بارت ١٤
المها : اييه ادري دايما فلك تحتسي لي بس تدرين حماس ودي اشارك
ملاك :خليتس فحالتس ذحين بيجيك مخمس من حيث لاتعلمين
ساره جلست وهي مرتاعه من منظر الهواش
فلك وهي تصارخ بعصبيه ووجهها محمرر : بنت ابوتسس احتسيي هاه
سلوى : فكوونيي يا متوحشااتت ييمهه الحقيينيي
وفجأه جا فنجال طاير متوجه لسلوى بس للاسف طاح قريب منها واحزرووو من مييين؟ ايه نعم من المها ذا ربي الي مقدرها عليه😂
ترف ضربت يدينها بحسره : خساره ليته جا بصندحتها
المها : يلا معليه المرا الجايه
فلك وهي ماسكه شعرها وعروقها طالعه : انااا بنتت عزااااام والله لاربيتس
رتيل وهي تتضارب مع سلوى : حاطه قدرتس على خالتيي هااهه
ريما وهي تعزز : كفوو اعطييه .. إيلاف شوشتها لا اوصيتس ودي أفزع بس خلاص البنت بتنصرع
وبسرعه دخلت الجده ووراها ام فلك وجدة ريما
(ريما يتيمه عايشه عند جدتها و ماعندها اخوان و اخوات تقدرون تقولون تربت مع عائلة الجده وتعتبرهم خواتها )
الجده وهي تفك البنات عن سلوى : بسس بسس فضحتونا صياحكم واصل لآخر البيتت
سلوى وهي تبكي ووجها مليان خدوش اظافر وشوشتها طايره : حسبيا الله عليكمم الله يااخذكمم
المها : وياتس
ام فلك بعصبيه: إيلاف وفلك وانا اقول بناتي العاقلات وخرو عنها بسرعه مالت بس وانتي يا ميلاف زي الصنم قاعده تتفرجين
ميلاف وهي تشرب فنجالها : شسوي يمه هذا جزاتها هي الي بدت
جدة ريما بعصبيه : ريمااا الظاهر اني ماربيتس زينن وانا اقول بنيتي تفارعع مب تعزيزاتها واصله اخر الدنيا
ريما : ياجده شكلتس ماتدرين اني كنت بفزع بس شفت البنات قضو عليها قلت أأجل طاقتي لوقت ثاني
ملاك : تستاهل
وراحت سلوى ركض عند امهاا تبكي وتصارخ
الجده : الظاهر يم نوال (اسم ام ريما) ماربينا بنياتنا زين
الجده ام نوال: صادزه علينا فيهم بعد ما نتفاهم مع ام سلوى
البنات شهقو : ياويلناا
ساره ركضت غرفتها وبدأت تبكي ..ليش كل ماحاولت تتخطى يذكرونها ليش
شموخ جلست وهي ترتب شكلها ولا كأنها قبل شوي بمهابد وهواش : كيف شكلي بنات
المها : مززهه ماتغيرتي حتى بعد المضاربه
فلك وهي تشرب مويا : اخخ بس دبغناها لين قال امين
المها : وربيي حمااسس كان ودي اشارك بس معرف السالفه
رتيل وهي تضحك : انتي رميتي الفنجال بس هذا الي مقدرتس عليه
المها تذكرت رميتها وضحكت : شسوي ياخي قهرتني ولا بعد ماخلصت الهوشه قمت القطه
ترف وهي تصفق : والله صراحه ابدعتو تسلم يمناكم
ملاك انهارت ضحك : واه يا بنات اشوا ما ذبحناها ماشاء الله حنا كثااارر تقل جيش الله يحفظنا وهي وحده بس بغت تختفي
ميلاف راحت لغرفة ساره وبدأت تدق الباب ..
ساره : تكفوونن خلوني لحاليي خلاص
ميلاف راحت زي ما تبغى قالت يمكن تحتاج وقت لحالها
عند الرجال ..
قاعدين يسولفون بأمور الشغل و الوظايف ..
عند الشباب
نصهم قاعدين يلعبون بلوت ونصهم قاعدين يسولفون
حارب ونواف الي اندمجو بسرعه معاهم
نواف وهو ماصدق لقى احد نفس جوه يعرف بأمور النياق الي هو براك : سمعت انه اسعار المجاهيم (نوع من انواع النياق) صايره غاليه هالأيام
براك : ايه معليك فتره وترجع لسعرها
فراس : انت يانواف لزومن تصير ولد ابوي بدالي صدقني بيصير فخور فيك دام انك تحب النياق
نواف ضحك : صادق والله الا ليت ابوي زيه مغير ينقد علي
براك ضحك : تدري ان عمي (يقصد ابو فراس بس يقوله عمي كاحترام ) فخور فيني دايما يطيرني مدح
حارب : اخبار ريميه
فراس و براك : منهي ريميه
نواف بكل ثقه : حبيبتي
حارب وهو يتدارك الوضع : عنده ناقه مسميها ريميه
نواف ابتسم وهو يتذكرها : آخخ ياريميه صارلي فتره مهملها اشتقت لها
براك : الله يعينك
نواف : تدرون ان قصايدي واشعاري فيها اصلا
حارب وهو يشرب شاهي : عطنا من قصايدك فيها
نواف تنحنح وقال :
فيها طرب ممشى وفيها حلا زين
وفيها وصايف مابعدها وصايف
ابرها لو الحق الدين بالدين
و اتبع هواها لو لحقني كلايف
تتعالى الاصوات بالتصفيق وبين صح لسانك وبين هالله هالله
عند الرجال ..
بو فلك يسولف عن مشكلة حصلت له بالدوام والكل متحمس ومنسجم معاه
ابو سلوى : ابك انت ماعندك سالفه غير ذا الدوام
واحد من الرجال : وانت شعليتس يبو سلوى اسلم يبو فلك
الجد : كمل كمل يبناخي
عند الحريم ..
دخلت سلوى المجلس وشعرها طاير ووجهها مليان خدوش تصيح عند امها
ام سلوى : حسبيا الله عليكم يالي ماتستحون
الجده : معليش يم سلوى
وحده من المعازيم: اكيد ما دبغوها حفيدات ام خالد الا لسبب كايد ولا نتسذب على بعض الكل يعرف اطباعها
سلوى وهي تبكي : حسبياا الله عليتتسس انتي شدخلتسس واهه ياراسييي
ام سلوى بغضبب سحبت بنتها : قومي قومي ياسلوى بنطلع الوعد بعدينن بحفيداتس يم خالد
الجده بورطه : السموحه لا تواخذينا
وبسرعه ام سلوى اخذت عبايتها وعباية بنتها ولبستها وطلعو برا
وكملو الحريم سوالفهم لانهم متعودين على حركات ام سلوى مستحييلل تصير عزيمهه بدون هالاكشن
عند البنات ..
قاعدين يلعبون اونو مستمتعين
إيلاف : المها حطيي لون ازرقق بسرعه
المها بنكبه : ماعنديي شسوي
ريما بطفش : اسحبيي طييبب الاوراق قدامتس الله لايعمينا
إيلاف: حسبيا الله عليتس ذا وجهي كان خليتس فريقي مرةٍ ثانيه
شموخ : معليه باقي قيم ثاني
فلك : اونووو
وبسرعه الكل حاول يخليها تسحب بس ماقدرو عليها للاسف وفازت فلك مع فريقها رتيل
فلك بثقة وقفت وبصوت عالي :
انا الفلك والكل حولي مدارات
تشوف عز نفوسها من خلالي
ميلاف وهي على جوالها : شدخل يختي مب وقت قصايدتس
فلك : مالتس دخل اهم شي انها بخاطري وقلتها
ترف : بناتت عندي فكره شرايكم اليوم نسهر مع بعضض المها تكفين خليتس معانا
المها : يااليتت والله بس بشوف ابوي
شموخ : ايي بتكون اطلق سهره ريما عندها عود تعرف تدق
ريما بثقه : ايي معليكمم بيجيكم اطلق دق
المها بحماس : الله ابغى اسمع دقيقه بدق على ابوي يارب يوافق
دقت المها على ابوها وقالت له انها بتقعد ووافق لان اصلا لسى ماتكلم هو وابو نواف عن الموضوع الي يبغاه فيه
عند ساره .. فتحت دفترها الي مليان قصايد وشعر كل ماتضايقت كتبت فيه وكتبت ودموعها على خدها :
مجروح قلبي من صواديف الايام
فرقى وليفي زود الطين بله
ماعاد ابي اجلس مع الناس مادام
غايب حبيب الروح وعايش بعزله
يتبع ..
تعليقاتكم تهمني💕
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
