عند الباب الخلفي
عبدالله شاف الباب مفتوح على خفيف وقال بصوته الخشن : ياجددهه..يااجدهه
شموخ كانت بالمطبخ وبسرعه راحت صكت الباب بأقوى ماعندها بوجه عبدالله وهو الي ماشافها ولا درا عنها
شموخ بصوت عالي وهي تصك الباب : ووجعع
عبدالله بأستغراب مايذكر انه في وحده من بنات خالاته بهذي الجرأه والوقاحه
عبدالله بنرفزه : يوجعتس وانا شيدريني انتس فيه ..وبعدين مخلين الباب مطرف تسذا ليه
شموخ بعصبيه من ورا الباب : وانا شيدريني الورعان رايحين جايين وخلوه مفتوح
عبدالله انقهر من انه بنت مايعرفها حتى تتكلم معاه تسذا وقال : لايكثر ..روحي نادي جدتي بس
شموخ : لاياشيخ وتتأمر بعد ماني ناديتها روح صايح بأعلى صوتك فالبيت تقل ورعٍ ضايع
عبدالله بصدمه : انا ورعٍ ضايع ؟هيه انتي لا اعرفك ولا تعرفيني روحي نادي جدتي بس
دخلت ملاك المطبخ وقالت : شموخ وين البُن امي تقول بنجدد القهوه ..اعوذ بالله شفاطين مب حريم مسرع خلصت (وبأستغراب ) انتي علامتس قاعده عند الباب
شموخ بورطه : كنت اسكره
عبدالله سمع اسمها وانصدم..معقول ذي شموخ الي كانت صغيره وهاديه لاتهش ولا تنش.. ذحين ام لسان
عبدالله تنحنح بصوت متضخم : يااولد
شموخ فزت من عند الباب بخرعه حطت يدها على قلبها ..توقعت انه راح بس طلع فيه
ملاك وهي تضحك توجهت تفتح الباب وشموخ على طول طلعت : هلا عبووديي
عبدالله سلم عليها : هلا بتس وبعدين وش عبودي اصغر عيالتس تراي اكبر منتس بسنتين على فكره مع انتس خالتي .. وش يضحكتس ضحكيني معتس
ملاك ماتحملت على طول انفجرت ضحك : اخخ تخي..ل شموخ كانت عند الباب تسكره..ا..ولل ما تكلمت خ..خرعتها الله يهديك انحاشت
عبدالله ماقدر يحبس ضحكته وضحك معاها ماتوقع ان ام لسان تنخرع تسذا : تستاهل ..الا اقول لتس وين جدتي جدي يبغى سلاحه من اول وانا افرفر ادور عليها مختفيه
ملاك : كانت مع الحريم تسولف معاهم .. وانا ما ادري وينه ..ابوي داسه بمكان محد يعرفه الا امي يخاف نفجر ببعض
عبدالله: صادز والله تكفين عجلي علي تأخرت جدي بيفجر هالسلاح فيني ترا
ملاك :أجل بنادي امي لك تشوف لك درب وتدخلك تشيل السلاح..تحرا برا ياخوفي احد يدخل
عند البنات :
ريما حطت يدها على راسها : واه يابنات دووخه وازعاج وراعينكم واجد
فلك وهي تعدل على مكياجها : فاتس ترا كل سنه ينزل جيل جديد منهم انتظري للسنه الجايه بس ..
جات مسك ( اخت شموخ الصغيره ) توجهت لشموخ : شموح
شموخ : هاه
إيلاف انهارت ضحك : من يوم ماسمعت شموح وانا غاسله يدي
مسك : ماما تقول حطي لي زي مكياجك
شموخ بصدمه : لا تسذابه امي اصلا ماتحط لتس مكياج توتس صغيره وبعدين بدري على التسذب
رتيل جات وأشرت على مسك بضحك : هيه انتي ماتسمعين اختس التسبيره قالت لا يعني لا
مسك بعصبيه : مالتس دخل
رتيل : عشتو مين معلمتس على الردود هاه
شموخ بقهر : مغير منصور حسبيا الله عليه ..ولا بعد مربي جسار معاه مخليه راعي مشاكل ومهايطي ..وهو حتى توه ما ينطق زين
ويقاطع كلامهم صوت الاسلحه والترحيبات.. بضيوفهم الي جو من بعيد
رتيل بسرعه قامت ترتب شكلها : هاه شفتي جو يلا نروح نستقبل عند الحريم
غرفة ساره..
ساره بتوتر لميلاف بعد ماتجهزت: تدرين احس خلاص..مابغى اروح بجلس هنا
ميلاف : ليشش بعد ماتكشختي
ساره بتوتر : مدري ياخي..صارلي فتره طويله ماقابلت احد..عاد تعرفين حريم الديره مايخلون واحد فحاله لازم يدبلون تسبده بالحتسي
ميلاف بضيق: وانتي شعليتس منهم خلاص طنشي
عند الرجال ..
عند دخول سيارة بو نواف وسيارة بو حارب ..
تتعالى الاصوات بين صوت الجد وفراس واصدقاء فراس لان الجد يعتبروهم بمكانة عياله وكل شخص قريب منهم بالترحيبات بحكم ان بو نواف و بو حارب مايجون كثير ف يعتبرونهم ضيوف صح ان العزيمه المفروض تكون لبو فلك بس الجد قرر يجيب اي سبب عشان يجمعهم لأن صارلهم فتره ماتجمعو ..
فراس وهو يطلق طلقات بالهوا : يالله حيهم
بو فلك : هلا بالعضيدد
براك وهو يمين فراس : حياكم الله
نزل بو نواف ونواف يسلم عليهم عليهم ومن سوء حظ المها انشغلو ابوها واخوها عنها ونسوها هنا ابتلشت وكانت خايفه من السلاح ..
فراس وهو يطلق : مرحباا ملييونن
المها بنفسها : بس الله ياخذتس ياخي
وهنا قررت المها تنزل وهي تشوف اهلها مشغولين بالتسليم
فراس اشر على الباب الصغير البعيد وهو صاد : الحريم مع ذاك الباب
المها بتشميقه وفراس اصلا مادرا عنها : طيب
عند الحريم ..
جات ام سلوى ..الحرمه الغثيثه نقالة العلوم ..كل حفيدات الجده يكرهونها بسبب انها تطلع اشاعات عنهم ..وملقوفه وبنتها سلوى اغث منها وراعية مشاكل
ام سلوى : اخبارتس ام فلك نورتي الديره
ام فلك : النور نورتس
ام سلوى بلقافه : الا اقولتس انتي ماحملتي ماعندتس غير هالبنيات لزومن يكون لهم اخو سند لهن
ام فلك وهي وأبو فلك ماتفرق معاهم اذا جا ولد او بنت كلهم فيهم الخير والبركه : ابد والله كلهم فيهم الخير والبركه ..وبناتي مرتاحات الحمدلله انا وابوهم سند لهم
ملاك بنرفزه : انتي مين الي جاتس وقعد يتشكى عندتس نبغى اخو هاه؟
ام سلوى بورطه : محد
ملاك : اجل لاتحشرين خشمتس
قاطعتهم الجده : ياهلا ومرحبا حياكم الله
شموخ وهي تهمس لملاك : قسم لو كانت فيه فلك كان مسحت بها الارض مسح
ملاك : صادزه والله عاني ايلاف الحمدلله كانت جالسه قريب من امي الظاهر قرصتها
لفو لإيلاف شافوها حاطه يدها على فخذها وتحكه بألم ..
سيارة بو حارب ..
نزل حارب وأبوه متوجهين لهم
فراس بصدمه وفتحت عيونه : انتتت !
سيف بنفس الصدمه : وش جابك ؟
قاطع كلامه الجد : وجع يوجعتس انت ماتستحي تقول لضيفك وش جابك هاه
سيف : بدون قصد والله
قاطع كلامهم صوت براك وهو يرحب فيه : ياامرحبااااا تراحيبب المطرر جا النشمي جاا
حارب بنفس الصدمه : الله يبقيك.. ماتوقعت اقابلكم هنيا والله
بو حارب بأبتسامه : طلعتو تعرفون بعض
فراس : تقابلنا مرةٍ وحده بس
توقعاتكم مين الي قابلوه ؟
عند الحريم ..
دقت المها الباب وفتحت لها ملاك ..
المها بتوتر تسلم عليها : اخبارتس
ملاك : بخير الحمدلله اخبارتس انتي حياتس اقلطي..انتي المها صح؟
يتبع ..
التعليقات تهمني💕
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
