قراءه ممتعه
ولاتنسون النجمه والتعليقات تهمني 💞
وضيفوني انستا
فالديره ..
تحديدا بيت الجد فالصاله
ينتشرون البنات بكل انحاء البيت الي تمسح الجدران والي تكنس والي تغسل الصحون والي تنفض الفرش
الجده ام خالد اصرت ان هذا عقابهم و للاسف بعد مايخلصون بينتقلون لبيت ام نوال وينفضونه نفض
غزلان نزلت فنجال قهوتها : فلك ادعكي زين
فلك وهي منهاره تعب : والله دعكت ياخاله
ريما وهي تمسح الارضيه: يهب المها ماتستحين على وجهتس مشاركتنا بالجريمه وتنضفين
الجده ام خالد بشهقه : يهبي ياوجهتس تبين ضيفتس تكرف معتس
المها وهي تضحك على اشكالهم : انا ضييفة ماتفهمين
إيلاف : المرا الثانيه بتمسحين معنا
الجده ام خالد بصوت عالي: لاا بعدد ناوين مرةٍ ثانيه
إيلاف بتوتر : لاخلاص تووبه
دخلت ميلاف متخصره : سلامات ليش ماعلمتوني ؟
ملاك : احنا عارفين لو علمناتس بتروحين تعلمين علينا مب جوتس هذي الاشياء
ميلاف ضربت رجلها بالأرض : طيب ليش تخلوني لحالي على الاقل لو وحده تقعد منكم معي ! ترا شي يقهر
إيلاف : علامك انتي شي صار وانتهى خلاص المرا الجايه بناخذتس لاتقعدين تبكبكين علينا ذحين وتنكدين علينا
فلك بحده لفت لإيلاف : إيلاف !
ميلاف تجمعت الدموع ف عيونها : طيب ياخي لي ..
قاطعتها ساره : ميلااف امشي معي لغرفتي
ميلاف : بس ي خاله
ساره : امشي معي
في غرفة ساره ..
ساره جلست : علامك انتي
ميلاف بدت تتكلم و تحرك يديها : ي خاله تشوفين اسلوبهم وتصرفاتهم معي ؟
كيف يعاملوني كذا كأني صنم واذا سوو شي انا آخر من يعلم و اذا سولفو بسالفه وجيت بوسطها غيروها
يحسبوني ما احس ولا انتبه إلا احس وانتبه
ساره الي كانت تبغاها تقول الي بخاطرها وما تبغى تقاطعها : إي ؟
ميلاف فجأه انهارت بحضنها تبكي بصوت متقطع : اوقات اكرههم ي خاله ..م ..حد نفس جوي فيهن احس اني اكبر وحده فيهم انا ما ادري المشكله فيني ولا فيهن حتى خواتي مافكرو يقعدون معي لما راحو
ساره وهي تمسح على راسها بحنيه ميلاف تذكرها كثيير بطفولتها خصوصا مع اهلها : افاا يا ميلافوه
كيف تكرهين اهلك تسذا هذول اهلك سندك
ميلاف وراسها مغطوس بحضن ساره : ادريي
ساره وهي تمسح على راسها: انتي شخصيتك عاقلله ورزينه وحلوه مالك ومال سماجتهن وتفهاتهن -وشدت شعرها على خفيف بمزح - وليش تقولين محد نفس جوي عانيني ماني نفس جوك واقرا رواياتك وكتبك واسولف معتس امداك جحدتيني يالجحود؟
ميلاف رفعت راسها ووجها احمر : بالعكس ماجحدتس يخالتي بس حلو الواحد يكون عنده اصدقاء وناس كثير نفس اهتمامته ونفس جوه بعمره
ساره رفعت حاجبها : وش قصدتس يعني انا عجوز ؟
ميلاف ابتسمت غصب عنها : لا والله انا العجوز
عند الرجال ..
دخل بو فلك وبو حارب ووسطهم بو مصلح يعاونوه بالمشي ورجله ملفوفه بشاش
فز الجد : يالله حيه .. سلامات وش قالو
بو فلك بدون مايحس: رضه خفيفه بس هو يحب يتدلع
بو مصلح بصدمه : هاهه؟
بو حارب بترقيع: يقصد رضه خفيفه بس عشان بو مصلح رجالٍ اجودي بيتشافى منها بسرعه ان شاءالله
نواف : خطاك السو ماتشوف شر
بو مصلح جلس ورجله الملفوفه مادها : الشر مايجيك الا وين ذاك الي برك على رجلي
بو فلك : يرجال الولد قالك بالغلط مهوب قاصد
بو مصلح : استغفرالله بس
عند البنات ..
شموخ ومعها سطل المويا : يمه وين اجدد المويا
مريم : كبيها بالحوش مع الباب الخلفي
راحت شموخ ركض للباب الخلفي وبسرعه فتحت الباب وكبت المويا والا يطلع عبدالله جاي بنفس الوقت
عبدالله وثوبه مليان مويا : وجع ! انتي
شموخ بورطه : انت !
وبسرعه رمت السطل على عبدالله وسكرت الباب
عبدالله بألم : آخ بس يارب تعبت منكم اول فراس هاللحين انتي .. اسمعيني دقيقه شموخ
شموخ من ورا الباب : هاه .. كيف عرفت اسمي
عبدالله : بلا غباء اكيد بعرفك الا بقولك بعدي عن منصور هاللحين حاولي ماتجين صوبه لين يركد لانه مشتط واجد اذا تبين سلامتتس يعني ولا تخافين انا بتصرف معه
شموخ : طيب ومين قالك اني خايفه قلت لك عبدالله تكفى ساعدني ولاوش !
عبدالله: ياصبر الارض على ذي البنت اذا تبغينه يخنقتس ماعندي مانع ترا بس انا حذرتس
شموخ بقلة حيلة : يصير خير
عبدالله : ولو سمحتي جيبي لي ثوب وبعدين وش هالقرف الي راميته علي
شموخ بضحكه : هذي موية الغسيل كنت امسح الارض
عبدالله : استغفرالله العظيم قومي جيبي لي ثوب بسرعه
شموخ : خدامه عندك
عبدالله : نادي لي خواتي لابارك الله بعدوتس
شموخ : طيب اصبر .. يااارتيلل ..ياترف
جات رتيل : وش عندتس
شموخ وهي طالعه : شوفي اخوتس وش يبغى
رتيل : يعني مناديتني من آخر الدنيا عشان تسذا وش بيضرتس لو قلتي وش يبغى
شموخ : مااالي دخل
رتيل : هاه وش عندك
عبدالله : جيبي لي ثوب المخنزه هذي شوفي وش كبت علي ريحتي ديتول وامسكي السطل لاهبدها فيه هاللحين
رتيل : طيب
عند الرجال
بو نواف قام : عاد احنا نستأذنكم الديار تطلب اهلها وماقصرتم يالأجاويد ..و خطاك السو يبو مصلح
بو خالد : يرجال بدري
بو نواف :لا والله ماتقصرون ..وانت يافراس ازهل موضوعك عندي انت واخوياك بس اعطوني ملفاتكم ومن الاسبوع الجاي بتداومون
بو مصلح بلقافه : وشهو موضوعهم
فراس فز بخرعة لاينتشر الخبر : نسييتتهه مااش شيي والله
نواف يحاول يفزع لفراس : اءء نياقق ..اي صح نيااق فراس يبغى ناقه من عندي
بو مصلح بشك : من متى يبي نياق هو حلال ابوه مارعاه حتى ..ووش دخل اخوياه
حارب دق على نواف بنفس اللحظه
نواف وهو طالع : عندي مكالمة مهمةة
فراس شرد : بروح دورة المياة بطني لاعبتن فيني
وتقابلو بالحوش
فراس بضحكه: تسلم عالترقيعه ذي
نواف : معليك واجبي اصلا يسموني نواف للمهمات الصعبة .. الا لاهنت ازهم لي اختي من عندهم - ورفع جواله - ماترد علي
فراس : ابشر
عند البنات
فراس من عند الباب : ياااوووللد
المها فزت بخرعه : وش اسوي وش اسوي
فلك مسكتها : انثبري هنيا فراس مابيدرعم تسذا
جته غزلان ركض : علامك
فراس : ازهمو اخت نواف ابوها برا بالسيارة
غزلان : تمام .. مهاوي حبيبتي
المها : هلا ياخالة
غزلان : اجهزي ابوتس برا بتروحون
فزو البنات بخرعة : لااا
المها : لاياربي مابغى اروح
ملاك : خليتس هنا بس يوم ثاني
المها : مقدرر ابوي عنده دوام
ببكي مابغى اروح
ترف حضنتها : بنفقدتس ..الوداع
المها : تكفون لاتقولون كذا بجيكم مرة ثانية اكييدد
فلك متربعه تتفرج بالمنظر : يوه عاد انا متعوده هناك متى مابغيت جيتس
شموخ : ياربي يزعل
ام فلك جات : مهاوي سلمي لي على امتس
المها : يوصل ان شاءالله
ام فلك : اعرفك بتنسين
المها وهي تلبس عبايتها وعيونها مليانه دموع: لامعليتس ثقي فيني ياخاله بقول لنواف يذكرني اصلا .. بنات عادي نبكي سوا لاتخلوني
ريما: للاسف دموعي مستهلكه لها فترة مب راضيه تبلدت من البلاوي الي تجيني
المها راحت تسلم على يد وراس الجدات : يلا مع السلامةة بجيكم مرا ثانية صدقوننيي
ام خالد : قولي ان شاءالله يابنيتي
عند الباب
المها : ياويل حالي انا من وين جيت وين شاص نواف .. يمااه بسم الله - الا فجأه طاحت -
فراس الي كان صاد عن الباب عشان تطلع بس لف من صوتها : يوه بسم الله علامك انتي عميا ماتشوفين الحصى هلا كبرها قدامتس
المها بألم وهي طايحه وعبايتها مليانه : مالك دخل كله منك ياراعي الرشاش
فراس بإستغراب : راعي الرشاش؟
المها : ايه راعي الرشاش مهوب انت الي اول ما جينا دبلت تسبدي برشاشك ذا ترا درينا عندك رشاش
فراس : قومي قومي بس الظاهر ماتعرفين سلومنا وعوايدنا وروحي لأخوتس يتحراك هناك
المها وهي تحاول تقوم : طيب اصبر
فراس: هيه انتي لايكون رجلتس ملتويه ولاشي انادي اخوتس؟
المها قامت وعبايتها كلها غبار : لا شايفني مشلولة
فراس بضحكة : على فكرة ترا عباتتس زود ما انها مغبره مقلوبه
المها قامت تتلفت لعبايتها : هااه ..اءء مالك دخل اصلا موديلها تسذا وش عرفك يالبدوي قم انقلع ووين سيارة اخوي؟
فراس : الله يخلف عليتس بس ..هناك سيارتكم وانتبهي ياكثر الحصى الموجود محد فايق لتس
عند البنات
دق جوال ريما
ام نوال : منهو
ريما هزت كتفها بعدم معرفة : مدري رقم غريب بس برد
ام نوال: عسى خير بس
ريما : الو .. مين معاي؟هاه عمي سند ! .. وين هالغيبة بتجي عندنا ؟..حياك الله .. ذحين ! كان علمتنا من بدري الله يهديك ووش صار على رقمك القديم؟ .. لاياشيخ خرب وتوك تفكر تدق علي ..خلاص تمام واسمع ياعم .. اياني واياك يجون بقية عماني خصوصا الي يسمى أيهم دبل كبدي بولده ذا يبغاني اخذه انا حذرتك وانا قد كلامي ! ماني ناقصة بلاوي ومشاكل .. خلاص تمام ابشر
وقفلت المكالمه
الجده ام نوال : سند بيجي
ريما : ايه
الجده: حياه الله بروح نجهز المجلس له بيبات عندنا ؟
ريما: والله مدري عنه بس قال بيجي ذحين مسافة الطريق وهو عندنا المفروض يقولنا من بدري
الجده : اجل بنروح البيت نرتب
ريما: يلا
الجده ام خالد : ابك خذي البنيات معكم يساعدونكم عالسريع
فلك شمرت اكمامها : احتزمي بي يا صيتة
الجده ام خالد شهقت : ياقليلة الادب وشهو صيتة خويتتس انا
فلك باست راسها : نمون عليتس ياصيوت .. يلا قدامي ملاك رتيل إيلاف الباقيات تعبانات ما يقدرون يجون
الجده ام نوال وهي تلبس برقعها : يلا يلا
فالحوش كانو البنات خارجين من الباب الخلفي ووراهم الجده ام نوال قابلهم فراس بس ما انتبه لها
فراس : ماتتبون انتن خاافو الله
ريما : معليك والله رايحين بيتنا صدقني
فراس : انتي اخر من يتكلم يا ام لسان
ريما بهمس : اخ حسبيا الله عليه فشلني
فلك : رح شف جدتي ورا جايه معنا بس مدري وش قومها بطيئة تسذا
فراس : خلاص انا بروح اشوف امي وانتن انقلعو تطمنت دام معكم احد خفت تنحاشون ومعد ترجعون
ملاك : يا حرام اخوي بيفقدني اذا انحشت صدق
فراس : اكيد بفقدتس وشذا السؤال وبعدين مين بحارش وأزعج فالبيت غيرتس سارة بتطردني اكيد
ملاك سوت كذا 👏🏻👐🏻: هه على حظي الاقشر وشذا الاخ - كيف الوصف بالله ههههههه-
فراس : وين شموخ
رتيل : عند امها
فراس : كانت بتجي معكم ؟
فلك : لا معليك مافحيلها تتحرك
فراس : متأكده
فلك : اي معليك
فراس : اجل خلاص ضفو وجيهكن
ريما : ياساتر جدتي ماوصلت لسى
فراس راح لها ركض: كيف حالتس ياجده
الجده ام نوال : بخير الحمدلله كيف حالك انت
فراس : الحمدلله الا اقول لتس
ام نوال : سم
فراس : ياجده لازم تفعلين خاصية التيربو عندتس ههههههههههههههههههههههههههههههههههه
ام نوال بإستغراب : هاه وشهو تربو ذا
فراس بضحكة : تيربو ياجده اسمه لازم تسرعين شوي
ام نوال: وليش اسرع ان شاءالله بيتي بيطير يعني قم قم عن وجهي انت بتأخرني
فراس : افا اقوى جحده ليش مستعجله ياجده
ام نوال وهي تحاول تسرع بخطواتها : سند عم ريما بيجي
فراس بانت بملامحه الجديه : وبقيتهم ؟؟
ام نوال بإستغراب :منهم
فراس : اعمام ريما وايهم ذا لا يكون بيخطبونها مرةٍ ثانية
ام نوال : والله مدري يوليدي بس بنشوف عسى خير بس ومعليك ترا سند بين فترة وفترة يزورنا بس هالمرة ابطى
فراس بعدم راحه : زين ان شاءالله واذا بغيتو شي انتي ولاريما تراي بالخدمة ياجده
ام نوال : جزاك الله خير يوليدي بس هاللحين رح رح عن وجهي
فراس بطقطقه دق لها تحية : سمعًا وطاعه ياجده اوامر اخرى
ام نوال : لاء بس روح
سيارة نواف
المها : يببااه
بو نواف بنفس النبرة : نعااام
المها : يبه تكفى بنروح لهم مرةٍ ثانية احس ماشبعت بالله
بو نواف : ان شاءالله يايبه بس مو هاللحين
نواف : يابنت الحلال مايصير كل ماتعرفتي على احد نشبتي بحلقه
المها : مالك دخل والله كان فله فاتتك
نواف وهو يسوق : وشهو الي فاتني تحسبيني بنت ترا حتى احنا فليناها واستانسنا .. الا قولي لي كيف تجرأتي وانحشتي معاهن يالداشره
بو نواف : الي مطمني ان القبيلة منحاشه معتس مو بس لحالك اشوا
المها : والله فلة فاتتكم المضاربة والله وحده اسمها سلوى كريهه مرا
نواف : وانتي شدخلتس تكرهينها
المها : مدري بس شفتهم يكرهونها المهم والله صارت مضاربه حرييقةة ضرب وتمعيط شوش حتى تخيل يبه
بو نواف : وشو
المها : فلك بنت عمي عزام طبت وسط الميدان ومحطتها تمحيط
بو نواف : اييه بنت عزام ذيبة ماعليها خوف
نواف اشر لحاجبه : شفت كيف يبه هذي بنت عزام بغت تفقع عيني .. ذحين لو فقعتها منجد بتسامحها
بو نواف : طبعا بسامحها تفداها انت بكبرك
نواف بأهتمام : اخ ياربي .. ايه كملي ووش بعد
المها : بس وربي ونااسة بروح اقول لأمي كلشي صار
يتبع ..
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
