات يبغون البقاله
براك : ليش ماقالو لي طيب
فراس : مدري عنهم بس وديهم
براك : طيب خلاص انا سألتهم قالو ما يبغون مدري عن الي ورا عاد .. بس تبشر بوديهم
نزل جواله يدخله جيبه ، ام براك : مين؟
براك : فراس يقول ان البنات داقين عليه يبغون البقاله
ام خالد بعصبيه : الوحده لسانها يلوط اذانها عندنا مايقدرون يتكلمون يعني مايحتاج يدقون عليه
ام براك : ماعليه ي ام خالد تلقينهم اكيد مستحيين
براك : يبشرون بوديهم
ام نوال : الله يحفظك ماتقصر
ملاك بفشله : بنات ليش احسه ناقد علينا
فلك بعدم اهتمام : ينقد ولا ماينقد بالطقاق
شموخ : جسااار ماتفهم كم مرا اقولك شيل رجلك
جسار : شلتها
ريما ضحكت : اشكالنا تضحك تقل وراعين نبي البقاله
ضحكوا البنات ، ابتسمت فلك تتأملهم هي تعزّ عائلتها حييل وتغليهم ماتبغى تشوف اي ضيق فيهم وفي هذي الطلعه خصيصًا حطت كل تركيزها على ريما تبغها تستانس بأي طريقه
ام نوال : وجع تراكم مب بصالتكم تضحكون تسذا!
ام خالد : استحوا على وجيهكن شوي
ام براك : هذولا البنات في وجهي ما اسمح لكن تخلونهم يسكتون تبغونهم طول الطريق ساكتين؟ اجل ليش طلعنا ان شاءالله مب عشان نستانس
ضحكت ام خالد : انتي الظاهر مدلعتهم بزياده
ابتسمت ام براك : إييه الود ودي آخذهن
ملاك بهمس : يازين هالحرمه احسها طيييبه حيل .. احس وجهها وجه خير
ريما : كيف شفتي وجهها وهي متبرقعه؟
ملاك : ياغبيه احساس .. شوفي كيف تدافع عننا حبيتها .. اعتقد قد شفتها زمان
فلك : لاتغرك المظاهر خداعه
رتيل : جت النكديه هههههههههههه
فلك : هذا الصدز لاتحكمين عليها من برا بكرا لا عشتي معاها بيطلع وجهها الحقيقي
ملاك بصدمه : ومين قالك اني بعيش معها اكلتوني بقشوري ماقلت شي
إيلاف : اتفق مع ملاك صراحه
« في سيارة البتال »
لف يعدل المرايا الاماميه : تبغون بقاله شي؟ اعتقد الباقي بيروحون البقاله
ترف : إيه لازم ناخذ لنا مفرحات للبر هناك ما
في شي
بتال : ابشري
ترف لفت لورا : ميلاف وش بتشترين
ميلاف بتوتر :   مم مدري
ترف : بشوف الموجود بعدين
بتال وهو مركز على سيارة فراس ويمينه براك : خالي ذا وين مودينا
ترف : ماعندي مانع يودينا اي مكان اهم شي نغير جو
« عند البقاله ، وقف براك الجمس بورطه وهو مو عارف كيف ينزلهم كلهم ، حصه : بنات مب لازم تنزلون كلكم ثنتين ولا ثلاث بكفون
فلك بتفكير : صح والله
ملاك بسرعه : انا بنزللل
فلك حركت يد ريما : وريما بتنزل
ريما : خلاص عادي مايحتاج انزل بوصيهم
فلك بحده : قلت ريما بتنزل
شموخ : انا مقدر اتحرك يادوب ضبطت وزنية القعده مع جسار
إيلاف : انا احس اذا نزلت بتورط
ملاك : وش تبون اشتري لكم
فلك :جيبي شيبسات كبيره وعصيرات وكذا تعرفين عاد جونا
ريما بحماس : يلا
رتيل : جيبي فصفص الاسود ذاك
ريما : صح اساس الجلسه هو
وقفت سيارة فراس وبتال قريب من جمس براك ، نزل فراس وهو يشوف براك متكتف برا يستناهم ينزلون
فراس بصوت عالي : عجلوا علينا
ام براك : خليهم بكيفهم انت وش دخلك هاه؟
ضحك براك : والله الوالده سددت لك وحده
فراس يمثل الحزن : اخ يا عجايزنا محد يحبني منهم ذولا
ام نوال : تعقب وتخسي انت العجوز
ام خالد : صادزه صح انك ولدي بس لا تغلط عاد ما اسمح لك تقول تسذا
فراس : حقكم علي ياعجايزنا
ناظرته ام براك بطرف عين : الله لا تبلانا عيال اخر زمن
نزل بتال من سيارته متوجه لهم ووراه ميلاف وترف
لف لهم فجأه : شتبون انتوا وراي؟ عانيها البقاله قدامكم روحوا تقضوا
ترف بفهاوه : نسيت
ميلاف بتوتر وهي لاصقه بترف : اابي اروح مع ف فراس
بتال : طيب روحي ، ترف
ترف : ها
بتال : هذي تهرج طبيعي زينا ولا معها تأتأه تسذا؟
ترف ضحكت : لا يحمار هي تهرج طبيعي بس لما تخاف او تتوتر يصير تسذا
بتال تكتف بضيق : يعني طول وقتها بالسياره مغير اا هي خايفه؟ وش بسوي لها يعني
ترف : بتال شفيك ترا طبيعي تستحي وتوتر تراك رجال غريب عنها
بتال : بس انا ولد خالتها
ترف : حتى لو ولد خالتها تبغاها تضحك وتطق ميانه معاك ولا وش ترا ميلاف شخصيتها مب تسذا خوافه حيل
بتال بضيق : خلاص طيب طيب روحي اشتري شوفي البنات نزلوا
توجهت لهم ترف ، اما ميلاف عند فراس لاصقه فيه
فراس : روحي اشتري
ميلاف  : تعال معانا
فراس : روحي واذا خلصتوا بجي احاسب
توجه له بتال : متى بنوصل طفشت
فراس : باقي شوي
براك : البنات راحوا لحالهن مايصير .. لازم ننتبه لهم
فراس : رح انت انا بعبي بنزين من المحطه القريبه وأرجع بسرعه لا تحركون بدوني
توجهوا براك وبتال للبقاله
براك بضيق : وينهم
بتال : بدورهم اصبر
ميلاف : ترف تعالي معي نشوف العصيرات
ملاك وهي تحاول توصل للشيبسات الكبيره : وجع قلّة الاماكن يعني
ريما عند الكاشير : لو سمحت فيه فصفص؟
الكاشير : إيه
براك بتساؤل : انتي معنا؟
ريما : إيه
براك : مابغيتو وينكم انتم
ريما : شوف ترا كل الي موجودين هنا معنا مافي احد غيرنا
شاف عامل متوجه لعند ملاك ، بدأ يقترب منها وهي تحاول تاخذ الشيبس ، وقفت بصدمه وهي تشوف الشخص الي يقترب منها ونظراته ماتبشر بالخير ما قدرت تستوعب الأمر بسرعه ، توجه له براك بأقصى سرعه يدفعه على الأرض مسكه مع رقبته : ماتستحي على وجهك انت؟
رجفت ملاك بخوف من شافته
براك وهو يهزه مع رقبته : لا اسمع صوتتس ! هالأشكال اعرف اتصرف معها انا
ملاك برجاء : تكفى والله موب ناقصين مشاكل احنا الي فينا مكفينا .. اخوي لا يدري بالله
براك وهو يشد عل رقبة العامل : والله ان درا فراس بيكون موته
ملاك بخوف : خلاص تكفى ماسوا شي هو
براك : لا تبررين له! انا شايفه قدام عيوني .. ولا لايكون عاجبتس الوضع
ملاك : ما اسمح لك تتكلم عني تسذا! وبأي حق تتهمني لو سمحت خلاص قلت ما سوا شي وما ابغى شي خلااص
ترك براك العامل على الأرض استغفر بصوت عالي : خليتس قدام عيوني لو صار لتس شي لاسمح الله! .. وش كنتي تبغين من هنا
ملاك بعصبيه : ما ابغى شي خلااص
براك : تعاالي وش تبغين اخلصي!
ملاك : ما ابغى شي
شافت بتال فجأه وتوجهت له 
بتال : اهلين .. افاا مين مزعل خالتي
ملاك تخبّت وراه : ماني زعلانه خلينا نطلع من هنا بسرعه
بتال : طيب بس استناهم يخلصون
ريما : ملاك خلصتي؟
ملاك بضيق : ما ابغى .. ريما بالله تقضي شيبسات بدالي والله ماقدرت بروح السياره قبلكم
براك بضيق توجه لهم : خلصتوا
ريما : دقيقه بالله باقي شوي
براك : وين رايحه!
ريما : بشتري شيبسات
براك توجه لها : بسرعه طيب لاتروحين لحالتس بجي معتس
ريما بإستغراب : طيب
بتال لف لملاك : شفيتس؟
ملاك : مافيني شي ياخي بس بروح للسياره
ترف جات وهي شايله اكياسها : بتال خلصت بس باقي ميلاف تحاسب
بتال : طيب
جت ميلاف شايله كيس وقفت جمب ترف : خلصت
بتال : بنروح السياره ونتحرا خالي يقول بعبي بنزين ويجي
ترف : تمام انت شريت لك شي؟
بتال : اي معليك معاي
تكتف براك بضيق من شاف ملاك خارجه بسرعه ، دخل فراس فجأه : علامها ملاك؟
ريما : مدري عنها فجأه قالت ماتقدر تشتري
فراس بإستغراب : جتها الحاله الظاهر .. وانتي لا بغيتي تجين ترا جتني اخبار انك ماتبغين تجين معنا هاه؟
ضحكت ريما : شسوي والله النفسيه كانت يادوبك
فراس : والحين؟
ريما : تمام التماام
فراس تنهد براحه : اشوا
ريما : توهم خرجوا الباقين راحوا السياره
فراس : حاسبتي؟
ريما : إييه
فراس : انا ماقلت انا بحاسب! ماتفهمون انتو
ريما : خلاص يا حاتم الطائي خف علينا .. خلصت الأغراض بروح
توجه فراس لبراك : اخذت شي لنا؟
براك بإستغراب : لا مدري وش آخذ اصلا
فراس : اجل باخذ انا .. خلاص روح انت السياره
ابتسم براك : نقدر نسبقك للمُلتقى ليش غصب تحشر نفسك تراك تدل الطريق
فراس : بكيفي ياخي ابي اجي معكم
براك : طيب عجّل علينا
ركب براك الجمس بضيق وتوجه هو وبتال ورا فراس الى المُلتقى
« عند الملتقى »
ابتسم براك : وصلنا الحمدلله على السلامه .. انزلوا
ملاك من ورا : بنات انتظرو حذياني ضاعت
فلك : خلاص مابنطير دوريها وتعالي
ملاك منزله راسها تدور : اصبروا
نزلوا الحريم من السياره وملاك باقي تدوّر حرك براك السياره فجأه ، رفعت ملاك راسها بخوف صرخت : وقفف! لاتخطفنيي ولا ترا بعلم اخويي
ناظرت قدامها شافت حذيانها المفقوده لبستها بأقصى سرعه ونطت للمرتبه الثانيه ، توتر براك من صراخها : اصبري يابنت الحلال ماني خاطفتس بس بعدل السياره
ملاك بخوف : وقف ذحين ماتفهم بعلم فراس
براك وهو يحرك الدركسون ، ضحك بإستهزاء : اصبري  تهدديني بخويي يعني؟
ملاك تحاول تستقوي : إييه اهدد بسرعه وقف ذحين ماتفهم
براك بملل وقف السياره : افهم والله وبعدين وش ابي فيتس اخطفتس
وباقصى سرعه فكت ملاك الباب بدون ماترد ونزلت ، نزل براك وهو يضحك متوجه لفراس الي يجهز فرشة الحريم والبنات متوزعين يمشون ، نزل فراس الفرش نفض يدينه من الغبار : ضحكنا معك
براك الي انهار فجأه يضحك كل مايتذكر شكلها : غبيه قسم بالله ..
ضحك فراس من ضحكته : منهي الغبيه؟ ياكثر الأغبياء الي عندنا
براك توجه للسياره ينزل المراكي نطق : اختك! تخيل وش سوت
فراس بإهتمام لف له : علامها
براك : اسألها بالله وشوف ردة فعلها هههههههههههه
فراس بفضول : تكفى قل
براك : لالا رح اسألها انت
توجه فراس بفضول ركض لملاك الي كانت متنقبه مسك يدها : تعالي تعالي
فلتت ملاك يده بخوف اكيد قاله براك عن الموقف حق العامل الي ببالها : وخر عني
فراس : وش مسويه انتي؟
ملاك بتبرير : والله صدقني صدقني يا فراس ان مالي دخل انا والله مالي ذنب!
فراس بإستغراب : علامك؟ جاي اسألك عن خوينا ذاك ليش يضحك عليتس سألته وعيّا يقول خليها تتكلم بنفسها
غطت ملاك عيونها بخوف وهي كانت بتفضح نفسها : يااربي ! ماله داعي ياخي مانيب قايله كيفي اكيد بتضحك علي
فراس برجاء : تكفين قولي ابي اضحك معه
ملاك : اول مرا بشوف وحده تفضح نفسها بنفسها بس عشانك فراس بعلمك - وقالت له السالفه -
ضحك فراس : وبعدين ليش مصدقه نفستس ان بيخطفتس؟ هو متوهق بنفسه عاد
ملاك بفشله : مدري وش دراني انا قلت يمكن يكون مب صاحي ولاشي تسذا
فراس: مافيه ثقه فيني؟ مجنون انا اخلي واحد ما اثق فيه يسوق فيكم ماخليته معاكم إلا اني واثق فيه ومعتبره حزامي
ملاك ضربت يدينها ببعض : اندري عنك عاد خلاص عرفت؟ هيا يلا انقلع عنده اسمع قبل ماتروح بالله شب لنا حطب نبي نصور
فراس : ابشري
تقدم لهم بتال فجأه : ياخال انا برقد فسيارتي اذا خلصتو كشتتكم صحوني
فراس بصدمه : لاياشيخ؟ قدامي يلا جايبك عشان ترقد عندي هنا قم ساعدنا ليش انت دمك بارد تسذا رح شف الحريم يحتاجون شي قم ساعدنا!
بتال بعدم اهتمام حرك يده بتمثيل : وبعدين ليش تبغون دمي حار زيكم تبغوني احرق دمي وأعصب على اي شي واقروش نفسي .. بلا هم بلا خرابيط خليني تسذا مرتاااح اخر همي الناس
ضرب فراس كتفه بخفه : قم انقلع قدامي يلا
بتال بورطه : ابشر
توجه فراس لبراك الي كان مشغول يشب الحطب ، رفع نظره لفراس : هاه وش قالت
فراس بإستغراب : يرجال والله اول ماجيتها يا انها انتفضت خوف مدري علامها تقول مالي دخل ومدري وش .. وبعدين عرفت انها تقصد سالفة السياره احس فيه شي غلط معقوله اختي ترتاع لهذا الحد من موقف
عقد حاجبينه براك بضيق وهو يحاول يشتت تفكير فراس : يمكن انها فهمت غلط ماعليك منها انت
فراس : والله حاسس صاير شي لأختي
براك بورطه : عيّن خير واجلس فرشتنا جاهزه - ابتسم بتغيير موضوع - تذكر آخر مره جينا هنا مع سيف هذيك الشجره للآن اذكرها تشقلبت بغى يدخل شوكها ف جبهتي ههههههههههه
ابتسم فراس : انا مدري كيف اقتنعت  بفكرة الدلخ سيف وتسابقنا سوا
براك : ليته موجود عشان يجيب لنا فعاليه جديده
فراس  ضحك : بنحاول نسوي فعاليات بنفسنا عاد الأخ مشغول مب فاضي لنا .. اييه نسيت اقول
براك : وشو
فراس : تكفى بالله رح شب حطب عند جلسة الحريم .. البنات يبغونه عشان يصورون انا
تربع بتال على كبوت سيارته رفع جواله نطق بضيق : ماش نت هنا .. بدور لي العاب بجوالي لين الله يفرجها
« عند البنات »
تمغطت ريما براحه : اخييرا احس تحررنا من الجمس الحشره ذا
فلك : باقي لنا الرجعه الله يعين
ملاك جلست على التراب : عادي استانسو
ريما : مستانسين يارب لك للحمد
رتيل : الجو حلو من حسن حظنا
جت ميلاف : بنات فيه صوره ببالي يارب تزبط
إيلاف : وشهي
انحنت ميلاف الى الأرض رسمت بأصباعها قلب نزلّت فنجال الشاهي الورقي حقها قريب منه ، رفعت جوالها تصور ابتسمت من طلعت الصوره نفس الي فبالها لفت الجوال جهة البنات توريهم
اقتربت إيلاف تشوف : الله تهببللل
ترف : بالله اي صوره ارسلوها بعدين للقروب عشان ازرف منكم
ضحكت رتيل : صادزه
شموخ قامت تنفض عبايتها : ياربي تغبرت واحنا ليش جالسين على التراب خالي ماقصر فارش لنا فرشه ياكبرها
فلك بعدم اهتمام : ياشيخه عادي ترا عبايه وبتتغسل
ابتسمت ميلاف وهي تتأمل الصوره
، رتيل : بنات تجمعوا عندي لكم شي خطير
بفضول تجمعوا البنات على شكل دائره جالسين على التراب ، رتيل : شرايكم  نسوق ونفحط؟
دقت فلك الصدر : ابد لعبتي ازهلوا
إيلاف بحماس : كفو
ميلاف بخوف : لا بالله فكونا اخاف تتقلبون ولا يصير شي ولا تموتون
كشرت ملاك بوجهها : ياحبك للدراما
ترف : صادزه ميلاف يخوف ترا
شموخ : انتن لا تصيرون خوافات تسذا عادي ترا
ملاك : والله ماتفرق معي بس اهم شي اركب معكم عشان اذا متنا نموت سوا
شهقت ميلاف بخوف : بسم الله عليكم!
فلك بحماس : كفو خالتي ماتخليني حتى بالموت
ريما بخوف : لا بنات تكفون والله خطير انتم تدرون ان ابوي مات بسبب هذا الشي تكفون مابي افقدكم
مسكت فلك راس ريما ، وبحده : ريما علامتس؟ معقوله صرتي خوافه لهالحد وبعدين احنا مابنفحط ذاك التفحيط بس بنسوق لاتخافين
ريما بعدم اقتناع : طيب ..
شموخ : بس ذحين وش يقنع العيال كيف ناخذ سياره من عندهم والحريم اكيد بيخاصمونا
فلك بثقه : عادي السياره نسرقها
ضحكت شموخ غصب : مهبوله انتي ترا سياره! وشلون بتسرقينها
ملاك : صدز وبالنسبه للعجايز بنهج مايمديهم يلحقونا
ترف غطت وجهها بضحك : استغفرالله تخيلت جدتي تطارد وراكم بالعصى وقفي يابنت هههههههههه
فلك قامت : شموخ وين اخوتس؟ بنخليه ينادي فراس من عندهم
ملاك : خلوه يجي هنا ونقنعه
ترف : انا وميلاف وريما بنقعد هنا نصوركم
توجه جسار لفراس الي جالس جمب براك ، نطق بخوف من براك : ف فراس البنات يبعونك
فز فراس : براك ترا بفقّع عيونك لك وراك مخوف الولد بنظراتك
براك بصدمه : والله ماسويت شي عيوني تسذا من الله
فراس : تعال جسار لازم تواجه مخاوفك
جسار بخوف : ما ابعى
براك : تعال ما آكلك انا - وبمزح - تعال ولا ترا بجيك بنص الليل - حرّك اصباعه السبابه على رقبته -  اذبحك واطبخك واتعشاك!
جسار بدموع : ما ابعى
ضرب فراس راس براك : وجع تراه يصدّق علامك انت ساعه ماينام عند امه .. وبعدين تراه مسوي نفسه رجال عندنا لا تخرّب رجولته لو سمحت ههههههههههههههههههه
براك ابتسم : امزح لايصيح عندي
فراس : بالله بعدين حاول تخفف دقنك شوي انا بكبري يخوفني فما بالك الصغير
رفع براك يده يحك دقنه ابتسم بثقه : غيران من دقني صح؟ اعترف والله اني داري
فراس : من زينه عاد - مسك شنبه - شف شنبي ازين منه
براك : رح بس شوف الاهل وش يبغون - لف لبتال الي كان متكي فوق سيارته - وانت وراك ماتجلس على الأرض فارشين فرش عالفاضي؟
بتال : لا ابي احرس سيارتي مانيب مرتاح للبنات اخاف تنسرق
ضحك براك : لاتخاف قفلها زين وماتنسرق بس تعال سولف لي بالله
بتال برفض : ما اعرف اسولف والله
براك بإستغراب : وشلون ماتعرف تعال عندي يرجال والسوالف تجي من حالها
بتال بضيق : ياخي ماعرف اسولف وش اسوي
حس براك انك مايبي يجي نطق : براحتك بس لازم تتعود
« عند فراس ، توجه للبنات المجتمعين نطق بصوت عالي : لا اله الا الله عسى خير نظراتكم ذي تخوفني
فلك : تعال تعال ابد كل خير
تكتف فراس بإنتظار وبسرعه رمت فلك نقابها عليه وبضحكه : طلبتك طلبه يالأجودي انك ماتردني!
التقط فراس نقابها بسرعه وابتسم : لا ياشيخه اخلصي وش عندكم!
فلك : قل تم
فراس : مب تم
فلك : فرااااس!
ضحك فراس : تم تم
فلك : تكفى يا افضل خال عندي يا اجمل شخص فالحياه يا اروع شخص
فراس بنرجسيه : زيدي زيدي
ملاك : تدري انك اسطوره! انت اسطورتي ماتفهم
فراس : افهم .. مين يزيد؟
إيلاف كملت : تدري انك رجالٍ اجودي ماتقصر معنا صح اوقات تعل الكبد بس ماعليها افضل خال حرفيا
اشر فراس لريما الي جالسه ومتنقبه : دام ام لسان ما تكلمت واضح الموضوع مب عاجبها
ريما تكتفت بضيق : صح عليك مب عاجبني
فلك : بالله نبغى سيارتك نبي نسوق تكفى
فراس بصدمه وسع عيونه : منجدكم؟ تبغون تموتون عندي ثم ابلش فيكم
فلك دقت الصدر : عندي الموضوع وانا بنت عزام! هم ف امان دام انا الي بسوق معليك
فراس بعدم اقتناع : ما اقدر اطلبوا اي شي الا هذا
رتيل: تكفى تكفى لاتردنا
ضحك فراس نطق بصوت عالي وهو يطلّع المفتاح من جيبه : ماعاااااش الي يردكم ياشيخ
ابتسمت فلك : كفووو
اشر فراس على جلسة الحريم الي ورا : مين بيقنع  هذولا؟ انا بالذات لاتجيبون طاريي والله ان تخنقني امي لو درت اني معطيكم إياه
رتيل : لاتخاف بنقول اننا سرقناه
ميلاف بخوف : بنات والله خايفه عليكم
شموخ ضربت فخذها بحماس : يقلع ابو الفله الحمدلله انك خالنا ياشيخ
ريما بضيق : استودعكم الله بس
فراس شاف نفسه عليهم : اي عشان تعرفون اني نعمه وتذكروا دايما تحمدون ربكم علي تراي نادر
فلك : خلصت؟ هيا يلا جيب نقابي
رمى النقاب عليها ونطق : انتبهي لهن .. ولا تتحركون الا لما اجلس عشان امي ماتشك
توجه فراس لبراك وبتال والبنات ينتظرونه يوصل متحمسين ، رفع نظره براك بإستغراب : ابطيت وش يبغون
ابتسم فراس : هالحين بتشوف
بتال تثاوب : الله يستر منهم والله مانيب متطمن
« جلسة الحريم »
شهقت ام خالد بصدمه : يادافع البلا وهو لايكون لين ذحين مايبغى يتزوج
ام براك بضيق : اي والله اني حاولت فيه لين ازريت مير مهوب راضي يسمع مني مادرت ان الحرمه بتكون تسذا ولا مديني مازوجّته
ام نوال : حاولي فيه مرةٍ ثانيه كود يرضى
ام براك نفضت يدينها بقلة حيله : حاولت واقوله اي بنت تبغاها أشرّ وانا اخطبها لك موب راضي براك وليدي وحيدي ماعندي غيره ودي اشوف عياله قبل ما الله ياخذ عمري
حصه وهي تصب الشاهي : بعيد الشر عنتس ياعمه بس لاتضغطين عليه تكفين ياخوفي يظلم البنت معاه خليه براحته
مريم : صادزه لاحق عالزواج
الجده بتفكير : وش رايك ازوّج فراس كود يتحمس ولدك ويخطب
ضحكت مريم غصب : يا يمه الزواج مهوب لعبه تسذا وش دخل فراس بالموضوع
ام براك ابتسمت بضيق :  والله الود ودي بس ماظنتي هالبراك راسه يااابس حيل
ابتسمت ام خالد بتفكير : بيني وبينكم .. احس فيه وحده دخلت ببالي لفراس من اول ماشفتها بسم الله عليها ادب وأخلاق وجمال
حصه شهقت بصدمه : حركااات يمه وماتعلمينا من بدري
مريم ضحكت : تخيلوا فراس يتزوج احس مب لايق  ههههههههههههههه
ام خالد بطرف عين : ليش ان شاءالله مب مالي عينك وليدي؟
مريم كتمت ضحكتها : الا مالي والله
ام نوال بسعاده : ومين الي داخله بالتس؟
ام خالد بإبتسامه : المها بنت فهد رفيق عزام .. تبارك الله عليها تهبل الله يحفظها
حصه ابتسمت : اي ماشاءالله عليها والله والنعم فيها انا اعرفها وأعرف امها
مريم ابتسمت : ماشاءالله وتخططين بدوننا يمه بس احسنتي الاختيار بنتٍ مزيونه كامله والكامل الله
اختفت الابتسامه من وجه ام نوال تدريجيًا : المها؟
ام خالد : إيه اللي جتنا ذيك المره مع ابوها ماتخبرينها
ابتسمت ام نوال بتمثيل تحاول تتدارك ملامح وجهها الي غرقت بالصدمه والخيّبه خابت كل هقواتها كانت تتمنى تقول انها ريما !  خابت كل ظنونها فجأه كان الشي الوحيد الي مطمنّها  وجود فراس في حياة ريما ، نطقت بصوت هادئ : ماشاءالله الله يوفقه
ام براك : عقبال الي عندي بس
ام خالد : ياحرمه حاولي فيه مره ثانيه انا بشاور فراس كان وافق بخليه يقنع براك
ام براك : ان شاءالله
حصه بإستغراب : بس تحسون عادي انه يخطب البنت الي ابوها مدير شركته ولا بعد موظفّه واسطه عنده
ام خالد : عادي يختي وش فيها بالعكس يتقربون اكثر
ام براك : على طاري الشركه الجديده متى يبدأ دوامهم؟ الي مطمني انهم الثلاثه فراس وبراك وسيف فنفس الشركه
ضحكت ام خالد غصب : سمعت انه قريب بيداومون  قولي الله يعين المدير عليهم بس هههههههههههههههههه
مريم نزلت فنجال الشاهي الي بيدها : بنشاور فراس بعدين الله يكتب الي فيه الخير
ام نوال ابتسمت بضيق : يستاهل كل خير هالفراس والله انه دايم على نياته ومايقصر ابد
شهقت حصه بصدمه : يمه البنات وين!
توجهوا لها ميلاف وترف وريما ، نطقت ميلاف بتوتر : اا هالحين بتشوفين
جلست ترف ترفع جوالها تصور سيارة فراس الي بدأت تتحرك مبتعده عنهم ،
براك بصدمه وسع عيونه : ولد! سيارتك سرقوها الحراميه
فراس بإستسلام : داري داري بس شوف هالحين وش بيسوون تفرج معاي مابيدي شي
بتال بتوتر : اللهم استودعك سيارة خالي وسيارتي وسيارة براك اللهم استودعك خالاتي وجداتي ..
فراس : سد حلقك شوي
بتال : والله اني متأكد الي تسوق انها فلك
فراس ضحك : بنت عزام !
براك بإنفعال : يرجال اهلك يسوقون معهم السياره تصرف كيف تخليهم تسذا
فراس بضحكه : انت ليش حارق دمك خلاص كيفهم
« في سيارة فراس كان الترتيب كالآتي
الي تسوق فلك متنقبه ولافه شماغ فراس على راسها ، جمبها ملاك ، وورا إيلاف وشموخ ورتيل »
فلك بحماس رمت جوالها على ملاك: شغلي لي اي شيله اتحمس زياده
شموخ وهي تصور : كفوو
رفعت ملاك الجوال وشبكته ببلوتوث السياره دخلت على الشيلات الي محملتها فلك ضغطت على شيله عشوائيه ورفعت الصوت ، بدأ صوت الشيله يتعالى وبدأت فلك تغني معاه بحمااس وانسجاام :
"  هنوف كن عينه يوم سلهم ..
تقول ان نظرة عيونه تسلم
وهو سلهم بعينه ما تكلم ..
اجل وشلون حالي لا سمع حكاه
قسم بالله لا جاء الجد لو ان محدن بحاديني
يا جعله فدوتةٍ للي عشقته خمسة سنيني
على شاص قراطيسه وكاله  ليا من فز ما تبغي بداله
يا حي اللي شراه و حي فاله
.. جسور يقطع الفرجات ممشاه
تعداني على خط المدينه
.. يسوقه جاهل على يمينه
هنوف سلهمت رمشه وعينه ..
تتل القلب من قاصيه لادناه