ملاك بألم : يمه تراي مانيب ببزر تكدّين (تمشطين) راسي تسذا
الجده : باقي شوي بجدله لتس وياويلتس تفكينه ذحين
وماصدقت الجده خلصت تمشيط الا تعطي ملاك ضربه على راسها بالمشط
ملاك بصدمه وألم : واه ياراسي...معد اقدر افكر زين
الجده بدون اهتمام: صجيتي راسي بصياحتس
دخلت مريم معها بنتها مسك وولدها جسار ( توأم)..
وبسرعه بدأو يركضون نحو جدتهم
مريم بهدوء : بشويش لاتطيحون
الجده بترحيب : هلا ويامرحبا ومسهلا ..حي الله عيالي
ملاك وهي حاطه يدها على راسها : هاه خذلك جو الوحوش بروح اسكر باب غرفتي
مريم : يايمه سلطان برا بيسلم عليتس
الجده : خليه يدخل يمي
مريم وهي تجلس : يقول مستعجل عنده استلام بنام عندكم الليله
الجده فزت: انا بروح له
سلطان وهو لابس بدلته العسكريه وبأبتسامه : ياهلا ومسهلا انحنى يبوس رأسها ويدها
الجده بزعل : كان جيت تقهويت عندي..ولا الظاهر ماشتقت لقهوتي
فز سلطان يسلم على يدها مره ثانيه : افاا ياذا العلم يم خالد...انا ما ابغى قهوتك؟ يعلم الله اني مستعجل بلحق على دوامي...ولا الظاهر تبغينهم يفصلوني عشان اجي عندتس
الجده بخرعه نفضت يدها: يادافع البلا انا ماقلت لتس يفصلونك مير روّح روّح وتعال لي مرةٍ ثانيه اهم شي وظيفتس ياوليدي
سلطان وهو مغادر ويضحك : يلا مع السلامه
الجده: في امان الله استودعتس الله
دخل فراس وجلس قبال الجده وباس راس اخته مريم ...
الجده بسؤال : هاه يمي وش صار على وظيفتك انت واخوياك
فراس بهدوء : قلت لأبوي قال بتصرف...يقول انه خوي نسيبي عزام عنده شركه خاصه فيه...كان مالقينا حل كود يوظفنا
مريم قامت : انا بروح ازهب القهوه (لفت لجسار ومسك ) وانتو انثبرو هنيا
فراس حضنهمم بسعاااده : حبايب خالهم ذولاا لا تخاصمينهم يامريم لو سمحتي
مريم : محد مدلعهم كثرك يافراس
فراس وهو لايزال حاضنهم : خليهم يتدلعون حبايبي ... (وبسؤال لف لمريم ) فين شموخ ومنصور ؟
مريم وهي مغادره : فالبيت راقدين...اصلا بكرا صباح بروح سلطان عنده استلام اليوم
فراس لف لأمه وهو حاضن جسار وملاذ : اخبار اوخيتي حصه
الجده بشوق : بيجونا الاسبوع الجاي ان شاءالله
فراس بإرتباك : المشكله ساره ...ماتحب الازعاج والرجه
الجده بتشديد : محد بيقرب صوبها ...لزومن تتعود هذول اهلها سندها
فراس قام : انا بروح احتسي معاها
غرفة ساره...
فراس وهو يدق الباب : افتحي ساااررااهه
ساره كانت منسدحه تتصفح جوالها وفزت اول ماسمعت الباب
ساره وهي فاتحه الباب ووجها رايح فيها تعبان: هاه
فراس دخل غرفتها : اجلسي اجلسي خلن نحتسي شوي
ساره وهي متكيه عالباب : فراس تكفى...والله مالي خلق احتسي ولا شيي..خلاص
فراس بأصرار : ياخي وش بيضرتس لو حتسيتي شوي (وانسدح على سريرها ) انا مانيب متحرك من هنيا لين تحتسين
ساره بصدمه: فراس خلاص خلاص ! انا ايش قلت
فراس وهو مغمض عينه : وش قلتي؟
ساره تقدمت وجلست على كرسي : ايه وش بغيت
فراس اعتدل بجلسته وتربع : أبغاك تحتسين
ساره وهي منزله عيونها للأرض وبدموع :
"ودي اشرح لك ظروفي واتكلم
بس اخاف تشيبك قصة حياتي
اخفي الألم واضحك وما اتألم
اتصبر واطلب الله في صلاتي
خرجتني صكت الدنيا معلم
كل ماراحت بي الايام جتني "
فراس بعصبيه من حال اخته : احتسي ياساره احتسي
ساره لفت له : فراس .. تعرف وش اخبار احمد وهو بالسجن.. متى بيطلع ؟
فراس بغضب : لاتجيبين طاري ذاك الخسيس راعي المخدرات انسيه
ساره بدفاع : لاتقول خسيس و انت اصلا..
فراس كمل : الا خسيس ونص بعد طلبنا منه يطلق ورفض ويوم قلنا بنرفع قضية خلع رفضتي انتي..معليش يا ساره انا ما اقبل اختي تعيش مع راعي مخدرات فاهمه.. باقي ثلاث شهور ويطلع ونتفاه معه زين وبيطلقك غصب
ساره وهي تحاول تتكلم بصوت واضح : انت..انت م..ماتدري وش السالفه (وبشهقه) لاتتكلم عن زوجي تسذا خ..خلاص فراس اطلع برا غرفتييي
فراس بدهشه : ايه انا ما اعرف السالفه..وشلون تبيني اعرفها وانتي ماتحتسين اصلا خليني افهم..كود نلقى حل لمشكلتك
ساره ببكاء : مقدر احتسي يافارس مقدر..
فراس بغضب : منهو الي ماسك حلقتس هاه
ساره بنفس النبره : خلاص..خليه يطلع واتفاهم معاه تكفى
فراس وهو خارج : يصير خير..يصير خير
بعد اسبوع في بيت بو فلك ...
بو فلك بصوت عالي: يلا يا بنات اجهزو بنروح صوب الديره..تفقدو عوايزكم لحد ينسى شي منّا ولا منّا
فلك بحماس وهي تركض مع الدرج : اخييررا..وحشتني جدتي
بو فلك بخرعه : على هونك لاتتقربعين عندنا محد ناقص
ام فلك وهي تلبس عبايتها : وانت ياعزام.. شرايك ترقد معانا
بو فلك هز راسه بنفي : انا اخذت اجازه اسبوع هذا الي قدرو يعطوني ياه ..يمكن ارقد عندكم بعده بنزل صوب الرياض دوامي واشغالي هنيا ..
ميلاف جت تحضن ابوها : بشتاق لك
بو فلك بضحكه حط يده على راسها: مسرع يبوك وانا يوميا راسي براستس ...
جت إيلاف جلست عالكنب : لزومن ابوي ياخذ استراحة محارب مننا ..(وبدلع حركة شعرها ) بنشوف مين اكثر وحده يشتاق لها هاه
بو فلك وهو طالع : اقول يلا قدامي حطيتو عوازيكم(اغراضكم) بالشنطه
كلهم : ايه
سيارة بو فلك ...
ام فلك لفت لبو فلك: اقول بالله وقف الدكان..نبغى نتقضى مفرحات الطريق تسذا
بو فلك حرك سيارته تجاه البقاله
فلك بفضول : يمه..بنات خالتي غزلان ومريم بيجون
ام فلك بدون ماتلتفت لها :ان شاءالله
ميلاف : يسس... متحمسه اشتقت لهم
بو فلك وقف السياره وقال : هيا انزلو تقضو الي تبغونه
بيت بو نواف تحديدًا الصاله...
الكل مجتمع على الغداء
ام نواف لفت لبو نواف : اقول بو نواف ابغى السوق..نبي نتقضى انا وبنتي وخليف معنا
بو فلك وهو ياكل لقمته : طيب انا مشغول اليوم
... خلي نايف ولا نواف يوديكم
المها بتذمر : نواف يدبل تسبدي مغير بسرعه( وبقرف) انت تذكر آخر مره وش سوا فيني
ابو نواف بضحكه : ايه .. اذكر قلت لتس مقدر اوديتس ذاك اليوم خليه يوم ثاني بس اصريتي عاد تستاهلين
ام نواف ماقدرت تحبس ضحكتها : يا الله يبنيتي كل ما اشوف المقاطع اموت ضحك عليتس حتى خلف ماخذتس طقطقه
نواف بضحكه : سويت لتس فعاليه احمدي ربتس
عز بضحكه : افا يا المها طلعتي خوافه
يتبع ..
لاااتنسون تضيفون حساباتي 💞
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
